1, 2. Omolwashike uukuume mboka wa li pokati kaJonatan naDavid wu li oshiholelwa dhingi shuudhiginini?

JONATAN okwa li a kuminwa uulaadhi womugundjuka David, sho a dhipaga omutongolume Goliat. David okwe eta “omutse gwaGoliat” kOmukwaniilwa gwaIsraeli, Saul, he yaJonatan. (1 Samuel 17:57) Jonatan okwa li e na uushili kutya Kalunga oku li pamwe naDavid. Okuza mpono Jonatan naDavid oya panga uukuume wopothingo. Oyu uvaneke kutya kehe gumwe ota ka kala aluhe omudhiginini kumukwawo. (1 Samuel 18:1-3) Jonatan okwa kala omudhiginini kuDavid monkalamwenyo ye ayihe.

² Jonatan okwa kala omudhiginini kuDavid nonando Jehova okwa li a hogolola David, oye a landule Saul muukwaniilwa, pehala lyaJonatan. Sho Saul a li ta kambadhala okudhipaga David, Jonatan okwa li ti ipula unene nakuume ke, David. Jonatan okwa li e shi shi kutya David oku li mombuga Horesh. Jonatan okwa ningi po shike? Okwa yi kuye e te mu ladhipike a tsikile okukala i inekela Jehova. Jonatan okwa lombwele David a ti: “Ino tila. Tate  Saul ita vulu oku ku ninga sha. [Okwa] tseya nawa kutya ngoye oto ka ninga omukwaniilwa gwaIsrael nangame ote kala elenga lyoye lyotango.” — 1 Samuel 23:16, 17.

3. Oshike sha li sha simanenena kuJonatan, kakele kokukala omudhiginini kuDavid, notu shi shi ngiini? (Tala kethano lyopetameko.)

³ Ohatu kala twa simaneka aantu mboka aadhiginini. Mbela otwa simaneka Jonatan owala molwaashono a li omudhiginini kuDavid? Aawe, hasho nando. Okukala omudhiginini kuKalunga, osho sha li oshinima sha simana monkalamwenyo yaJonatan. Omolwetompelo ndyoka okwa kala omudhiginini kuDavid noka li e mu sila ondumbo, nonando David okwa li ta ka ninga omukwaniilwa. Jonatan okwa li nokuli a kwathele David a kale i inekela muJehova. Ayehe oya kala aadhiginini kuJehova noya kala yi inekelathana. Oya kala aadhiginini keuvaneko lyawo ndyoka tali ti: “Omuwa oye onzapo nokutya tse nangoye, osho wo oluvalo lwoye naandoka lwandje otalu ka dhiginina euvaneko ndyoka eyapuki twe li uvanekelathana.” — 1 Samuel 20:42.

4. (a) Oshike tashi vulu oku tu kaleka twa nyanyukwa shili notwa gwanenwa? (b) Otatu ka kundathana shike moshitopolwa shino?

⁴ Tse otu na wo okukala aadhiginini kaanegumbo yaandjetu, kookuume ketu nosho wo kaamwatate naamwameme megongalo. (1 Aatessalonika 2:10, 11) Kakele kaashono, shoka sha simanenena kwaayihe, okukala aadhiginini kuJehova. Oye e tu pa omwenyo. (Ehololo 4:11) Ngele otwa kala aadhiginini kuye, otashi tu pe enyanyu lyashili nokukala twa gwanenwa. Otu na okukala aadhiginini kuKalunga, nonando otu li momathimbo omadhigu. Moshitopolwa shika, otatu ka kundathana nkene oshiholelwa shaJonatan tashi vulu oku tu kwathela tu kale aadhiginini kuJehova moonkalo dhi li ne tadhi landula. Onkalo (1) uuna wu wete kutya omuntu ngoka e na oonkondopangelo ino gwana oku mu simaneka. Onkalo (2) uuna tatu hogolola ngoka tu na okukala omudhiginini kuye. Onkalo (3) uuna omumwatate ngoka e na oshinakugwanithwa e tu uva ko papuko, nenge tu ungaunga natse nayi. Onkalo (4) uuna tu uvite kutya oshidhigu okugwanitha po euvaneko ndyoka twa ninga.

