1. Yamwe otashi vulika ya kale ye uvitile ngiini okukala nomwenyo sigo aluhe?

 AANTU oyendji ohaya li iikulya mbyoka tayi tungu nohaya kambadhala okuninga omadhewo pandjigilile, opo ya kale ye na uukolele. Ihe nonando ongawo, ihaya kala ya tegelela ya kale nomwenyo sigo aluhe. Otashi vulika ya dhiladhile kutya itaya vulu okukala nomwenyo sigo aluhe, omolwomaupyakadhi ngoka haga etwa kuukulupe. Ihe nonando ongawo, Jesus okwa ti kutya aantu otaya vulu okukala ‘nomwenyo gwaaluhe’ ngaashi sha popiwa muJohannes 3:16 nosho wo ontopolwa 5:24.

2. Johannes ontopolwa 6, oya popi shike shi na ko nasha nomwenyo gwaaluhe? (Joh. 6:39, 40)

² Oshikando shimwe, Jesus okwa li a kutitha ongundu yaantu niikwiila noohi pashikumithalonga. a Shoka osha li oshikumithi, ihe shoka a ka popya esiku lya landula ko, osho nokuli uunene sha li tashi kumitha. Ongundu yaantu oya li ye mu landulile ko kuKapernaum, popepi nomunkulofuta gwaGalilea, naahoka okwa li e ya lombwele kutya aantu otaya ka yumudhwa notaya ka kala nonkalamwenyo sigo aluhe. (Lesha Johannes 6:39, 40.) Okutala kwaashono, dhiladhila kookuume koye nosho wo  koyaandjeni mboka ya sa. Oohapu dhaJesus otadhi ulike kutya oyendji mboka ya sa otaya ka yumudhwa. Ngoye nosho wo aantu mboka wu hole otamu ka kala nonkalamwenyo sigo aluhe. Ihe nonando ongawo, osha li oshidhigu koyendji okuuva ko oohapu dhaJesus, ndhoka a ka popya muJohannes ontopolwa 6. Natu ka taleni kudhimwe dhomudho.

3. Sha ikolelela kuJohannes 6:51, Jesus okwa holola shike kombinga ye mwene?

³ Ongundu ndjoka yomuKapernaum sho ya mono iikwiila mbyoka Jesus e ya pe pashikumithalonga oya mono kutya osha pambathana nomanna ngoka Jehova a li a pe oohekulululwa. Odhoshili kutya Omanyolo oga ti kutya omanna ‘iikulya ya za megulu.’ (Eps. 105:40; Joh. 6:31) Jesus okwa li a longitha omanna, ngoka aantu ye shi, opo a vule oku ya kwathela ya uve ko oshinima sha simana. Nonando omanna oga li elongekidho lyopashikumithalonga ga za kuJehova, mboka ye ga li, lwanima oya ka sa. (Joh. 6:49) Jesus okwa ipopi e li “oshikwiila sha za megulu,” “oshikwiila shaKalunga” noku li “oshikwiila shomwenyo.” (Joh. 6:32, 33, 35) Jesus okwa popi kombinga yeyooloko enene ndyoka li li pokati ke, nomanna ngoka Jehova a li a gandja. Okwa ti: “Ongame oshikwiila shomwenyo, shoka sha zi megulu. Kehe ngoka ta li oshikwiila shoka ota kala sigo aluhe.” (Lesha Johannes 6:51.) Aajuda mboka oya li ya geya. Kaya li ye uvite ko kutya omolwashike Jesus a ipopi kutya ye “oshikwiila” shoka sha za megulu, shoka sha simana shi vule omanna ngoka Kalunga a li a pe oohekulululwa. Ihe Jesus okwe ya lombwele a ti: “Oshikwiila shoka tandi gandja, osho olutu lwandje.” Mbela okwa li a hala okutya shike? Osha simana tu uve ko kutya okwa li a hala okutya shike, molwaashoka otashi tu kwathela tu mone nkene tatu ka vula okukala nomwenyo gwaaluhe pamwe noyaandjetu. Natu taleni kutya Jesus okwa li a hala okutya shike.

OSHIKWIILA SHOMWENYO NOSHO WO OLUTU LWE

4. Omolwashike yamwe ya li ya kuminwa shono Jesus a ti?

⁴ Yamwe yomwaamboka ya li ya uvu sho Jesus ta popi kombinga ‘yolutu lwe, ndwoka talu gandjwa omolwoomwenyo dhaantu,’ oya li ya kumwa. Otashi vulika ya li taya dhiladhila kutya, ote ke ya pa onyama yo yeneyene. (Joh. 6:52) Jesus okwa li wo a gwedha ko uuyelele mboka tawu kumitha noonkondo sho a ti: “Ngele itamu li olutu lwOmuna gwomuntu nokunwa ombinzi ye, itamu ka mona omwenyo.” — Joh. 6:53.

