1. “Ombili yaKalunga” oshike, nuuwanawa wuni hatu mono uuna tu yi na? (Aafilippi 4:6, 7)

 OPU na ombili ndjoka aantu yomuuyuni kaaye shi nando osha kombinga yayo. Ombili ndjoka “ombili yaKalunga,” ano engungumano ndyoka hali zi mokukala omuntu e na ekwatathano lyopothingo naTate yetu gwomegulu. Uuna tu na ombili yaKalunga, ohatu kala tu uvite twa gamenwa. (Lesha Aafilippi 4:6, 7.) Ohatu kala tu na ekwatathano lyopothingo nayalwe mboka ye mu hole. Ohatu kala wo tu na ekwatathano lyopothingo “naKalunga kombili.” (1 Tes. 5:23) Uuna tu shi, twa inekela nohatu vulika kuTate gwetu, ombili yaKalunga ohayi vulu oku tu ngungumaneka, uuna tu li monkalo ondhigu.

2. Omolwashike tatu vulu okukala tu na uushili kutya otatu vulu okukala tu na ombili yaKalunga?

² Mbela otashi vulika ngaa tu kale tu na ombili yaKalunga, uuna pwa tukuluka omukithi, oshiponga, omakuyunguto, okumangwa po nenge omapataneko? Omaupyakadhi agehe ngono ga kwata miiti otaga vulu oku tu etela uumbanda. Ihe Jesus okwa li a ladhipike aalanduli ye a ti: “Oomwenyo dheni inadhi ziyalala, ne inamu tila.” (Joh 14:27) Shinyanyudha, aamwatate naamwameme oya landula omayele gaJesus. Kekwatho lyaJehova, oya vulu okukala ye na ombili, nonando oya li taya ungaunga nomaupyakadhi ga kwata miiti.

3. Omukithi gwekomba otashi vulika ngiini gu piyaganeke ombili yoye?

³ Omukithi gwekomba otagu vulu okutukuka moshitopolwa nenge muuyuni nohagu lundulula meendelelo onkalamwenyo. Dhiladhila ashike kiilanduliko oyindji mbyoka ye etithwa komukithi gwo-COVID-19. Ekonakono limwe, olya ti etata lyaantu oyendji, olya li lya lopotwa ihaali kotha nawa pethimbo lyomukithi ngoka gwekomba. Etukuko lyomukithi olye etela aantu omaipulo, ethindakano  lyopamadhiladhilo, elongithonayi lyiikolitha niingangamithi, omahepekathano gomomagumbo nosho wo oonkambadhala dhokwiidhipaga. Ngele omukithi gwontumba ogwa tukuka moshitopolwa sheni, ongiini to vulu okukala kuu na oshimpwiyu sha pitilila nowu kale wu na ombili yaKalunga?

4. Omolwashike okutseya ehunganeko lyaJesus kombinga yomasiku gahugunina hali tu etele ombili?

⁴ Jesus okwa li a hunganeke kutya momasiku gahugunina, otaku ka kala omikithi dhomalega, nenge ndhoka hadhi taandele “koombinga noombinga.” (Luk. 21:11) Okukala tu shi oshinima shono ohaku tu etele ngiini ombili? Inatu kumwa sho tu wete etukuko lyomikithi. Otu wete iiningwanima mbyoka tayi ningwa ngashingeyi kutya oyo Jesus a li a popi kutya otayi ka ningwa. Onkee, otu na etompelo ewanawa lyokulandula omayele gaJesus, ngoka a li a pe mboka ye li ko pethimbo lyehulilo a ti: “Inamu tulwa uumbanda.” — Mat. 24:6.

5. (a) Metsokumwe nAafilippi 4:8, 9, oshike tu na okugalikana kombinga yasho uuna pwa tukuluka omukithi gwontumba? (b) Okupulakena kOmbiimbeli ya kwatwa mewi ohashi tu etele ngiini uuwanawa?

