1-2. (a) Omolwashike aantu oyendji haye shi mono oshidhigu kunena okwiinekela mboka ye na oonkondopangelo? (b) Oshike tatu ka kundathana moshitopolwa shika?

KUNENA aantu oyendji ohaye shi mono oshidhigu okwiinekela mboka ye na oonkondopangelo. Omolwashike mbela? Oshoka oya mona kutya omapangelo noompango ndhono ga tula po, olundji ohadhi gamene owala aayamba naamboka ye na oonkondopangelo, ihe oohepele olundji ihadhi ungaungiwa nadho pauyuuki. Ombiimbeli otayi shi popi sha yela tayi ti: ‘Omuntu ota pangele mukwawo nonyanya.’ (Omuuv. 8:9, yelekanitha NW) Shimwe ishewe, aakwatelikomeho yamwe momalongelokalunga nayo ohaya ningi iinima iiwinayi, shoka sha ningitha aantu yamwe kaaya kale we yi inekela Kalunga. Onkee ngele gumwe okwa zimine tu konakone naye Ombiimbeli, ohatu kala twa pumbwa oku mu kwathela i ilonge okukala i inekela Jehova naakalelipo ye yokombanda yevi.

² Odhoshili kutya aakonakonimbiimbeli hayo owala ya pumbwa okwiilonga okukala yi inekela Jehova nosho wo ehangano lye. Natse mboka twa kala moshili omimvo odhindji, katu na okweetha po okukala twi inekela kutya Jehova oha ningi aluhe shoka shi li mondjila. Omathimbo gamwe oha pu holoka sha shoka tashi vulika shi makele einekelo lyetu muJehova. Moshitopolwa shika otatu ka kundathana oonkalo ndatu moka eitaalo lyetu tali vulu okumakelwa. (1) Sho tatu lesha omahokololo gontumba mOmbiimbeli, (2) uuna twa pewa omalombwelo ga za kehangano lyaJehova nosho wo (3) uuna tatu ka adhika komaudhigu monakuyiwa.

3. Omahokololo gamwe gomOmbiimbeli otaga vulu ngiini okumakela einekelo lyetu muJehova?

 ³ Uuna tatu lesha Ombiimbeli, otashi vulika tu ipule kombinga yomukalo moka Jehova a ungaunga naantu yamwe nosho wo kutya omolwashike a ningi omatokolo gontumba. Pashiholelwa, membo lyaNumeri ohatu lesha mo kutya Jehova okwa li a tokolele eso Omuisraeli ngono a li a tyaya iikuni mEsabati. Membo etiyali lyaSamuel omwa popiwa kutya konima yomathelemimvo, Jehova okwa li a dhimine po omukwaniilwa David sho a yi moluhondelo naBatseba, e ta dhipagitha ishewe omusamane gwe. (Num. 15:32, 35; 2 Sam. 12:9, 13) Otashi vulika tu ipule ngeyi, ‘Omolwashike Jehova a dhimine po David sho a dhipagitha omuntu naasho a yi moluhondelo, ihe okwa tokolele eso Omuisraeli ngono eyono lye tali monika inaali kwata miiti?’ Opo tu yamukuleni epulo ndyoka, natu ka taleni kiinima itatu mbyono tu na aluhe okukaleka momadhiladhilo uuna tatu lesha Ombiimbeli.

4. Genesis 18:20, 21 nosho wo Deuteronomium 10:17 otaye tu kwathele ngiini tu kale tu na einekelo momatokolo gaJehova?

⁴Ombiimbeli ihayi popi aluhe uuyelele awuhe mboka wa kwatelwa mo mehokololo lyontumba. Pashiholelwa, otu shi shi kutya David okwa li i iyele ombedhi omolwomayono ge. (Eps. 51:2-4) Ihe mbela omulumentu ngono a li a taaguluka ompango yi na ko nasha nEsabati okwa li e na iikala ya tya ngiini? Mbela okwa li ngaa i iyele ombedhi omolwoshinima shoka a ningi? Mbela okwa za ha yono oompango dhaKalunga monakuziwa? Mbela okwa li i ipwililikile nenge a tindi omalondodho ngono a pewelwe? Ombiimbeli inayi shi popya. Nonando ongawo, otatu vulu okukala nuushili kutya Jehova ‘ke na uugoyoki.’ (Deut. 32:4) Oha ningi omatokolo ge shi ikolelela kuuyelele wi ihwa po, ihe hakwaashoka aantu taya ti, kokatongo nenge shi ikolelela kwaashoka olundji hashi ningitha aantu ya kale ye na etaloko lya penga kombinga yonkalo yontumba. (Lesha Genesis 18:20, 21; Deuteronomium 10:17.) Ngele otwa kala hatu ilongo kombinga yaJehova nomithikampango dhe, otatu ka kala tu na einekelo momatokolo ge. Nonando ehokololo lyontumba mOmbiimbeli oli tu ningithe tu kale tu na omaipulo, shoka tu shi kombinga yaKalunga ketu otashi vulu oku tu kwathela tu kale twa tompwa kutya “omuyuuki miilonga ye ayihe.” — Eps. 145:17.