5. Omolwashike sha li oshidhigu kAaIsraeli okukala aadhiginini kuKalunga, sho Saul a li omukwaniilwa?

⁵ Jonatan noshigwana shaIsraeli oya li monkalo ondhigu. Omukwaniilwa Saul, he yaJonatan, lwanima ina ka vulika we kuJehova. Omolwoshinima shono, Jehova okwe mu ekelehi. (1 Samuel 15:17-23) Mbela Jehova okwa li e mu kutha uukwaniilwa mepathimo lyeho? Aawe, okwe etha Saul a tsikile okupangela omimvo odhindji. Onkee ano, osha li oshidhigu kaantu ya kale aadhiginini kuKalunga, sho omukwaniilwa ngoka e li “koshipangelapundi shoka sha tulwa po kOmuwa” a li ta longo uuwinayi wu nyanyalitha. — 1 Ondjalulo 29:23.   

6. Oshike tashi ulike kutya Jonatan okwa li omudhiginini kuJehova?

⁶ Jonatan okwa kala omudhiginini kuJehova. Dhiladhila kushoka Jonatan a ningi po konima sho Saul a tameke okukala itaa vulika kuJehova Kalunga. (1 Samuel 13:13, 14) Pethimbo mpono, etangakwiita enene lyAafilisti olye ya nomatembakwiita 30 000 li ponokele Israeli. Saul okwa li owala e na aakwiita 600. Ye nomwana Jonatan oyo ayeke ya li ye na iikondjitho. Mbela Jonatan okwa li a tila? Aawe. Okwa dhimbulukwa oohapu dhomuhunganeki Samuel, ndhoka tadhi ti: “Omuwa oku uvaneke noite mu etha nando.” (1 Samuel  12:22) Jonatan okwa lombwele omuhumbati gwomatati ge a ti: ‘Kapu na shoka tashi imbi Jehova, e tu pe esindano, nonando otu li po aashona.’ Jonatan nomukwiita ngono oya ponokele ongundu yAafilisti noya dhipaga aakwiita 20 lwaampono. Jonatan okwa li e na eitaalo muJehova, na Jehova okwe mu yambeke. Jehova okwa kakamitha evi, Aafilisti e taya tila. Okuza mpono Aafilisti oya pilukilathana po e taya dhipagathana, nokungawo Aaisraeli oya sindana molugodhi. — 1 Samuel 13:5, 15, 22; 14:1, 2, 6, 14, 15, 20.

7. Jonatan okwa li u ungaunga nahe ngiini?

⁷ Saul okwa tsikile nokukala itaa vulika kuJehova, ihe shoka inashi imba Jonatan a kale itaa vulika kuhe mpoka sha pumbiwa. Pashiholelwa, ayehe oya li ya kondjitha Aafilisti, opo ya gamene oshigwana shaJehova. — 1 Samuel 31:1, 2.

8, 9. Ongiini tatu vulu okukala aadhiginini kuKalunga, uuna tatu simaneke mboka ye na oonkondopangelo?

⁸ Ngaashi Jonatan, natse natu kale aadhiginini kuJehova mokukala tatu vulika kepangelo lyomoshilongo shetu mpoka tashi vulika. Jehova okwe etha ‘aapangeli mboka taye tu pangele’ ya kale po. Okwa tegelela wo tu ya simaneke. (Lesha Aaroma 13:1, 2.) Otu na okuungaunga naapangeli nesimaneko, nonando poompito dhimwe kaye na oshili nenge tu uvite kutya inatu pumbwa oku ya simaneka. Shimwe ishewe, natu simaneke ayehe mboka Jehova a pa oonkondopangelo. — 1 Aakorinto 11:3; Aahebeli 13:17.

