1. Jesus okwa li a lombwele aalongwa ye kutya uuyuni otawu hulu uunake, nelondodho lini a li e ya pe?

 KONIMA yomasiku omashona, manga Jesus inaa sa, aalongwa ye yane oya li ye mu pula ya ti: ‘Endhindhiliko olini tali holola ehulilo lyuuyuni?’ (Mat. 24:3) Aalongwa mboka otashi vulika ya li tayi ipula nkene taya vulu okutseya kutya uunake Jerusalem notempeli yasho tashi ka hanagulwa po. Jesus sho e ya yamukula ina popya owala kombinga yehulilo lyaJerusalem notempeli yasho, ihe okwa li wo a popi kombinga ‘yehulilo lyuuyuni’ mbuka. Shi na ko nasha nethimbo lyehulilo lyuuyuni, Jesus okwa ti: “Esiku notundi ndjoka kaku na ngoka e yi shi, nando aayengeli yomegulu nenge Omwana, oTate awike.” Opo nduno okwa li a londodha aalongwa ye ayehe a ti: “Kaleni mwa tonata.” — Mark. 13:32-37.

2. Omolwashike sha li sha simana kAakriste yomethelemumvo lyotango ya kale ya tonata?

² Aakriste Aajuda yomethelemumvo lyotango oya li ye na okukala ya tonata, opo ya hupithwe. Jesus okwa li a lombwele aalanduli ye kombinga yoshinima shoka ye na okutala kusho, tashi ulike kutya Jerusalem oshi li pokuhanagulwa po. Okwa ti: “Uuna tamu mono Jerusalem sha kondekwa komatanga gaakwiita, tseyeni kutya oshi li popepi nokuhanagulwa po.” Pethimbo ndyoka, oya li ye na okuvulika kelondodho lyaJesus ‘nokutembukila koondundu.’ (Luk. 21:20, 21) Mboka ya vulika kelondodho ndyoka oya hupithwa, sho Aaroma ya hanagula po Jerusalem.

3. Oshike tatu ka kundathana moshitopolwa shika?

³ Otu li pethimbo lyehulilo lyuuyuni mbuka wa kolokosha. Onkee natse otu na okukala twa kotoka notwa tonata. Moshitopolwa shika otatu ka kundathana nkene tatu vulu okukala tu na ondjele, uuna tashi ya piiningwanima mbyono tayi ningwa muuyuni, nkene tu na okwiitonatela nankene tu na okulongitha nawa ethimbo ndyoka lya hupa ko.

4. Omolwashike tu na okukala tu na ohokwe mokutala nkene iiningwanima mbyoka tayi ningwa muuyuni tayi gwanitha po omahunganeko gOmbiimbeli?

⁴ Opu na omatompelo omawanawa kutya omolwashike tu na okukala tu na ohokwe mokutala nkene iiningwanima yopethimbo ndika tayi gwanitha po omahunganeko gomOmbiimbeli. Pashiholelwa, Jesus okwe tu pa omusholondondo gwiiningwanima yokondandalunde, opo e tu kwathele tu tseye kutya uuyuni waSatana owu li popepi nokuhula po. (Mat. 24:3-14) Omuyapostoli Petrus okwe tu ladhipika tu gandje eitulomo kunkene omahunganeko gomOmbiimbeli taga gwanithwa, opo eitaalo lyetu li kale lya kola. (2 Pet. 1:19-21) Embo lyahugunina lyOmbiimbeli, olya tameka noohapu tadhi ti: “Embo ndika olyo ehokololo lyiiningwanima mbyoka Jesus Kristus e yi holola. Kalunga okwe mu pe ehokololo ndika e li hololele aapiya yaKalunga shoka shi na okuningwa mbala.” (Eh. 1:1) Onkee otu na lela ohokwe miiningwanima mbyoka tayi ningwa muuyuni nokutseya nkene tashi vulika yi gwanithe po omahunganeko gomOmbiimbeli. Notashi vulika tu kale twa halelela okukundathana iiningwanima mbyoka nayalwe.