5. Okwaagwanenena kwetu ohaku tu ningitha ngiini tu tale ko iinima pambambo? (Tala wo oshimpungu “ Okwaagwanenena ohaku tu ningitha tu tale ko iinima pambambo.”)

 ⁵Omathimbo gamwe ohatu tala ko iinima pambambo molwaashono inatu gwanenena. Kalunga okwe tu shita oshifetha she, onkee ohatu kala twa halelela aantu yu ungaungiwe nayo pauyuuki. (Gen. 1:26) Ihe molwaashono inatu gwanenena, otashi vulika tu thike pehulithodhiladhilo lya puka, nonando otu wete tu na uuyelele awuhe. Pashiholelwa, dhimbulukwa nkene Jona a li a yemata, sho Jehova a sile Aaninive ohenda. (Jona 3:10–4:1) Ihe oshike sha ningwa po sho Jehova e shi ningi? Aaninive ye vulithe 120 000 mbono ya li yi itedhulula, oya hupithwa. Pehulilo, Jona oye a li e na okulundulula etaloko lye, ihe haJehova.

6. Omolwashike Jehova inaa pumbwa oku tu yelithila kutya omolwashike a ninga omatokolo gontumba?

⁶Jehova ina pumbwa okuyelithila aantu kutya omolwashike a ninga omatokolo gontumba. Odhoshili kutya Jehova okwa li a pitike aapiya ye yamwe monakuziwa ya popye nkene ye uvite kombinga yomatokolo ngoka a ninga naangoka a li pokuninga. (Gen. 18:25; Jona 4:2, 3) Poompito dhimwe okwa li a yelitha kutya omolwashike a ningi etokolo lyontumba. (Jona 4:10, 11) Nonando ongawo, Jehova ina pumbwa oku tu yelithila kutya omolwashike a ninga etokolo lyontumba. Molwaashoka oye Omushiti gwetu, ina pumbwa epitikilo lyetu manga inaa ninga etokolo nenge konima ngele e li ningi. — Jes. 40:13, 14; 55:9.

7. Otashi vulika tu kale tu wete oshidhigu okuninga shike, nomolwashike?

⁷ Kapu na omalimbililo kutya atuheni otu shi shi kutya Jehova oha ningi aluhe shoka shi li mondjila. Ihe otashi vulika tu shi mone oshidhigu okwiinekela aalumentu mboka a langeka po. Otashi vulika tu kale twa limbililwa ngele mboka taya kwatele komeho mehangano lyaJehova ohaya landula ngaa ewiliko lye, nenge ohaya ningi owala iinima shi ikolelela koondunge dhawo yene. Pethimbo lyOmbiimbeli, yamwe otashi vulika osho ya li haya dhiladhila ngaaka. Natu taleni kiiholelwa mbyoka yi li mokatendo  okati-3. Omukwanezimo gwomulumentu ngoka a li a taaguluka ompango yi na ko nasha nEsabati otashi vulika a li a limbililwa ngele Moses okwa pula ngaa Jehova shili manga omulumentu ngoka inaa tokolelwa eso. Kuume kaUria Omuheti, ngoka omukulukadhi gwe a yi moluhondelo naDavid, otashi vulika a li a thiki pehulithodhiladhilo kutya David okwa longitha ondondo ye, opo a yande okudhipagwa. Uushili owo kutya itatu vulu okutya otwi inekela muJehova ngele inatu inekela aalumentu mboka a langeka po, mbono Jehova i inekela.