⁵ Uuna pwa tukuluka omukithi gwontumba, ohashi kala oshipu kutse tu tameke okukala twa limbililwa unene nenge twa tila. Shoka osho sha li sha ningilwa omumwameme Desi. b Konima sho hekulu, omumwayinagona nandohotola gwe ayehe ya si ko-COVID-19, okwa li a tila kutya naye ota kwatwa komukithi ngoka e te gu taambekidha kuyina ngoka a kulupa. Omukithi ngono ogwa li wo gwe mu ningitha a kale a tila kutya ota kanitha iilonga ye. Onkee okwa li a limbililwa kutya ngele ota ka vula ngaa okulanda iikulya nokufutila egumbo moka a li ha zi. Omalimbililo ngoka oge mu ningitha kaa kothe uusiku. Ihe Desi okwa tameke ishewe e na ombili. Oshike she mu kwathele? Okwa galikana kuJehova kondandalunde e mu kwathele a kale a ngungumana, noku dhiladhile iinima mbyoka iiwanawa. (Lesha Aafilippi 4:8, 9.) Okwa pulakene kuJehova ta popi naye okupitila mOmbiimbeli ya kwatwa mewi. Okwa ti, “ Ewi lyomuleshi tali hekeleke moshikwamawi shoka, olya ngungumaneke ndje nolya dhimbulukitha ndje kutya Jehova oku na ko nasha nangame.” — Eps. 94:19.

6. Ongiini okuninga ekonakono lyopaumwene nokugongala tayi vulu oku ku kwathela?

⁶ Pethimbo lyetukuko lyomukithi, ihashi kala aluhe oshipu okuninga iinima ayihe mbyoka twa li hatu ningi nale, ihe ino etha nando osha shi ye moshipala okuninga ekonakono lyoye lyopaumwene nenge okuya kokugongala. Iimoniwa mbyoka tayi adhika miileshomwa yetu nomuuvidio, otayi ku dhimbulukitha kutya aamwaho naamwanyoko otaya tsikile okulongela Jehova nuudhiginini, nonando oye na omashongo ga fa goye. (1 Pet. 5:9) Okugongala otaku ku kwathele wu dhiladhile kiinima iiwanawa yomOmbiimbeli. Okugongala ohaku ku pe wo ompito yokutsa yalwe omukumo nokutsuwa kuyalwe omukumo.  (Rom. 1:11, 12) Sho to dhiladhila nkene Jehova ha yambidhidha aapiya ye, uuna taye ehama, ya tila nenge yu uvite uuwike, eitaalo lyoye otali kolo noto kala wu na uushili kutya Jehova ote ku kwathele wo nangoye.

7. Oshiilongomwa shini tatu ilongo komuyapostoli Johannes?

⁷ Ninga oonkambadhala wu kale ho popi naamwatate naamwameme. Uuna pwa tukuka omukithi, otashi vulika tu kale twa pumbwa okwiikala kokule nokuli nooitaali ooyakwetu. Pethimbo ndyoka otashi vulika wu kale wu uvite ngaashi omuyapostoli Johannes. Okwa li a hala okumona kuume ke Gaius nokupopya naye okana nokana. (3 Joh. 13, 14) Ihe Johannes okwa li a mono kutya ita vulu okumona Gaius, uule wethimbo lyontumba. Onkee Johannes okwa li a ningi ngaashi ta vulu a nyolele Gaius ontumwafo. Ngele nangoye ito vulu okutalela po aamwatate naamwameme, kambadhala okukwatathana nayo pangodhi, oku ya dhengela pavidio nenge oku ya tumina omatumwalaka. Uuna wa kala ho kwatathana nAakriste ooyakweni, oto ka kala wu uvite wa gamenwa nowu na ombili. Kala wo ho kwatathana naakuluntugongalo uuna wu uvite wu na iimpwiyu, nokutaamba ko etsomukumo lyawo lyopahole. — Jes. 32:1, 2.

8. Oshiponga shontumba otashi vulu ngiini okuyona po ombili yoye?

⁸ Ngele owa adhikile nale kefundja, kekakamo lyevi nenge komulilo, otashi vulika wa li wu na omaipulo ogendji uule wethimbo konima yoshiponga shoka, sho sha hulu po. Ngele owa silwa omuntu gwaandjeni nenge iinima yoye ya hanagulwa po, otashi vulika wa li wa nika oluhodhi, wa kanitha etegameno nokuli nowa geya. Ihe shoka itashi ti kutya owu hole omaliko nenge kutya ku na eitaalo. Owa pita monkalo ondhigu, nayamwe otashi vulika ya kale ya tegelela wu inyenge momukalo omwiinayi. (Job 1:11) Ihe nonando owu kale moonkalo tadhi yemateke noonkondo, oto vulu okukala wu na ombili. Ngiini mbela?