5. Oshike tu na okuyanda, noshike tu na okuninga? (Tala wo omathano.)

⁵ Uuna tatu kundathana ehunganeko lyOmbiimbeli otu na okuyanda okutengeneka. Omolwashike mbela? Omolwaashoka inatu hala okupopya sha shoka tashi yono po uukumwe megongalo. Pashiholelwa, otashi vulika tu uve aaleli yuuyuni taya popi kombinga yankene taya ka kandula po uupyakadhi wontumba nokweeta ombili negameno. Pehala lyokutengeneka kutya epopyo ndyoka otali gwanitha po ehunganeko ndyoka li li mAatessalonika yotango 5:3, otwa pumbwa okukala tu na euvoko li li pethimbo lyuuyelele mboka wa nyanyangidhwa. Ngele oonkundana dhetu ohadhi kala dha kankamena kiileshomwa mbyoka ya nyanyangidhwa kehangano lyaJehova, otatu ka kwathela egongalo li tsikile okukala lya hangana, ‘li na edhiladhilo limwe.’ — 1 Kor. 1:10; 4:6.

6. Iiyilongomwa yini tatu vulu okwiilonga muPetrus omutiyali 3:11-13?

⁶ Lesha 2 Petrus 3:11-13. Omuyapostoli Petrus ote tu kwathele tu tsikile okukala tu na etaloko li li pandjele, uuna tashi ya pomahunganeko gomOmbiimbeli. Okwe tu ladhipika ‘tu tegelele esiku lyaKalunga.’ Omolwashike? Hamolwaashoka andola twa hala okutseya “esiku notundi,” uuna Jehova ta ka eta Armagedon, ihe omolwaashoka otwa hala okulongitha ethimbo ndyoka lya hupa ko, tu longe “iilonga iiyapuki noyometilokalunga.” (NW) (Mat. 24:36; Luk. 12:40) Shono osha hala okutya otwa hala okukala tu na eihumbato ewanawa nokushilipaleka kutya otatu longo iilonga yaJehova, molwaashoka tu mu hole noonkondo. Opo tu kale tatu ningi ngawo, otu na okwiitonatela tse yene.

7. Ohatu ulike ngiini kutya otatu itonatele tse yene? (Lukas 21:34)

⁷ Jesus okwa li a lombwele aalongwa ye a ti kutya kaye na owala okwiitonatela yo yene shi na ko nasha niiningwanima yuuyuni, ihe oyi itonatele wo yo yene. Oshinima shoka osha yelithwa nawa melondodho ndyoka tali adhika muLukas 21:34. (Lesha.) Ndhindhilika oohapu dhaJesus ndhoka tadhi ti: “Ikotokeleni ne yene.” Omuntu ngoka hi ikotokele ye mwene, oha kala a kotokela oshinima kehe tashi yono po ekwatathano lye naJehova noha katuka oonkatu e shi yande. Momukalo ngoka  ohi ikaleke mohole yaKalunga. — Omayel. 22:3; Jud. 20, 21.

8. Elombwelo lini omuyapostoli Paulus a pa Aakriste?

⁸ Omuyapostoli Paulus okwa lombwela Aakriste yi itonatele yo yene. Pashiholelwa, okwa li a lombwele Aakriste yomuEfeso a ti: “Ikonakoneni ano nawa nkene mu na okukala. Inamu kala ngashika omagoya, kaleni ngaashi aanandunge.” (Ef. 5:15, 16) Satana oha kala aluhe ta kambadhala okuyona po uukuume wetu naJehova, onkee Ombiimbeli otayi tu pe omayele tu ‘konakone kutya Omuwa okwa hala tu ninge shike,’ opo tu vule okwiigamena komaponokelo gaSatana. — Ef. 5:17.