8. Efaathano lini li li pokati kaashono sha popiwa mIilonga 16:4, 5 naashono hashi ningwa megongalo lyopaKriste kunena?

⁸ Kunena, Jehova oha wilike oshitopolwa shehangano lye shokombanda yevi ta longitha ‘omupiya omudhiginini nomunandunge.’ (Mat. 24:45, yelekanitha NW) Ngaashi olutuwiliki lwomethelemumvo lyotango, omupiya nguno oha tonatele oshigwana shaJehova muuyuni awuhe noha gandja omalombwelo kaakuluntugongalo momagongalo. (Lesha Iilonga 16:4, 5.) Opo ihe aakuluntugongalo ohaya landula omalombwelo ngoka momagongalo gawo. Ohatu ulike kutya otwi inekela omukalo moka Jehova ha ningi iinima, uuna tatu vulika komalombwelo ngoka haga zi kehangano lye nokaakuluntugongalo.

9. Uunake tashi vulika tu shi mone oshidhigu okuyambidhidha etokolo lyontumba ndyoka lya ningwa kaakuluntugongalo, nomolwashike?

⁹ Omathimbo gamwe otashi vulika tu shi mone oshidhigu tu yambidhidhe omatokolo ngoka ga ningwa kaakuluntugongalo. Pashiholelwa, momimvo opo dha zi ko, momagongalo ogendji nomiikandjo omwa ningwa omalunduluko. Poompito dhimwe, aakuluntugongalo oya li ya pula aauvithi yamwe ya tembukile komagongalo galwe, opo ya ka udhithe iipundi mIinyanga yetu mbyoka yUukwaniilwa. Ngele otwa  pulwa tu wayimine egongalo epe, otashi vulika tu shi mone oshidhigu okuthiga po ookuume naakwanezimo. Mbela aakuluntugongalo ohaya pewa omalombwelo kutya omuuvithi guni ta yi kegongalo lini? Hasho nando. Shono otashi vulika shi shi ningithe oshidhigu tu landule omalombwelo ngono hatu pewa. Ihe Jehova okwi inekela aakuluntugongalo sho e ya pa omalombwelo ngoka, onkee ano natse otu na oku ya inekela. *

10. Metsokumwe nAahebeli 13:17, omolwashike tu na okuyambidhidha omatokolo gaakuluntugongalo?

¹⁰ Omolwashike tu na okuyambidhidha omatokolo ngono haga ningwa kaakuluntugongalo nonando hago twa li twa hala ya ninge? Omolwaashoka ngele otwe shi ningi, kungawo otatu kwathele oshigwana shaKalunga shi kale sha hangana. (Ef. 4:2, 3) Shimwe ishewe, omagongalo ohage shi enditha nawa ngele aakwanegongalo ayehe ohaya ambidhidha omatokolo ngono ga ningwa kolutu lwaakuluntugongalo. (Lesha Aahebeli 13:17.) Shono sha simanenena, ohatu ulikile Jehova kutya otwe mu inekela, uuna tatu vulika kwaamboka a pa oshinakugwanithwa shoku tu sila oshimpwiyu. — Iil. 20:28.

11. Oshike tashi vulu oku tu kwathela tu kale tu na einekelo lya kola mewiliko ndyoka hatu pewa kaakuluntugongalo?

¹¹ Otatu vulu okukala tu na einekelo lya kola mewiliko ndyono hatu pewa kaakuluntugongalo, oshoka ohaya galikana ya pewe ombepo ondjapuki uuna taya ningi omatokolo ngono ga guma egongalo. Ohaya tala wo komakotampango gOmbiimbeli ngono taga opalele, nokomilandu ndhono dha tulwa po kehangano lyaJehova. Ohaya ningi ngawo, oshoka oya hala okunyanyudha Jehova noya sile oshimpwiyu oshigwana she nawa ngaashi tashi vulika. Aalumentu mbaka aadhiginini oye shi kutya Kalunga oha kala e na ko nasha nomukalo moka taya sile oshigwana she oshimpwiyu. (1 Pet. 5:2, 3) Natu taleni kwaashika: Nonando uuyuni owa topolwa komihoko, komalongelokalunga nokopolotika, oshigwana shaJehova osha hangana, tashi longele Kalunga kashili gumwe. Shino osha vulu owala okuningwa, molwaashono Jehova ota kwathele ehangano lye!

