ODHOSHILI kutya owu hole omagano ogendji ngoka Jehova he ku pe, nowa pandula sho ho vulu okuninga omatokolo gankene wu na oku ga nyanyukilwa. Shoka oshihokithi, Ombiimbeli oya popya kutya omaviinu omagano ga za kuKalunga, sho ya ti: “Iitelekela ohayi telekelwa okunyanyudha, omaviinu haga hangelwa okushambudha omwenyo.” (Omuuv. 10:19; Eps. 104:15) Ihe nando ongawo, otashi vulika wa mona kutya aantu yamwe oye na uupyakadhi niikolitha. Shimwe ishewe, aantu muuyuni awuhe oye na omataloko nomikalo dha yoolokathana dhi na ko nasha nokunwa iikolitha. Oshike nduno tashi vulu okukwathela Omukriste a ninge omatokolo ge li pandunge, ngele tashi ya pokunwa iikolitha?

Kutya nduno ohatu kala peni, nenge otwomeputuko lini, okweetha etaloko lyaKalunga li wilike okudhiladhila kwetu nomatokolo getu, otaku ke tu kwathela lela notaku ke tu etela uuwanawa tawu kalelele.

Otashi vulika we shi ndhindhilika kutya aantu oyendji muuyuni ohaya nu iikolitha. Yamwe otashi vulika haye yi nu, molwaashoka hayi ya uvitha nawa. Yalwe ohaye yi nu, opo ya vule okuungaunga nomaupyakadhi gawo. Pomahala gamwe, ngoka ha nu iikolitha okwa talika ko a kola noku na oonkondo.

Ihe Aakriste ohaya wilikwa pandunge kOmushiti gwawo omunahole. Pashiholelwa, okwe tu lombwela iilanduliko iiwinayi mbyoka hayi zi mokunwa iikolitha sha pitilila. Otashi vulika twa lesha mOmayeletumbulo 23:29-35 uuyelele kombinga yomuntu onkolwe noyomaupyakadhi gamwe ngoka ha mono. a Omukuluntugongalo gumwe, Daniel gwokoEuropa, ota dhimbulukwa nkene onkalamwenyo ye ya li manga inaa ninga Omukriste gwashili, a ti:“Uunkolwe owa ningitha ndje ndi ninge omatokolo omawinayi, nomolwago onda li nda mono iilanduliko iiwinayi monkalamwenyo yandje, nohandi kala natango tandi ipe uusama, uuna tandi yi dhiladhila.”

Ongiini tatu vulu okuninga omatokolo gopandunge kombinga yiikolitha, nokuyanda omaupyakadhi ngoka hayi etitha? Opo tu shi ninge, otwa pumbwa okweetha Jehova a wilike omadhiladhilo getu noonkatu dhetu.

Tala shoka Ombiimbeli tayi popi shi na ko nasha niikolitha, nonokutya omolwashike yamwe haye yi nu.

Ombiimbeli inayi indika okunwa pandjele iikolitha. Uushili owo kutya, Ombiimbeli oya ti kutya okunwa omaviinu otaku vulu nokuli oku ku etela enyanyu. Oya ti: “Lya oshikwiila shoye nenyanyu nou nwe omaviinu goye nomutima gwa tundulukwa.” (Omuuv. 9:7) Jesus pompito yimwe okwa li nokuli a nu omaviinu, naapiya yalwe yaJehova osho ya li ya ningi. — Mat. 26:27-29; Luk. 7:34; 1 Tim. 5:23.

Nonando ongawo, Ombiimbeli oya popya sha yela eyooloko ndyoka li li pokati kokunwa pandjele iikolitha nokukolwa. Oya ti: “Inamu kolwa komaviinu.” (Ef. 5:18) Oya ti wo nokuli kutya: ‘Oonkolwi itadhi ka ya moshilongo shaKalunga.’ (1 Kor. 6:10) Odhoshili kutya Jehova okwa indika okunwa sha pitilila nosho wo uunkolwe. Pehala lyokulandula omukalo gwetu gwokunwa pamuthigululwakalo, otwa pumbwa okupandula Jehova sho tu na etaloko lya fa lye, li li pandjele.