9. Ongiini tatu vulu okumona kutya Jehova okwa hala tu ninge shike?

⁹ Ombiimbeli inayi tu lombwela ashihe shoka tashi vulu okuyona po uukuume wetu naJehova. Olundji otu na okuninga omatokolo miinima mbyoka inaayi popiwa kondandalunde mOmanyolo. Opo tu ninge omatokolo ge li pandunge, otwa pumbwa okumona kutya ‘Omuwa okwa hala tu ninge shike.’ Shika otatu vulu oku shi ninga mokukala hatu konakona pandjigilile Oohapu dhaKalunga nokutedhatedha kudho. Ngele otwa kala tu shi kutya Jehova okwa hala tu ninge shike, e tatu kambadhala okukala tu na “omadhiladhilo gaKristus,” otashi vulika tu ke ende “ngaashi aanandunge,” nokuli nonando kapu na oompango dhokondandalunde tadhi tu lombwele shoka tu na okuninga. (1 Kor. 2:14-16) Omathimbo gamwe ohashi kala oshipu okundhindhilika mo iinima mbyoka tu na okuyanda, ihe omathimbo gamwe ihashi kala oshipu.

10. Iinima yimwe yini ya nika oshiponga tu na okuyanda?

¹⁰ Iinima yimwe ya nika oshiponga mbyoka twa pumbwa okuyanda, ongaashi okudhana nomaiyuvo gagumwe, uunkolwe, uufukedhi nokupopya oohapu tadhi uvitha nayi yalwe nosho wo okutala omainyanyudho gelongithonkondo, omathano giipala niikwawo ya fa mpoka. (Eps. 101:3) Omutondi gwetu Satana oha kala aluhe ta kongo oompito a yone po uukuume wetu naJehova. (1 Pet. 5:8) Ngele inatu kotoka Satana ota vulu okukuna momadhiladhilo getu nomomitima dhetu efupa, okupopya iifundja, olwiho, uutondwe, uuntsa nokugeelathana. (Gal. 5:19-21) Petameko omaiyuvo ngoka otashi vulika tu kale tu wete inaaga nika oshiponga. Ihe ngele ihatu katu nziya onkatu tu ga vudhe mo, otaga ka tsikila okukoka mutse ga fa oshimeno shi na uuzigo notage ke tu etela uupyakadhi. — Jak. 1:14, 15.

11. Oshiponga shimwe shini ihaashi monika nuupu tu na okuyanda, nomolwashike?

¹¹ Oshiponga shimwe ihaashi monika nuupu eendathano ewinayi. Natu taleni konkalo ndjika. Oho longo nagumwe ngoka kee shi Onzapo yaJehova. Oho kala wa hala omuniilonga pamwe nangoye ngoka a kale ta dhiladhilile muuwanawa Oonzapo dhaJehova. Onkee ohu ungaunga naye nombili noho mu kwathele. Otashi vulika wo ho zimine mu ka lye omwiha pamwe naye omathimbo nomathimbo. Nziya owa tameke okukala ho li aluhe omwiha pamwe naye. Omathimbo gamwe omuntu ngoka oha tameke okupopya iinima inaayi yogoka mbyoka petameko wa li kuu hole. Konima yethimbo nangoye owa tameke okukala we yi igilila noihayi ku uvitha we nayi. Opo nduno esiku limwe, omuniilonga pamwe nangoye ngoka okwe ku hiya mu ka nwe sha pamwe konima yiilonga, e to shi zimine. Lwanima, nangoye owa tameke okukala ho dhiladhila ngaashi ye. Mbela shono otashi ke ku pula ngaa ethimbo ele, wu tameke okukala ho ihumbata ngaashi ye? Odhoshili kutya ohatu  ungaunga naantu nombili nohatu ya simaneke. Ihe otu na okudhimbulukwa kutya aantu mboka twa hogolola okukala hatu kala pamwe nayo, otaye ke tu nwetha mo noonkondo. (1 Kor. 15:33) Ngele otwa kala hatu itonatele tse yene ngaashi Jesus e tu ladhipika tu ninge, otatu ka yanda eendathano inaali pumbiwa naantu mboka ihaaya vulika komithikampango dhaJehova. (2 Kor. 6:15) Otatu ka mona kutya oshinima shoka osha nika oshiponga e tatu shi yanda.