5. Omolwashike tatu vulu okukala nuushili kutya Jesus ka li a hala okutya aantu oye na okunwa ombinzi ye yo yeneyene?

⁵ Pethimbo lyaNoa, Kalunga okwa li a indike aantu kaaya lye ombinzi. (Gen. 9:3, 4) Lwanima, Jehova okwa li wo a lombwele Aaisraeli kaaya lye ombinzi. Kehe ngoka ta li ombinzi okwa li e na “okudhimwa mo maantu yaKalunga,” nenge tu tye a dhipagwe. (Lev. 7:27) Jesus okwa li a popile ompango ndjoka. (Mat. 5:17-19) Onkee, Jesus ka li nando ta ka pula Aajuda ya lye olutu lwe lwo lwenelwene, nenge ya nwe ombinzi ye yo yeneyene. Nonando Jesus okwa li a popi oohapu tadhi kumitha, okwa longo aantu nkene ye na oku ka mona “omwenyo gwaaluhe.” — Joh. 6:54.

6. Omeityo lini tu uvite ko oohapu dhaJesus kombinga yokulya olutu lwe, nokunwa ombinzi ye?

⁶ Jesus okwa li a hala okutya ngiini? Osha yela kutya Jesus okwa li ta popi meityo lyopathaneko. Okwa li e shi ningi sho a lombwele omukiintu Omusamaria a ti: “Ihe kehe ngoka ta nu omeya, ngoka tandi mu pe, ita ka sa we enota nandonando, ihe omeya, ngoka tandi mu pe, otaga ka kala ngaashi omeya gothithiya  muye, taga fuluka, ge mu pe omwenyo gwaaluhe.” (Joh. 4:7, 14) b Jesus ka li a hala okutya omukiintu Omusamaria ota ka mona omwenyo gwaaluhe, ngele okwa nu omeya go genegene. Sha faathana, Jesus ka li a ti kutya ongundu ndjoka a li a popi nayo muKapernaum, otayi ka kala nomwenyo sigo aluhe, ngele oya li olutu lwe lwo lwenelwene nokunwa ombinzi ye yo yeneyene.

EYOOLOKO POKATI KIININGWANIMA IYALI

7. Yamwe oya ti ngiini kombinga yoohapu dhaJesus, ndhoka dhi li muJohannes 6:53?

⁷ Aantu yomomalongelokalunga gamwe ohaya ti kutya oohapu dhaJesus, ndhoka dhi li muJohannes 6:53, tadhi popi kombinga yokulya olutu lwe nokunwa ombinzi ye, odha ukithwa kUulalelo wOmuwa, molwaashoka pompito ndjono, Jesus okwa li a popi oohapu dha faathana. (Mat. 26:26-28) Yamwe ohaya ti kutya kehe gumwe ngoka ha kala pUulalelo wOmuwa, oku na okukutha ombinga mokulya oshikwiila nokunwa omaviinu, mbyoka hayi itaambekidhwa kwaamboka ye li po. Mbela oye li mondjila? Osha simana tu mone eyamukulo kombinga yaashoka, oshoka omumvo kehe aantu omamiliyona muuyuni awuhe, ohaya gongala pamwe natse poshiningwanima shoka. Otatu ka mona kutya opu na eyooloko pokati koohapu ndhoka dhi li muJohannes 6:53, naashoka Jesus a li a popi pUulalelo wOmuwa.

