1. Omolwashike Abraham a tsikile okukala e na etegameno kutya ota ka mona okanona kokamati?

 JEHOVA okwa li a uvanekela kuume ke Abraham kutya aantu yomiigwana ayihe kombanda yevi otaya ka lalekwa nuuyamba okupitila moluvalo lwe. (Gen. 15:5; 22:18) Omolweitaalo lye lya kola muKalunga, Abraham okwa li a tompwa thiluthilu kutya euvaneko ndyoka otali ka gwanithwa shili. Aaihokani mboka aadhiginini kaya li natango ya mona okanona kokamati, sho Abraham a li nokuli e na omimvo 100, ye omukadhi oku na omimvo 90. (Gen. 21:1-7) Ihe nonando ongawo, Ombiimbeli otayi ti: “Abraham okwi itaale nokwa tegamene, manga pwaa na sha shokutegamenwa, onkee okwa ningi he yiigwana oyindji. Ongaashi enyolo tali ti.” (Rom. 4:18) Etegameno lyaAbraham olya li lya gwanithwa shili. Oye he, yaIsak, omwanamati ngoka a kala a tegamena. Omolwashike Abraham a li e na einekelo lya kola kutya shoka Jehova e mu uvanekela otashi ka gwanitha po shili?

2. Omolwashike Abraham a li a tompwa kutya euvaneko lyaJehova otali ka gwanithwa shili?

² Omolwekwatathano lye lyopothingo naJehova, Abraham okwa li “e shi shi nawa kutya shoka Kalunga e shi uvaneke, ota vulu oku shi gwanitha” shili. (Rom. 4:21) Jehova okwa li a hokwa Abraham, nomolweitaalo lye okwe mu tala omuyuuki. (Jak. 2:23) Ngaashi Aaroma 4:18 taye shi popi, Abraham okwa li e na eitaalo nosho wo etegameno. Natu taleni shoka omuyapostoli Paulus a popi kombinga yetegameno montopolwa ontano yAaroma.

3. Paulus okwa yelitha shike kombinga yetegameno?

³ Paulus okwa yelitha nkene tatu vulu okukala nuushili kutya omolwashike ‘okutegamena itaaku tu sitha ohoni.’ (Rom. 5:5) Okwe tu kwathele wo tu uve ko nkene etegameno lyetu  lyopaKriste tali vulu okukoka. Tala nkene eitaalo lyoye tali vulu okukala lya kola mokukonakona shoka Paulus a popi mAaroma 5:1-5. Okuninga ngawo, otaku ke ku kwathela wu mone kutya etegameno lyoye lyopaKriste olyolela. Sho tatu kundathana kombinga yoshinima shono otashi ka holola wo nkene etegameno lyoye tali vulu okukala lya kola shi vulithe ndyoka wu na ngashingeyi. Tango natu taleni ketegameno ewanawa ndyoka Paulus a ti kutya itali tu sitha ohoni.

4. Oshike sha popiwa mAaroma 5:1, 2?

⁴ Lesha Aaroma 5:1, 2. Paulus okwa nyolele egongalo lyAaroma oohapu ndhoka. Aamwatate naamwameme mboka oya li ye na eitaalo tali longo sho ya tseya Jehova nosho wo Jesus, e taya ningi Aakriste. Onkee ano oya “ningwa aayuuki koshipala shaKalunga molweitaalo,” nokwe ya gwayeke wo nombepo ondjapuki. Odhoshili kutya oya li ya mono etegameno ewanawa.

5. Aagwayekwa oye na etegameno lini?

⁵ Konima yethimbo Paulus okwa ka nyolela Aakriste aagwayekwa muEfeso kombinga yetegameno ndyoka ya ithanenwa. Etegameno ndyoka olya kwatela mo ‘uuthiga waayapuki.’ (Ef. 1:18, OB-1954) Paulus okwa li wo a lombwele Aakolossa kutya etegameno lyawo olyoku ka kala nomwenyo peni. Okwa ti “kutya shoka mwe shi tegamena pauvaneko, oshe mu pungulilwa nawa megulu.” (Kol. 1:4, 5) Onkee etegameno lyAakriste aagwayekwa olyo okuyumudhwa ya kale nomwenyo sigo aluhe megulu, moka taya ka pangela pamwe naKristus. — 1 Tes. 4:13-17; Eh. 20:6.

