1. Omapulo geni omumwameme e na okwiipula manga inaa hokanwa?

OMUTSE gwAakriste ayehe, oJesus Kristus, ngoka a gwanenena. Ihe ngele omukiintu Omukriste a hokanwa, omusamane gwe ngoka inaa gwanenena, oye ha ningi omutse gwe, oshinima shono hashi kala eshongo. Onkee, omukiintu okwa pumbwa okudhiladhila nawa kombinga yomumwatate ngoka a hala oku mu hokana. Oku na okwiipula kutya: ‘Oshike tashi ulike kutya omumwatate ngoka ota ka kala omutse gwegumbo omwaanawa? Mbela okwa pititha ngaa komeho okulongela Jehova monkalamwenyo ye? Ngele hasho, oshike sha tompa ndje kutya ote ke shi enditha nawa e li omutse uuna twa hokana?’ Omumwameme oku na wo okwiipula kutya: ‘Omaukwatya geni ndi na ngoka taga ka kwathela ondjokana yetu yi pondole? Ondi na ngaa eidhidhimiko nohandi kamutuluka? Mbela ondi na tuu ekwatathano lya kola naJehova?’ (Omuuv. 4:9, 12) Ngele omumwameme okwa ningi omatokolo gopandunge manga inaa hokanwa, otashi ka kwathela ondjokana yawo yi pondole noya kale mo ye na ombili.

2. Otatu ki ilonga shike moshitopolwa shika?

² Aamwameme oyendji oya tula po oshiholelwa oshiwanawa mokukala haya vulika kaasamane yawo. Otu uvite uuntsa nuunambano sho tatu longele Jehova pamwe naakulukadhi mboka aadhiginini. Oyi ilongela shili okupandulwa. Moshitopolwa shika otatu ka yamukula omapulo ngaka gatatu: (1) Omashongo gamwe geni aakulukadhi hayi iyadha mugo? (2) Omolwashike omukulukadhi a pumbwa okuvulika nokusimaneka omusamane gwe? (3) Aasamane naakulukadhi Aakriste otaya vulu okwiilonga shike kombinga yevuliko noyesimaneko koshiholelwa shaJesus, shaAbigal noshaMaria, omukulukadhi gwaJosef, yina yaJesus?

3. Omolwashike aaihokani hayi iyadha momashongo?

³ Ondjokana omagano omawanawa ga za kuJehova, ihe oga pewa aantu inaaya gwanenena. (1 Joh. 1:8) Ombiimbeli oya londodha aaihokani kutya otaya ka taalela omashongo ngoka ga popiwa ge li ‘uudhigu womokukalamwenyo.’ (1 Kor. 7:28) Natu tale komashongo gamwe ngoka omukulukadhi tashi vulika i iyadhe mugo.

4. Oshike tashi vulu okuningitha omukulukadhi a kale u uvite kutya okuvulika komusamane gwe otaku mu dhinitha?

⁴ Omathimbo gamwe, omukulukadhi otashi vulika a kale u uvite kutya okuvulika komusamane gwe noku mu simaneka, otaku mu dhinitha. Omukulukadhi otashi vulika a dhiladhile ngawo omolweputuko lye. Omumwameme Marisol gwokoAmerika, okwa ti: “Moshitopolwa shetu aakiintu oya li haya lombwelwa aluhe kutya oye na okukala ye thike pamwe naalumentu mukehe shimwe. Ondi shi shi kutya Jehova oye a tula po aasamane ya kale omitse dhomagumbo nokwa hala aakulukadhi ya vulike kuyo, ihe aakulukadhi nayo oye na wo okusimanekwa. Ohashi kala oshidhigu kungame ndi simaneke omusamane gwandje aluhe, oshoka aantu momudhingoloko oye wete inaashi pumbiwa.”

