AAKADHONA yaali aagundjuka oya li taye ende moshitopolwa shoongeshefa moshilando Baguio, moFilipine. Oya mono okatemba kiileshomwa, ihe inaya ya po. Omumwameme Helen, ngoka a li a thikama puko okwe ya tala ti imemeha. Aakadhona oya piti po owala, ihe eimemeho lyaHelen inaye li dhimbwa.

Konima sho taya shuna kegumbo nombesa, oya mono epulakata enene lya nyolwa jw.org, li li kOshinyanga shUukwaniilwa. Oya dhimbulukwa kutya oondanda ndhono oye dhi mona pokatemba kiileshomwa hoka ya mono moshilando. Oya zi mo mombesa e taya yi pOshinyanga shUukwaniilwa. Oshinyanga shoka osha li hashi longithwa komagongalo ogendji noya mono po elandulathano kutya kehe limwe ohali gongala uunake nopongapi.

Aakadhona mboka yaali oye ya kokugongala oshikando sha landula ko. Owu shi kutya olye ya mono sho taye ya mOshinyanga shUukwaniilwa? Omumwameme Helen. Oye mu dhimbulula kutya oye a li pokatemba ti imemeha. Helen ota ti: “Sho taye ende yu uka kungaye, onda li nda tila kashona. Onda li tandi dhiladhila kutya pamwe onda ninga sha sha puka.” Aakadhona oye mu lombwele kutya oye mu mona pokatemba kiileshomwa.

Aakadhona mbono okugongala oya li ye ku tyapula noya li yu uvite uugumbo sho aantu taye ya popitha nombili. Sho ya mono aantu taya opaleke Oshinyanga konima yokugongala, oya pula ngele nayo otaya vulu okwoopaleka. Omukadhona gumwe okwa tembuka mo moFilipine, ihe mukwawo okwa kala ha holoka kokugongala nokwa tameke okukonakona Ombiimbeli. Eimemeho lye eta iizemo iiwanawa!