Onda tameke okuyola, molwaashoka kanda li ndi shi ngele kuume kandje omukwangeleka. Onde mu pula nda ti: “Owu shi shike kombinga yOmbiimbeli?” Ihe ina yamukula ndje nziya. Hugunina, okwa lombwele ndje a ti kutya yina Onzapo yaJehova nokwi ilonga iinima yimwe kuye. Onda li nda hala okuuva ombahu nokawawa, onkee onde mu pula a lombwele ndje oshindji.

Otwa li twa popi sigo omokati kuusiku. Kuume kandje okwa lombwele ndje kutya Ombiimbeli otayi popi kutya Satana oye ta pangele uuyuni mbuka. (Joh. 14:30) Otashi vulika ngoye wa kala wu shi shi nale, ihe kungame oshinima shika oshipe noshihokithi. Onda kala aluhe handi uvu kutya uuyuni otawu pangelwa kuKalunga omunalukeno nomuyuuki. Ihe shoka kasha li naanaa tashi ti sha kungame, omolwiinima mbyoka nda mona monkalamwenyo yandje. Nonando onda li owala ndi na omimvo 26, onda li nda mono iinima oyindji mbyoka ya uvitha ndje nayi noonkondo.

Tate okwa li omuhingi gwoondhila dhEtanga lyEgameno lyoMombanda lyaAmerika. Onkee ano, sho nda li okanona, onda li ndi wete lela kutya otashi vulika pu holoke iita yolute. Etanga ndyoka olya li li ilongekidha okuumba omboma yolute ethimbo kehe. Iita mbyoka ya li moVietnam oya li ya ningwa pethimbo ndi li mokolindji moCalifornia. Onda li handi wayimine aanasikola ooyakwetu momakanka. Opolisi oya li hayi tu tidha yi na oonkunya. Otwa li hatu yi fadhuka po, tatu fudha nuudhigu nokaatu wete ko nawa, omolwomuku gwokuzitha omahodhi. Olya li ethimbo lya piyagana lela nolyuunashipotha. Pethimbo ndyoka aanapolotika oya li taya dhipagwa oshiyakela, nopwa li omakanka nevundakano. Kehe gumwe okwa li e na edhiladhilo li ili kombinga yaashoka shi na okuningwa po. Aantu oya li ya ngwangwana noonkondo.

Mo 1970, onda li nda tameke iilonga komunkulofuta gwokuumbangaluntu waAlaska nonda li nda longo iimaliwa oyindji. Opo nduno onda tuka nondhila e tandi yi koLondon, hoka nda landa omota, nonde yi hingi ndu uka muumbugantu kaandi na kutya otandi yi kehala lini lyokondandalunde. Konima yoomwedhi dhontumba, onda thiki moAfrika. Mondjila onda tsakanene mo naantu mboka nayo ya li ya hala okufadhuka po, ano ya li ya hala okuthiga po omaupyakadhi gawo.

 Onkee shi ikolelela kwaashoka nda mona nonda uva, otashi tsu kumwe naashoka Ombiimbeli tayi ti kutya oshishitwa oshikolokoshi shopambepo osho tashi pangele uuyuni. Ihe ngele Kalunga haye a li ta pangele uuyuni mbuka, okwa li ta ningi shike? Onda li nda hala oku shi tseya.

Moomwedhi dha ka landula ko, onda li nda mono eyamukulo. Nomokweendela ko kwethimbo, onda tseyathana naalumentu naakiintu oyendji, e tandi kala ndi ya hole, mboka moonkalo adhihe dha yoolokathana, ya li ya ulike kutya aadhiginini kuKalunga gumwe awike kashili.