6. Omumwatate gumwe omugwayekwa okwa ti shike kombinga yetegameno?

⁶ Aakriste aagwayekwa oye na etegameno ndyoka. Omumwatate Frederick Franz, ngoka naye e li gumwe gwomuyo, okwa popya oohapu tadhi zi komutima, a ti: “Etegameno lyetu otali ka gwanithwa shili, onkee ano oshilyo kehe shokangundu okashona kaantu 144 000 otaka ka mona ondjambi ndjoka Kalunga e tu uvanekela shi vulithe pwaashoka hatu kala tatu dhiladhila.” Sho a kala nokulongela Jehova nuudhiginini uule womimvo odhindji, omumwatate Franz mo 1991 okwa popi nomukumo a ti: “[Tse] otwa lenga noonkondo natango etegameno lyetu. . . .  Sho ngaa omimvo ndhoka twe li tegelela tadhi ka dhilongela, olupandu lwetu nalwo ohalu ende talu kolo. Oku li tegelela oshinima lela sha simana kutya nduno otu tegelele omimvo omamiliyona gangapi. Ondi hole lela etegameno lyetu shi vulithe nale.”

7-8. Aapiya yaJehova oyendji oye na etegameno lini? (Aaroma 8:20, 21)

⁷ Aalongeli yaJehova oyendji kunena oye na etegameno li ili. Otaya ka kala nomwenyo gwaaluhe kombanda yevi mUukwaniilwa waKalunga, etegameno ndyoka Abraham naye a si e na. (Heb. 11:8-10, 13) Paulus okwa nyola kombinga yetegameno ndyoka ewanawa. (Lesha Aaroma 8:20, 21.) Sho wa ilongo tango kombinga yomauvaneko gomonakuyiwa ngoka ge li mOmbiimbeli, etegameno lini lya li tali hokitha unene kungoye? Mbela olyo ndono kutya siku limwe oto ka kala wa gwanenena, kuu na uulunde washa? Nenge pamwe owa li wa kumwa sho wa ilongo kutya mboka wu hole ya sa otaya ka yumuka ya ka kale nomwenyo kombanda yevi? Iinima mbyoka otwe yi tegelela monakuyiwa “omolwetegameno ndyoka tu na.”

⁸ Kutya nduno otu na etegameno lyoku ka kala nomwenyo sigo aluhe megulu nenge kombanda yevi, otu na etegameno ewanawa ndyoka tali tu kaleke twa nyanyukwa. Onkee ano otatu vulu okukala nokuli neinekelo lya kola metegameno lyetu. Oohapu dhaPaulus ndhoka a landulitha ko otadhi tu pe uuyelele nkene tashi vulu okuningwa. Natu tale shoka a nyola kombinga yetegameno lyetu. Oohapu dhe otadhi ke tu kwathela tu kale tu na omukumo, netegameno lyetu otali ka koka notali ka gwanithwa shili.

9-10. Ngaashi sha li sha ningilwa Paulus, oshike shono Aakriste tashi vulika ye ki iyadhe taya ningilwa? (Aaroma 5:3) (Tala wo omathano.)

⁹ Lesha Aaroma 5:3 Ndhindhilika kutya uudhigu otashi vulika wu tu inyengithe tu koleke etegameno lyetu. Shono otashi vulika shi tu kumithe. Uushili owo kutya aalanduli yaKristus ayehe oye na okukala ya tegelela ya iyadhe momaudhigu gi ili nogi ili. Natu tale koshiholelwa shaPaulus. Okwa lombwele Aatessalonika a ti: “Sho twa li pune, otwe mu londodha kutya onatu ka tidhaganwa, naashika omwe shi mono kutya  osho naanaa tashi ningwa.” (1 Tes. 3:4) Okwa nyolele ishewe Aakorinto a ti: “Otwa hala oku mu dhimbulutha uudhigu mboka twa li tu na . . . otwa li twa kanitha etegameno alihe lyokukala nomwenyo.” — 2 Kor. 1:8; 11:23-27.

¹⁰ Aakriste kunena, otashi vulika nayo ya iyadhe momaudhigu gontumba nogongandi. (2 Tim. 3:12) Ongiini kombinga yoye? Mbela owa iyadhele to hepekwa konima sho wa itaale Jesus e to ningi omulanduli gwe? Otashi vulika ookuume koye naakwanezimo ya li ye ku sheke. Otashi vulika nokuli ya li ya ungaunga nangoye nonyanya. Mbela oho iyadha muupyakadhi kiilonga, molwaashoka wa tokola toka okukala omunashili miinima ayihe? (Heb. 13:18) Owa iyadhele nale to hepekwa kepangelo, molwaashoka owala ho uvithile yalwe kombinga yetegameno ndyoka wu na? Paulus okwa ti natu nyanyukwe nonando otu iyadhe muudhigu wu thike peni. Omolwashike mbela?