5. Aalumentu yamwe oye na etaloko lya puka lini li na ko nasha naakiintu?

⁵ Poompito dhimwe, otashi vulika omukiintu a hokanwa komulumentu ngoka ha dhiladhila kutya aalumentu oye na oshilonga ye vule aakiintu. Omumwameme Ivon gwokUumbugantu waAmerika, ota ti: “Moshitopolwa shetu aalumentu oyo haya li tango, yo aakiintu taya hugunine. Aanona yaakadhona oyo ye na okuteleka nokwoopaleka, omanga aanona yaamati haye etelwa iikulya kooyina nokaamwayinakadhona. Omumati kehe oha lombwelwa kutya ‘oye omuhona megumbo.’” Omumwameme gwedhina Yingling, gwokoAsia, okwa ti: “Melaka lyetu omu na omupopyo tagu ti kutya aakiintu inaya pumbwa okukala ye na oondunge nenge uunkulungu washa. Oshinakugwanithwa shawo osho okulonga iilonga ayihe megumbo noinaya pitikwa ya lombwele aasamane yawo nkene yu uvite.” Omusamane ngoka iha ulukile omukadhi ohole noiha tula miilonga shoka Ombiimbeli tayi ti, ita landula oshiholelwa shaJesus nota yemateke Jehova. Omusamane a tya ngawo, oha ningitha ondjokana yi kale omutenge komukadhi. — Ef. 5:28, 29; 1 Pet. 3:7.

6. Aakulukadhi oya pumbwa okuninga shike, opo ya kale ye na ekwatathano lyopothingo naJehova?

⁶ Ngaashi sha popiwa moshitopolwa sha zi ko, Jehova okwa tegelela aasamane ya sile oshimpwiyu aanegumbo lyawo pambepo, pamaiyuvo nosho wo palutu. (1 Tim. 5:8) Ongiini kombinga yaamwameme mboka ya hokanwa? Oye na okukonga ethimbo esiku kehe, ya leshe Ombiimbeli nokutedhatedha kombinga yaashoka ya lesha nosho wo okugalikana kuJehova nomutima aguhe. Ihashi kala aluhe oshipu, oshoka ohaya kala yi ipyakidhila noonkondo. Otashi vulika ya kale yu uvite kutya kaye na ethimbo noonkondo ye shi ninge, ihe osha simanenena ya konge ethimbo lyokuninga iinima mbyoka. Omolwashike mbela? Omolwaashoka Jehova okwa hala kehe gumwe gwomutse a kokeke noku kale e na ekwatathano lyi ikalekelwa naye. — Iil. 17:27.

7. Oshike tashi ka ningitha omukulukadhi a kale ha vulika komusamane gwe nokwe mu simaneka?

⁷ Omukulukadhi okwa pumbwa okukambadhala a mana mo a kale ha vulika komusamane gwe ngoka inaa gwanenena. Otashi ka kala oshipu kuye oku shi ninga, ngele oku uvite ko nota tsu kumwe naashoka Ombiimbeli tayi ti kombinga yokusimaneka omusamane gwe nokuvulika kuye.

8. Ngaashi sha popiwa mAaefeso 5:22-24, omolwashike omukulukadhi e na okuvulika komusamane gwe?

⁸ Omukulukadhi Omukriste oku na okukala ha vulika komusamane gwe, oshoka Jehova osho a tegelela a ninge. (Lesha Aaefeso 5:22-24.) Okwi inekela He gwomegulu, noku shi shi kutya  oku mu hole nokapu na esiku e mu pule a ninge sha shoka itaashi mu etele uuwanawa. — Deut. 6:24; 1 Joh. 5:3.

9. Oshike tashi ka ningwa po ngele omukulukadhi oha vulika komusamane gwe?

⁹ Uuyuni ohawu ladhipike aakiintu kaaya landule omithikampango dhaJehova noya kale ye wete kutya okusimaneka nokuvulika kaasamane, otaku ya tula pondondo yopevi. Odhoshili kutya mboka taya humitha komeho etaloko lya tya ngawo, inaya tseya Kalunga ketu omunahole. Kapu na esiku a pe oyanakadhona mboka e hole oshipango shoka tashi ya dhinitha. Omukulukadhi ngoka ha kondjo a mana mo a gwanithe po oshipango shaJehova shokuvulika komusamane gwe, oha humitha komeho ombili megumbo. (Eps. 119:165) Shono ohashi mu etele uuwanawa nosho wo omusamane gwe noyana.