Sho nda galukile koLondon, onda kwatathana nayina yakuume kandje, nokwa pe ndje Ombiimbeli. Konima sho nda yi koAmsterdam, moHolanda, Onzapo yimwe oya mono ndje tandi yi lesha nda thikama pelamba limwe mepandaanda, noya kwathele ndje ndi ilonge oshindji. Konima yaashono, onda yi kOdubelini, moIreland, nonda mono mo oshitayimbelewa shOonzapo dhaJehova, e tandi yi po ndi ka konkole po. Onda adha mo omumwatate gumwe a kotoka noku na owino, Arthur Matthews. Onde mu pula a konakone Ombiimbeli nangame, e ta zimine.

Onda li nda tameke okukonakona Ombiimbeli ndi itula mo, nonda li nda halelela okulesha omambo niifo mbyoka ya nyanyangidhwa kOonzapo dhaJehova. Odhoshili kutya nOmbiimbeli onda li handi yi lesha. Shoka osha li hashi nyanyudha ndje noonkondo! Pokugongala kwegongalo onda li handi mono kutya nokuli nuunona owu shi omayamukulo gomapulo ngoka aantu mboka ya longwa ya kala taya ipula nago uule womimvo omathele. Omapulo ngoka ongaashi: ‘Omolwashike aantu haya longo uuwinayi? Kalunga oye lye? Oshike hashi ningwa peso?’ Onda li owala handi endathana nOonzapo dhaJehova. Naashoka osha li oshipu, molwaashoka moshilongo ashihe kanda li ndi shi mo nando omuntu gumwe. Oonzapo odha kwathele ndje ndi tameke okukala ndi hole Jehova nondi kale nda hala okulonga ehalo lye.

Mo 1972, onda ninginithwa. Konima yomumvo gumwe onda tameke okukokola ondjila nonda wayimine egongalo eshona moNewry, shaNorthern Ireland. Onda li handi hiila megumbo limwe li ikalela li li kondundu. Opwa li pu na epya li li popepi moka mwa li hamu kala oongombe, nonda li handi ilongekidha iipopiwa yandje nda thikama komeho gadho. Odha li hadhi kala dha fa tadhi pulakene dhi itula mo, sho tadhi ekeshele. Nonando kadha li hadhi vulu okupa ndje omayele, odha kwathele ndje ndi ilonge okutala kaapulakeni, sho tandi gandja iipopiwa yandje. Mo 1974, onda li nda langekwa po ndi li omukokolindjila i ikalekelwa nonda wayiminwa kuNigel Pitt, ngoka a ningi kuume kandje kopothingo.

Omathimbo gamwe moNorthern Ireland omwa li hamu kala iikolokosha oyindji. Onkee yamwe oshilongo shoka oya li haye shi ithana “oshilongo shoombona  nooholo.” Momapandaanda aantu oya li haya kondjo, haya yahwa, noohauto odha li hadhi mbomwa po. Olundji omaupyakadhi oga li gopapolotika nogopalongelokalunga. Ihe Aaprotestande nAakatoolika oya li ye shi ndhindhilike kutya Oonzapo dhaJehova ihadhi kutha ombinga mopolotika, onkee otwa li hatu vulu okuuvitha twa manguluka notu li megameno. Aantu momagumbo olundji oya li ye shi kutya uunake nopeni tapu ka kala iikolokosha, noya li haye tu londodha, opo tu yande oshiponga.

