Mbela owa lesha ngaa nuukeka, iitopolwa yOoshungolangelo dhonuumvo? Tala ngele oto vulu okuyamukula omapulo taga landula:

Jehova okwa tula po oshiholelwa shini, shi nako nasha nokuungaunga naakiintu?

Oha ungaunga nayo kaapu na okatongo, ano iha tala ko aalumentu ye ya vule. Kalunga oha pulakene kaakiintu, na oku na ko nasha nankene ye uvite nosho wo nomaipulo gawo. Okwe ya inekela ya gwanithe po iilonga ye. — w24.01, ep. 15-16.

Ongiini tatu vulu okutula miilonga Aaefeso 5:7, ndjoka tayi ti: “Inamu kala mu na ekwatathano naantu ya tya ngaaka”?

Omuyapostoli Paulus okwa li te tu londodha kaatu endathane naantu mboka taye ke shi ningitha oshidhigu kutse, tu vulike komithikampango dhaJehova. Eendathano ndyoka inaali yogoka, olya kwatela mo aantu mboka hatu kala nayo oshipala noshipala naamboka hatu endathana nayo komapandja gopaintaneta. — w24.03, ep. 22-23.

Omahokololo giifundja goludhi luni twa pumbwa okuyanda?

Otwa pumbwa okukotokela omahokololo ngoka inaaga shilipalekwa ngele ogoshili, okuza kookuume ketu, oo-email ndhoka dha tumwa kaantu mboka kaatu shi, naashunimonima mboka haya iningitha ya fa ye na ohokwe metumwalaka lyetu. — w24.04, ep. 12.

Oshike tu shi, noshike kaatu shi kombinga yankene Jehova ta ka pangula omukwaniilwa Salomo naamboka ya sila muSodom naGomorra nomEyelu?

Katu shi wo lelalela ngele Jehova okwe ya tokolela ehanagulo lyaaluhe. Ihe otu shi kutya oye e shi iinima ayihe, na oku na wo ohenda onene. — w24.05, ep. 3-4.

Sho Kalunga e li “emanya” ohashi tu shilipaleke kombinga yashike? (Deut. 32:4)

Otatu vulu okukonga egameno kuJehova. Oku shi okwiinekelwa, noha gwanitha po aluhe omauvaneko ge. Iha tengauka, nuukwatya we nelalakano lye kayi na esiku yi lunduluke. — w24.06, ep. 26-28.

Oshike tashi vulu oku ku kwathela wu igilile megongalo epe?

Inekela muJehova ngoka te ke ku kwathela, ngaashi owala a li a kwathele aapiya ye monakuziwa. Yanda okuyelekanitha egongalo hoka wa za naandyoka wu li. Kutha ombinga miinima yomegongalo ndyoka wa za, kambadhala okupanga uukuume nayalwe. — w24.07, ep. 26-28.

Iiyilongomwa yini yi li momayele gatatu ngoka taga adhika muMateus ontopolwa 25?

Eyele lyoonzi niikombo otali tsu omuthindo okukala omudhiginini nomwiinekelwa. Lyaakadhona aanandunge naamboka omagoya, otali tsu omuthindo nkene sha simana okukala twa ilongekidha notwa tonata. Lyo lyiitalenti otali tsu omuthindo nkene sha simana okulonga nuudhiginini nonuupenda. — w24.09, ep. 20-24.

Mbela ondjugo yethikilo yomotempeli yaSalomo oya li yi na uule wu thike peni?

Omanyolwakaha gamwe mOndjalulo ontiyali 3:4 oga ti: “Oondja 120.” Shoka sha ningitha ondjugo yethikilo yi kale yi na uule woometa 53, muule wopombanda. Ihe omanyolo gamwe ge shi okwiinekelwa, oga ti: “Oondja 20,” shoka sha ningitha otempeli yi kale yi na uule woometa 9. Enyolo ndyoka olya fa tali tsu kumwe nuunene wekuma lyotempeli. — w24.10, ep. 31.

Osha hala okutya ngiini omuyakuligongalo a kale e na “omukiintu gumwe?” (1 Tim. 3:12)

Osha hala okutya okwa hokana owala omukiintu gumwe noke na nando okuya momilalo dha nyata. Shimwe ishewe, iha gandja nando eitulomo lya pitilila kaakiintu yalwe. — w24.11, ep. 19.

Omolwashike tatu vulu okutya shoka Jesus a popi muJohannes 6:53 inashi faathana naashoka a li a popi puulalelo wOmuwa?

Johannes 6:53 ota popi kombinga yokulya olutu lwaJesus nokunwa ombinzi ye. Jesus okwa popi oohapu ndhoka mo 32 E.N., muGalilea ta lombwele Aajuda mboka ya li natango ya pumbwa okukala ye na eitaalo muye. Ihe uulalelo wOmuwa owa li wa dhikwa po konima yomumvo gumwe muJerusalem. Puulalelo wOmuwa Jesus okwa li a popi naamboka taya ka pangela pamwe naye megulu. — w24.12, ep. 10-11.