11. Omolwashike tu na okukala twa tokola toko tu idhidhimikile eshongo kehe?

¹¹ Otatu vulu okukala twa nyanyukwa uuna tatu hepekwa, oshoka ohashi tu kwathele tu kokeke uukwatya wa simana. Aaroma 5:3 otaya ti kutya “muudhigu ohamu zi eidhidhimiko.” Aakriste ayehe otaye ki iyadha muudhigu, onkee Aakriste ayehe oye na okukala ye na eidhidhimiko. Otu na okukala twa tokola twa mana mo, tu idhidhimikile eshongo kehe tatu ki iyadha mulyo. Otatu ka mona owala ondjambi yetu ngele ohatu idhidhimike. Inatu hala tu kale twa fa aantu mboka Jesus a li ta dhiladhila, sho ta popi kombinga yoombuto ndhoka dha gwila mevi lya nika omamanya. Ohaya kala ya nyanyukwa petameko ngele ya uvithilwa, ihe uuna “pwa holoka uupyakadhi, nenge omapataneko” ohaya shuna omutse miipeta. (Mat. 13:5, 6, 20, 21) Odhoshili kutya kashi shi oshinima oshipu, nenge oshiwanawa uuna tatu hepekwa, nenge twa taalela omashongo, ihe okwiidhidhimikila iinima mbyoka ohaku tu etele uuwanawa tawu kalelele. Omomukalo guni mbela?

12. Uuwanawa wuni hatu mono mokwiidhidhimikila omashongo?

¹² Omuyapostoli Jakob okwa popi uuwanawa mboka hawu zi mokwiidhidhimikila omashongo. Okwa nyolwa a ti: “Eidhidhimiko nali mu endithe ondjila ayihe pwaa na omapunduko, opo mu kale mwa gwana, mwaa na oshipo ne inamu pumbwa sha.” (Jak. 1:2-4) Jakob okwa popi eidhidhimiko lya fa li na elalakano, nenge oshilonga shoka li na okugwanitha po. Oshilonga shini eidhidhimiko li na okugwanitha po? Otali vulu oku ku kwathela wu kokeke ontalanteni, eitaalo nokukala wa inekela muKalunga. Kakele kaashono, ohatu mono uuwanawa momukalo gwa dhenga mbanda ngele ohatu idhidhimike.

13-14. Eidhidhimiko ohali eta shike, nongiini lya pambathana netegameno? (Aaroma 5:4)

¹³ Lesha Aaroma 5:4. Paulus okwa ti kutya eidhidhimiko ohali tu kwathele “okusindana memakelo.” Jehova oha kala e ku hokwa uuna to idhidhimike. Shino itashi ti nduno kutya Jehova oha kala a panda uuna to makelwa nenge wu li momaudhigu. Shoka Kalunga a hokwa, ongoye. Uuna to idhidhimike oto mu nyanyudha. Onkee ano eidhidhimiko oli li lela eyambeko ekumithi. — Eps. 5:12.

¹⁴ Dhimbulukwa kutya Abraham okwa li a idhidhimikile omamakelo, na Kalunga okwa li e mu hokwa. Kalunga okwe mu ithana kutya oku li kuume ke nomuyuuki. (Gen. 15:6; Rom. 4:13, 22) Oshinima shono natse otashi vulu oku tu ningilwa. Kalunga iha kala e tu hokwa omolwuuwindji wiilonga mbyoka hatu mu longele, nenge molwuuthembahenda wiilonga mbyoka tu na. Oha kala e tu hokwa uuna tu li aadhiginini kuye, nonando otatu hepekwa. Kutya nduno otu na uunkulungu wuni, omimvo ngapi, notu li monkalo ya tya ngiini, atuheni otatu vulu okwiidhidhimika. Mbela owu li omudhiginini kuJehova ngashingeyi, nonando oto idhidhimikile eshongo lyontumba? Ngele osho dhimbulukwa kutya oto nyanyudha Jehova. Uuna tu shi oshinima  shono, otashi vulu okukala enwethomo ewanawa kutse. Otashi vulu okukoleka etegameno lyetu.

