1-2. Shi ikolelela kuMateus 5:11, otu na okutala ko ngiini omamakelo?

JESUS okwa li u uvanekele aalanduli ye kutya otaya ka kala ya nyanyukwa shili. Okwa li wo a londodha mboka ye mu hole kutya otaya ka taalela omaudhigu. (Mat. 10:22, 23; Luk. 6:20-23) Otwa nyanyukwa sho tu li aalongwa yaKristus. Ihe otatu ka kala tu uvite ngiini ngele otatu patanekwa kuyaandjetu, tatu hepekwa kepangelo, tatu thiminikwa kaaniilonga ooyakwetu nenge kaanasikola ooyakwetu tu ninge sha shoka sha puka? Okudhiladhila kiinima mbyoka otaku vulu oku tu ningitha tu kale tu na omaipulo ogendji.

² Aantu olundji ihaya dhiladhila kutya omuntu ota vulu okukala a nyanyukwa uuna ta hepekwa. Ashike shoka osho naanaa Oohapu dhaKalunga tadhi tu lombwele tu ninge. Pashiholelwa, omulongwa Jakob okwa nyola kutya pehala lyokukala tu uvite twa gwililwa po, otu na okukala twa nyanyukwa, uuna tatu adhika komamakelo. (Jak. 1:2, 12) Jesus naye okwa ti kutya otu na okukala twa nyanyukwa nuuna tatu hepekwa. (Lesha Mateus 5: 11.) Ongiini tatu vulu okukaleka po enyanyu lyetu, nonando otatu makelwa? Otatu vulu okwiilonga oshindji mokukonakona omayele gontumba montumwafo ndjoka Jakob a nyolele Aakriste yonale. Tango, natu taleni omashongo ngoka Aakriste mboka ya li yi iyadha mugo.

3. Oshike sha li sha ningwa po konima owala sho Jakob a ningi omulongwa gwaJesus?

³ Konima owala sho omumwayina gwaJesus, Jakob, a ningi omulongwa, Aakriste muJerusalem oya adhika komapataneko. (Iil. 1:14; 5:17, 18) Sho omulongwa Stefanus a dhipagwa, Aakriste oyendji oya  yi ontuku, okuza muJerusalem, e taya “halakanene omikunda adhihe dhaJudea nodhaSamaria,” nolwanima yamwe oya yi kuKipro nokuAntiokia. (Iil. 7:58–8:1; 11:19) Dhiladhila owala kutya aalongwa oya li yi idhidhimikile omaudhigu ge thike peni. Ihe nonando ongawo, oyu uvitha nuulaadhi onkundana ombwanawa kehe mpoka ya yi, nomagongalo oga li ga totwa miitopolwa mbyoka ya li kohi yepangelo lyaRoma. (1 Pet. 1:1) Ashike konima yaashono, Aakriste mboka oya ka tsakaneka omaupyakadhi ogendji.

4. Omamakelo galwe geni Aakriste yonale ya li yi idhidhimikile?

⁴ Aakriste yonale oya li yi idhidhimikile omamakelo ga yoolokathana. Pashiholelwa, momumvo 50 E.N. lwaampono, Omupangeli gwaRoma, Klaudius, okwa li a lombwele Aajuda ayehe ya ze mo muRoma. Onkee ano, Aajuda ayehe mboka ya li ya ningi Aakriste, oya thininikwa ya thige po omagumbo gawo e taya tembukile komahala galwe. (Iil. 18:1-3) Lwomomumvo 61 E.N., omuyapostoli Paulus okwa li a nyola kutya Aakriste ooyakwawo oya hepekwa montaneho yaayehe, ya tulwa mondjedhililo noya yugwa omaliko gawo. (Heb. 10:32-34) Ngaashi owala aantu yalwe, Aakriste mboka oya li ye na okwiidhidhimikila oluhepo nomikithi. — Rom. 15:26; Fil. 2:25-27.