9. Jesus okwa popi shike, opo e tu longekidhe sho tatu ka adhika kiiponga?

⁹ Dhimbulukwa shoka Jesus a hunganeka. Aantu yamwe ohaya dhiladhila kutya kaye na esiku ya ka adhike koshiponga, ihe tse otu shi kutya iiponga otayi ki indjipala pethimbo lyetu notu shi kutya yimwe otayi ke tu adha. Jesus okwa lombwela aalanduli ye a ti, otaku ke ya “omakakamo gevi omatilithi” nosho wo iiponga yilwe manga ehulilo inaali ya. (Luk. 21:11) Jesus okwa li a hunganeke wo kutya “uulunde otau ka lunda pombanda,” shono shi iwetikile momiyonena, omahepeko nosho wo omaponokelo gopaukulo. (Mat. 24:12) Jesus ina popya kutya iiponga mbyoka otayi ka adha owala mboka yi idhimbika Jehova. Ihe naapiya oyendji yaJehova aadhiginini oya adhika kiiponga mbyoka. (Jes. 57:1; 2 Kor. 11:25) Jehova otashi vulika kee tu gamene pashikumithalonga kiiponga ayihe mbyoka, ihe ote ke tu pa shoka twa pumbwa tu tsikile okukala twa ngungumana.

10. Omolwashike okwiilongekidhila oshiponga shontumba ngashingeyi, ku li euliko kutya otu na eitaalo? (Omayeletumbulo 22:3)

¹⁰ Otatu ke shi mona oshipu okukala twa ngungumana, uuna pwa holoka oshiponga shontumba, ngele otwe shi ilongekidhila kuyele. Ihe mbela shono osha hala kutya katu na eitaalo muJehova? Aawe. Nokuli, okwiilongekidhila oshiponga shontumba, otaku ulike kutya otu na eitaalo note tu sile oshimpwiyu. Ngiini mbela? Oohapu dhaKalunga otadhi tu pe omayele tu ilongekidhile iiponga mbyoka tayi vulu okuholoka po. (Lesha Omayeletumbulo 22:3.) Shimwe ishewe, okupitila miileshomwa yetu, mokugongala kwegongalo nomomatseyitho ge li pethimbo, ehangano lyaKalunga olya kala noku tu ladhipika tu ilongekidhile iiponga. c Mbela otwa inekela ngaa Jehova? Ngele osho, otatu ka landula omayele ngoka ngashingeyi, manga oshiponga shontumba inaashi holoka.

11. Oshike tatu ilongo koshiholelwa shaMargaret?

 ¹¹ Natu ka taleni koshimoniwa shomumwameme gwedhina Margaret. Okwa li a lombwelwa komunambelewa, a thige po egumbo lye, omolwomulilo ngoka gwa tukuluka moshitopolwa shawo. Molwaashoka aantu oya li taya kambadhala okuza mo moshitopolwa shoka pethimbo limwe, ondjila oya li yu udha oohauto, nokapwa li ngoka ta vulu okwiinyenga. Mombepo omwa li mu na olwithi oluluudhe naMargaret ka li ta vulu okuza mo mohauto ye. Ihe okwa hupu, molwaashoka okwa li i ilongekidha. Mokandjato ke kopeke, omwa li mu na okaalita hoka a li ta vulu okutala, opo a vule okumona ondjila yimwe ndjoka ta vulu okuya nayo a ze mo moshitopolwa shoka. Ondjila ndjono okwa li nokuli e yi enda nale nosha li she shi ningitha oshipu kuye, opo a vule okuza mo moshitopolwa shoka uuna pwa holoka oshiponga. Molwaashoka Margaret okwa li i ilongekidha, okwa li a hupu moshiponga shoka.