⁹ Omumwameme Olga, gwokoSouth Amerika,  oku ulike kutya ye omudhiginini kuJehova, sho a kala a simaneka omusamane gwe ngoka a kala noku mu ngwenyagula. ^[1] (Tala enyolo lyopehulilo.) Molwaashono Olga Onzapo yaJehova, omusamane gwe omathimbo gamwe oha kala inaa hala okupopya naye nenge a popye naye nuuhasha. Okwa li e mu lombwele nokuli kutya ote mu thigi po, e ta yi noyana. Nonando ongawo, Olga ine mu “shunithila uuwinayi” washa. Pehala lyaashono, okwa ningi ngaashi ta vulu mokukala omukulukadhi omwaanawa. Okwa kala he mu telekele, he mu yogele oonguwo dhe nokusila oshimpwiyu ezimo lyomusamane gwe. (Aaroma 12:17) Uuna omusamane gwe ta ka talela po ezimo lye nosho wo ookuume ke, Olga oha yi pamwe naye, ngele ota vulu. Pashiholelwa, sho omusamane gwe a li ta yi kefumviko lyahe, koshilando shilwe, Olga okwe mu longekidhile ashihe shoka a li a pumbwa okuya nasho. Olga okwa yi nomulume kefumviko, nokwa kala e mu tegelela e li pondje yongeleka. Konima yomimvo odhindji, omusamane gwe okwa tameke okuungaunga naye nawa. Oshike she mu inyengitha? Omumwameme Olga okwa kala noku mu idhidhimikila noku mu simaneka aluhe. Ngashingeyi omusamane oha tsu Olga omukumo a ye kokugongala, noye nokuli he mu fala. Omathimbo gamwe ayehe ohaya kala pamwe pokugongala. — 1 Petrus 3:1.

10. Jonatan okwa tseya ngiini kutya okulye e na okukala omudhiginini?

¹⁰ Sho Saul a ti kutya ota ka dhipaga David, Jonatan okwa ningi etokolo lya kwata miiti. Okwa li a hala okukala omudhiginini kuhe, na ishewe okwa li a hala okukala omudhiginini kuDavid. Jonatan okwa li e shi shi kutya Kalunga oku li pamwe naDavid, ihe ke li pamwe nahe Saul. Shono osha ningitha Jonatan a kale omudhiginini kuDavid. Okwa londodha David a ka holame, e ta lombwele Saul e ethe David a kale nomwenyo. — Lesha 1 Samuel 19:1-6.

11, 12. Ongiini ohole yetu yokuhola Kalunga tayi tu kwathele tu kale aadhiginini kuye?

¹¹ Omumwameme gwokoAustralia, Alice, okwa li a tokola kutya okulye e na okukala omudhiginini. Sho e li metifa lyokukonakona Ombiimbeli, okwa li a lombwele yaandjawo kombinga yaashoka ti ilongo. Okwa li wo e ya lombwele kutya ita kala we ha dhana Okrismesa, nokwe ya yelithile kutya omolwashike. Petameko, shoka osha li sha yemateke yaandjawo, noya kala ye mu geela noonkondo. Oya li yu uvite kutya Alice ke na ko nasha we nawo. Alice okwa lombwelwa kuyina kutya ina hala nandonando oku mu mona we. Alice okwa ti: “Onda haluka nonda li ndu uvite nayi noonkondo, molwaashono yaandjetu onda li ndi ya hole unene. Elalakano lyandje olyo kutya Jehova nOmwana oyo yotango momutima gwandje. Onda ninginithwa poshigongi sha ka landula ko.” — Mateus 10:37.

¹² Inatu kala nando twa lenga iinima ngaashi: oosipana dhomaudhano, osikola nenge oshilongo. Hayo yi kala ya simana unene kutse, ihe natu kale aadhiginini kuJehova. Pashiholelwa, Henry okwa li e hole uudhano hawu ithanwa chess. Okwa li mosipana yosikola ndyoka hayi dhana uudhano mboka, nokwa li a hala osikola yawo yi sindane po ekopi muudhano mboka. Henry okwa li ha dhana uudhano mboka ehuliloshiwike kehe. Shono osha li sha mana po ethimbo lye lyokuuvitha nokuya kokugongala. Okwa ti kutya okwa li omudhiginini kosikola yawo, pehala lyokukala omudhiginini kuKalunga. Okwa ningi po shike? Okwa tokola e ethe po okudhanena osikola yawo uudhano mboka. — Mateus 6:33.