12. Jesus okwa li a pe aalongwa ye iilonga yini ye yi longe, manga ya tegelela ehulilo lyuuyuni?

¹² Jesus okwa li a hala aalongwa ye ya kale yi ipyakidhila manga ya tegelela ehulilo lyuuyuni. Onkee okwa li e ya pe iilonga ye yi longe. Okwa li e ya lombwele yu uvithe onkundana ombwanawa ‘muJerusalem, muJudea alihe nomuSamaria sigo omiilongo ayihe yokombanda yevi.’ (Iil. 1:6-8) Iilonga mbyono kaya li tuu oyindji noonkondo! Molwaashono aalongwa yaJesus oya li ya ningi ngaashi taya vulu yu uvithile yalwe, oya li ya longitha ethimbo lyawo nawa.

13. Omolwashike twa pumbwa okulongitha ethimbo lyetu nawa? (Aakolossa 4:5)

¹³ Lesha Aakolossa 4:5. Opo tu itonatele tse yene, otwa pumbwa okudhiladhila nawa kombinga yankene hatu longitha ethimbo lyetu.  Molwaashoka “iiningwanima inaayi tegelelwa” otayi vulu okwaadha kehe gumwe gwomutse. (Omuuv. 9:11, NW) Shimwe ishewe, otatu vulu okusa ombadhilila.

14-15. Ongiini tatu vulu okulongitha ethimbo lyetu nawa? (Aahebeli 6:11, 12) (Tala wo ethano.)

¹⁴ Otatu vulu okulongitha ethimbo lyetu nawa mokulonga ehalo lyaJehova nomokukoleka uukuume wetu naye. (Joh.14:21) Otwa pumbwa ‘okukala twa ikolelela twaa tenguke nokukala twa ipyakidhila aluhe niilonga yOmuwa.’ (1 Kor. 15:58) Opo nduno ngele ehulilo lye ya, kutya nduno olyonkalamwenyo yetu nenge olyuuyuni mbuka wa kolokosha, itatu ki ipa uusama kutya inatu longela Jehova oshindji. — Mat. 24:13; Rom. 14:8.

¹⁵ Kunena Jesus ota tsikile okuwilika aalanduli ye, sho taya uvitha kombinga yUukwaniilwa waKalunga muuyuni awuhe. Jesus okwa gwanitha po nale euvaneko lye ndyoka. Okupitila mehangano lyaJehova, Jesus ohe tu dheula nohe tu pe iilongitho mbyoka twa pumbwa, opo tu taandeleke onkundana ombwanawa. (Mat. 28:18-20) Ohatu ningi shoka Jesus a tegelela tu ninge mokulonga nuudhiginini tu uvithile yalwe nokukala twa tonata, sho twa tegelela Jehova a hulithe po uuyuni mbuka. Ngele otwa tula miilonga omayele ngoka taga adhika mAahebeli 6:11, 12, otatu ka kala twa dhiginina etegameno lyetu “sigo okehulilo.” — Lesha.

16. Otwa tokola toko okuninga shike?

¹⁶ Jehova okwa tula po nale esiku notundi moka ta ka hanagula po uuyuni mbuka waSatana. Ngele esiku ndyoka lya thiki, Jehova ota ka gwanitha po omahunganeko ge agehe ngoka ge li mOohapu dhe. Ihe omathimbo gamwe otashi vulika tu dhiladhile kutya ehulilo itali ya nziya. Nonando ongawo, esiku lyaJehova ‘itali dhikala.’ (Hab. 2:3) Onkee natu kale twa tokola toko okukala twa ‘tegelela Omuwa,’ tu na ‘einekelo muKalunga ketu ngoka te tu hupitha.’ — Mika 7:7.