15. Oohapu dhini ishewe Paulus a li a popi, nomolwashike tashi vulika dhi limbililike yamwe?

¹⁵ Ngaashi Paulus e shi yelitha, Jehova ota ka kala e tu hokwa ngele ohatu idhidhimikile omashongo nomupondo. Paulus okwa tsikile ko a ti kutya ‘okusindana memakelo otaku tu pe omukumo gwokutegamena. Okutegamena hoka itaku tu sitha ohoni.’ (Rom. 5:4, 5) Oohapu ndhika otashi vulika dhi limbililike yamwe. Omolwashike mbela? Oshoka ngaashi sha popiwa metetekelo mAaroma 5:2, Paulus okwa ti kutya Aakriste yomuRoma oye na nale etegameno, “mokutegamena eadhimo lyaKalunga.” Otashi vulika gumwe a pule ta ti: ‘Ngele Aakriste mboka oye na nale etegameno, omolwashike Paulus a ka popya ishewe kombinga yetegameno momusholondondo gwe konima yethimbo?’

16. Etegameno ohali ende ngiini tali koko momuntu? (Tala wo omathano.)

¹⁶ Otatu ka uva ko nawa kutya Paulus okwa li a hala okutya shike, uuna tatu kaleke momadhiladhilo kutya etegameno oshinima shoka hashi koko. Mbela oto dhimbulukwa oshikando shotango wa uva kombinga yetegameno ekumithi ndyoka li li mOmbiimbeli? Otashi vulika wa li wu uvite kutya edhiladhilo lyoku ka kala nomwenyo sigo aluhe kombanda yevi moparadisa kali shi lyoshili. Ihe sho we ende to tseya nawa Jehova nosho wo omauvaneko ngoka ge li mOmbiimbeli, ngashingeyi owu wete kutya etegameno ndyoka otali ka gwanithwa shili.

17. Etegameno lyoye ohali tsikile ngiini okukoka, konima yeiyapulo neninginitho lyoye?

¹⁷ Konima nokuli sho wa iyapulile Jehova e to ninginithwa, etegameno lyoye otali tsikile okukoka sho to ilongo kombinga ye nokukoka pambepo. (Heb. 5:13–6:1) Otashi vulika wa ningilwa oshinima shoka sha popiwa mAaroma 5:2-4. Owa li wa iyadha momaudhigu gi ili nogi ili, ihe owe ga idhidhimikila nowa mona kutya Kalunga okwe ku hokwa. Molwaashoka owu na einekelo kutya okwe ku hokwa, ngashingeyi owu na etompelo lya kola kutya ote ke ku pa iinima  mbyoka a uvaneka. Onkene etegameno lyoye olya kola shi vulithe nale petameko. Oli li oshinima sholela kungoye noshopaumwene. Ohali ku gumu meni lyomutima gwoye, ohali nwetha mo kehe shimwe shoka ho ningi monkalamwenyo yoye, ohali lundulula nkene ho ungaunga naantu yaandjeni, nkene ho ningi omatokolo nosho wo nkene ho longitha ethimbo lyoye nokuli.

18. Jehova okwe tu pa eshilipaleko lini?

¹⁸ Paulus okwa gwedha ko oshitsa sha simana kombinga yetegameno ndyoka wu na sho Kalunga a tameke okukala e ku hokwa. Paulus okwa shilipaleke kutya etegameno lyoye otali ka gwanithwa. Omolwashike to vulu okukala wu na uushili moshinima shono? Paulus mAaroma okwa kwatela mo oohapu ndhoka tadhi shilipaleke Aakriste tadhi ti: “Okutegamena itaku tu sitha ohoni, oshoka ohole yaKalunga oya tililwa moomwenyo dhetu kOmbepo Ondjapuki, ndjoka twe yi pewa omagano kuKalunga.” (Rom. 5:5) Onkee ano owu na etompelo lya kola kutya Jehova okwe ku pa etegameno ndyoka.

19. Uushili wuni to vulu okukala wu na kombinga yetegameno lyoye?

¹⁹ Tedhatedha kwaashoka Jehova a uvanekele Abraham nokunkene a li e mu hokwa nokwe mu tala ko e li kuume ke. Shoka Abraham a kala a tegamena osha ka ningwa shili. Ombiimbeli otayi ti: “Abraham okwi idhidhimike e ta pewa shoka Kalunga e mu uvanekela.” (Heb. 6:15; 11:9, 18; Rom. 4:20-22) Onkee ano ina ka yemata, oshoka euvaneko lye olya gwanithwa. Ngele nangoye owa kala omudhiginini, oto ka mona ondjambi yaashoka Kalunga e ku uvanekela. Etegameno lyoye olyolela, otali ku etele enyanyu noitali ke ku yemateka nando. (Rom. 12:12) Paulus okwa nyola a ti: “Kalunga, ngoka oluthithiya lwetegameno, ne mu udhithe enyanyu alihe nombili tayi zi meitaalo lyeni, opo mu vule okukoka mokutegamena kweni koonkondo dhOmbepo Ondjapuki.” — Rom. 15:13.