1. Oshike tu na okuninga, opo tu kale Aakriste ya koka pambepo?

 OHASHI tu kumitha okumona nkene okanona haka koko e taka ningi omukuluntu. Ohaka koko paunshitwe nopwaa na okuninga po sha. Ihe opo omuntu a koke pambepo, oku na okuninga oonkambadhala dhontumba. b (1 Kor. 13:11; Heb. 6:1) Opo tu a dhe elalakano ndyoka, otu na okukala tu na ekwatathano lyopothingo naJehova. Otwa pumbwa wo ombepo ondjapuki, opo tu vule okukokeka omaukwatya gopakalunga, uunkulungu nokwiilongekidhila iinakugwanithwa yomonakuyiwa. — Omayel. 1:5.

2. Oshike tatu ilongo muGenesis 1:27, noshike tatu ka kundathana moshitopolwa shika?

² Jehova okwa shita aantu, yamwe aalumentu yamwe aakiintu. (Lesha Genesis 1:27.) Odhoshili kutya aalumentu naakiintu oya yoolokathana palutu nosho wo momikalo dhilwe. Pashiholelwa, Jehova okwa pa aalumentu naakiintu iinakugwanithwa yokondandalunde, onkee ano oya pumbwa omaukwatya nosho wo uunkulungu mboka tawu ya kwathele ya gwanithe po iinakugwanithwa yawo mbyoka. (Gen. 2:18) Moshitopolwa shika, otatu ka kundathana shoka omumwameme omugundjuka ta vulu okuninga, opo a kale Omukriste a pyokoka. Moshitopolwa tashi landula, otatu ka kundathana shoka aamwatate aagundjuka taya vulu okuninga.

3-4. Openi aamwameme aagundjuka taya adha iiholelwa iiwanawa mbyoka taya vulu okulandula? (Tala wo ethano.)

³ Ombiimbeli oya tumbula aakiintu oyendji mboka ya li ye hole noya longela Jehova. (Tala oshitopolwa kepandja lyetu, jw.org, “Oshike tatu vulu okwiilonga kaakiintu mboka ya popiwa mOmbiimbeli?”) Ngaashi enyolo lyenenedhiladhilo lyoshitopolwa lya ti,  oya li ye na ‘omikalo omiwanawa noye na oshili miinima ayihe.’ Kakele kawo, momagongalo getu kunena namo omu na aakiintu Aakriste ya pyokoka, mboka aamwameme aagundjuka taya vulu okuholela.

⁴ Aamwameme aagundjuka, omolwashike itaamu tala kutya aakiintu Aakriste ya pyokoka yeni megongalo lyeni tamu vulu okuholela? Taleni komaukwatya gawo omawanawa, opo nduno tamu tala nkene tamu vulu okuholela omaukwatya gawo. Muutendo tawu landula, otatu ka kundathana omaukwatya gatatu ga simana ngoka aakiintu ya pyokoka ya pumbwa okukala ye na.

5. Omolwashike eifupipiko lya simanenena komukiintu Omukriste ngoka a pyokoka pambepo?

⁵ Eifupipiko oli li uukwatya wa simana mboka tawu ndhindhilikitha mo Omukriste ngoka a koka pambepo. Ngele omukiintu omwiifupipiki, ota ka kala e na ekwatathano ewanawa naJehova nosho wo nayalwe. (Jak. 4:6) Pashiholelwa, omukiintu ngoka e hole Jehova oha tula miilonga neifupipiko ekotampango li na ko nasha nuukwamutse, ndyoka He gwomegulu a tula po. (1 Kor. 11:3) Ekotampango ndyoka otali longo megongalo nomomagumbo. c

6. Oshike aamwameme aagundjuka taya vulu okwiilonga keifupipiko lyaRebekka?

⁶ Natu taleni oshiholelwa shaRebekka. Okwa li omukiintu omunandunge nokwa kala ha ningi omatokolo nziya momikalo tadhi opalele monkalamwenyo ye ayihe. (Gen. 24:58; 27:5-17) Ihe nonando ongawo, okwa li e na esimaneko noha vulika. (Gen. 24:17, 18, 65) Ngele oho yambidhidha neifupipiko omalongekidho ngoka Jehova a tula po ngaashi Rebekka, oto kala oshiholelwa oshiwanawa kaantu yaandjeni nokegongalo.

7. Ongiini aamwameme aagundjuka taya vulu okuholela eishonopeko lyaEster?

⁷ Eishonopeko olyo uukwatya wulwe mboka Aakriste ayehe ya pyokoka pambepo ya pumbwa okukala ye na. Ombiimbeli otayi ti kutya “eishonopeko olyo owino.” (Omayel. 11:2) Ester okwa li omukiintu omwiishonopeki. Sho a ningi omunyekadhi, ka li nando a inenepeke. Okwa li a vulika nokulandula omayele ngoka a pewa  komumwayinagona omukuluntu, Mordekai. (Est. 2:10, 20, 22) Nangoye oto vulu okukala omwiishonopeki, ngaashi Ester, mokukonga nomokutula miilonga omayele omawanawa. — Tit. 2:3-5.

