1-3. (a) Omolwashike tu na uushili kutya otatu vulu okuninga ookuume kaKalunga? (b) Iiholelwa yoolye tatu ki ilonga moshitopolwa shino?

OMBIIMBELI oya popya lwiikando itatu kutya Abraham okuume kaKalunga. (2 Ondjalulo 20:7; Jesaja 41:8; Jakob 2:23) Oye awike i ithanwa kuume kaKalunga kondandalunde mOmbiimbeli. Mbela shono otashi ti kutya Abraham oye owala omuntu a li ta vulu okuninga kuume kaKalunga? Aawe. Ombiimbeli oye shi popya kutya atuheni otu na uuthembahenda wokuninga ookuume ke.

² Iiholelwa oyindji yaalumentu naakiintu aadhiginini, mbono ya li aatilikalunga, oya nyolwa mOmbiimbeli. Aantu mboka oya li ye na eitaalo muye noya ningi ookuume ke. (Lesha Episalomi 25:14.) Oye li oshitopolwa ‘shongundu onene yoonzapo’ ndyoka ya popiwa kuPaulus. Aantu ayehe mboka oya li ookuume kopothingo kaJehova. — Aahebeli 12:1.

³ Oshitopolwa shika otashi kundathana kombinga yookuume yatatu yaJehova mboka ya popiwa mOmbiimbeli. Gwotango, oRut, omuselekadhi omugundjuka omudhiginini a za kuMoab. Omutiyali, oHiskia, omukwaniilwa omudhiginini gwaJuda. Omutitatu,  oMaria, yina yaJesus. Maria okwa li omwiifupipiki. Otatu ka taleni nkene sha li she ende, opo ayehe ya ninge ookuume kaKalunga, naashoka tatu ilongo miiholelwa yawo.

4, 5. Etokolo edhigu lini Rut a li e na okuninga, nomolwashike lya li edhigu? (Tala kethano lyopetameko.)

⁴ Kuku Naemi niitenya ye iyali, Rut naOrpa oya li yi idhenge ondjila taya zi kuMoab yu uka kuIsraeli. Orpa okwa li a hulile ondjilakati, e ta shuna koyaandjawo. Naemi okwa li a tokola a mana a shune kuIsraeli, koshilongo shaandjawo. Mbela Rut okwa ningi po shike? Okwa li e na okuninga etokolo lyomondjila, nonando kasha li oshipu. Okwa li e na okuhogolola pokati kokushuna kuMoab nokulandula yinamweno, Naemi, ngoka a li ta shuna kuBetlehem. Rut okwa li a ningi po shike? — Rut 1:1-8, 14.

⁵ Rut Omumoab, nomo mwa li ezimo lye. Okwa li ta vulu okushuna kaakwanezimo lye, oyo ye ke mu sile oshimpwiyu. Okwa li e shi nawa elaka, omuthigululwakalo nosho wo aantu yomuMoab. Mbela Rut okwa li e shi elaka, omuthigululwakalo naantu yokuBetlehem hono yu uka naNaemi? Aawe. Shimwe ishewe, Naemi okwa li a tila kutya Rut ita ka mona ko omusamane nenge egumbo kuBetlehem. Onkee ano, Naemi okwa li a ladhipike Rut a shune koshilongo shawo. Ngaashi twe shi mono, Orpa “okwa yi koyaandjawo nokookalunga ke.” (Rut 1:9-15) Mbela Rut naye okwa li a tokola a shune koyaandjawo nokiikalunga mbyoka hayi longelwa koshilonga shawo? Hasho nando.

6. (a) Etokolo lyopandunge lini Rut a li a ningi? (b) Omolwashike Boas a ti kutya Rut okwe ya okukonga egameno kuJehova?

⁶ Otashi vulika Rut a li a longwa kombinga yaJehova komusamane gwe nenge kuyinamweno, Naemi. Rut okwi ilongo kutya Jehova ina fa iikalunga yAamoab. Okwa li e hole Jehova, nokwa li e shi kutya oye e na okulongela. Shono osha kwathele Rut a ninge etokolo lyopandunge. Okwa lombwele Naemi a ti: “Aangandjoye otaa ka ninga aangandjetu, ngaashika Kalunga koye ota ka kala Kalunga kandje wo.” (Rut 1:16) Uuna tatu dhiladhila kohole ndjoka Rut a li e nine Naemi ohashi gumu omitima dhetu. Ihe shoka sha mana oompata, ohole yokuhola Jehova ndjoka Rut a li e na. Oshinima shoka osha li wo sha kumitha Boas, ngoka konima yethimbo a tanga Rut sho ‘e ya okukonga egameno kuJehova.’ (Lesha Rut 2:12.) Oohapu dhaBoas otadhi tu ningitha tu dhiladhile kombinga yankene uudhilona hawu kongo egameno kohi yomawawa gooyina. (Episalomi 36:7; 91:1-4) Jehova okwa li a ningile Rut oshinima sha faathana. Okwa li e mu gamene e te mu pe ondjambi omolweitaalo lye. Rut ka li nando i ipe uusama omolwetokolo lye ndyoka a ninga.

