1. Opoompito dhini tashi vulika tu pewe omayele, nomolwashike atuheni twe ga pumbwa?

ATUHENI ohatu kala twa pumbwa okupewa omayele ethimbo nethimbo. Poompito dhimwe otashi vulika tu pule omayele kwaangoka twi inekela. Shimwe ishewe, omumwatate ngoka ti ipula natse otashi vulika e tu lombwele kutya otu li pokugwila “meyono,” ndyoka tali ke tu ningitha tu ipe uusama. (Gal. 6:1) Omathimbo gamwe omayele ngoka otashi vulika tu ga pewe momukalo gwepukululo konima sho twa yona sha kwata miiti. Kutya nduno otwe ga pewelwa shike, natu ga taambe ko. Ngele otwe shi ningi, otashi ke tu etela uuwanawa notashi ka hupitha oomwenyo dhetu. — Omayel. 6:23.

2. Metsokumwe nOmayeletumbulo 12:15, omolwashike tu na okupulakena komayele?

² Enyolo lyetu lyenenedhiladhilo lyoshitopolwa otali tu ladhipike tu ‘pulakene koohapu dhaanawino.’ (Omayel. 22:17) Kapu na omuntu e shi kehe shimwe, ihe oha pu kala aluhe gumwe ngoka e na owino oyindji e tu vule. (Lesha Omayeletumbulo 12:15.) Onkee ano, ngele otwa kala hatu pulakene komayele, kungawo otatu ulike kutya tse aaifupipiki. Otashi ulike wo kutya otu shi omangambeko getu notwa pumbwa ekwatho lyayalwe, opo tu adhe omalalakano getu. Jehova okwa li i inyengitha omukwaniilwa Salomo a nyole ta ti: ‘Omadhiladhilo otaga tompola sha mpoka pe na aagandjindunge oyendji.’ — Omayel 15:22.

3. Omomikalo dhini tashi vulika tu pewe omayele?

³ Otashi vulika tu pewe omayele momukalo gu ukilila nenge ngoka ga nuninwa kehe gumwe. Mbela okupewa omayele ngoka ga nuninwa kehe gumwe osha hala okutya ngiini? Otashi vulika tu leshe oshinima shontumba mOmbiimbeli nenge mushimwe shomiileshomwa yetu, shoka tashi tu ningitha tu dhiladhile nawa kombinga yoshinima shoka twa hala okuninga, e tatu lundulula okudhiladhila kwetu neihumbato lyetu. (Heb. 4:12) Ngoka ogo nduno omayele ga nuninwa kehe gumwe. Ihe okupewa omayele momukalo gu ukilila osha hala okutya ngiini? Omukuluntugongalo, nenge omumwatate  gulwe a pyokoka, otashi vulika e tu lombwele kondandalunde kutya openi twa pumbwa okuninga omalunduluko. Nena ngono omayele ge tu ukilila. Ngele gumwe okwe tu ulukile ohole moku tu pa omayele gopaMbiimbeli, natu ulike kutya otwe mu pandula mokupulakena kuye, e tatu kambadhala okutula miilonga omayele ngoka.

4. Shi ikolelela kOmuuvithi 7:9, oshike tu na okuyanda uuna tatu pewa omayele?

⁴ Uushili owo kutya omathimbo gamwe ohashi vulika shi kale oshidhigu lela okutaamba ko nokutula miilonga omayele ngoka twa pewa ge tu ukilila. Otashi vulika nokuli tu geye. Omolwashike mbela? Nonando oshipu kutse okupopya kutya inatu gwanenena, otashi vulika tu shi mone oshidhigu okutaamba ko omayele ngele omuntu gumwe okwe tu lombwele kondandalunde epuko ndyoka twa ninga. (Lesha Omuuvithi 7:9.) Otashi vulika tu ninge omaipopilo. Otashi vulika tu ipule kutya omolwashike omuntu ngoka e tu pe omayele nenge tu geye omolwomukalo moka e ge tu pe. Otashi vulika nokuli tu mu pe uusama tatu ti: ‘Ke na uuthemba woku pa ndje omayele. Naye oha ningi omapuko!’ Hugunina, ngele omayele ngoka otu wete inaage tu opalela, otashi vulika tu gi ipwililikile nenge tu ka pule omuntu gulwe ngoka tu wete kutya ote ke tu lombwela shoka twa hala okuuva.