12. Aakuluntugongalo oye na okutala kiinima yini uuna taya tala ngele omuntu okwi iyela ombedhi?

¹² Jehova okwa pa aakuluntugongalo oshinakugwanithwa sha kwata miiti shokukaleka egongalo lya yela. Ngele Omukriste okwa yono eyono lya kwata miiti, Jehova okwa tegelela aakuluntugongalo ya tale ngele omuntu ngono okwa pumbwa okukondwa nenge hasho. Sho taye shi ningi, ohaya tala wo ngele omuntu ngono okwi iyela shili ombedhi omolwoshinima shoka a ninga. Otashi vulika a tye okwi iyela ombedhi, ihe mbela oku tonde ngaa shili shono a ninga? Okwa tokola ngaa toko kaa endulule we eyono lye? Ngele okwa yono omolwookuume aawinayi, mbela oku na ngaa ehalo lyokweetha po okweendathana nayo? Aakuluntugongalo ohaya galikana nokutala kuuyelele awuhe mboka wa kwatelwa mo nosho wo shoka Ombiimbeli tayi ti, e taya tala ishewe kutya nakuyona oku uvitile ngiini shoka a ninga. Opo nduno ohaya tala ngele omuyoni ngoka ota kala megongalo nenge hasho. Poompito dhimwe, oku na okukondwa. — 1 Kor. 5:11-13.

13. Otashi vulika tu kale tu na omaipulo geni ngele kuume ketu kopothingo nenge omukwanezimo gwetu okwa kondwa?

¹³ Einekelo lyetu maakuluntugongalo otashi vulika li makelwe ishewe ngiini? Ngele omuntu ngoka a kondwa ke shi kuume ketu kopothingo nenge omukwanezimo, otashi vulika tu taambe ko nuupu etokolo ndyoka lya ningwa kaakuluntugongalo. Ihe ongiini ngele omuntu ngono a kondwa okuume ketu kopothingo? Otashi vulika tu kale tatu ipula ngele aakuluntugongalo oya tala ngaa kuuyelele awuhe mbono wa kwatelwa mo nenge tu kale twa limbililwa ngele etokolo ndyoka ya ninga olyo ngaa Jehova li a hala ya ninge. Oshike tashi vulu oku tu kwathela tu kale tu na  iikala iiwanawa kombinga yetokolo ndyoka ya ninga?

14. Oshike tashi vulu oku tu kwathela ngele aakuluntugongalo oya tokola kutya kuume ketu nenge omukwanezimo gwetu na kondwe?

¹⁴ Natu dhimbulukwe kutya okukondwa elongekidho lya tulwa po kuJehova. Ohaku etele egongalo uuwanawa nohaku vulu wo okweetela nakuyona uuwanawa. Ngele omuyoni ngoka ini iyela ombedhi okwe ethwa a kale megongalo, ota vulu okukala enwethomo ewinayi kuyalwe. (Gal. 5:9) Shimwe ishewe, otashi vulika kaa mone kutya eyono lye olya kwata miiti shi thike peni, notashi vulika a kale e wete inaashi pumbiwa a lundulule okudhiladhila kwe neihumbato lye, opo a kale ishewe a hokiwa kuJehova. (Omuuv. 8:11) Natu kale nuushili kutya uuna aakuluntugongalo taya tokola ngele omuntu oku na okukondwa, oshinima shono ohaye shi ningi lela yi itula mo. Oye shi kutya ngaashi aapanguli yopethimbo lyaIsraeli shonale, ‘ihaya tokolele aantu, ihe Omuwa.’ — 2 Ondjal. 19:6, 7, OB-1954.

15. Omolwashike tu na okukala twi inekela mewiliko lyaJehova ngashingeyi shi vulithe nale?

¹⁵ Sho uuyuni mbuka wa kolokosha tawu ende wu uka pehulilo, otwa pumbwa okukala twi inekela omukalo moka Jehova ha ningi iinima, shi vulithe nale. Omolwashike mbela? Pethimbo lyuudhigu uunene, otashi vulika tu ka pewe omalombwelo ngoka tatu ka kala tu wete omadhigu okuuva ko nenge tu wete itaatu vulu oku ga tula miilonga. Odhoshili kutya pethimbo ndyono Jehova ita ka popya natse pauhandimwe. Otashi vulika e ke tu pe omalombwelo okupitila maalumentu mboka a langeka po. Ndyoka itali ka kala ethimbo lyokukala twa limbililwa omalombwelo ngoka tatu pewa, nenge tatu ipula tatu ti: ‘Omalombwelo ngano oga zi ngaa shili kuJehova nenge aamwatate mbono ya langekwa po oyo owala ye ga toto po yo yene?’ Mbela oto ka kala ngaa wi inekela muJehova nomehangano lye pethimbo ndyono lya simana? Shono ho dhiladhila kombinga yewiliko ndyono Jehova ha gandja ngashingeyi okupitila maakalelipo ye, osho tashi ku kwathele wu mone kutya eyamukulo lyoye olini kepulo ndyoka. Ngele oho kala wi inekela ewiliko ndyono hatu pewa ngashingeyi noho vulika kulyo nehalo ewanawa, otashi vulika osho wu ka ninge ngaaka pethimbo lyuudhigu uunene. — Luk. 16:10.