7. Oshike tashi vulu okukwathela mboka taya kakadhala okwiiyapulila Jehova?

⁷ Aantu oyendji ohayi ilongo kombinga yaJehova, ihe ihaya kongo egameno kuye. Ohaya kala taya kakadhala oku mu iyapulila, opo ya ninginithwe. Ngele nangoye osho wu uvite ngawo, onawa wu tale kutya oshike tashi ku imbi. Kehe gumwe oha longele kalunga gwontumba nenge gwongandi. (Josua 24:15) Shoka shi li pandunge osho okulongela Jehova Kalunga kashili. Uuna we mu iyapulile, kungawo owe shi ulika montaneho kutya owu na eitaalo muye noye ta kala eshigo noshiholameno shoye. Ote ke ku kwathela wu tsikile oku mu longela, nonando owu kale muupyakadhi wa fa peni. Shika osho Kalunga a li a ningile Rut.

8. Hokolola onakuziwa yaHiskia.

⁸ Onakuziwa yaHiskia oya yooloka ko lela kwaandjoka yaRut. Hiskia okwa li Omuisraeli, oshigwana shoka sha li shi iyapulila Kalunga.  Mbela Aaisraeli ayehe oya li aadhiginini? Hasho nando. Omukwaniilwa Ahas, he yaHiskia, okwa li a longo shoka inaashu uka koshipala shaKalunga. Ka li a simaneka otempeli yaKalunga, pehala lyaashono, okwa li a nwetha mo aantu ya longele iikalunga. Ahas okwa li nokuli a yamba po oyana, e ya yambele oshikalunga, sho e ya fike po ye na omwenyo. Onkee ano, Hiskia okwa mona iinima iinyanyalithi sho a li omushona. — 2 Aakwaniilwa 16:2-4, 10-17; 2 Ondjalulo 28:1-3.

9, 10. (a) Oshike sha li tashi vulu okuningitha Hiskia a kale a yemata? (b) Omolwashike kaatu na okuyematela Kalunga? (c) Omolwashike eputuko lyetu itaali vulu okuutha kutya otatu ka kala aantu ya tya ngiini monakuyiwa?

⁹ Oshiholelwa oshiwinayi shaAhas osha li tashi vulu okunwetha mo omwanamati Hiskia a tonde nenge a geele Jehova. Opu na yamwe mboka ya “tsa ondumbo nOmuwa” kunena, nenge ya yematela ehangano lye, nonando oonkalo ndhoka ya pita mudho kadhi na siku dhi ka adhe mwaandhoka mwa li Hiskia. (Omayeletumbulo 19:3) Yamwe oyu uvite kutya otashi vulika onkalamwenyo yawo kaayi ke ende nawa omolweputuko lyawo ewinayi, nenge ye wete kutya nayo otaye ke endulula omapuko ngoka ga ningwa kaavali yawo. (Hesekiel 18:2, 3) Mbela shika oshoshili?

¹⁰ Onkalamwenyo yaHiskia oye shi ulika kutya hasho. Onkee ano, kapu na nando etompelo lyasha lyokugeela Jehova. Haye he etitha uuwinayi mboka hatu iyadha muwo. (Job 34:10) Odhoshili kutya aavali otaya vulu okutulila po oyana oshiholelwa oshiwanawa nenge oshiwinayi. (Omayeletumbulo 22:6; Aakolossa 3:21) Shino itashi ti nduno kutya eputuko lyetu otali vulu okuutha kutya otatu ka kala aantu ya tya ngiini monakuyiwa. Omolwashike mbela? Omolwaashono Jehova okwe tu shita nemanguluko lyokuninga omatokolo. Shino otashi ti kutya otatu vulu okuhogolola pokati kaashoka shu uka naashoka sha puka. (Deuteronomium 30:19) Mbela Hiskia okwa li a longitha omagano ngono ngiini?