8. Sha ikolelela kuTimoteus gwotango 2:9, 10, eishonopeko otali ka kwathela ngiini omumwameme a ninge omatokolo gopandunge, ngele tashi ya pokuzala nokwiiyopaleka?

⁸ Ester okwa li ishewe a ulike eishonopeko momukalo gulwe. Okwa li “o opala e na ondjelo ombwanawa,” ihe shoka inashi mu ningitha a kale ta ishiti. (Est. 2:7, 15) Aakiintu Aakriste otaya vulu ngiini okumona uuwanawa mokulandula oshiholelwa shaEster? Omukalo gumwe moka taya vulu oku shi ninga otagu adhika muTimoteus gwotango 2:9, 10. (Lesha.) Omuyapostoli Paulus okwa lombwela aakiintu Aakriste ya zale oonguwo dhi shi ku talwa nodha yogoka. Iitya yOshigreka mbyoka ya longithwa movelise ndjika, otayi gandja edhiladhilo kutya omukiintu Omukriste oku na okuzala momukalo tagu simanekitha Kalunga, notagu yaalele omaiyuvo nomataloko gayalwe. Otu na okukala twa lenga aakiintu Aakriste aadhiginini sho haya zala oonguwo tadhi opalele.

9. Oshike tatu ilongo koshiholelwa shaAbigal?

⁹ Oondunge dhokuyoolola odho uukwatya wulwe mboka aamwameme ayehe ya pumbwa okukokeka. Oondunge dhokuyoolola oshike? Odho okuninga omatokolo omawanawa, ano uunkulungu wokutseya shoka shi li mondjila naashoka sha puka, opo ihe to ningi shoka shi li mondjila. Natu taleni koshiholelwa shaAbigal. Omusamane gwe okwa li a ningi etokolo lya samapala, ndyoka lya li tali vulu okutula aanegumbo lye ayehe muupyakadhi lela. Abigal okwa li a katuka onkatu nziya. Omolwetokolo lye ewanawa okwa hupitha oomwenyo odhindji. (1 Sam. 25:14-23, 32-35) Oondunge dhokuyoolola ohadhi tu kwathele tu mone kutya uunake tu na okupopya nokumwena. Ohadhi tu kwathele wo tu kale tu na ondjele ngele tashi ya pokukala tu na ko nasha nayalwe. — 1 Tes. 4:11.

10-11. Okulesha nokunyola nawa otaku ku etele ngiini uuwanawa nosho wo yalwe? (Tala wo ethano.)

¹⁰ Omukiintu Omukriste okwa pumbwa okwiilonga uunkulungu mboka tawu mu kwathele monkalamwenyo. Iilonga yimwe mbyoka aakadhona haya ilongo sho aashona ohayi ya kwathele monkalamwenyo yawo ayihe. Natu taleni kiiholelwa yimwe tayi landula.

¹¹ Ilonga wu kale wu shi okulesha nokunyola nawa. Momaputuko gamwe, okulesha nokunyola inaku talika ko oshinima sha simana okwiilongwa kaakiintu. Ihe osha simana kOmukriste kehe a kale e shi iinima mbyoka. d (1 Tim. 4:13) Onkene ino etha nando osha shi ku imbe wu ilonge okukala wu shi okulesha nokunyola nawa. Uuwanawa wuni to ka mona? Okulesha nokunyola  otaku vulu oku ku kwathela wu mone iilonga noku yi kaleka po. Otaku ke ku kwathela wu kale wu shi okukonakona nawa Ombiimbeli noku yi longa aantu. Shoka sha dhenga mbanda, oto ka hedha popepi naJehova sho to lesha Ombiimbeli nokutedhatedha kuyo. — Jos. 1:8; 1 Tim. 4:15.

12. Omayeletumbulo 31:26 otaga vulu oku ku kwathela ngiini wu kale wu shi okupopya nawa naantu?

¹² Ilonga okupopya nawa naantu. Aakriste oya pumbwa okukala ye shi okupopya nawa naantu. Omulongwa Jakob okwe tu pa omayele omawanawa, sho a ti: “Kehe gumwe na kale ha pulakene mbala, ihe ohi ikwata mokupopya.” (Jak. 1:19) Ngele oho pulakene nawa uuna yalwe taya popi, kungawo, oto ya ulukile uukwawo wanankali, nenge ‘euvitopamwe.’ (1 Pet. 3:8) Ngele ku uvite ko nawa kutya omuntu okwa hala okutya shike, nenge oku uvite ngiini, mu pula omapulo taga opalele. Opo nduno dhiladhila manga inoo popya. (Omayel. 15:28) Ipula kutya, ‘Mbela shoka nda hala okupopya oshoshili ngaa notashi tungu? Mbela otashi ulike ngaa esimaneko nolukeno?’ Ilonga sha kaamwameme ya pyokoka pambepo, mboka ye shi nkene aantu haya popiwa nayo. (Lesha Omayeletumbulo 31:26.) Gandja eitulomo kunkene haya popi nayalwe. Ngele owa ilongo okuninga ngawo, oto ka kala wu na ekwatathano ewanawa nayalwe.