5. Omapulo geni tatu ka yamukula?

⁵ Sho Jakob a nyola ontumwafo ye komeho yomumvo 62 E.N., okwa li e shi nawa omamakelo ngoka mwa li ooitaali ooyakwawo. Jehova okwa li e mu wilike a nyolele Aakriste mboka, opo e ya pe omayele omawanawa ngoka ga li tage ke ya kwathela ya kale ya nyanyukwa, nonando otaya makelwa. Natu ka konakoneni ontumwafo yaJakob, e tatu yamukula omapulo ngaka: Jakob okwa nyola kombinga yenyanyu lini? Oshike tashi vulu okuyuga Omukriste enyanyu ndyoka? Ongiini uunongo, eitaalo nuulaadhi tayi vulu oku tu kwathela tu kale twa nyanyukwa kutya nduno otwa taalela omamakelo ga fa peni?

6. Shi ikolelela kuLukas 6:22, 23, omolwashike Omukriste ta vulu okukala a nyanyukwa uuna ta makelwa?

⁶ Aantu otashi vulika ya dhiladhile kutya otaya vulu owala okukala ya nyanyukwa ngele oye na uukolele, ye na iimaliwa oyindji noye na ekwatathano ewanawa noyaandjawo. Ihe enyanyu ndyoka Jakob a popi oli li oshitopolwa shiiyimati yombepo yaKalunga noinali ikolelela koonkalo dhomuntu. (Gal. 5:22) Omukriste oha vulu okukala a nyanyukwa nenge e uvite ombili, ngele e shi kutya okwa hokiwa kuKalunga nota landula oshiholelwa shaJesus. (Lesha Lukas 6:22, 23; Kol. 1:10, 11) Ngaashi owala omulilo hagu kala gwa tema nawa mekende lyolamba, enyanyu ndyoka hali kala momutima gwOmukriste nalyo ohali kala lya hwama. Ihatu kanitha enyanyu lyetu uuna tatu ehama nenge uuna tu na oshimaliwa oshishona. Ihatu kanitha wo enyanyu uuna tatu shekwa nenge tatu patanekwa kuyaandjetu nosho wo kuyalwe. Oshikando kehe aantu taya kambadhala okuyona po enyanyu lyetu, ohali indjipala owala pehala lyokukana po. Uuna tatu makelwa omolweitaalo lyetu, ohashi ulike kutya tse aalongwa yashili yaKristus. (Mat. 10:22; 24:9; Joh. 15:20) Onkee ano, Jakob okwa nyola, a ti: “Aamwameme, italeni aanelago, ngele tamu adhika komamakelo gi ili nogi ili.” — Jak. 1:2.

7-8. Omolwashike eitaalo lyetu hali kolo uuna tatu makelwa?

⁷ Jakob okwa popi ishewe etompelo limwe kutya omolwashike Aakriste hayi idhidhimikile omamakelo, nokuli naangoka omadhigu. Okwa ti: “Eitaalo lyeni uuna tali piti momayeleko ga tya ngeyi, nena otamu mono omukumo gwokwiidhidhimika.” (Jak. 1:3) Omamakelo otaga vulu okuyelekanithwa nomulilo moka hamu tulwa omwele. Ngele omwele ogwa zi momulilo, e tagu tulwa momeya gu nwethwe, nena ohagu kala gwa kola shi vulithe nale. Sha faathana, uuna tatu idhidhimikile omamakelo, eitaalo lyetu ohali kolo. Jakob okwa nyola a ti: “Eidhidhimiko nali mu endithe ondjila ayihe pwaa na omapunduko, opo mu kale mwa gwana, mwaa na oshipo.” (Jak. 1:4) Uuna tu shi kutya omamakelo ohaga koleke eitaalo lyetu, otatu ka vula oku gi idhidhimikila twa nyanyukwa.

