1. Oshike shoka omulumentu Omukriste a pumbwa okuninga, opo a pondole?

 OMUKWANIILWA David okwa li a lombwele Salomo a ti: “Kala omwiinekelwa nomulumentwelela.” (1 Aak. 2:1-3) Aalumentu ayehe Aakriste ohaya ningi ngaashi taya vulu ya tule miilonga omayele ngoka. Opo ya pondole, oye na okwiilonga okuvulika kOompango dhaKalunga nokutula miilonga omakotampango gOmbiimbeli miinima ayihe monkalamwenyo yawo. (Luk. 2:52) Omolwashike sha simanenena aamwatate aagundjuka ya kale ya pyokoka pambepo?

2-3. Omolwashike sha simana komumwatate omugundjuka a kale Omukriste a pyokoka pambepo?

² Omulumentu Omukriste oku na iinakugwanithwa oyindji ya simanenena megumbo nosho wo megongalo. Aamwatate aagundjuka, kapu na omalimbililo kutya omwa dhiladhila kombinga yiinakugwanithwa mbyoka tamu ka kala mu na monakuyiwa. Otashi vulika wa itulila po elalakano lyokuya miilonga yethimbo lya udha, okuninga omuyakuligongalo nolwanima omukuluntugongalo. Otashi vulika wo wa hala okuhokana nokukala wu na aanona. (Ef. 6:4; 1 Tim. 3:1) Opo wu adhe omalalakano ngoka nowu pondole, owa pumbwa okukala Omukriste a pyokoka pambepo. b

³ Oshike tashi vulu oku ku kwathela wu kale Omukriste a pyokoka? Opu na iinima oyindji ya simana mbyoka wa pumbwa okwiilonga, opo wu kale Omukriste a pyokoka. Oshike ishewe to vulu okuninga ngashingeyi wu ilongekidhile iinakugwanithwa kehe mbyoka tashi vulika wu ka kale wu na monakuyiwa, opo wu vule okupondola?

4. Openi to vulu okwaadha iiholelwa iiwanawa mbyoka to vulu okuholela? (Tala wo ethano.)

⁴ Hogolola iiholelwa iiwanawa mbyoka to vulu okulandula. MOmbiimbeli omu na iiholelwa oyindji iiwanawa mbyoka aalumentu aagundjuka taya vulu okulandula. Aalumentu mboka yonale oya  li ye hole Kalunga, noya ungaunga niinakugwanithwa ya yoolokathana mokusila oshimpwiyu oshigwana she. Oto vulu wo okumona iiholelwa iiwanawa mokati kAakriste ya pyokoka yaandjeni nomegongalo lyeni. (Heb. 13:7) Owu na oshiholelwa sha dhenga mbanda shaJesus Kristus. (1 Pet. 2:21) Sho to konakona nuukeka iiholelwa mbino, tala omaukwatya gawo omawanawa. (Heb. 12:1, 2) Opo nduno tokola ngele oto ke ga landula.

5. Omolwashike wa pumbwa okukokeka okudhiladhila pandunge? (Episalomi 119:9)

⁵ Kokeka ‘euvoko noino li kanitha momeho goye.’ (Omayel. 3:21) Omulumentu ngoka ha dhiladhila muule, oha tala nuukeka manga inaa ninga etokolo. Onkee ano longa nuudhiginini wu kale ho dhiladhila muule nokutsikila oku shi ninga. Omolwashike mbela? Omolwaashoka muuyuni mbuka omu udha aalumentu aagundjuka mboka haya wilikwa komadhiladhilo gawo yene, nenge haya landula shoka ya hala okuninga. (Omayel. 7:7; 29:11) Iikundaneki otayi vulu wo okunwetha mo omukalo moka ho dhiladhila. Ihe ongiini to vulu okwiilonga okukala wu na euvoko ndyoka lyomuule? Tameka okwiilonga omakotampango gOmbiimbeli nokudhiladhila kutya omolwashike ge na uuwanawa kungoye. Opo nduno longitha omakotampango ngoka ge ku kwathele wu ninge omatokolo ngoka ga hokiwa kuJehova. (Lesha Episalomi 119:9.) Ngele owa kokeke uunkulungu mboka wa simana, oto ka katuka oonkatu dha simanenena wu kale omulumentu Omukriste a pyokoka. (Omayel. 2:11, 12; Heb. 5:14) Tala nkene okudhiladhila muule taku vulu oku ku kwathela moonkalo dhopaali: (1) mokuungaunga naamwameme nosho wo (2) okuninga omatokolo ge na ko nasha nokuzala nokwiiyopaleka kwoye.