10. Oshike tatu ilongo moohapu dhomumwameme Carol?

¹⁰ Omukulukadhi ngoka ha vulika noha simaneke omusamane gwe inaa gwanenena, otu ulike kutya oku hole nokwa simaneka Jehova, ngoka a tula po elongekidho lyuukwamutse. Omumwameme Carol, gwokUumbugantu waAmerika, okwa ti: “Ondi shi kutya omusamane gwandje oha ningi omapuko. Ondi shi wo kutya omukalo moka handi inyenge ngele a ningi epuko, ohagu ulike kutya onda lenga shi thike peni ekwatathano lyandje naJehova. Onkee ano, ohandi kambadhala okuvulika komusamane gwandje, oshoka onda hala okunyanyudha Tate yetu gwomegulu.”

11. Oshike hashi kwathele omumwameme Aneese a kale ha dhimine po, noshike tatu ilongo moohapu dhe?

¹¹ Oshidhigu komukulukadhi a simaneke omusamane gwe noku vulike kuye, ngele omusamane ihu ulike kutya oku na ko nasha nomaiyuvo ge nenge naashoka ha kala ti ipula nasho. Ndhindhilika kutya omumwameme Aneese ohi inyenge ngiini uuna omusamane gwe a ningi ngawo. Ota ti: “Ohandi kambadhala kaandi geye. Ondi shi kutya atuhe ohatu ningi omapuko. Ondi itulila po elalakano lyokukala handi dhimine po nda fa Jehova. Uuna nda dhimine po, ohandi kala nda pepelelwa.” (Eps. 86:5) Ngele omukulukadhi oku na ombepo yokudhimina po, ohashi kala oshipu kuye okuvulika komusamane gwe.

12. MOmbiimbeli omu na iiholelwa yini?

¹² Yamwe otashi vulika ya kale yu uvite kutya omuntu ngoka ha vulika noha simaneke mboka ye na oonkondopangelo, okwi idhina. Ndhono  odhanakalindi. MOmbiimbeli omu na iiholelwa oyindji yaamboka haya vulika noye na esimaneko, ihe oya li aalaadhi. Natu ka tale kwaashoka tatu ilongo moshiholelwa shaJesus, shaAbigal noshaMaria.

13. Omolwashike Jesus ha vulika kuJehova? Shi yelitha.

¹³ Jesus oha vulika kuJehova, ihe hamolwaashoka kee na owino nenge uunkulungu washa. Jesus okwa li ha longo aantu momukalo omupu nogwa yela, oshinima shoka hashi ningwa owala komuntu ngoka e na owino oyindji. (Joh. 7:45, 46) Jehova oku shi kutya Jesus oku na uunkulungu owundji, nomolwaasho a li e mu pitike a longe pamwe naYe sho ta shiti iinima megulu nokombanda yevi. (Omayel. 8:30; Heb. 1:2-4) Konima sho Jehova a yumudha Jesus, okwe mu pe “epangelo alihe megulu nokombanda yevi.” (Mat. 28:18) Nonando Jesus oku na uunkulungu owundji, oha pula aluhe ekwatho kuHe. Omolwashike mbela? Oshoka oku mu hole. — Joh. 14:31.

14. Aasamane otayi ilongo shike (a) komukalo moka Jehova a tala ko aakiintu? (b) koohapu ndhoka dhi li mOmayeletumbulo 31?

¹⁴ Shoka aasamane tayi ilongo. Jehova ina pula omukulukadhi a kale ha vulika noha simaneke omusamane gwe, molwaashoka a tala ko aalumentu oyo ya simana ye vule aakiintu. Shono otu shi iwetele sho a hogolola aakiintu naalumentu ya ka pangele pamwe naJesus. (Gal. 3:26-29) Jehova oku ulike kutya okwiinekela Omwana sho e mu pe oonkondopangelo. Omusamane ngoka e hole omukadhi, oha ningi sha faathana moku mu pa oonkondopangelo dhontumba. Ombiimbeli otayi hokolola omukulukadhi omwaanawa tayi ti kutya oha sile oshimpwiyu egumbo lye, noha vulu okulanda nokulanditha. (Lesha Omayeletumbulo 31:15, 16, 18.) Ke shi omupika ngoka kee na uuthemba wokupopya omaiyuvo ge. Pehala lyaashono, omusamane gwe okwe mu inekela noha pulakene komaetopo ge. (Lesha Omayeletumbulo 31:11, 26, 27.) Ngele omusamane ohu ungaunga nomukadhi momikalo ndhoka, otashi ka kala oshipu komukadhi oku mu simaneka.