⁸ Jakob okwa popi wo montumwafo ye iinima yimwe mbyoka tayi vulu okuyona po enyanyu lyetu. Mbela iinima mbyoka oyini, nongiini tatu vulu okuungaunga nayo?

9. Omolwashike twa pumbwa uunongo?

⁹ Shoka tashi vulu okuyona po enyanyu lyetu: Okukala kaatu shi kutya natu ninge po shike. Uuna tu li muudhigu, otu na okupula Jehova e tu kwathele opo tu ninge omatokolo ngoka tage mu nyanyudha, taga kwathele ooitaali ooyakwetu notage tu kwathele tu kakatele uudhiginini wetu. (Jer. 10:23) Otwa pumbwa uunongo, opo tu kale tu shi shoka tu na okuninga naashoka tu na okulombwela mboka taye tu pataneke. Ngele  katu shi shoka tu na okuninga po, otashi vulika tu teke omukumo, e tatu kanitha nziya enyanyu lyetu.

10. Jakob 1:5 okwe tu lombwela tu ninge shike, ngele otwa pumbwa oondunge nenge uunongo?

¹⁰ Shoka to vulu okuninga: Pula Jehova e ku pe uunongo. Opo twi idhidhimikile omamakelo twa nyanyukwa, tango otu na okupula Jehova megalikano e tu pe oondunge nenge uunongo mboka twa pumbwa, tu vule okuninga omatokolo gopandunge. (Lesha Jakob 1:5.) Mbela otu na okwiinyenga ngiini ngele otu uvite kutya Jehova ita yamukula mbala omagalikano getu? Jakob okwa ti kutya natu “indile” kuKalunga. Jehova iha kala e wete tatu mu ningile nayi, uuna tatu mu indile lwiikando e tu pe uunongo. Ye ite ke tu geela. Uuna tatu pula Tate yetu gwomegulu uunongo opo tu vule okwiidhidhimikila omamakelo, ote ke wu tu pa, oshoka ye “ke shi omundalapata.” (Eps. 25:12, 13) Omamakelo getu oku ga wete, oku tu uvitile uukwawo wanankali nokwa halelela oku tu kwathela. Shoka otashi ke tu kwathela tu kale twa nyanyukwa lela. Ihe mbela Jehova ohe tu pe ngiini uunongo?

11. Oshike ishewe tu na okuninga, opo tu likole uunongo?

¹¹ Jehova ohe tu pe oondunge nenge uunongo okupitila mOohapu dhe. (Omayel. 2:6) Opo tu likole uunongo mboka, otu na okukonakona Ombiimbeli nosho wo iileshomwa mbyoka ya kankamena kuyo. Ihe otwa pumbwa okuninga oshindji kaashi shi owala okwiilikolela ontseyo oyindji. Otu na okutula miilonga uunongo wopakalunga monkalamwenyo yetu, mokuninga shoka te tu lombwele. Jakob okwa nyola a ti: “Okupulakena kweni naku mu fale miilonga.” (Jak. 1:22) Uuna tatu tula miilonga omayele gopakalunga, otatu kala lela tu na ombili, olukeno nohenda. (Jak. 3:17) Omaukwatya ngoka otage ke tu kwathela tu idhidhimikile emakelo kehe twa nyanyukwa.

12. Omolwashike sha simana okukala tu shi nawa Ombiimbeli?

 ¹² Oohapu dhaKalunga odha fa esipili. Ohadhi tu kwathele tu mone mpoka twa pumbwa okuninga omalunduluko nankene tu na oku ga ninga. (Jak. 1:23-25) Pashiholelwa, ngele twa konakona Oohapu dhaKalunga, otashi vulika tu mone kutya otwa pumbwa okupangela ongeyo yetu. Kekwatho lyaJehova, ohatu ilongo nkene tu na okukala aanambili uuna tatu ungaunga naantu nenge nomaupyakadhi ngoka taga vulu oku tu geyitha. Ngele otu li aanambili, otatu ka vula okwiidhidhimikila omaupyakadhi ngoka ge tu taalela. Otatu ka vula wo okudhiladhila nawa nokuninga omatokolo gopandunge. (Jak. 3:13) Inashi simana tuu okukala tu shi nawa Ombiimbeli!