5. Otatu ka kundathana shike moshitopolwa shika?

⁵ Moshitopolwa shika otatu ka kundathana kombinga yiiholelwa yayamwe mboka ya popiwa mOmbiimbeli, mboka ya li ya tindi omayele naamboka ya li ye ga taamba ko. Otatu ka tala wo kutya oshike tashi tu kwathele tu kale hatu taamba ko omayele, e tatu mono uuwanawa mugo.

6. Oshike tatu ilongo kunkene omukwaniilwa Rehabeam i inyenge sho a pewa omayele?

⁶ Natu tale koshiholelwa shaRehabeam. Sho a ningi omukwaniilwa gwaIsraeli, aalelwa ye oya yi kuye ye ke mu pule e ya ningile sha. Oye mu pula a pupaleke omitenge omidhigu ndhoka he, Salomo, a li e ya tsika. Shoka shi shi okupandulwa, Rehabeam okwa ka pula aasamane aakulupe yomuIsraeli eyamukulo ndyoka e na oku ka pa aalelwa ye. Aasamane mboka oya lombwele omukwaniilwa ngoka kutya ngele okwa ningi shoka aalelwa ye mu pula, otaye ke mu longela aluhe nuudhiginini. (1 Aak. 12:3-7) Ihe Rehabeam ka li a panda omayele ngoka a pewa, onkene okwa yi a ka pule omayele kaalumentu yepipi lye mboka ya putukila pamwe naye. Aalumentu mboka otashi vulika ya li yepipi lyomimvo 40 lwaampono, onkene otashi vulika nayo ya li ye na owino yontumba monkalamwenyo. (2 Ondjal. 12:13) Ihe nonando ongawo, oya pe Rehabeam omayele omawinayi. Oye mu lombwele a ka dhigupaleke noonkondo omitenge dhaalelwa ye. (1 Aak. 12:8-11) Molwaashoka Rehabeam ngashingeyi okwa li a pewa omaetopo gaali, okwa li e na okupula Jehova megalikano kutya na landule po lini. Ihe pehala lyaashono, okwa tokola a taambe ko omayele ngoka e wete ogo omawanawa, ngoka a pewa kaalumentu aagundjuka, e ta ningi shoka ye mu lombwele. Shoka osha li she etele Rehabeam iizemo iiwinayi noonkondo nosho wo Aaisraeli. Kutse, omayele ngoka hatu pewa otashi vulika hago aluhe hatu kala twa hala okuuva. Ihe ngele oga kankamena kOohapu dhaKalunga, natu kale hatu ga taamba ko.

7. Oshiholelwa shomukwaniilwa Ussia otashi tu longo shike?

⁷Omukwaniilwa Ussia naye okwa li a tindi omayele. Esiku limwe okwa li a yi mehala limwe lyomotempeli yaJehova moka mwa li owala mwa pitikilwa okuyiwa kaayambi, e ta kutha iitsinino e yi fikile ketsininoyambelo. Aayambi yaJehova oye mu lombwele ya ti: “Ussia! Ku na uuthemba okufikila Omuwa iitsinino. Aayambi yomoluvalo lwaAaron oyo ayeke ya yapulilwa oku shi ninga.” Ussia okwi inyenge ngiini? “Okwa geele aayambi.” Ihe andola okwa taambele ko omayele ngoka neifupipiko e ta zi mo mbalambala motempeli, otashi vulika andola Jehova e mu dhimine po. Omayele okwe ga tindile shike? Omolwaashoka okwa li e uvite kutya shaashi ye  omukwaniilwa, oku na uuthemba wokuninga shoka a hala. Ihe Jehova ka li e shi tala ko ngaaka. Onkee molwaashoka okwa ningi oshinima shoka kaa li e na uuthemba woku shi ninga, Ussia okwa kwatwa koshilundu “sigo okesiku lyeso lye.” (2 Ondjal. 26:16-21) Oshiholelwa shaUssia otashi tu longo kutya ngele ohatu tindi omayele ga kankamena kOmbiimbeli nonando otse oolye yalye, Jehova ita ka kala we e tu hokwa.