12. Omolwashike hatu landula omalombwelo ngono hatu pewa goku tu kaleka twa gamenwa?

¹² Opo aakwanambelewa ye tu kaleke twa gamenwa nosho wo yalwe, ohashi vulika ye tu pule, tu vulike kokangendjo kontumba, tu tembuke mo mehala lyontumba nenge tu landule omalombwelo galwe. Ihe aantu yamwe ohaye ende kashona, okuvulika komalombwelo ngoka, nenge kaaya vulike kugo, molwaashoka inaya hala okuthiga po iinima yawo. Mbela Aakriste ohayi inyenge ngiini? Ombiimbeli otayi ti: “OmolwOmuwa vulikeni kepangelo kehe lyokombanda yevi: Komupangeli, ngoka e li kombanda yaayehe, nokaaleli mboka ye li kohi yepangelo lye, oomboka ya tumwa. (1 Pet. 2:13, 14) Ehangano lyaKalunga ohali tu pe wo omalombwelo, lyi tu kaleke twa gamenwa. Ohatu dhimbulukithwa pandjigilile tu pe aakuluntugongalo uuyelele, hoka taya vulu okukwatathana natse, uuna pwa holoka oshiponga ombaadhilila. Mbela owa gandja ngaa uuyelele woye? Ohashi vulika wo tu pewe omalombwelo kombinga yokukala mehala limwe, yokutembuka nowankene tu na okumona iikwatha nenge kombinga yankene nuunake tu na okukwathela yalwe. Ngele ohatu ndopa okuvulika komalombwelo ngono, otatu ka tula oomwenyo dhetu nodhaakuluntugongalo moshiponga. Dhimbulukwa kutya aalumentu mboka aadhiginini ohaye tu tonatele. (Heb. 13:17) Margaret okwa ti: “Ondi itaala lela kutya sho nda landula omalombwelo gaakuluntugongalo nogehangano, osha hupitha omwenyo gwandje.”

13. Oshike she etele Aakriste oyendji mboka ya thiga po omagumbo gawo enyanyu nombili?

¹³ Aamwatate naamwameme oyendji mboka ya li ya thiga po omagumbo gawo omolwoshiponga,  iita nenge omakuyunguto noya ninga ngaashi taya vulu, opo yi igilile omukalo omupe nokulonga oshindji mokulongela Jehova. Ngaashi Aakriste yonale, mboka ya li ya halakanithwa omolwomahepeko, oya tsikile ‘okuuvitha Oohapu dhaKalunga.’ (Iil. 8:4) Okuuvitha ohaku ya kwathele ya gandje eitulomo kUukwaniilwa, pehala lyokugandja eitulomo koonkalo oondhigu. Oshizemo, oya li ya vulu okukala ye na enyanyu nombili.

14. Omahepeko otaga vulu ngiini okuyona po ombili yetu?

¹⁴ Omahepeko otaga vulu oku tu yuga iinima oyindji, mbyoka hayi tu kwathele tu kale tu na ombili. Ohatu kala twa nyanyukwa notwa gwanenwa, uuna twa gongala pamwe naamwatate, tatu uvitha twa manguluka nokuninga iinima yetu yesiku kehe, nopwaa na uumbanda kutya otatu kwatwa po. Ngele otwa kala itaatu vulu okuninga iinima mbyoka, otashi vulika tu tameke okukala tu na iimpwiyu notwa tila kutya oshike tashi ke tu ningilwa. Inashi puka okukala tu uvite ngaaka. Ihe otu na okukala twa kotoka. Jesus okwa li e shi ulike kutya omahepeko otaga vulu okupundukitha aalanduli ye. (Joh. 16:1, 2) Ihe mbela ongiini tatu vulu okukaleka po ombili yetu pethimbo tatu hepekwa?