6. Ongiini okudhiladhila pandunge taku ka kwathela omumwatate omugundjuka a kale ha simaneke aamwameme?

⁶ Okudhiladhila muule otaku ke ku kwathela wu kale ho simaneke aakiintu. Oshi li paunshitwe nosha uka komumwatate omugundjuka a kale a hala okutseya nawa omumwameme Omukriste. Ihe nando ongawo, ngele oha dhiladhila muule, ita ka popya sha, ita ka nyola, nenge a ninge sha shoka tashi ulike kutya oku na ohokwe okuya nomumwameme ngoka mondjokana, ngele ine mu hala shili. (1 Tim. 5:1, 2) Ngele otaya endelathana, ota ka kambadhala kaa nyateke edhina ewanawa lyomumwameme, mokukala oyo ayeke, shila ongele owala pu na omuntu gulwe. — 1 Kor. 6:18.  

7. Ongiini okudhiladhila pandunge taku ka kwathela omugundjuka, uuna ta ningi omatokolo ge na ko nasha nokuzala nokwiiyopaleka?

 ⁷ Omukalo gulwe omumwatate omugundjuka ta vulu okuulika oondunge dhokuyoolola, omokukala ha ningi omatokolo ge li pandunge, ngele tashi ya pokuzala nokwiiyopaleka. Olundji, omizalo dhoshinanena ohadhi ndulukwa nohadhi humithwa komeho kaantu mboka ihaaya simaneke Jehova, nenge ye na eihumbato lya nyata. Ohashi imonikila kutya omadhiladhilo gawo inaga yogoka mokuzala omizalo dha ponda, nenge tadhi monikitha aalumentu ya kale ya fa aakiintu. Omulumentu Omukriste omugundjuka ngoka a koka pambepo, uuna ta hogolola shoka ta zala, ota ka wilikwa komakotampango gOmbiimbeli nota ka landula iiholelwa iiwanawa megongalo. Ota vulu okwiipula ta ti: ‘Mbela ohandi ulike ngaa kutya omatokolo ngoka he ningi ogopandunge nosho wo kutya onda simaneka yalwe? Mbela omizalo dhandje ohadhi ningitha ngaa yalwe ya itaale nuupu kutya ohandi longele shili Kalunga?’ (1 Kor. 10:31-33; Tit. 2:6) Omulumentu omugundjuka ngoka ha longitha oondunge dhokuyoolola ota ka simanekwa kaamwatate naamwameme nosho wo kuTate yetu gwomegulu.

8. Ongiini omumwatate omugundjuka ta vulu okwiilonga okukala omwiinekelwa?

⁸ Kala omwiinekelwa. Omulumentu omugundjuka ngoka e shi okwiinekelwa, oku na ondjungu niinakugwanithwa ye ayihe. (Luk. 16:10) Jesus okwa tula po oshiholelwa oshiwanawa. Ka li nando omuntu kee na ko nasha nenge omuhasha. Pehala lyaashono, okwa li a gwanitha po iilonga ayihe mbyoka Jehova e mu pa, nokuli nuuna sha li oshidhigu kuye. Okwa li e hole aantu, unene tu aalongwa ye, nokwa gandja omwenyo gwe omolwawo. (Joh. 13:1) Onkee ano nangoye holela Jesus mokukala to longo nuudhiginini, wu gwanithe po iilonga mbyoka wa pewa. Ngele ku shi nkene hayi longwa kala omwiifupipiki e to pula ekwatho kaamwatate mboka ya pyokoka pambepo. Ino kala ho ningi shampa owala to ningi. (Rom. 12:11) Pehala lyaashono, longa oshimati iilonga yoye tayi pu, to shi ningi nomwenyo aguhe ‘ongaangoka itoo longele aantu, ihe Omuwa ye mwene.’ (Kol. 3:23) Molwaashoka ino gwanenena, kala omwiifupipiki noho zimine omapuko goye. — Omayel. 11:2.