13. Omolwashike tu na okukonakona iiholelwa yaamboka ya popiwa mOmbiimbeli?

¹³ Omathimbo gamwe, ohatu tseya owala shoka tu na okuninga, konima sho twa ninga nale epuko. Ihe kungawo, ombedhi ohayi kala nuukelo. Omukalo omwaanawa gwokwiilikolela uunongo ogwo okwiilonga komapuko gayalwe nokiiholelwa yawo iiwanawa. Onkee ano, Jakob ote tu ladhipike tu tale kiiholelwa yaamboka ya popiwa mOmbiimbeli, ngaashi Abraham, Rahab, Job naElia. (Jak. 2:21-26; 5:10, 11, 17, 18) Aapiya yaJehova mboka aadhiginini oya li ya vulu okwiidhidhimikila omamakelo ngoka ga li taga vulu okuyona po enyanyu lyawo. Iiholelwa yawo yeidhidhimiko otayi ulike kutya kekwatho lyaJehova otatu vulu okuninga sha faathana.

14-15. Omolwashike kaatu na okwiipwililikila omalimbililo?

¹⁴ Shoka tashi vulu okuyona po enyanyu lyetu: Uuna twa limbililwa shoka twi itaala. Omathimbo gamwe, otashi vulika tu kale kaatu uvite ko nawa oshinima shontumba shoka sha popiwa mOohapu dhaKalunga. Nenge tashi vulika Jehova inaa yamukula omagalikano getu momukalo ngoka twa li twa hala. Shoka otashi vulika shi tu ningithe tu kale twa limbililwa. Ngele otwi ipwililikile omalimbililo getu, otaga ka nkundipaleka eitaalo lyetu nokuyona po ekwatathano lyetu naJehova. (Jak. 1:7, 8) Otashi vulika nokuli ge tu ningithe tu kanithe etegameno lyetu lyonakuyiwa.

¹⁵ Omuyapostoli Paulus okwa faathanitha etegameno lyetu lyonakuyiwa nohangela. (Heb. 6:19) Ohangela oshitenda hashi kala kondungu yelyenge shoka hashi kankeke osikepa pethimbo lyoshikungulu noku yi kaleka ya thikama itaayi falwafalwa, opo kaayi ipume momamanya. Ihe ohangela ohayi kwathele owala ngele elyenge ndyoka lya mangelwa kosikepa inali tokoka. Ngaashi owala olusu halu li po elyenge lyohangela, omalimbililo nago otaga vulu okunkundipaleka eitaalo lyetu. Uuna omuntu ngoka e na omalimbililo ta patanekwa, otashi vulika kaa kale we i itaala kutya Jehova ota ka gwanitha omauvaneko ge. Ngele eitaalo lyetu olya nkundipala, itatu kala we netegameno. Ngaashi sha popiwa kuJakob, ngoka a limbililwa “okwa fa ekuthikuthi lyomefuta tali falafalwa notali telaalithwa kombepo.” (Jak. 1:6) Omuntu ngoka e li monkalo ya tya ngawo ke na siku a kale a nyanyukwa nando!