8. Job okwi inyenge ngiini sho a pewa omayele?

⁸ Mepingathano niiholelwa tayi londodha mbyoka twa zi nokukundathana, mOmbiimbeli omu na wo iiholelwa iiwanawa yaamboka ya li ya yambekwa molwaashoka ya pulakene komayele. Natu taleni kuJob. Nonando okwa li omutilikalunga, naye ka li a gwanenena. Pethimbo a li ta thiminikwa, Job okwa li a popi iinima yimwe ya puka. Omolwoshinima shoka, okwa li a pewa omayele gokondandalunde kuElihu naJehova. Mbela Job okwa li i inyenge ngiini? Okwa taamba ko omayele ngoka neifupipiko. Okwa ti: “Onda popi iinima ndaa yi shi . . . Onkee onda sa ohoni molwaayihe mbyoka nde yi popi, notandi itedhulula nokukuutumba montsi nomomutoko.” Jehova okwa yambeke Job molwaashoka okwa li omwiifupipiki. — Job 42:3-6, 12-17.

9. Moses okwa tula po oshiholelwa shini oshiwanawa ngele tashi ya pokutaamba ko omayele?

⁹Moses oku li oshiholelwa oshiwanawa shagumwe ngoka a li a taamba ko epukululo, konima sho a yono eyono lya kwata miiti. Pompito yimwe, okwa li a geye noka li a simaneke Jehova. Omolwoshinima shoka, okwa kanitha uuthembahenda wokuya mEvi lyEuvaneko. (Num. 20:1-13) Sho Moses a pula Jehova a talulule etokolo lye, Jehova okwe mu lombwele a ti: “Ino lombwela ndje we oshinima shika.” (OB-1954) (Deut. 3:23-27) Moses ka li a geye. Pehala lyaashono, okwa taamba ko etokolo lyaJehova, na Jehova okwa tsikile oku mu longitha a wilike Aaisraeli. (Deut. 4:1) Job naMoses oya taamba ko omayele, onkee oye li iiholelwa iiwanawa kutse. Job ina ninga nando omaipopilo, ihe okwa lundulula etaloko lye. Moses oku ulike kutya okwa taamba ko omayele gaJehova, oshoka okwa kala omudhiginini nokuli nokonima sho a kanitha uuthembahenda mboka a li e hole.

10. (a) Uuwanawa wuni wa popiwa mOmayeletumbulo 4:10-13 tatu ka mona ngele otwa taamba ko omayele ngoka tatu pewa? (b) Yamwe sho ya pewa omayele, oya ulike iikala yini iiwanawa?

¹⁰ Ohatu mono uuwanawa ngele otwa landula iiholelwa yaalumentu aadhiginini ngaashi Job naMoses. (Lesha Omayeletumbulo 4:10-13.) Aamwatate naamwameme oyendji oya ninga sha faathana. Ndhindhilika shoka omumwatate gumwe gwedhina Emmanuel ngoka ha kala moCongo a popi kombinga yelondodho lyontumba ndyoka a li pewa. Okwa ti: “Aamwatate ya pyokoka yomegongalo lyetu oya li ya mono kutya ondi li pokuyona po ekwatathano lyandje naJehova, onkee oya kambadhala okukwathela ndje. Onda tula miilonga omayele gawo noga kwathele ndje ndi yande omaupyakadhi ogendji.” * Megan, omumwameme gumwe gwokoKanada okwa popi kombinga yokupewa omayele a ti: “Omayele ngoka nda kala handi pewa, haaluhe ogo nda kala nda hala okuuva, ihe ogo nda li nda pumbwa okuuva.” Omumwatate gumwe gwokoCroatia gwedhina Marko okwa ti: “Onda li nda kanitha uuthembahenda wontumba, ihe ngashingeyi shampa nde shi dhiladhila, ohandi shi mono kutya omayele ngoka nda pewelwe oga kwathela ndje ndi kale ishewe nekwatathano ewanawa naJehova.”