9. Omolwashike omumwatate omugundjuka e na okukokeka uunkulungu wontumba?

⁹ Opo wu ninge omulumentu Omukriste a pyokoka pambepo, owa pumbwa okwiilonga wu kale wu shi okuninga iinima yontumba. Otashi ke ku kwathela wu taambe ko iinakugwanithwa megongalo, wu kale wu na iilonga, opo wu vule okwiisila oshimpwiyu, nenge aantu yaandjeni nowu kale wo wu na ekwatathano ewanawa nayalwe. Tala kiinima yontumba mbyoka wa pumbwa okukala wu shi nawa.

10-11. Ongiini omumwatate omugundjuka ta vulu okumona uuwanawa nosho wo egongalo, ngele okwa ilongo okulesha nokunyola nawa? (Episalomi 1:1-3) (Tala wo ethano.)

¹⁰ Ilonga okulesha nokunyola nawa. Ombiimbeli otayi ti kutya opo omulumentu a kale a nyanyukwa nota pondola monkalamwenyo ye, oku na okulongitha ethimbo a kale ha lesha Ombiimbeli  esiku kehe nokutedhatedha kuyo. (Lesha Episalomi 1:1-3.) Okulesha Ombiimbeli esiku kehe otashi ke mu kwathela a tseye nkene Jehova ha dhiladhila, notashi ke mu kwathela a kale ha dhiladhila noha tompathana nawa. (Omayel. 1:3, 4) Omulumentu a tya ngawo oye a pumbiwa megongalo. Omolwashike mbela?

¹¹ Aamwatate naamwameme oya pumbwa ekwatho lyaalumentu mboka ye shi okulonga nokugandja omayele ga kankamena kOmbiimbeli. (Tit. 1:9) Ngele owu shi okulesha nokunyola nawa, oto ka vula okwiilongekidha iipopiwa nomatyokosha taga tungu yalwe nokukoleka eitaalo lyawo. Oto ka vula wo okuninga omandhindhilikoshango sho to konakona noto pulakene kiipopiwa megongalo, piigongi yoshikandjo noyoshitopolwa. Omandhindhilikoshango ngoka wa ninga, otage ke ku kwathela wu tunge eitaalo lyoye nokutsa yalwe omukumo.

12. Oshike tashi ku kwathele wu kale ho popi nawa naantu?

¹² Kala wu shi okupopya nawa naantu. Omulumentu Omukriste oku na okwiilonga okukala e shi okupopya nawa naantu. Opo e shi ninge nawa, oku na okukala ha pulakene kuyalwe nokuuva ko omadhiladhilo nomaiyuvo gawo. (Omayel. 20:5) Oha vulu okumona kutya omuntu oku uvite ngiini mokupulakena komutono gwewi lye, komainyengo ge gokoshipala nosho wo keholokopo lye. Iinima mbyoka ito ke yi tseya ngele iho kala ethimbo naantu. Ngele oho popi naantu olundji to longitha iikwaelektronika, ngaashi o-email nokutuma omatumwalaka nongodhi, otayi vulu oku ku ningitha wu kale ihoo popi iinima yi uvitike nawa, ngele wu li naantu oshipala noshipala. Onkee ano kala ho kongo oompito wu popye nayalwe wu li puyo. — 2 Joh. 12.

