Owi ilongekidhila ngaa oku “ka thigulula evi”?
ATUHENI otwa tegelela nondjuulukwe euvaneko lyaJesus li ka gwanithe po, ndyoka tali ti: “Aanelago oomboka aayifupipiki, oshoka oyo taa ka thigulula evi.” (Mat. 5:5) Aagwayekwa otaya ka thigulula evi, sho taya ka ninga aakwaniilwa nokupangela pamwe naJesus megulu. (Eh. 5:10; 20:6) Ihe Aakriste oyendji kunena, oya tegelela oku ka thigulula evi noku ka kala ko sigo aluhe ya gwanenena, ye na ombili noya nyanyukwa. Ihe opo shoka shi ka ningwe, otaya ka longa iilonga ya simana. Pashiholelwa, otaya ka kwathela mokuninga evi oparadisa, otaya ka shilipaleka kutya aantu mboka ya yumudhwa oye na shoka ya pumbwa, notaya ke ya longa kombinga yaJehova. Dhiladhila wo kwaashoka tatu vulu okuningeni ngashingeyi, tu ulike kutya otwa hala oku ka ninga iinima mbyoka muuyuni uupe.
MBELA OWI ILONGEKIDHA NGAA OKU KA NINGA EVI OPARADISA?
Sho Jehova a li a lombwele aantu kutya ‘nayu udhithe evi alihe nokuli tula mepangelo lyawo,’ okwa li tu ulike kutya evi alihe, olya li tali ka ninga oparadisa. (Gen. 1:28) Mboka taya ka kala nomwenyo sigo aluhe kombanda yevi, otaya ka vulika koshipango shoka. Evi itali ka thikila lya ninga oparadisa, molwaashoka oshikunino shaEden kashi ko we. Konima yaArmagedon, otatu ka kala tu na iilonga oyindji yokwoopaleka evi ndyoka lya yonagulwa. Shoka otashi ka kala oshilonga oshinene!
Oshinima shoka otashi tu dhimbulukitha iilonga mbyoka Aaisraeli ya li ye na okulonga sho ya shuna koshilongo shawo okuza kuBabilon. Mevi lyawo omwa li mwa kala kaamu na aantu omimvo 70. Ihe Jesaja okwa li a hunganeke kutya otaya ka vula okutungulula evi lyawo. Ehunganeko olya ti: “Ombuga yasho otii yi shitukitha Eden, nomaputu gasho otii ga shitukitha oshikunino shOmuwa.” (Jes. 51:3) Jehova okwa li a kwathele Aaisraeli ya tungulule evi lyawo. Sha faathana, kekwatho lyaJehova, mboka taya ka thigulula evi nayo otaya ka vula oku li ninga oparadisa ombwanawa. Nangoye ngashingeyi oto vulu okuulika kutya owa hala oku ka kutha ombinga miilonga mbyoka.
Omukalo gumwe, omo ku ninga ngaashi to vulu wu kaleke egumbo lyoye nomudhingoloko gwoye gwa yela nogu li melandulathano. Oto vulu oku shi ninga, nonando aashinda yoye ihaye shi ningi. Oto vulu wo okukwathela nokukaleka monkalo ombwanawa Oshinyanga shUukwaniilwa nOshiigongi shomoshitopolwa sheni. Ngele onkalo yoye otayi ku pitike, oto vulu wo wi iyambe wu kwathele mokugandja iikwatha. Shono otashi ku ulika kutya owa hala okukwathela aamwaho naamwanyoko, uuna ye na ompumbwe. Ipula ngeyi, ‘Mbela itandi vulu okwiilonga uunkulungu wontumba mboka tandi vulu oku ka longitha, ngele Jehova okwa pitike ndje ndi ka kale nomwenyo sigo aluhe kombanda yevi?’
MBELA OWI ILONGEKIDHA NGAA OKU KA KWATHELA MBOKA TAYA KA YUMUDHWA?
Nziya konima sho Jesus a yumudha okamwanakadhona kaJairus, okwa lombwele aantu ye ka pe okulya. (Mark. 5:42, 43) Otashi vulika kaasha li oshidhigu okusila oshimpwiyu okakadhona hoka komimvo 12. Ihe dhiladhila owala kiilonga mbyoka tatu ka longa, sho Jesus ta ka gwanitha po euvaneko lye ndyoka tali ti kutya “ayehe mboka ye li moombila, [otaa] ka uva ewi lye. Yo notaa ka za mo moombila dhawo.” (Joh. 5:28, 29) Nonando Ombiimbeli inayi tu lombwela oshindji kombinga yaashoka, otatu vulu okuthika pehulithodhiladhilo kutya mboka taya ka yumudhwa otaya ka pumbwa iikulya, ehala lyokukala nosho wo oonguwo. Mbela ito vulu okuulika ngashingeyi kutya owa hala oku ke ya kwathela? Natu taleni kiinima yimwe mbyoka to vulu okuninga.