11. Omumwatate Karl Klein okwa ndhindhilike shike kombinga yokutaamba ko omayele?

¹¹ Oshiholelwa shagumwe ngoka a monene uuwanawa sho a taamba ko omayele, omumwatate Karl Klein, ngoka a li oshilyo shOlutuwiliki. Mehokololo lyondjokonona yonkalamwenyo ye, omumwatate Klein okwa popi kombinga yoshikando shimwe sho a pewelwe omayele ga kwata miiti komumwatate Joseph F. Rutherford,  ngoka wo a li kuume ke kopothingo. Omumwatate Klein okwa zimine kutya petameko ka li e uvitile ombili omayele ngoka a pewa. Okwa ti: “Oshikando sha landula ko sho [omumwatate Rutherford] a mono ndje, okwa popitha ndje a nyanyukwa a ti: ‘Onawa tuu Karl?’ Ihe molwaashoka natango onda li nde mu geyela, onde mu ngonene owala. Okwa gwedha ko a ti, ‘Karl kotoka! Ino pa Omuhindadhi ompito!’ Onde mu yamukula nda sa ohoni nda ti, ‘Omumwatate Rutherford, inandi ku geyela kaya.’ Ihe okwe shi mono mo kutya natango kandi na ombili naye, e ta lombwele ndje ta ti, ‘Eewa, ihe kala wa kotoka. Omuhindadhi ino mu pa ompito.’ Okwa li lela e li mondjila. Ngele otwa kala twa kwatela omumwatate onkone, unene tuu molwaashono a popi oshinima shoka e na uuthemba woku shi popya . . . , otashi ka kala oshipu tu ye momwigo gwaSatana.” * (Ef. 4:25-27) Omumwatate Klein okwa taamba ko omayele gomumwatate Rutherford noya tsikile okukala ookuume kopothingo.

12. Eifupipiko otali vulu ngiini oku tu kwathela tu taambe ko omayele? (Episalomi 141:5)

¹² Mbela oshike tashi vulu oku tu kwathela tu taambe ko omayele? Otwa pumbwa okwiifupipika nokudhimbulukwa kutya inatu gwanenena nosho wo kutya omathimbo gamwe ohatu ningi iinima ya nika uugoya. Ngaashi twa zi noku shi kundathana muutendo wa tetekele, petameko Job okwa li e na etaloko lya puka, ihe lwanima okwa lundulula okudhiladhila kwe, na Jehova okwe mu yambeke. Omolwashike mbela? Omolwaashoka Job okwa li omwiifupipiki. Okwa ulike kutya ye omwiifupipiki shili sho a taamba ko omayele ngoka Elihu e mu pe, nonando Elihu okwa li lela omugundjuka kuye. (Job 32:6, 7) Eifupipiko otali ke tu kwathela wo tu tule miilonga omayele ngoka tatu pewa, nonando otu uvite kutya inatu ga pumbwa nenge kutya ngoka te ge tu pe omugundjuka kutse. Omukuluntugongalo gumwe gwokoKanada okwa ti: “Otashi ka kala oshidhigu kutse tu ninge ehumokomeho, ngele kapu na ngoka he tu pe omayele.” Atuheni otwa pumbwa okutsikila okukokeka iiyimati yombepo nokuninga aauvithi naalongi yonkundana ombwanawa ya pyokoka. — Lesha Episalomi 141:5.

13. Otu na okutala ko ngiini omayele ngoka hatu pewa?

¹³Kala ho tala ko omayele ge li euliko kutya Kalunga oku ku hole. Jehova oha kala aluhe e tu halela uuwanawa. (Omayel. 4:20-22) Uuna te tu pe omayele okupitila mOohapu dhe, moshileshomwa sha kankamena kOmbiimbeli nenge okupitila momwiitaali ngoka a pyokoka, kungawo ote tu ulukile kutya oku tu hole. Aahebeli 12:9, 10 otaya ti kutya ‘ohe shi ningi omoluuwanawa wetu yene.’