Yamwe oye uvite kutya otaya vulu okunwa iikunwa oyindji yoalkoholi nopwaa na okukolwa. Ihe shoka osha nika lela oshiponga. Omanyolo oge shi yelitha kutya okukala ‘ombwiyi yiikolitha,’ otaku vulu okuningitha omuntu a ninge omapuko ga kwata miiti nokuyona kuJehova. (Tit. 2:3; Omayel. 20:1) Jesus okwe shi popi kutya ‘uunkolwi’ otawu ka imba yalwe ya ye muuyuni uupe. (Luk. 21:34-36) Oshike  tashi vulu okukwathela Omukriste kaa ye momaupyakadhi ngoka haga etithwa kiikolitha?

Osha nika oshiponga okunwa ngaashi aantu yamwe yomeputuko lyoye haya nu. Aakriste aanandunge ohaya ningi shoka tashi nyanyudha Jehova ngele tashi ya pokunwa nokulya. Ombiimbeli otayi tu dhimbulukitha kutya: “Ngele tamu li nenge tamu nu, longeni ayihe nokusimanekitha Kalunga.” (1 Kor. 10:31) Tala komapulo gamwe nomakotampango gopaMbiimbeli taga landula:

Mbela ohandi nu iikolitha ndi kale nda faathana naamboka haye shi ningi? Eksodus 23:2 ota ti: “Ino landula ongundu.” Jehova okwa li ta londodha Aaisraeli shi na ko nasha nokuholela aantu mboka inaaya hokiwa kuye. Omayele ngoka omawanawa nokAakriste yokunena. Ngele ohatu etha oomakula ya nwethe mo okudhiladhila kwetu nokuninga omatokolo getu ge na ko nasha nokunwa iikolitha, otatu ka iyadha tu li kokule naJehova nomithikampango dhe. — Rom. 12:2.

Mbela ohandi nu iikolitha ndi ulike kutya onda kola? Momaputuko gamwe okunwa iikolitha sha pitilila oku li apuhe nokwa taambwa ko. (1 Pet. 4:3) Ihe ndhindhilika shoka Aakorinto yotango 16:13 taye tu ladhipike tu ninge, sho taya ti: “Kotokeni, ne mu kale mwa kola meitaalo. Kaleni aanankondo mwaa na uumbanda.” Mbela omalovu ohaga kwathele ngaa shili omuntu a kale omunankondo? Hasho nando. Omalovu otaga vulu okunkundipaleka okudhiladhila kwetu notaga vulu oku tu imba okuninga omatokolo omawanawa. Onkee ano okunwa iikolitha oyindji itashi ulike kutya omuntu oku na oonkondo, ihe otashi ulike kutya ke na oondunge. Jesaja 28:7 okwa popya mboka taa puka, naashoka tashi ya pundukitha.

Oonkondo dhashili ohadhi zi kuJehova nodha kwatela mo ‘okukala wa tonata nowa kola meitaalo.’ (Eps. 18:32) Omukriste gwashili shoka oha vulu oku shi ninga, mokukala a kotoka nokukatuka pandunge, opo a igamene kiinima mbyoka tayi vulu okuyona po uupambepo we. Oonkondo ndhoka Jesus okwa li e dhi ulike sho a li kombanda yevi, naantu oyendji oya li ye mu simaneke, molwaashoka okwa li omulaadhi nokwa tokola toko okulonga shoka sha uka.

Mbela ohandi nu iikolitha, ndi dhimbwe omaupyakadhi gandje? Omupisalomi okwa li a nwethwa  mo a nyole ta ti: “Uuna nda tila nonda sa iimpwiyu, [Jehova] oto hekeleke ndje e to nyanyudha ndje.” (Eps. 94:19) Ngele owa gwililwa po komaupyakadhi, konga ekwatho kuJehova e ku kwathele, ihe hamokunwa iikolitha. Omukalo gumwe to vulu oku shi ninga, omokugalikana olundji kuJehova. Shimwe ishewe, aantu oyendji oya mona kutya okukonga omayele taga longo kukuume a pyokoka pambepo megongalo, ohashi kwathele. Okwiipimpila iikolitha, opo ando wu vule okuungaunga nomaupyakadhi, ohaku yonagula, ohaku ngushulula omikalo dhomuntu nohaku mu imbi a ninge shoka shi li mondjila. (Hos. 4:11) Daniel, ngoka a tumbulwa metetekelo, okwe shi zimina, a ti: “Onda li tandi kondjo nepolimano nosho wo nokukala ndi uvite ndi na ondjo. Onda tameke okunwa, opo ando ndi vule okuungaunga nonkalo ndjoka, ihe omaupyakadhi oga indjipala owala nonda kanitha ombili neisimaneko.” Oshike sha li sha kwathele Daniel? Okwa ti: “Onda li nda mono kutya onda pumbwa okwiinekela muJehova, ihe hamiikolitha. Sho nde shi ningi, onda vulu okuungaunga nomaupyakadhi gandje.” Uushili owo kutya Jehova okwa ilongekidha aluhe oku tu kwathela, nokuli nuuna tatu monika twa fa kaatu na we etegameno lyasha. — Fil. 4:6, 7; 1 Pet. 5:7.