8. Eyooloko lini li li pokati kiiningwanima mbyoka iyali? (Tala wo ethano.)

 ⁸ Natu taleni keyooloko ndyoka li li pokati kiiningwanima mbyoka iyali. Lyotango, uunake nopeni Jesus a popile oohapu ndhoka tadhi adhika muJohannes 6:53-56? Okwe dhi popile muGalilea mo 32, E.N, ta lombwele ongundu yAajuda. Okwa li e shi ningi konima yomumvo gumwe lwaampono, manga inaa dhika po Uulalelo wOmuwa muJerusalem. Oshitiyali, oohapu dhe odha li dha nuninwa oolye? Oyendji yomaapulakeni ye muGalilea, oya li unene ye na ko nasha nokugwanitha po oompumbwe dhawo dhopalutu dhopokathimbo, pehala lyokugwanitha po oompumbwe dhawo dhopambepo. (Joh. 6:26) Uushili owo kutya, uuna Jesus a popi oshinima shoka ya li ye wete oshidhigu okuuva ko, oya li ya kanitha nziya eitaalo lyawo muye. Nokuli nayamwe yomaalongwa ye, oya etha po oku mu landula. (Joh. 6:14, 36, 42, 60, 64, 66) Yelekanitha oshiningwanima shoka naashoka sha ka ningwa po konima yomumvo gumwe lwaampono 33 E.N., sho Jesus a dhike po Uulalelo wOmuwa. Pompito ndjono, aayapostoli ye aadhiginini ye li 11, oya li naye, nonando kaya li ye uvite ko thiluthilu ashihe shoka e ya longo. Natango, mepingathano naamboka yomuGalilea, aayapostoli ye aadhiginini oya li ya tompwa kutya Jesus Omuna gwaKalunga, ngoka a zi megulu. (Mat. 16:16) Okwe ya pandula a ti: “Ihe ne one mwa kala pamwe nangame momamakelo gandje.” (Luk. 22:28) Iiningwanima mbika iyali, otayi ulike kutya oohapu dhaJesus ndhoka tadhi adhika muJohannes 6:53, itadhi ulike kwaashoka sha ka ningwa po, pUulalelo wOmuwa. Opu na wo uumbangi wa gwedha po.

NANGOYE OWA KWATELWA MO

9. Oohapu dhaJesus ndhoka a popi pUulalelo wOmuwa odha ukithwa koolye?

⁹ Pethimbo lyUulalelo wOmuwa, Jesus okwa li a pe aayapostoli ye oshikwiila inaashi ya efulika nokwe ya lombwele kutya otashi thaneke olutu lwe. Opo nduno okwe ya pe omaviinu nokwa ti kutya otaga thaneke “ombinzi yandje yehangano.” (Mark. 14:22-25; Luk. 22:20; 1 Kor. 11:24) Shoka osha simana noonkondo. Ehangano epe olya dhikwa po ‘nAaisraeli yopambepo,’ mboka taya ka kala “mUukwaniilwa waKalunga,” ihe kali shi naantu ayehe. (Heb. 8:6, 10; 9:15) Aayapostoli kaya li ya uvu ko oshinima shoka pethimbo mpoka, ihe masiku oya li taya gwayekwa nombepo ondjapuki nokukala oshitopolwa shehangano epe, ya ka kale, pamwe naJesus megulu. — Joh. 14:2, 3.

10. Omolwashike shoka Jesus a li a popi muGalilea, sha yooloka ko kwaashoka a li a popi pUulalelo wOmuwa? (Tala wo ethano.)

¹⁰ Dhimbulukwa kutya pethimbo lyUulalelo wOmuwa, Jesus okwa li a gandja eitulomo ‘koshigunda oshishona.’ Aayapostoli ye aadhiginini, oyo ya li yotango yomongundu ndjoka onshona. (Luk. 12:32) Aayapostoli nayalwe mboka ya li mongundu ndjoka, oya li ya tegelelika ya kuthe ombinga mokulya oshikwiila nokunwa omaviinu. Oyo otaya ka pewa ehala megulu pamwe Jesus. Onkee, ndino olyo eyooloko lilwe ndyoka li li pokati kUulalelo wOmuwa naashoka a li a popi muGalilea. Shoka Jesus a li a popi pUulalelo wOmuwa, okwa li e shi ukitha kokangundu okashona. Ihe shoka a li a popi, osha li sha kwatela mo aantu oyendji.

11. Jesus okwa popi shike muGalilea, shoka tashi ulike kutya ka li owala a ukitha kokangundu okashona?

¹¹ Sho Jesus a li muGalilea mo 32 E.N., okwa li unene ta popi kombinga yAajuda, mboka ya li ya hala e ya pe iikulya. Ihe Jesus okwa li a kambadhala oku ya kwathela ya uve ko kutya, opu na oshinima shoka sha simanenena, shi vulithe iikulya. Okwa popi kombinga yetegameno lyoku ka mona omwenyo gwaaluhe. Jesus okwa ti kutya mboka ya sa, otaya ka  vula okuyumudhwa mesiku lyahugunina noku ka kala nomwenyo sigo aluhe. Ka li a ukitha kokangundu okashona ngaashi a li e shi ningi lwanima pUulalelo wOmuwa. Pehala lyaashono, muGalilea, okwa li a popi kelalekonuuyamba ndyoka aantu ayehe taya ka mona. Okwa ti: “Kehe ngoka ta li oshikwiila shoka, ota kala sigo aluhe. . . Oshikwiila shoka tandi gandja, osho olutu lwandje, ndwoka talu gandjwa omolwoomwenyo dhaantu.” — Joh. 6:51. c

