Omuyapostoli Paulus okwa a li a nyolele omukuluntugongalo omukwawo, Timoteus a ti: “Otandi ku ganitha koshipala shaKalunga nosha Jesus Kristus nomontaneho yaayengeli aayapuki: Dhiginina elongo ndika, waa kale nando nontondo nenge nondhipi mwaayihe mbyoka to yi ningi.” — 1 Tim. 5:21.

Tango, natu tale kutya oolye inaaya kwatelwa mo maayengeli mboka. Osha yela kutya kaye shi okangundu 144 000. Pethimbo sho Paulus ta nyolele Timoteus, eyumuko lyAakriste aagwayekwa ya ye megulu kalya li lya tameka. Aayapostoli naagwayekwa yalwe, kaya li natango ya ninga iishitwa yopambepo, onkene uutumbulilo ‘aayengeli aayapuki’ inawu ukithwa kuyo. — 1 Kor. 15:50-54; 1 Tes. 4:13-17; 1 Joh. 3:2.

Shimwe ishewe, uutumbulilo ‘aayengeli aayapuki’ inawu ukithwa kaayengeli mboka inaaya vulika pethimbo lyEyelu, oshoka oya wayimine Satana noya ningi oondemoni, ano aatondi yaJesus. (Gen. 6:2; Luk. 8:30, 31; 2 Pet. 2:4) Monakuyiwa, oondemoni otadhi ka umbilwa molumbogo, moka tadhi ka kala uule womimvo eyuvi, nokonima otadhi ka hanagulwa po pamwe naSatana. — Jud. 6; Eh. 20:1-3, 10.

‘Aayengeli aayapuki,’ mboka Paulus a popi, oye na okukala ye li megulu, nohaya ambidhidha ‘Kalunga naJesus Kristus,’ mboka nayo ya popiwa movelise ndjoka.

Opu na aayengeli aadhiginini omayovi ogendji. (Heb. 12:22, 23) Osha fa shi li ngeyi kutya ayehe kaye na oshinakugwanithwa sha faathana, noihaya gwanitha po iinakugwanithwa yawo pethimbo limwe. (Eh. 14:17, 18) Pashiholelwa, omuyengeli gumwe okwa li a pewa oshinakugwanithwa shokuhanagula po aakwiita Aayassur 185 000. (2 Aak. 19:35) Aayengeli yontumba otashi vulika ya li ya pewa oshinakugwanithwa ‘shokuyoolola mo mUukwaniilwa waJesus iinima ayihe mbyoka hayi pundukitha aantu, naamboka haya longo shoka inaashi uka.’ (Mat. 13:39-41) Yamwe otashi vulika ye na oshinakugwanithwa ‘shokugongela aahogololwa ye’ megulu. (Mat. 24:31) Omanga yalwe ye na oshinakugwanithwa ‘shoku tu shiga shaampoka tu li.’ — Eps. 91:11; Mat. 18:10; yelekanitha Mateus 4:11; Luk. 22:43.

‘Aayengeli aayapuki,’ mboka ya popiwa muTimoteus gwotango 5:21, otashi vulika aayengeli mboka ya pewa iinakugwanithwa ya ikalekelwa yokutonatela oshigwana shaKalunga. Menyolo ndyoka, Paulus okwa gandja omayele gopandunge kombinga yaakuluntugongalo, mboka ye na okusimanekwa kuyalwe megongalo. Paulus okwa ti kutya aakuluntugongalo kaye na okukala nando “nontondo nenge nondhipi,” sho taya gwanitha po iinakugwanithwa yawo nokaye na okuninga omatokolo inaaga dhiladhilwa nawa. Paulus okwa li e ya pe etompelo lya simanenena lyokulandula omayele ge, ngono kutya, otaya yakula aamwahe “koshipala shaKalunga noshaJesus Kristus nomontaneho yaayengeli aayapuki.” Eeno, aayengeli yamwe oya pewa iinakugwanithwa ya ikalekelwa megongalo, ngaashi oku li gamena okutonatela iilonga yokuuvitha, nokulombwela Jehova shoka ya mona. — Mat. 18:10; Eh. 14:6.