11. Oshike sha ningitha Hiskia a kale omukwaniilwa omwaanawa gwaJuda?

¹¹ Omukwaniilwa Ahas, he yaHiskia, okwa li a longo uuwinayi wu lulila muJuda, ihe omwana Hiskia okwa li a longo shoka shu uka koshipala shaKalunga. (Lesha 2 Aakwaniilwa 18:5, 6.) Hiskia ina landula nando oshiholelwa oshiwinayi shahe. Pehala lyaashono, okwa pulakene shoka sha popiwa kaahunganeki yaJehova, ngaashi Jesaja, Mika naHosea. Okwa landula omayele nomapukululo gawo. Shino osha li she mu kwathele a kandule po  omaupyakadhi gamwe ngono ge etithwa kuhe. Okwoopaleke otempeli, okwa pula Kalunga a dhimine po oshigwana oondjo dhasho nokwa hanagula po iikalunga mbyoka ya li yi ihanena oshilongo ashihe. (2 Ondjalulo 29:1-11, 18-24; 31:1) Sho omukwaniilwa gwaAssur, Sennakerib, a li a hala okuponokela Jerusalem, Hiskia oku ulike kutya ye oku na uulaadhi neitaalo lya kola. Okwa li i inekela thiluthilu kutya Jehova ote ke mu gamena pamwe noshigwana ashihe. (2 Ondjalulo 32:7, 8) Hiskia okwa li a kwatwa kuuntsa oshikando shimwe, ihe sho Jehova e mu pukulula, okwi ifupipike. (2 Ondjalulo 32:24-26) Osha yela kutya Hiskia okwe tu tulila po oshiholelwa oshiwanawa tu shi landule. Ine etha onakuziwa ye yi nwethe mo onkalamwenyo ye. Pehala lyaashono, okwe shi ulike kutya ye okuume kaJehova.

12. Aakriste oyendji oya panga ngiini uukuume naJehova ngaashi Hiskia a li e shi ningi?

¹² Muuyuni kunena omu udha aantu ye na onyanya nokaye na ohole. Aanona oyendji oya putudhwa kaavali yaa na ohole nesiloshimpwiyu. (2 Timoteus 3:1-5) Aakriste oyendji yopethimbo lyetu oya pita moonkalo oondhigu mokuputuka kwawo, ihe nonando ongawo, oya panga uukuume naJehova. Oye shi ulika kutya onakuziwa hayo hayi utha onakuyiwa yomuntu. Aakriste mboka oya landula oshiholelwa shaHiskia. Kalunga okwe tu pa emanguluko tu hogolole oku mu longela noku mu simaneka, ngaashi Hiskia a li e shi ningi. Ehogololo oli li miikaha yetu yene.

13, 14. Omolwashike oshinakugwanithwa shaMaria sha li sha fa oshidhigu noonkondo, ihe ye okwa li i inyenge ngiini?

¹³ Opwa li ishewe omukadhona gumwe ngoka a li a panga uukuume naJehova. Edhina lye oMaria nokwa li a pewa uuthembahenda wi ikalekelwa. Okwa valwa pwa pita omimvo odhindji konima yeso lyaHiskia. Okwa li a ningi omusimba e ta vala okanona kokamati, noye e ka putudha. Okanona hoka oka li Jesus, Omwana gwaKalunga. Osha yela kutya Jehova okwa li e hole Maria nokwe mu inekela, sho e mu pe esimano li thike mpoka. Mbela Maria okwa li i inyenge ngiini sho u uvu kutya ota ka ninga yina yaJesus?

¹⁴ Olundji ohatu popi kombinga yesimano ndyoka Maria a li a zalekwa. Mbela muye kamwa li mu na uumbanda washa? Pashiholelwa, omuyengeli Gabriel okwa li e mu lombwele kutya ota ka ninga omusimba, nonando shi valelwe a ye momilalo. Omuyengeli ka li a lombwele ezimo naashinda yaMaria nkene tashi ke enda, opo a ninge omusimba. Oshike sha li tashi ke ya momadhiladhilo gawo uuna ya mono Maria i ihumbata? Mbela Maria okwa li ta ka lombwela Josef shike shi na ko nasha nuusimba we? Maria okwa li wo e na oshinakugwanithwa oshinenenene shokuputudha Omwana gwaKalunga, e li omuntu gwopanyama. Katu shi naanaa kutya Maria okwa li ti ipula niinima yini lela, ihe otu shi shi shoka a ningi po sho Gabriel  a popi naye. Maria okwa ti: Ongame omuntu gwOmuwa. Nandi ningwe ngaashi wa ti. — Lukas 1:26-38.