13. Ongiini to vulu okwiilonga nkene egumbo hali kalwa nalyo?

¹³ Ilonga nkene egumbo hali kalwa nalyo. Momahala ogendji, aakiintu oyo unene haya longo iilonga oyindji megumbo. Meme gwoye, nenge omumwameme gulwe a pyokoka, ota vulu oku ku kwathela wu yi ilonge. Omumwameme Cindy okwa ti: “Oshinima shimwe sha dhenga mbanda, shoka meme a longa ndje, osho kutya okulonga nuudhiginini ohaku eta enyanyu. Okwiilonga okuteleka, okwoopaleka, okuhondja nokulanda oya kwathela ndje ndi vule okwiisila oshimpwiyu nondi longe oshindji miilonga yaJehova. Meme okwa li wo a longo ndje nkene ndi na okuyakula aayenda, nokungawo onda li nda tsakanene naamwatate naamwameme ye li nawa, mboka tandi vulu okulandula oshiholelwa shawo.” (Omayel. 31:15, 21, 22) Omukiintu e na ondjungu, e shi okuyakula aayenda noku shi nkene egumbo hali kalwa nalyo, oku li elalekonuuyamba kuyaandjawo nokegongalo. — Omayel. 31:13, 17, 27; Iil. 16:15.

14. Oshike to vulu okwiilonga koshimoniwa shaCrystal, noshike wu na okugandja eitulomo kusho?

¹⁴ Ilonga okuninga iinima kungoye mwene. Osha simana kAakriste ayehe ya pyokoka pambepo, ya kale ye shi iilonga yontumba. (Fil. 4:11) Omumwameme Crystal okwa ti: “Aavali yandje oya li ya kwathele ndje okuhogolola shoka ndi na okwiilongela kosikola yopombanda, opo ndi vule okwiilonga uunkulungu mboka tawu ka kwathela ndje monkalamwenyo. Tate okwa li a ladhipike ndje ndi ilonge nkene iimaliwa hayi ungaungiwa nayo, naashoka osha kwathele ndje noonkondo.” Kakele kokwiilonga uunkulungu mboka tawu ke ku kwathela wu mone iilonga, kambadhala wo okwiilonga nkene wu na okukwata nawa iimaliwa yoye, opo waahe yi longithe nayi. (Omayel. 31:16, 18) Kala to gandja eitulomo komalalakano goye gopambepo, mokuyanda oongunga inaadhi  pumbiwa nokukala wa gwanenwa kwaashono wu na. — 1 Tim. 6:8.

15-16. Aamwameme inaaya hokanwa otaya vulu okweetela yalwe uuwanawa wuni? (Markus 10:29, 30)

¹⁵ Ngele owa kokeke omaukwatya gopambepo nokwiilonga uunkulungu mboka wa pumbiwa, otashi ke ku kwathela wu ninge omatokolo omawanawa monakuyiwa. Natu ka taleni iiholelwa yontumba yaashoka to vulu okuninga.

¹⁶ Oto vulu okukala uule wethimbo inoo hokanwa. Metsokumwe naashoka sha popiwa kuJesus, aakiintu yamwe oya tokola okukala inaaya hokanwa, nokuli nando aantu meputuko lyawo oye shi tala ko kaashi li nawa. (Mat. 19:10-12) Yamwe ohaya kala inaaya hokanwa omolwomatompelo gontumba. Kala wu na uushili kutya Jehova naJesus inaya dhina Aakriste mboka inaaya hokanwa. Muuyuni awuhe, aamwameme inaaya hokanwa oye li elalekonuuyamba kegongalo. Molwaashoka aakiintu mbaka Aakriste oye hole noye na ko nasha nayalwe, ohaya ningi aamwameme ya pyokoka noomeme yopambepo yoyendji. — Lesha Markus 10:29, 30; 1 Tim. 5:2.