15. Aakulukadhi otayi ilongo shike kuJesus?

¹⁵ Shoka aakulukadhi tayi ilongo. Nonando Jesus okwa li a longo iinima oyindji ya simana, ka li u uvite kutya okuvulika kuJehova, otaku mu tula pondondo yopevi. (1 Kor. 15:28; Fil. 2:5, 6) Sha faathana, omukulukadhi ngoka ha landula oshiholelwa shaJesus ita ka kala uvite kutya okusimaneka omusamane gwe nokuvulika kuye otashi mu dhinitha. Ota ka ambidhidha omusamane gwe, hamolwaashoka owala e mu hole, ihe omolwaashoka e hole Jehova nokwe mu simaneka.

16. Ngaashi sha popiwa muSamuel gwotango 25:3, 23-28, Abigal okwa li momashongo geni? (Tala ethano lyokombanda.)

¹⁶ Abigal okwa li a hokanwa kuNabal, ngoka a li ihole nayi, e na uuntsa noiha pandula. Nonando onkalo osho ya li ngawo, Abigal ina hengana. Okwa li ta vulu okumwena, nokweetha David naalumentu ye ya dhipage Nabal, opo a ze omukundu gumwe. Ihe ine shi ninga. Okwa ningi ngaashi ta vulu, a gamene Nabal naanegumbo lyawo oyendji. Osha li lela sha pula Abigal uulaadhi, opo a ye kaalumentu 400 ya homata nokupopya naDavid nesimaneko kombinga yuupyakadhi mboka we etithwa kuNabal. Okwa gandja nokuli ombili pehala lyomusamane gwe. (Lesha 1 Samuel 25:3, 23-28.) David okwa li a mono kutya Jehova oye a longitha omukiintu ngoka omulaadhi, e mu pe omayele ngoka ge mu kwathele, opo kaa ka tilehi ombinzi.

17. Aasamane otayi ilongo shike kuDavid naAbigal?

¹⁷ Shoka aasamane tayi ilongo. Abigal okwa li omukiintu omunandunge. David okwa li a pulakene komayele ge omawanawa. Kungawo, David okwa katuka pandunge kaa dhipage aantu kaaye na ondjo. Sha faathana, omusamane ngoka e hole omukadhi oha pulakene komaetopo ge manga inaa ninga omatokolo ga simana. Otashi vulika omaetopo gomukadhi ge mu kwathele, kaa ninge etokolo lya samapala.

18. Aakulukadhi otayi ilongo shike kuAbigal?

 ¹⁸ Shoka aakulukadhi tayi ilongo. Omukulukadhi ngoka e hole Jehova nokwe mu simaneka, ota vulu okukala ekwatho enene kaanegumbo lye, nuuna omusamane gwe ihaa longele Jehova nenge ihaa vulika komithikampango dhe. Omukulukadhi a tya ngawo, ita ka konga omatompelo kaage li pamanyolo a teye ondjokana. Pehala lyaashono, ota ka ninga ngaashi ta vulu a kwathele omusamane gwe a kale a hala okwiilonga kombinga yaJehova. Ngiini mbela? Omokukala ha vulika komusamane gwe noku mu simaneka. (1 Pet. 3:1, 2) Nonando omusamane ina taamba ko oshili, omolwoshiholelwa oshiwanawa shomukadhi, Jehova ota ka kala a nyanyukwa sho e wete omukulukadhi ta vulika komusamane gwe note mu simaneke.