15. Omolwashike eitaalo lyaMaria endhindhilikwedhi?

¹⁵ Maria okwa li e na eitaalo lya kola shili. Okwa li i ilongekidha okuninga kehe shimwe shoka ta pulwa a ninge, ngaashi omuntu gwOmuwa. Okwa li i inekela kutya Jehova ote ke mu sila oshimpwiyu noku mu gamena. Oshike sha li sha kwathele Maria a kale neitaalo lya kola ngawo? Otu shi shi nawa kutya omuntu iha valwa neitaalo, ihe otatu vulu okukala tu li na ngele otwe li kokeke. Otatu vulu okupula Kalunga a yambeke oonkambadhala dhetu. (Aagalati 5:22; Aaefeso 2:8) Maria okwa li a longo nuudhiginini a kale e na eitaalo lya kola. Otu shi shi ngiini? Omukalo nkene a li a pulakene nosho wo shoka a popi otagu tu kwathele tu shi mone.

16. Oshike tashi ulike kutya Maria okwa li ha pulakene nawa?

¹⁶ Nkene Maria a li a pulakene. Ombiimbeli otayi ti kutya kehe gumwe “na kale ha pulakene mbala, ihe ohi ikwata mokupopya.” (Jakob 1:19) Maria okwa li ha pulakene nawa. Ombiimbeli oye shi ulika kutya Maria okwa li ha pulakene neitulomo kiinima mbyoka hu uvu, unene tuu mbyoka i ilongo kombinga yaJehova. Okwa li ha kongo ethimbo a tedhatedhe kiinima yopambepo. Oshiholelwa shimwe, sho Jesus a valwa, aasita yiimuna oya li ya lombwele Maria etumwalaka ndyoka lya zi komuyengeli. Pethimbo sho Jesus e na omimvo 12 okwa li a popi oshinima shoka sha kumitha Maria. Poompito adhihe ndhoka, Maria okwa li a pulakene, nokudhimbulukwa shoka a lombwelwa. Okwa li wo a dhiladhila nuukeka kombinga yaashono u uvu. — Lesha Lukas 2:16-19, 49, 51.

17. Oshike tatu ilongo momukalo moka Maria a li a popi?

¹⁷ Shoka Maria a popi. Ombiimbeli inayi tu lombwela oshindji kombinga yaashoka Maria a popya. MuLukas 1:46-55 omo owala a popya ethimbo ele. Ehokololo ndyoka otali ulike kutya Maria okwa li e shi nawa Omanyolo gOshihebeli. Omolwashike tatu tile ngawo? Omolwaashono oohapu ndhoka Maria a popi odha fa ndhoka dhomegalikano lyaHanna, yina yaSamuel. (1 Samuel 2:1-10) Osha fa shi li ngeyi kutya Maria okwa li a totha lwiikando 20 lwaampono oohapu dhe mOmbiimbeli. Osha yela kutya okwa li e hole okupopya kombinga yoshili ndjoka i ilonga kuJehova, ngoka e li Kuume ke omunene.

18. Omomikalo dhini tatu vulu okuholela eitaalo lyaMaria?

¹⁸ Omathimbo gamwe natse ohatu pewa iinakugwanithwa kuJehova, mbyoka hatu kala tu uvite kutya iidhigu unene, ngaashi owala Maria a li u uvite. Otu na nduno okuninga po shike? Natu landule oshiholelwa shaMaria nokutaamba ko iinakugwanithwa mbyoka nomwenyo aguhe, tu na einekelo kutya Jehova ote ke tu kwathela. Otatu ka landula oshiholelwa shaMaria, ngele ohatu pulakene kuJehova twi itula mo, nokutedhatedha wo shoka e tu longa kombinga ye nomalalakano ge. Shono otashi ke tu ningitha tu kale tu na ehalo lyokulonga yalwe shoka twi ilonga. — Episalomi 77:11, 12; Lukas 8:18; Aaroma 10:15.

19. Uuna tatu holele eitaalo lyaamboka ya popiwa mOmbiimbeli, otatu vulu okukala neinekelo lini?

¹⁹ Osha yela kutya Rut, Hiskia naMaria oya li ookuume kaJehova naanaa ngaashi Abraham. Oya li iilyo ‘yongundu onene yoonzapo’ ndyoka ya li yi na wo uuthembahenda wokuninga ookuume kaKalunga. Onkee ano, atuheni natu tsikileni okuholela aantu mboka, molwaashoka yo oya li ye na eitaalo lya kola shili. (Aahebeli 6:11, 12) Uuna tatu shi ningi, Jehova ote ke tu pa ondjambi ndjoka tayi kalelele.