16. Einekelo lyetu mepangulo lyaJehova otashi vulika li ka makelwe ngiini monakuyiwa?

¹⁶ Opu na ishewe oshinima shimwe twa pumbwa okudhiladhila muule kombinga yasho, ano sho Jehova ta ka pangula aantu pehulilo lyuuyuni mbuka wa kolokosha. Ngashingeyi, otu na einekelo kutya aantu oyendji mboka ihaaya longele Jehova, mwa kwatelwa aakwanezimo yetu, otaya ka hogolola ye mu longele  manga ehulilo inaali ya. Ihe puArmagedon, Jehova ota ka longitha Jesus a ninge etokolo lyahugunina kombinga yonakuyiwa yawo. (Mat. 25:31-33; 2 Tes. 1:7-9) Hatse tatu ka tokola kutya omuntu guni ta silwa ohenda kuJehova na guni ta hanagulwa po. (Mat. 25:34, 41, 46) Mbela otatu ka kala ngaa twi inekela metokolo ndyono Jehova ta ka ninga nenge otatu ka etha po oku mu longela molwaashono itaatu tsu kumwe nalyo? Onkee ano, otwa pumbwa okukoleka einekelo lyetu muJehova ngashingeyi, opo tu ke mu inekele thiluthilu monakuyiwa.

17. Uuwanawa wuni tatu ka mona ngele Jehova a hanagula po uuyuni mbuka wa kolokosha?

¹⁷ Dhiladhila owala nkene tatu ka kala tu uvite muuyuni uupe sho Jehova a hanagula po aakolokoshi. Itamu ka kala omalongelokalunga giifundja, oongeshefa ndhono dhi na olwiho nosho wo omapangelo gopapolotika ngoka ga kala nokuthindila aantu kongudhi noku ya hepeka. Otatu ka kala tu na uukolele wi ihwa po, itatu ka kulupa noitatu ka silwa aaholike yetu. Satana noompwidhuli dhe otaya ka kala ya mangwa uule womimvo eyuvi. Iinima ayihe iiwinayi mbyoka ye etithwa kuunashipotha wawo, itayi ka kala po we. (Eh. 20:2, 3) Itatu ka kala tuu twa pandula sho twa kala twi inekela momukalo moka Jehova ha ningi iinima!

18. Iiyilongomwa yini tatu vulu okwiilonga kAaisraeli muNumeri 11:4-6 nosho wo 21:5?

¹⁸ Mbela muuyuni uupe einekelo lyetu momukalo mono Jehova ha ningi iinima otashi vulika li ka makelwe? Pashiholelwa, natu taleni kwaashoka sha li sha ningwa po konima yokathimbo okafupi sho Aaisraeli ya mangululwa mo muupika muEgipiti. Yamwe oya tameke okunyenyeta molwaashoka ya yuulukwa iikulya mbyoka ya li haya li koshilongo hoka, noya li ya kenyanana omanna ngono Jehova a li he ya pe. (Lesha Numeri 11:4-6; 21:5.) Mbela natse otashi vulika tu ka kale tu na omadhiladhilo ga fa gawo konima yuudhigu uunene? Katu shi kutya otatu ka longa iilonga yi thike peni, sho tatu ka opaleka evi nokweendela ko tatu li ningi oparadisa. Otashi vulika tatu ka kala tu na iilonga oyindji, nonkalamwenyo otashi vulika itayi ka kala ompu petameko. Mbela otashi vulika tu ka nyenyete kombinga yaashono Jehova te ke tu pa pethimbo ndyono? Uushili owo kutya ngele ohatu kala twa pandula iinima mbyoka Jehova he tu pe ngashingeyi, otatu ka kala wo twa pandula iinima mbyoka te ke tu pa monakuyiwa.

19. Owi ilongo shike moshitopolwa shino?

¹⁹ Jehova aluhe oha ningi iinima momukalo gu li mondjila. Natu kale lela tu na einekelo moshinima shoka. Otwa pumbwa wo okukala twi inekela mboka Jehova a pa oshinakugwanithwa shoku tu pa omalombwelo ge. Shimwe ishewe, inatu dhimbwa oohapu ndhoka Jehova a lombwele omuhunganeki Jesaja, a ti: ‘Inekelii ndje meimweneneno, notamu kala mu na oonkondo.’ — Jes. 30:15.