19. Omoonkalo dhini omukulukadhi inaa pumbwa okuvulika komusamane gwe?

¹⁹ Omukulukadhi Omukriste oku na okuvulika nokusimaneka omusamane gwe. Ihe ngele omusamane ote mu pula a ninge oshinima shi li ompinge noompango dhOmbiimbeli nenge nomakotampango gayo, ota ka tinda. Natu tye andola omusamane ngoka kee shi Onzapo ota thiminike omukadhi a fundje, a yake nenge a ninge sha shoka kaashi li metsokumwe nomanyolo. Monkalo ya tya ngawo, omukulukadhi oku na okuvulika kuJehova Kalunga, oshoka Aakriste ayehe osho ya tegelelwa ya ninge. Ngele omusamane ota pula omukadhi a yone omakotampango gOmbiimbeli, nena oku na okunukila pomutenya nokuyelithila omusamane gwe momukalo omuwanawa kutya omolwashike ta tindi. — Iil. 5:29.

20. Otu shi shi ngiini kutya Maria okwa li e na ekwatathano lyopothingo naJehova?

²⁰ Maria okwa li e na ekwatathano lyopothingo naJehova. Okwa li e shi nawa Omanyolo. Sho a li ta popi naElisabet, yina yaJohannes Omuninginithi, Maria okwa totha lwiikando yi vulithe 20 mOmanyolo gOshihebeli. (Luk. 1:46-55) Shimwe ishewe, nonando Maria okwa li a yalekwa kuJosef, omuyengeli gwaJehova ini ihololela Josef tango. Omuyengeli okwa popi tango naMaria shu ukilila, e te mu lombwele kutya ota ka vala Omuna gwaKalunga. (Luk. 1:26-33) Jehova okwa li e shi Maria nawa nokwa li e na einekelo kutya ota ka kala e hole Omwana note ke mu sila oshimpwiyu. Maria okwa tsikile lela okukala e na ekwatathano ewanawa naJehova sho Jesus a si nokonima sho a yumudhilwa omwenyo gwomegulu. — Iil. 1:14.

21. Aasamane otayi ilongo ko shike kwaashoka Ombiimbeli ya popya kombinga yaMaria?

 ²¹ Shoka aasamane tayi ilongo. Omusamane oha kala a nyanyukwa ngele omukadhi oku shi nawa Omanyolo. Iha kala a geya nenge a dhiladhile kutya omukadhi okwa hala oye a ninge omutse gwegumbo. Oku shi kutya ngele omukadhi oku shi nawa Ombiimbeli nomakotampango gayo, ota ka kala ekwatho enene megumbo. Nonando omukulukadhi oku kale a longwa e vule omusamane gwe, omusamane oye e na okukwatela komeho elongelokalunga lyuukwanegumbo nosho wo iinima yilwe yopakalunga. — Ef. 6:4.

22. Aakulukadhi otayi ilongo shike kuMaria?

²² Shoka aakulukadhi tayi ilongo. Omukulukadhi oku na okusimaneka nokuvulika komusamane gwe, noku na wo oshinakugwanithwa shokwiipalula ye mwene pambepo a kale e na eitaalo lya kola. (Gal. 6:5) Onkee ano, okwa pumbwa okukonga ethimbo a konakone Ombiimbeli paumwene nokutedhatedha kwaashoka ti ilongo. Shoka otashi ke mu kwathela a kale aluhe e hole Jehova nokwe mu simaneka. Otashi ke mu kwathela wo a kale ha vulika komusamane nohe mu simaneke nomutima aguhe.

23. Uuwanawa wuni aakulukadhi mboka haya vulika hayi iyetele yo yene, aanegumbo lyawo nosho wo megongalo?

²³ Aakulukadhi mboka haya vulika kaasamane yawo, shaashi ye hole Jehova, ohaya kala ya nyanyukwa noonkondo noya gwanenwa, ye vulithe mboka haya tindi okulandula elongekidho lyuukwamutse ndyoka Jehova a tula po. Oye li oshiholelwa oshiwanawa kaalumentu naakiintu aagundjuka. Ohaya ningitha wo aantu megumbo nomegongalo ya kale ye holathane noye na ombili. (Tit. 2:3-5) Aapiya yaJehova oyendji mboka aadhiginini kunena, aakiintu. (Eps. 68:11) Kehe gumwe megongalo, kutya nduno omulumentu nenge omukiintu, oku na oshinakugwanithwa sha simana. Oshitopolwa tashi landula ko otashi ke tu kwathela tu mone nkene tatu vulu oku shi gwanitha po.