Oshike to vulu okuninga ngashingeyi wu ulike kutya owi ilongekidha oku ka thigulula evi?
Uuna pwa ningwa etseyitho kutya omutonatelishikandjo oteya a talele po egongalo lyeni, mbela oho mu hiya ngaa mu lye pamwe? Uuna mboka ya li haya longo moBetel ya tuminwa momapya nenge omutonatelishikandjo a hulitha po iilonga ye yuuyendi, mbela oto ke ya kwathela ngaa ya mone ehala lyokukala? Ngele moshitopolwa sheni otamu ka ningilwa oshigongi shoshitopolwa nenge shi ikalekelwa, mbela ito vulu okwiiyamba wu longe petameko nenge konima yoshigongi nenge wu hambelele aayenda?
OWI ILONGEKIDHILA NGAA OKU KA LONGA AANTU MBOKA TAYA KA YUMUDHWA?
Metsokumwe nIilonga 24:15, otwa tegelela aantu omabiliyona ya ka yumudhwe. Oyendji oomboka inaaya mona ompito yokwiilonga kombinga yaJehova manga inaaya sa. Onkee otaya ka mona ompito yokulongwa konima, ngele ya yumudhwa. a Aapiya yaKalunga aadhiginini noye na owino, otaya ka kutha ombinga miilonga mbyoka. (Jes. 11:9) Charlotte ngoka u uvithila muEuropa, muAmerika lyokUumbugantu nosho wo muAfrika, okwa tegelela nondjuulukwe oku ke shi ninga. Oha popi a nyanyukwa ta ti: “Onda tegelela nondjuulukwe oku ka longa aantu mboka taya ka yumudhwa. Uuna tandi lesha kombinga yomuntu ngoka a li ko nale, olundji ohandi ipula te ti: ‘Andola okwa li omuntu nguka a tseya Jehova andola onkalamwenyo ye, oya kala lela ombwanawa.’ Onda halelela oku ka lombwela aantu kombinga yaJehova mboka taya ka yumudhwa, nankene oonkalamwenyo dhawo tadhi ka kala oombwanawa, ngele oye mu longele.”
Nokuli naapiya yaJehova mboka ya li ko manga Jesus inee ya kombanda yevi, otaya ki ilonga iinima oyindji. Dhiladhila owala nkene tashi ke tu etela enyanyu nuuthembahenda mboka tatu ka kala tu na, wokuyelithila Daniel ehunganeko ndyoka a nyola noka li e li uvite ko. (Dan 12:8) Nenge wu dhiladhile sho tatu ka kwathela Rut naNaemi yi ilonge kutya mezimo lyawo omo mwa ka za Mesiasa. Itashi ka kala tuu shi nyanyudha okukutha ombinga miilonga yokulonga aantu muuyuni awuhe, moka itaamu ka kala omathiminiko nomapiyagano ngoka ge li muuyuni mbuka wa kolokosha ngashingeyi!
Oshike to vulu okuninga ngashingeyi wu kale wi ilongekidha oku ka kwathela mokulonga mboka taya ka yumudhwa? Omukalo gumwe to vulu oku shi ninga, omo ku kambadhala okuhwepopala mokulonga aantu nokukala ho uvitha pandjigilile. (Mat. 24:14) Nonando ito vulu okuuvitha ngaashi nale, molwaashoka wa kulupa nenge omolwomatompelo galwe, oto vulu okuulika kutya owa halelela oku ka longa mboka taya ka yumudhwa mokuninga ngaashi to vulu miilonga yokuuvitha ngashingeyi.
Epulo lya simana olyo ndika kutya, owa tegelela ngaa nondjuulukwe oku ka thigulula evi? Owa nyanyukwa ngaa oku ka ninga evi oparadisa nosho wo oku ka kwathela nokulonga aantu mboka taya ka yumudhwa? Oto vulu oku shi ulika kutya owi ilongekidha mokukutha ombinga kunena miilonga mbyoka ya faathana naambyoka to ka longa sho to ka thigulula evi!
a Tala oshitopolwa “Taya nongeke aantu oyendji shoka shu uka” shi li mOshungolangelo yaSeptemba 2022.