16. Oshike tu na okuninga, ngele otu na omalimbililo?

¹⁶ Shoka to vulu okuninga: Za momalimbililo e to koleke eitaalo lyoye. Ino kakadhala. Pethimbo lyomuhunganeki Elia, oshigwana shaJehova osha kala tashi kakadhala okuninga omatokolo. Elia okwa li e shi lombwele a ti: “Sigo uunake tamu tengukile koombinga noombinga? Omuwa ngele oye Kalunga, mu longeleni; ihe Baal ngele oye Kalunga, mu longeleni!” (1 Aak. 18:21) Nokunena inatu pumbwa okukakadhala. Otwa pumbwa okuninga omapekapeko, tu kale twa tompwa kutya Jehova oye Kalunga, Ombiimbeli oyi li Oohapu dhe nonokutya Oonzapo dhaJehova odho oshigwana she. (1 Tes. 5:21) Ngele otwe shi ningi, otashi tu kutha momalimbililo notashi koleke eitaalo lyetu. Ngele otwa pumbwa ekwatho opo tu ze momalimbililo, otatu vulu okupula ekwatho kaakuluntugongalo. Otu na okuninga po sha nziya, ngele otwa hala okukala twa nyanyukwa sho tatu longele Jehova.

17. Oshike tashi ka ningwa po, ngele otwa teka omukumo?

 ¹⁷ Shoka tashi vulu okuyona po enyanyu lyetu: Etekomukumo. Oohapu dhaKalunga otadhi ti: “Ngele to tenguka pethimbo lyuudhigu, nena oonkondo dhoye oonshona ngiini!” (Omayel. 24:10) Oshitya shOshihebeli shoka sha tolokwa “tenguka” otashi gandja wo eityo “lyokuteka omukumo.” Ngele owa teka omukumo, ito kala we wa nyanyukwa.

18. Okwiidhidhimika otashi ti shike?

¹⁸ Shoka to vulu okuninga: Inekela muJehova e ku pe oonkondo wi idhidhimike. Otwa pumbwa okukala tu na omukumo, opo tu idhidhimikile omamakelo. (Jak. 5:11) Oshitya shoka sha longithwa kuJakob, shoka sha tolokwa “eidhidhimiko,” otashi gandja edhiladhilo lyomuntu ngoka ihaa tengauka. Otashi vulika tu dhiladhile kombinga yomukwiita a nyatipala itaa fadhuka po, e na omukumo okukondjitha omutondi gwe.

19. Oshike tatu vulu okwiilonga koshiholelwa shomuyapostoli Paulus?

¹⁹ Omuyapostoli Paulus okwe tu tulila po oshiholelwa dhingi shokukala nomukumo nokwiidhidhimika. Omathimbo gamwe, okwa li u uvite a nkundipala. Ihe okwa li a vulu okwiidhidhimika, molwaashoka okwa li i inekela muJehova e mu pe oonkondo. (2 Kor. 12:8-10; Fil. 4:13) Natse ota vulu oku tu pa oonkondo nosho wo uulaadhi, ngele otwa zimine neifupipiko kutya otwa pumbwa ekwatho lye. — Jak. 4:10.

20-21. Otu na okukala tu na uushili kombinga yashike?

²⁰ Otatu vulu okukala nuushili kutya omamakelo ngoka hage tu adha, kage shi egeelo okuza kuJehova. Jakob ote tu shilipaleke ta ti: “Omuntu ngele a adhika kemakelo lyoku mu yeleka, ina tya: ‘Emakelo ndika olya zi kuKalunga.’ Oshoka Kalunga iha makelwa kuuwinayi noiha makele nando omuntu.” (Jak. 1:13) Uuna twa tompwa kutya osho shi li ngawo, otatu ka hedha popepi lela naTate yetu gwomegulu omunahole. — Jak. 4:8.

²¹ Jehova ‘iha lunduluka.’ (Jak. 1:17) Okwa li a ambidhidha Aakriste yomethelemumvo lyotango yi idhidhimikile omamakelo, nota ka kwathela wo kehe gumwe gwomutse. Mu pula wa mana mo e ku pe uunongo, eitaalo nomukumo. Ota ka yamukula omagalikano goye. Opo nduno, oto vulu okukala nuushili kutya ote ke ku kwathela wu kale wa nyanyukwa, sho to idhidhimikile omamakelo.