Tsikila okulongela Jehova nenyanyu
MBELA opu na esiku limwe wa li wa nyanyukwa shambishi megumbo mwa tselwa? Ngele osho, esiku lini? Mbela esiku wa hokana nenge wa hokanwa? Esiku osheeli shoye sha valwa? Nenge esiku wa ninginithwa? Esiku moka wa ninginithwa olyo esiku lya simanenena nolyenyanyu monkalamwenyo yoye. Mbela mesiku ndyono aamwatate naamwameme oya li yu uvite ngiini sho ye ku tala tu ulike kutya owu hole lela Kalunga nomutima gwoye aguhe, nomwenyo gwoye aguhe, nomadhiladhilo goye agehe nonoonkondo dhoye adhihe? — Markus 12:30.
Okuza esiku wa ninginithwa otashi vulika wa kala to longele Jehova nenyanyu. Nonando ongawo, aauvithi oyendji oya kanitha enyanyu lyawo ndjoka ya li ye na. Omolwashike mbela? Oshike tashi tu kumike, opo tu tsikile okulongela Jehova nenyanyu?
AAPIYA YAJEHOVA YAMWE OYA KANITHA ENYANYU
Etumwalaka lyUukwaniilwa waKalunga ohali tu etele enyanyu enene. Omomikalo dhini mbela? Jehova oku uvaneka kutya Uukwaniilwa we otawu ka hulitha po uuyuni mbuka wa kolokosha, e tapu ya uuyuni uupe. Sefanja 1:14 otayi ti: “Esiku enene lyOmuwa oli li popepi — popepilela notali ya tali endelele.” Ngele otu uvite kutya otu na ko natango ethimbo ele okutegelela, otashi vulika tu kanithe enyanyu ndyoka twa li tu na. Shika otashi vulu oku tu ningitha kaatu longele Kalunga nuudhiginini. — Omayeletumbulo 13:12.
Ngele ohatu kala naamwatate nosho wo naamwameme, shika ohashi tu tsu omukumo tu tsikile okulongela Jehova nenyanyu. Eihumbato ewanawa lyaapiya yaJehova otashi vulika olyo lye tu nanena kelongelokalunga lyashili nolye tu kwathela tu tameke okulongela Kalunga twa nyanyukwa. (1 Petrus 2:12) Oshike tashi vulu okuholoka po ngele omumwatate nenge omumwameme a gandwa kegongalo, molwaashoka iha vulika komalombwelo gaKalunga? Otashi vulika shi teye yamwe omukumo megongalo notashi vulika nokuli ya kale inaaya nyanyukwa we.
Ohole yokuhola omaliko nayo otashi vulika yi tu ningithe tu kanithe enyanyu lyetu mokulongela Jehova. Ngiini mbela? Uuyuni mbuka waSatana ohawu tu tsu omaminimini, opo tu lande niinima mbyoka inaatu pumbwa naanaa. Onkee ano, natu dhimbulukwe oohapu dhaJesus ndhoka tadhi ti: “Kaku na ngoka ta vulu okulongela aawa yaali; oshoka ota tondo gumwe, ye e ta kala e hole mukwawo, nenge ta simaneke nguka, ye ta dhini ngwiyaka. Kamu vulu okulongela Kalunga pamwe nemona.” (Mateus 6:24) Itatu vulu okulongela Jehova nenyanyu, ngele otatu indumbilile iinima muuyuni mbuka.
KALA WA NYANYUKWA MIILONGA YAJEHOVA
Okulongela Jehova kaku shi omutengi omudhigu kwaamboka ye mu hole. (1 Johannes 5:3) Jesus okwa ti: “Ileni kungame amuhe mwa vulwa nomwa humbatekwa uudhigu, ongame notandi mu pe evululuko. Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko. Oshoka ondjoko yandje ombwanawa nomutenge gwandje omupu.” (Mateus 11:28-30) Okukala Omukriste gwashili ohaku tu etele enyanyu nohaku tu talaleke. Otu na omatompelo ogendji okukala twa nyanyukwa sho tatu longele Jehova. Tala gatatu gomugo. — Habakuk 3:18.
Ohatu longele Kalunga omunyanyukwi, Omushiti gwetu. (Iilonga 17:28; Episalomi 104:31) Otu shi shi kutya tse otu na okulongela Omushiti monkalamwenyo yetu ayihe. Onkee ano, natu tsikile oku mu longela nenyanyu. Shino otu na oku shi ninga kutya nduno otwa ninginithwa nalenale nenge opo twa ninginithwa.
Omumwatate Héctor oha kala a nyanyukwa uuna i ipyakidhila niilonga yokuuvitha nuuna ta dhiladhila ketegameno ndyoka e na lyUukwaniilwa
Tala koshiholelwa shomumwatate Héctor, ngoka a longela Jehova uule womimvo 40, e li omutonateli omweendi. Natango ota tsikile okulongela Jehova “nomuukokele” we. (Episalomi 92:13-15, OB-1954; [Episalomi 92:12-14, OB-2008]) Iilonga ye yokulongela Kalunga oya shuna pevi, sho omukadhi a kwatwa kuunkundi. Ihe omumwatate Héctor ina kanitha enyanyu lye. Ota hokolola ta ti: “Nonando oshiyemateka okumona onkalo yanekulu lyandje tayi nayipala, inandi etha nando eshongo ndika li kuthe po enyanyu lyandje ndyoka handi mono sho tandi longele Kalunga kashili. Odhoshili kutya kasha li oshipu oku mu sila oshimpwiyu. Okukala ndi shi kutya otandi longele Jehova monkalamwenyo yandje ayihe, ngoka a shita aantu nelalakano, osha ningitha ndje ndi kale ndi mu hole noonkondo noku mu longela nomutima aguhe. Onda kala ndi ipyakidhila niilonga yokuuvitha. Onda kaleke wo momadhiladhilo shoka Uukwaniilwa tawu ke tu ningila, opo kaandi kanithe enyanyu lyandje.”