15. Omolwashike kaatu na okutila omahepeko? (Johannes 15:20; 16:33)

¹⁵ Oohapu dhaKalunga otadhi tu lombwele tadhi ti: “Ayehe mboka ya hala okulongela Kalunga nesimaneko muukumwe naKristus Jesus, otaa ka tidhaganwa.” (2 Tim. 3:12) Omumwatate Andrei okwa li a mono oshidhigu okutaamba ko oshinima shoka konima, sho iilonga yetu yokuuvitha ya li yi indikwa moshilongo shawo. Okwa ti: ‘Moshilongo muno omu na Oonzapo odhindji mu. Aakwanambelewa otaya vulu ngaa oku tu kwata po atuhe?’ Ihe pehala oshinima shono shi etele Andrei ombili, oshe mu ningitha owala a kale ti ipula aluhe. Aamwatate yalwe oye ethele oshizemo shoka miikaha yaJehova, nokaya li ya dhiladhila kutya itaya ka kwatwa po. Oya li ye shi kutya otashi vulika ya ka kwatwe po, ihe kaya li unene ye na omaipulo ngaashi Andrei. Onkee okwa tokola okutaamba ko, etaloko lyawo nokwi inekele muJehova. Nziya Andrei okwa li u uvite ombili. Natse osho tatu vulu okukala ngaaka. Nonando Jesus okwe tu lombwela kutya otatu ka hepekwa, okwe tu shilipaleka wo kutya otatu vulu okukala aadhiginini.  — Lesha Johannes 15:20; 16:33.   

16. Ewiliko lini tu na okuvulika kulyo, uuna tatu hepekwa?

 ¹⁶ Uuna iilonga yetu yi indikwa nenge ya ngambekwa unene, otashi vulika tu pewe omalombwelo taga zi koshitayimbelewa nosho wo kaakuluntugongalo. Aakuluntugongalo ohaye tu gamene, ohaya shilipaleke kutya otwa mona iikulya yopambepo noku tu kwathela tu tsikile okuuvitha ngaashi tashi vulika. Ninga ngaashi to vulu wu vulike kewiliko ndyoka to pewa, nonando ku lyu uvite ko naanaa, kutya omolwashike lya gandjwa. (Jak. 3:17) Shimwe ishewe, ino gandja uuyelele kombinga yaamwatate naamwameme nenge kombinga yiilonga yomegongalo kwaamboka inaaya pumbwa oku wu tseya. — Omuuv. 3:7.

17. Ngaashi aayapostoli yomethelemumvo lyotango, otwa tokola toko okuninga shike?

¹⁷ Etompelo limwe kutya omolwashike Satana ha kondjitha oshigwana shaKalunga, olyo kutya ohashi “dhiginine oshili ndjoka ya hololwa kuJesus.” (Eh. 12:17) Onkee ino etha Satana nuuyuni we ye ku tilithe. Okuuvitha nokulonga aantu Oohapu dhaKalunga nonando otatu patanekwa, ohashi tu etele enyanyu nombili. Methelemumvo lyotango, sho aapangeli Aajuda ya li ya lombwele aayapostoli ye ethe po okuuvitha, aalumentu mboka aadhiginini oya hogolola okuvulika kuKalunga. Oya tsikile okuuvitha, niilonga mbyoka oya li ye ya etele enyanyu. (Iil. 5:27-29, 41, 42) Odhoshili kutya uuna iilonga yetu ya ngambekwa, otu na okukala twa kotoka sho tatu uvitha. (Mat. 10:16) Ihe ngele otwa ningi ngaashi tatu vulu, otatu ka kala tu na ombili ndjoka hayi zi mokunyanyudha Jehova, nomokulombwela yalwe etumwalaka ndyoka tali hupitha oomwenyo.

18. Oshike tu na okudhimbulukwa kombinga yonzo yombili ndjoka twa pumbwa?

¹⁸ Kala wu na omukumo kutya, nonando otu li moonkalo oondhigu, otatu vulu okukala tu na ombili. Pomathimbo ngono, otu na okudhimbulukwa kutya ombili ndjoka twa pumbwa, ombili yaKalunga, ano ombili ndjoka Jehova, oye awike ta vulu oku yi gandja. Mu inekela uuna pwa tukuka omukithi, oshiponga nenge omahepeko. Kala popepi nehangano lye. Kala wo wa tala konakuyiwa ombwanawa ndjoka yi li komeho. Ngele owa ningi ngawo, ‘Kalunga kombili ota kala pamwe nangoye.’ (Fil. 4:9) Moshitopolwa tashi landula ko, otatu ka kundathana nkene tatu vulu okukwathela ooitaali ooyakwetu mboka ye li momaudhigu ya vule okukala ye na ombili yaKalunga.