13. Okukala aadhiginini kuKalunga otashi ke tu kwathela ngiini tu ungaunge nomaupyakadhi muukwanegumbo?

 ¹³ Omathimbo gamwe otashi vulika shi kale oshidhigu tu kale aadhiginini kiilyo yuukwanegumbo aluhe. Pashiholelwa, omumwatate Ken okwa ti: “Onda li nda hala okukala he talele po meme olundji nokukala wo he ya kutse tu kale po naye omathimbo nomathimbo. Ihe meme nomukulukadhi gwandje kaya li haya tsu ya thithe.” Okwa tsikile ko a ti: “Ite vulu okugama ombinga, oshoka otashi ku uvitha gumwe nayi.” Ken okwa dhiladhila komayele gOmbiimbeli. Okwe shi mono mo kutya oku na okunyanyudha omukadhi nokukala omudhiginini kuye. Okwa ningi etokolo ndyoka lya nyanyudha omukadhi. Okuza mpono, okwa lombwele omukadhi a kale nombili nayinamweno, nokwe mu pe omatompelo kutya omolwashike. Okwa lombwele wo yina a simaneke omukadhi nokwe mu pe omatompelo kutya omolwashike. — Lesha Genesis 2:24; 1 Aakorinto 13:4, 5.

14. Saul okwa li u ungaunga naJonatan ngiini?

¹⁴ Otatu vulu wo okukala aadhiginini kuJehova nonando omumwatate gwoshinakugwanithwa otu ungaunga natse nayi. Omukwaniilwa Saul okwa li a hogololwa kuKalunga, ihe okwa kala tu ungaunga nayi nomwana, Jonatan. Saul ka li u uvite ko kutya omolwashike Jonatan e hole David. Sho Jonatan a li ta kambadhala okukwathela David, osha geyitha Saul noonkondo. Okwa sitha Jonatan ohoni  montaneho yaantu, ihe Jonatan okwa tsikile nokusimaneka he. Pethimbo opo tuu mpono, Jonatan okwa kala omudhiginini kuJehova nosho wo kuDavid, ngoka a hogololwa kuKalunga, a landule Saul muukwaniilwa. — 1 Samuel 20:30-41.

15. Otu na okwiinyenga ngiini, uuna omumwatate u ungaunga natse nayi?

¹⁵ Aamwatate mboka taya kwatele komeho momagongalo kunena inaya gwanenena, ihe ohaya kambadhala yu ungaunge nawa nakehe gumwe. Omolwokwaahagwanenena, ohashi vulika ya kale kaayu uvite ko kutya omolwashike twa ningile oshinima shontumba. (1 Samuel 1:13-17) Mbela ongiini ngele oye tu pangula papuko nenge kaaye tu uvite ko? Otu na owala okukala aadhiginini kuJehova.

16. Omoonkalo dhini tu na okukala aadhiginini kuKalunga, pehala lyokukala tu ihole tse yene?

¹⁶ Saul okwa li a hala Jonatan oye e mu landule muukwaniilwa, pehala lyaDavid. (1 Samuel 20:31) Jonatan okwa li e hole Jehova nokwa kala omudhiginini kuye. Peha lyokukala i ihole mwene, Jonatan okwa panga uukuume naDavid nokudhiginina euvaneko ndyoka a ninga naye. Omuntu ngoka e hole Jehova noku li omudhiginini kuye “oha gwanitha shoka e shi uvaneka nonando oshi mu fale muudhigu.” (Episalomi 15:4) Otatu ka gwanitha po omauvaneko getu, molwaashoka tse aadhiginini kuKalunga. Pashiholelwa, ngele otwa ningi euvathano lyopangeshefa, onawa tu gwanithe po shoka tu uvaneka kutya nduno otatu nana nuudhigu. Ngele otu na uupyakadhi mondjokana yetu, otatu ku ulika ohole yokuhola Jehova mokukala aadhiginini kaasamane nenge kaakulukadhi yetu. — Lesha Maleaki 2:13-16.

17. Oshitopolwa shika oshe ku kwathela ngiini?

¹⁷ Otwa hala okukala aadhiginini kuKalunga, nonando otatu li tatu pi ngaashi Jonatan. Onkee ano, natu kale aadhiginini kaamwatate naamwameme, nuuna ye tu yemateka. Uuna tatu shi ningi otatu ka nyanyudha omutima gwaJehova natse yene. (Omayeletumbulo 27:11) Otu na uushili kutya Jehova ote ke tu ningila aluhe shoka she tu opalela noku tu sila oshimpwiyu. Oshike tatu ki ilonga moshitopolwa tashi landula? Iiholelwa yaantu mboka ya li ko pethimbo lyaDavid, yamwe oya li aadhiginini, yo yalwe kaaya li aadhiginini.