Jehova okwe shi ningi tashi wapa tu kale twa nyanyukwa monkalamwenyo, sho a gandja omwana e tu kulile. Ombiimbeli otayi ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Shono otashi ti kutya oondjo dhetu otadhi vulu okudhimwa po, ngele otwa kala tu na eitaalo mekuliloyambo ndyoka li li omagano gopahole ngoka Kalunga e tu pa. Otatu ka mona wo omwenyo gwaaluhe. Omolwoshinima shika otu na okukala nolupandu. Ngele otwa pandula ekuliloyambo, otashi ke tu inyengitha tu longele Jehova nenyanyu.
Omumwatate Jesús okwe etha po onkalo yuuzeko nokwa longela Jehova nenyanyu omimvo odhindji
Omumwatate gwedhina Jesús, ngoka a li ha kala moMeksiko, okwa ti: “Onda li nda pikwa kiilonga yandje. Omathimbo gamwe onda kala handi longo omalutayima tagi itsikile, nonando oku shi ninga kakwa li taku dhengele. Onda kala handi longo ngawo, molwaashono onda hala okuyambapala. Opo nduno ondi ilongo kombinga yaJehova nankene a gandja Omwana a kulile aantu. Onda kala nehalo enene lyoku mu longela. Onkee ano, onde mu iyapulile onkalamwenyo yandje ndi kale tandi mu longele. Konima sho nda longo uule womimvo 28, onda tokola okweetha po iilonga, e tandi yi miilonga yethimbo lyu udha.” Omumwatate Jesús osho a tameke okulongela Jehova nenyanyu ngawo.
Okweetha po iilonga yuulunde, ohaku tu etele enyanyu. Mbela oto dhimbulukwa onkalamwenyo yoye kutya oya li ya tya ngiini, manga inoo tseya Jehova? Omuyapostoli Paulus okwa li a dhimbulutha Aakriste muRoma kutya oya li “aapika yuulunde,” ihe oya ningi “aapika yiilonga iiwanawa.” Omolwomalunduluko Aaroma 6:17-22) Tse natse kunena ohatu landula omithikampango dhaJehova. Shono ohashi tu kwathele kaatu iyemateke monkalamwenyo yetu omolwiilonga yuulunde. Shoka ohashi tu etele enyanyu kaali shi okuyelekwa.
ngoka ya ningi, otaya vulu oku ka mona omwenyo gwaaluhe. (Omumwatate Jaime ota ti: “Omimvo ndhoka nda kala tandi longele Jehova monkalamwenyo yandje, odho owala omimvo dhenyanyu kungame.”
Omulumentu gwedhina Jaime naye ka li i itaala muKalunga, ihe omelongo lyoevolusi, ye okwa li ishewe omudhengingonyo. Okwa tameke okuya kokugongala kwopaKriste nokwa li i inyengithwa kohole ndjoka a mono ko. Okwa pula Jehova e mu kwathele i itaale muye, nokulundulule onkalamwenyo ye yonale. Jaime ota hokolola ta ti: “Kashona nakashona, onde ende tandi mono ohole nohenda yaKalunga mpoka yi thike. Okukala metsokumwe nomithikampango dhaJehova okwa gamena ndje. Andola onda li inaandi lundulula, ando onda dhipagwa nale nda fa ookuume kandje yamwe mboka ya li aadhengingonyo. Omimvo ndhoka nda kala tandi longele Jehova monkalamwenyo yandje, odho owala omimvo dhenyanyu kungame.”
INO SHUNA OMUTSE MIIPETA!
Otu na okukala tu uvite ngiini sho twa tegelele ehulilo lyuuyuni mbuka wa yonana? Ombiimbeli otayi tu ladhipike tayi ti: “Inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.” (Aagalati 6:8, 9) Onkee ano, tse otatu tsikile nokulonga ehalo lyaKalunga notwa tegelela oku ka mona omwenyo gwaaluhe. Kekwatho lyaJehova, natu tsikileni okwiidhidhimika nokulonga nuudhiginini tu kokeke omaukwatya ngoka tage ke tu kwathela tu ka hupe sho “uudhigu uunene” tawu ya. Oshikwawo, natu tsikileni nokulongela Jehova. — Ehololo 7:9, 13, 14, NW; Jakob 1:2-4.
Otu na uushili kutya Jehova ote ke tu pa ondjambi uuna tatu idhidhimike. Omolwashike mbela? Oku shi iilonga yetu nosho wo ohole ndjoka twe mu ulukila nokusimanekitha edhina lye. Ngele otwa tsikile noku mu longela nenyanyu, otatu ka kala ngaashi Omupisalomi David ngoka a ti: “Aluhe ondu uvite, Omuwa e li ndje popepi; oku li popepi, nokaku na shoka tashi hindi ndje. Onkee ano ondu uvite uunelago nonda nyanyukwa, nondu uvite ndi li megamenolela.” — Episalomi 16:8, 9.