14. Oshike tu na okukala hatu gandja eitulomo kusho uuna twa pewa omayele?

¹⁴Kala ho gandja eitulomo komayele, ihe hakomukalo moka we ga pewa. Omathimbo gamwe otashi vulika tu kale tu uvite kutya ngoka e tu pe omayele ine shi ninga momukalo omwaanawa.  Odhoshili kutya ngoka ta gandja omayele oku na oku ga gandja momukalo ngoka tagu ningitha ngoka te ga pewa e ga taambe ko nuupu. * (Gal. 6:1) Ihe ngele otse tatu pewa omayele, otwa pumbwa okukala hatu gandja eitulomo kwaashoka tage tu longo nonando otu uvite kutya otwa li tu na oku ga pewa momukalo omwaanawa. Otatu vulu okwiipula tatu ti: ‘Nonando inandi panda omukalo moka nda pewa omayele ngaka, mbela oshike tandi vulu okwiilonga mugo? Pehala lyokugandja eitulomo kokwaagwanenena kwaangoka e ga pe ndje, omolwashike owala itaandi gandja eitulomo kwaashoka taga longo ndje?’ Otashi ka kala pandunge ngele otwa kala hatu kongo omikalo moka tatu vulu okumona mo uuwanawa momayele ngoka hatu pewa. — Omayel. 15:31.

15. Omolwashike tu na okupula omayele?

¹⁵ Ombiimbeli otayi tu ladhipike tu kale hatu pula omayele. Omayeletumbulo 13:10 otaga ti: “Mboka haya kongo omayele ohaya mono uunongo.” (NW) Shoka oshoshili lela! Mboka haya pula omayele pehala lyokutegelela gulwe e ge ya pe, olundji oyo haya ningi ehumokomeho megongalo shi vulithe mboka ihaaye ga pula. Onkee ano, kala ho pula omayele.

16. Omoonkalo dhini tashi vulika tu pule omayele?

¹⁶ Omoonkalo dhini tashi vulika tu pule omayele kooitaali ooyakwetu? Natu ka tale kiiholelwa yimwe po. (1) Omumwameme okwa pula omuuvithi ngoka a pyokoka ya ka ninge ko kekonakonombiimbeli lye, lwanima e te mu pula nkene e na okuhwepopaleka omukalo gwe gwokulonga aantu. (2) Omumwameme inaa hokanwa okwa hala okulanda iizalomwa, onkene okwa pula omayele komumwameme gulwe ngoka a pyokoka ngele omizalo ndhoka odhi shi ngaa okutalwa. (3) Omumwatate okwa pewa oshinakugwanithwa a ka gandje oshipopiwa she shotango shomontaneho. Okwa pula omumwatate gulwe ngoka e na owino e mu pulakene nawa sho ti iyenditha po, omumwatate ngoka e te mu pe omayele tage mu kwathele a hwepopale. Omumwatate ngoka nokuli a kala ha gandja iipopiwa omimvo odhindji, oshi li pandunge a kale ha pula aapopi mboka ya pyokoka kutya ohe shi enditha ngiini, e ta tula miilonga omayele ngoka a pewa.

17. Oshike tu na okuninga, opo tu mone mo uuwanawa momayele ngoka tatu pewa?

¹⁷ Esiku limwe lyomomasiku, atuheni otatu ka peweni omayele kutya nduno otse yene tatu ga pewa shu ukilila nenge oongoka ga nuninwa kehe gumwe. Ngele shoka oshe ku ningilwa, dhimbulukwa iitsa mbyoka twa zi nokukundathana. Kala ho taamba ko omayele neifupipiko. Gandja eitulomo komayele ngoka, ihe hakomukalo moka we ga pewa, e to ga tula miilonga. Oondunge ihadhi gwanene omutse gumwe. Ihe ngele otwa kala hatu ‘pulakene komayele, e tatu taamba eputudho,’ Ombiimbeli otayi ti kutya otatu ka ninga ‘aanandunge.’ — Omayel. 19:20.