13. Oshike ishewe omulumentu omugundjuka ta vulu okwiilonga? (1 Timoteus 5:8) (Tala wo ethano.)

¹³ Ilonga okwiiyambidhidha mwene. Omulumentu ngoka a koka pambepo, oku na okukala e shi okwiiyambidhidha mwene nosho wo aanegumbo lye. (Lesha 1 Timoteus 5:8.) Miilongo yimwe, aamwatate aagundjuka ohashi vulika ya ilonge iilonga yontumba koohe nenge kaakwanezimo yalwe. Omanga miilongo yilwe, omulumentu omugundjuka otashi vulika a ilonge uunongo wontumba nenge uunkulungu washa wiinima yopaungomba manga e li nokuli mosekondele. Kutya nduno omukalo guni wa landula, oshi li nawa wu ilonge uunkulungu mboka tawu vulu oku ku kwathela wu mone iilonga. (Iil. 18:2, 3; 20:34; Ef. 4:28) Kala wu shiwike wu li omuntu ngoka ha longo nuudhiginini noha longo oshilonga she sigo sha pu. Ngele osho ho ningi ngawo, otashi vulika wu ka mone iilonga nuupu noku yi kaleka po. Omaukwatya nosho wo uunkulungu mboka twa zi nokukundathana, iinima ya simana wo komulumentu Omukriste, opo a vule oku ka gwanitha po iinakugwanithwa ye monakuyiwa. Natu taleni kiinakugwanithwa yimwepo.

14. Ongiini omumwatate omugundjuka ta vulu okwiilongekidhila okuya miilonga yethimbo lya udha?

¹⁴ Omulongi gwethimbo lya udha. Aalumentu oyendji Aakriste ya pyokoka pambepo, oya tameka iilonga yethimbo lya udha sho ya li aagundjuka. Uukokolindjila ohawu kwathele omulumentu omugundjuka a ilonge nkene e na okuungaunga nomupondo naantu yomaukwatya ga yoolokathana. Ohawu mu kwathele wo a ilonge nkene e na okulongitha nawa iimaliwa mbyoka ha mono. (Fil. 4:11-13) Omukalo omwaanawa okutameka iilonga yethimbo lya udha, owo okukutha uukwathelikokolindjila. Aantu oyendji ohaya kutha uukwathelikokolindjila, mboka hawu ya kwathele ya tameke uukokolindjila wondjigilile. Uukokolindjila otashi vulika wu ku egululile ompito yilwe yokuya miilonga yethimbo lya udha, mwa kwatelwa okulonga miilonga yokutunga nenge yaBetel.

15-16. Oshike tashi vulu okukwatha omumwatate omugundjuka a ninge omuyakuligongalo nenge omukuluntugongalo?

¹⁵ Omuyakuligongalo nenge omukuluntugongalo. Aalumentu Aakriste oye na okugwanitha po iitegelelwa, opo ya kale ya gwana okukwathela aamwatate naamwameme megongalo ye li aakuluntugongalo. Ombiimbeli otayi ti kutya aalumentu mboka ya gwanitha po iitegelelwa oya “hala oshilonga oshiwanawalela.” (1 Tim. 3:1) Manga omumwatate inaa ninga omukuluntugongalo, oku na okugwanitha po iitegelelwa yokuninga omuyakuligongalo. Aayakuligongalo ohaya kwathele aakuluntugongalo, mokusila oshimpwiyu aamwatate naamwameme megongalo. Aakuluntugongalo naayakuligongalo ohaya yakula neifupipiko aamwatate naamwameme, nohaya kutha ombinga nuulaadhi miilonga yokuuvitha. Aamwatate aagundjuka otaya vulu okulangekwa po ye li aayakuligongalo, nokuli nonando oye li mepipi lyomimvo omulongo nasha. Omuyakuligongalo ngoka a gwanitha po iitegelelwa ye, ota vulu okulangekwa po e li omukuluntugongalo mepipi lyomimvo omilongo mbali nasha.

¹⁶ Ongiini to vulu okukala wa gwanitha po iitegelelwa yokukala omuyakuligongalo, nokonima to ningi omukuluntugongalo? Ombiimbeli oya gandja owala omusholondondo gwiitegelelwa ayihe mbyoka wa pumbwa okugwanitha po. Ihe iitegelelwa mbyoka ya pumbiwa, oya kankamena kOmbiimbeli, kohole yokuhola Jehova, yokuhola yaandjeni nosho wo egongalo. (1 Tim. 3:1-13; Tit. 1:6-9; 1 Pet. 5:2, 3) Iitegelelwa mbyoka ayihe natu kale tu yi uvite ko. Galikana Jehova e ku kwathele wu yi gwanithe po. c