17. Ongiini omumwameme omugundjuka ta vulu okwiilongekidhila okuya miilonga yethimbo lya udha?

¹⁷ Oto vulu okuya miilonga yethimbo lya udha. Aakiintu Aakriste ohaya ningi oshindji miilonga yokuuvitha muuyuni awuhe. (Eps. 68:11) Mbela ito vulu okuya miilonga yethimbo lya udha ngashingeyi? Oto vulu okuninga omukokolindjila, omwiiyambi miilonga yokutunga, nenge Omubetel. Galikana kombinga yelalakano lyoye. Popya nayalwe mboka ya adha elalakano ndyoka, e to tala kutya oshike wu na okuninga, opo wu kale wa gwana. Opo nduno ninga omalongekidho wu li adhe. Ngele owa adha elalakano lyoye, otashi ke ku egululila oompito odhindji dhinyanyudha dhokulongela Jehova.

18. Omolwashike omumwameme e na okuhogolola nuukeka ngoka te ke mu hokana? (Tala wo ethano.)

¹⁸ Oto vulu okutokola ngele oto hokanwa. Omaukwatya nuunkulungu mboka twa kundathana, otawu ke ku kwathela wu kale omukulukadhi e li nawa. Osha yela kutya ngele owa hala okuhokanwa, owu na okuhogolola nuukeka ngoka te ke ku hokana. Ndyoka olyo etokolo limwe lyomomatokolo ga simanenena ngoka wu na okuninga. Dhimbulukwa kutya oto ka kala kohi yuukwamutse womulumentu ngoka e ku hokana. (Rom. 7:2; Ef. 5:23, 33) Ano ipula kutya, ‘Mbela okwa pyokoka ngaa pambepo? Okwa pititha ngaa iinima yopambepo komeho monkalamwenyo ye? Mbela oha ningi ngaa omatokolo gopandunge? Oha vulu ngaa okuzimina omapuko ge? Okwa simaneka  ngaa aakiintu? Oku na ngaa uunkulungu mboka wa pumbiwa wokukwathela ndje pambepo, painiwe nopamaiyuvo? Mbela oha ungaunga ngaa nawa niinakugwanithwa ye? Pashiholelwa, iinakugwanithwa yini e na megongalo, noha ungaunga nayo ngiini?’ (Luk. 16:10; 1 Tim. 5:8) Ngele owa hala okuhokanwa komulumentu e li nawa, nangoye owa pumbwa okukala omukiintu e li nawa.

19. Omolwashike oshilonga shomukiintu e li “omukwathi” shi li uuthembahenda?

¹⁹ Ombiimbeli otayi ti kutya omukiintu omwaanawa oku li “omukwathi” gwomusamane gwe nokwe mu “opalela.” (Gen. 2:18) Mbela shono otashi dhinitha omukiintu? Aawe! Oshilonga shomukiintu e li omukwathi oshi li uuthembahenda. Ombiimbeli olundji ohayi popi nokuli Jehova e li “omukwathi.” (Eps. 54:4; Heb. 13:6) Omukiintu oku li shili omukwathi gwomusamane gwe, ngele ohe mu yambidhidha nohe mu kwathele, sho ta ningi omatokolo muukwanegumbo. Molwaashoka omukiintu oku hole Jehova, oha ningi ngaashi ta vulu, opo yalwe ya vule okumona omaukwatya omawanawa gomusamane gwe. (Omayel. 31:11, 12; 1 Tim. 3:11) Oto vulu okwiilongekidhila iinakugwanithwa yomonakuyiwa mokukoleka ohole yoye yokuhola Jehova, nomokukala omukwathi kuyalwe megumbo nomegongalo.

20. Ongiini omuvalakadhi ta vulu okukala ekwatho enene kuyaandjawo?

²⁰ Oto vulu okuninga omuvali. Ngele wa hokanwa, ngoye nomusamane gwoye otashi vulika mu mone aanona. (Eps. 127:3) Onkee ano oshi li pandunge oku shi kaleka momadhiladhilo manga kuyele. Omaukwatya nuunkulungu mboka twa kundathana moshitopolwa shika otayi ke ku kwathela ngele wa ningi omukulukadhi nenge omuvali. Ohole, olukeno neidhidhimiko lyoye otayi ke mu kwathela maandjeni mu kale mwa nyanyukwa, naanona ya ka kale ye uvite ya gamenwa noye holike. — Omayel. 24:3.

21. Otu na okukala tu uvitile ngiini aamwameme, nomolwashike? (Tala ethano lyokombanda.)

²¹ Aamwameme, otu mu hole molwaashihe shoka hamu ningile Jehova noshigwana she. (Heb. 6:10) Ohamu longo nuudhiginini mu kokeke omaukwatya gopambepo, uunkulungu mboka mwa pumbwa, opo wu mu kwathele monkalamwenyo nowu kwathele mboka ye li pamwe nane nosho wo sho tamu ilongekidhile iinakugwanithwa yomonakuyiwa. Omu na ongushu mehangano lyaJehova!