Mbela owa lesha ngaa nawa Ooshungolangelo dhomumvo nguka? Tala ngele oto vulu okuyamukula omapulo taga landula:

‘Okushitulula omadhiladhilo getu’ osha kwatela mo shike? (Rom. 12:2)

Inashi kwatela mo owala okulonga iilonga iiwanawa. Osha kwatela mo okukonakona uuntu wetu womeni nokuninga omalunduluko ngoka ga pumbiwa, opo tu vulike komithikampango dhaKalunga. — w23.01, ep. 8-9.

Ongiini tatu vulu okuulika ondjele, uuna tatu tala kiiningwanima yomuuyuni?

Otu na ohokwe mokumona nkene iiningwanima yopethimbo ndika tayi gwanitha po omahunganeko gomOmbiimbeli. Okukala hatu tengeneke egwanitho lyomahunganeko ohaku yono po uukumwe megongalo. Onkee ano pehala lyokuninga ngawo, otwa pumbwa okukankamekela oonkundana dhetu kiileshomwa mbyoka ya nyanyangidhwa kehangano lyaJehova. (1 Kor. 1:10) — w23.02, ep. 16.

Eninginitho lyaJesus olya yooloka ko ngiini kwaandyoka lyaalanduli ye?

Jesus ka li a pumbwa okwiiyapulila Jehova, molwaashoka okwa valwa moshigwana sha li sha yapulilwa Kalunga. Okwa li a gwanenena noke shi omulunde. Ka li a pumbwa okwiiyela ombedhi omolwomayono ge. — w23.03, ep. 5.

Ongiini tatu vulu okukwathela yalwe ya gandje omatyokosha pokugongala?

Otatu vulu okugandja omatyokosha omafupi, opo tu pe yalwe ompito nayo ya kuthe ombinga. Otatu vulu wo okuyanda okupopya kombinga yiitsa oyindji unene. Kungawo, yalwe otaya ka vulu okukala ye na oshindji okutya. — w23.04, p. 23.

“Ondjila ondjapuki” ndjoka ya popiwa muJesaja 35:8, otayi ulike kushike?

Onenendjila yopathaneko ndjoka tango oya li tayi ulike kondjila yAajuda okuza kuBabilonia yu uka kevi lyaandjawo. Mbela oya li tayi ulike kushike methimbo opo lya zi ko? Omathelemimvo ga tetekele omumvo 1919, opwa li pwa ningwa omalongekidho ge na ko nasha nokutoloka nokunyanyangidha Oombiimbeli nosho wo iinima yimwe. Oshigwana shaKalunga osha li sha tameke okweenda ‘mOndjila ondjapuki’ sha uka moparadisa yopambepo, ano mUukwaniilwa waKalunga, mboka tawu ke shi etela oonkalo oombwanawa. — w23.05, ep. 15-19.

Omayeletumbulo ontopolwa 9 otayi popi omayele ngoka taga popi shi na ko nasha naakiintu yaali yopathaneko?

Omayeletumbulo otaga popi kombinga ‘yomukiintu omugoya’ ngoka ehiyo lye tali fala ‘moshaasi’ nosho wo kombinga ‘yowino,’ ndyoka tayi thaneke omukiintu ngoka ehiyo lye tali fala ‘momapola goondunge’ nosho wo komwenyo gwaaluhe. (Omayel. 9:1, 6, 13, 18) — w23.06, pp. 22-24.

Eifupipiko lyaKalunga nosho wo okutifuka kwe oya li yi iwetikile ngiini mokuungaunga kwe naLot?

Jehova okwa li a lombwele Lot a ye kuSodom, oshitopolwa shokoondundu. Sho Lot a pula Kalunga pehala lyaashono a ye kuZoar, Kalunga okwe shi zimine. — w23.07, p. 21.

Omukulukadhi ota vulu okuninga shike ngele omusamane gwe oha tala omathano giipala?

Omukulukadhi oku na okudhimbulukwa kutya ke na okwiipa uusama. Oku na okugandja eitulomo kekwatathano lye naKalunga nokutedhatedha kombinga yomahokololo gomOmbiimbeli gaakiintu mboka ya li ya hekelekwa kuKalunga. Ota vulu okukwathela omusamane gwe a yande oonkalo ndhoka tadhi mu tula memakelo. — w23.08, ep. 14-17.

Ongiini oondunge dhokuyoolola hadhi tu kwathele tu kale nomwenyo omwaanawa, uuna eitaalo lyetu tali makelwa?

Otatu vulu okutala ko epulo nenge emakelo kutya otali vulu oku tu kwathela tu mone shoka omuntu ta dhiladhila nenge ti ipula nasho. Shono otashi ke tu kwathela tu mu yamukule twa ngungumana. — w23.09, ep. 17.

Oshike tatu ilongo kuMaria, uuna twa pumbwa oonkondo?

Sho yalwe ya uvu kutya Maria ota ka ninga yina yaMesias, oye mu nkondopaleka. Gabriel naElisabet oye mu tsu omukumo nOmanyolo. Natse wo otatu vulu okunkondopalekwa kaalongelikalunga ooyakwetu. — w23.10, ep. 15.

Jehova oha yamukula ngiini omagalikano getu?

Jehova okwa uvaneka kutya ota ka pulakena komagalikano getu noha tala nkene ga pambathana nelalakano lye. (Jer. 29:12) Otashi vulika a yamukule omagalikano getu momikalo dha yoolokathana, ihe ote ke tu ambidhidha aluhe. — w23.11, ep. 21-22.

MAaroma 5:2 omwa tumbulwa ‘etegameno,’ mbela omolwashike lya tumbulwa ishewe movelise 4?

Omuntu ngele okwa uvu onkundana ombwanawa, otashi vulika a kale e na etegameno lyoku ka kala nomwenyo sigo aluhe meviparadisa. Ihe ngele okwa iyadha momaudhigu, e te ga idhidhimikile nokumona kutya Kalunga okwe ku hokwa, etegameno lye otali kolo shi vulithe nale notali kala oshinima shopaumwene. — w23.12, ep. 12-13.