17. Ongiini omumwatate omugundjuka ta vulu okwiilongekidhila okukala omusamane nomutse gwegumbo? (Tala wo ethano.)

¹⁷ Aasamane nomitse dhomagumbo. Ngaashi  Jesus e shi popi, aalumentu Aakriste ya pyokoka pambepo, otaya vulu okukala inaaya ya mondjokana. (Mat. 19:12) Ihe ngele owa hokana, kiitegelelwa yoye otaku gwedhwa oshinakugwanithwa shokukala omusamane nomutse gwegumbo. (1 Kor. 11:3) Jehova okwa tegelela omusamane a kale e hole omukulukadhi gwe noku mu sila oshimpwiyu palutu, pamadhiladhilo nopambepo. (Ef. 5:28, 29) Omaukwatya nomaunkulungu ngoka twa kundathana nale moshitopolwa shika, ngaashi okukala ho dhiladhila pandunge, okusimaneka aakiintu nokukala omwiinekelwa, otage ke ku kwathela wu kale omusamane e li nawa. Oto kala wa ilongekidhila nawa okugwanitha po iinakugwanithwa yoye wu li omusamane nomutse gwegumbo.

18. Ongiini omumwatate omugundjuka ta vulu okwiilongekidhila okukala omusamane omuvali?

¹⁸ Omusamane. Ngele wa hokana, otashi vulika wu ninge tate omuvali. Oshike to vulu okwiilonga kuJehova kombinga yokukala tate e li nawa? Opu na iiyilongomwa oyindji. (Ef. 6:4) Jehova okwa li a popi sha yela ta lombwele Omwana, Jesus, kutya oku mu hole nokwe mu hokwa. (Mat. 3:17) Ngele owa ningi omuvali, shilipaleka kutya oto kala aluhe ho lombwele aamwoye kutya owu ya hole. Kala aluhe ho ya pandulile iinima iiwanawa mbyoka ya ninga. Ootate mboka haya landula oshiholelwa shaJehova, ohaya kwathele oyana ya ninge aalumentu naakiintu Aakriste ya pyokoka pambepo. Oto vulu okwiilongekidhila ngashingeyi oshinakugwanithwa shika, mokukala ho sile oshimpwiyu yalwe maandjeni nomegongalo nomokwiilonga oku ya lombwela kutya owu ya hole nowe ya pandula. (Joh. 15:9) Shika otashi ke ku kwathela, wu vule okugwanitha po iinakugwanithwa yoye yomonakuyiwa, wu li omusamane nomuvali. Mokweendela ko kwethimbo, oto ka kala wa lengwa kuJehova, kuukwanegumbo woye nokegongalo.

19-20. Oshike tashi vulu okukwathela aamwatate aagundjuka ya kale Aakriste ya pyokoka pambepo? (Tala ethano lyokombanda.)

¹⁹ Aamwatate aagundjuka otamu vulu okukala Aakriste ya pyokoka pambepo. Omwa pumbwa okuhogolola okulandula iiholelwa iiwanawa, ngaashi okukala hamu dhiladhila pandunge, mu shi okwiinekelwa, mu na uunkulungu mboka tawu mu kwathele monkalamwenyo nokwiilongekidhila iinakugwanithwa yomonakuyiwa.

²⁰ Omathimbo gamwe otashi vulika mu kale mu uvite mwa gwililwa po, uuna tamu dhiladhila kiilonga ayihe mbyoka mu na okulonga. Ihe nando ongawo otamu vulu oku yi longa. Dhimbulukweni kutya Jehova okwa halelela oku mu kwathela. (Jes. 41:10, 13) Odhoshili kutya aamwatate naamwameme megongalo lyeni otaye ke mu kwathela wo. Ngele omwa kala ngaashi Jehova a hala, otamu ka nyanyukilwa onkalamwenyo yeni. Aamwatate aagundjuka otu mu hole! Jehova ne mu laleke nuuyamba ngashingeyi sho tamu longo mu kale Aakriste ya pyokoka. — Omayel. 22:4.