12. Otwa pumbwa okuninga shike, opo tu ka mone mo uuwanawa mwaashoka Jesus a popi?

¹² Jesus ka li a lombwele Aajuda kutya elalekonuuyamba ndika, otali ka ningilwa kehe gumwe ngoka e li ko, nenge ngoka ta ka valwa. Ihe oomboka owala haya “li oshikwiila shoka,” ano mboka ye na eitaalo muye taya ka mona mo uuwanawa. Aakriste oyendji ohaya kala ye uvite kutya shampa owala ye na ‘eitaalo muJesus’ noye mu tala ko e li omugameni gwawo otaya ka hupithwa. (Joh. 6:29) Natango, yamwe yomongundu ndjoka ya li ya itaala muJesus, oya etha po oku mu landula. Omolwashike?

13. Okukala omulongwa gwaJesus gwashili, osha hala okutya shike?

¹³ Oyendji yomongundu ndjoka Jesus a kutitha, oya li ya panda oku mu landula, shampa owala te ya pe shoka ya pumbwa. Oya li ya hala e ya aludhe, e ya pe iikulya noku ya lombwela iinima mbyoka tayi nywitha omakutsi. Ihe nonando ongawo, Jesus okwa li a ulike kutya aalongwa ye oye na okuninga oshindji. Ka li e ya kombanda yevi, opo ando a gwanithe po omahalo gaantu gopanyama. Oya li ye na  “okuya” kuye, ano okupulakena nokuvulika ku kehe shimwe shoka a li a longo. — Joh. 5:40; 6:44.

14. Oshike tu na okuninga, opo tu mone mo uuwanawa molutu nomombinzi yaJesus?

¹⁴ Jesus okwa li e ya longo kutya mokuyamba po olutu lwe nosho wo ombinzi ye, okwa li te ke shi ningitha tashi wapa ya ka kale nomwenyo sigo aluhe. Oshinima shoka oya li ye na oku shi itaala. Eitaalo ndyoka olya li lya simanenena kAajuda mboka, nolya simanenena wo nokunena. (Joh. 6:40) Opo tu mone mo uuwanawa ‘molutu nomombinzi’ yaJesus, ngaashi sha popiwa muJohannes 6:53, otwa pumbwa okukala tu na eitaalo mekuliloyambo. Ompito ndjoka oya egulukila aantu oyendji. — Ef. 1:7.

15-16. Iinima yini ya simana twa ilonga muJohannes ontopolwa 6?

¹⁵ MuJohannes ontopolwa 6, otwa ilonga mo iinima oyindji ya simana notayi tu tsu omukumo atuheni. Otayi popi sha yela nkene Jesus ha kala e uvitile aantu ohenda. Manga e li muGalilea, okwa li a aludha aantu, a longo aantu kombinga yUukwaniilwa nokwa shilipaleke kutya oompumbwe dhaantu dhiikulya odha gwanithwa po. (Luk. 9:11; Joh. 6:2, 11, 12) Shoka sha simanenena, okwa li e ya longo kutya oye “oshikwiila shomwenyo.” — Joh. 6:35, 48.

¹⁶ Mboka a ti kutya oye li “oonzi dhilwe,” ihaya nokaye na okukutha ombinga mokulya oshikwiila nokunwa omaviinu pUulalelo wOmuwa. (Joh. 10:16) Ihe nonando ongawo, ohaya mono mo uuwanawa molutu nomombinzi yaJesus Kristus. Ohaye shi ningi mokuulika eitaalo mongushu yekuliloyambo lye, ndyoka tali ya hupitha. (Joh. 6:53) Mepingathano naashono, mboka haya kutha ombinga mokulya oshikwiila nokunwa omaviinu, ohaya ulike kutya oye li oshitopolwa shehangano epe noye na etegameno lyoku ka pangela mUukwaniilwa womegulu. Onkee ano, kutya nduno otu li aagwayekwa, nenge oonzi dhilwe, osha simana okwiilonga sha mehokololo ndyoka li li muJohannes ontopolwa 6. Otali tsu omuthindo nkene sha simana okuulika eitaalo, opo tu ka kale nomwenyo gwaaluhe.