Ngele omathimbo gamwe oho nu iikolitha, omolwashike itoo tala ngele owa pumbwa okulundulula okunwa kwoye, mokwiipula omapulo ngano: ‘Mbela opu na gumwe gwaandjetu nenge kuume kopothingo a tile kutya oti ipula nokunwa kwandje iikolitha?’ Ngele osho, otashi ulike kutya oto kokeke ondjigilile yoku yi nwa unene, nenge wu na uupyakadhi muyo mboka kuu wete. ‘Mbela ohandi nu unene sha pitilila?’ Omuntu ngoka inaa pikwa kiikolitha otashi vulika a kale monkalo ndjoka tayi mu fala mokupikwa kuyo. ‘Mbela ohandi mono oshidhigu okukala inaandi nwa iikolitha omasiku omashona nenge ge vulithe po?’ Ngele osho, iikolitha otashi vulika ye ku pika. Shoka otashi vulika tashi ti kutya owa pumbwa ekwatho lya ikalekelwa, opo wu sinde uupyakadhi mboka.

Molwaashoka okunwa ohaku vulu okweeta omaupyakadhi ogendji, Aakriste oyendji oya tokola kaaya makele iikolitha. Yamwe otashi vulika ya tokola kaaya nwe, molwashoka kaaye yi hole. Ngele gumwe gwomookuume koye oha nu, simaneka  etokolo lye, mokupopya naye nombili nopwaa na oku mu uusama.

Nenge otashi vulika wa tokola wu itulile po omangambeko kutya oto nu iikolitha shi thike peni. Omukriste otashi vulika a itulile po omangambeko kutya ota kala ha nu shi thike peni. Nenge tashi vulika a itulile po ompango kutya ota kala ha nu lungapi, tashi vulika a tokole okunwa lumwe aluke moshiwike, nenge a kale ha nu sha eleka, uuna ta li. Yalwe oya tokola kutya iikolitha yoludhi luni taya kala haya longitha, ngaashi okunwa omaviinu nenge ombiila, ihe haikolitha iidhigu nenge mbyoka ya lumbakanithwa. Ngele omuntu okwa itulile po omangambeko omawanawa ge na ko nasha nokunwa, otashi ka kala oshipu kuye oku ga tula miilonga. Omukriste a pyokoka ina pumbwa okukala a sa ohoni, ngele okwa ninga etokolo lya tya ngawo, e te li tula miilonga.

Otu na okukala hatu yaalele yalwe, uuna tatu ningi omatokolo ge na ko nasha niikolitha. Aaroma 14:21 oya ti: “Oshinima shoka oshiwanawa okuninga, okukala ihoo li onyama noihoo nu omaviinu nenge okuninga kehe tuu shoka tashi pundukitha mukweni.” Ongiini to vulu okutula omayele ngono miilonga? Omokuulika ohole yuumwayinathana. Ngele owu wete kutya okunwa iikolitha kwoye otaku vulu okupundukitha yalwe, otashi ka kala pahole oku yi etha po. Ngele owe shi ningi, otashi ka ulika kutya owa simaneka nowu hole yalwe nonokutya owu na ko nasha nayo shi vulithe pungoye. — 1 Kor. 10:24.

Shimwe ishewe, epangelo otashi vulika li na oompango dhi na ko nasha niikolitha, ndhoka dhi na okuwilika etokolo lyOmukriste. Oompango ndhoka otashi vulika tadhi popi kutya aantu yomimvo dhi thike peni ye na okunwa iikolitha nenge dha indika oku yi nwa uuna omuntu ta hingi nenge ta longitha iikwamashina yontumba. — Rom. 13:1-5.

Jehova okwe tu pa omagano ogendji omawanawa. Shoka osha kwatela mo omagano gokulongitha emanguluko lyokuninga omatokolo kombinga yaashoka tatu kala hatu li nohatu nu. Ano omatokolo getu naga ulike kutya otwa lenga emanguluko ndyoka, moku li longitha tu nyanyudhe Tate yetu gwomegulu.