Opwa li wo natango oonkalo dha nika oshiponga. Esiku limwe, ngame naDenis Carrigan, ngoka naye a li omukokolindjila, otwa li tatu uvitha mondoolopa yimwe yopopepi, moka kaamwa li mu na Oonzapo, moka twa li twa enda mo owala oshikando shimwe. Omukiintu gumwe okwe tu lundile kutya tse aakwiita yomonanguwi yaBritania, tashi vulika molwaashoka twa li ihaatu popi nomutono gwelaka lyOshiairish. Omalundilo ngoka oga li ge tu tilitha. Okupopya nani owala nombili naakwiita okwa li taku vulu oku ku dhipagitha nenge oku ku yahitha mongolo. Manga twa thikama pondje otse atuke, nokwa li kwa talala, twa tegelela ombesa, ohauto yimwe oye ya e tayi thikama komeho gokefe moka mwa li mu na omukiintu ngoka te tu lundile. Omukiintu ngoka okwa zi mo nokwa popi naalumentu mboka yaali ya li mohauto ndjoka, ta popi ta ulike kutse a nyanyukwa. Aalumentu mboka oya hingi kashona ya uka kutse, noye tu pula omapulo gontumba kutya ombesa otayi ya ethimbo peni. Sho ombesa ya thiki, oya popi nomuhingi gwayo. Ihe katwa li tu uvite ko kutya otaya popi shike. Mombesa ndjoka kamwa li mu na aafaalelwa yalwe, onkee otwa li tu wete lela kutya otaya ningi omalongekidho, ye ke tu monithe iihuna kondje yondoolopa. Ihe shoka inashi tu ningilwa. Sho twa zi mo mombesa, onda pula omuhingi nda ti: “Aalumentu mbeyaka, oya li taya pula kombinga yetu?” Okwa yamukula a ti: “Ondi shi kutya one oolye, e tandi ya lombwele. Inamu ipula nasho. Omu li megameno.”

Poshigongi shimwe shoshitopolwa 1976, mOdubelini, onda li nda tsakanene po naPauline Lomax, omukokolindjila i ikalekelwa ngoka e ya koshigongi shoka, a zi koEngland. Pauline okwa li omumwameme omudhiginini, omwiifupipiki nomunahole. Ye nomumwayinamati, Ray, oya putudhilwa moshili. Konima yomumvo gumwe, ngame naPauline otwa hokana notwa tsikile nuukokolindjila wi ikalekelwa moBallymena, shaNorthern Ireland.

Otwa li twa kala miilonga yuutonatelishikandjo uule wethimbo, tatu kwathele aamwatate yomoBelfast, moLondonderry nomiitopolwa yilwe ya nika oshiponga. Otwa li twa tsuwa omukumo keitaalo lyaamwatate naamwameme mboka ya thigi po omaitaalo ngoka ga li ga mena omidhi muyo, okatongo nosho wo mboka ya li inaaya hala okulongela Jehova. Jehova okwa li lela e ya yambeke noku ya gamena!

MoIrlanda onda li nda kala mo uule womimvo omulongo. Opo nduno mo 1981 otwa hiywa tu ka hite ongundu onti-72 yaGilead. Konima sho twa mana, otwa tuminwa koSierra Leone, oshilongo shi li kuuninginino waAfrika.

Otwa li hatu kala megumbo limwe lyaatumwa pamwe naamwatate naamwameme 11. Otwa li hatu longitha okombitha yimwe, uundjugo utatu, uuyiyogelo uyali, ongodhi yimwe yokopaala, eshina limwe lyokuyoga nalimwe lyokukukutika oonguwo. Olusheno olwa li halu gu ko olundji inaatu shi tegelela. Oombuku odha li hadhi yi moombuli dhegumbo lyetu noontoka ohadhi iyakele mela lyomevi.

Nonando oonkalo kadha li oompu, otwa li hatu tyapula iilonga yokuuvitha. Aantu oya li ya simaneka Ombiimbeli nohaya pulakene yi itula mo. Oyendji oya li ya konakona Ombiimbeli e taya ningi Oonzapo. Aantu yomoshitopolwa oya li haya ithana ndje “Tate Robert.” Omanga Pauline haye mu ithana “Meme Robert.” Konima yethimbo, sho nda kala handi longo ethimbo olindji koshitayimbelewa nonda li owala handi kala miilonga yokuuvitha omalupita, aantu moshitopolwa oya tameke  okwiithana Pauline “MeePauline.” Ngame oya li haya ithana ndje “Tate Pauline.” Pauline okwa li e shi hole!

Aamwatate oyendji moSierra Leone oya li ya hepa, ihe Jehova okwa li aluhe he ya sile oshimpwiyu, nokuli nomathimbo gamwe omomikalo omindhindhilikwedhi. (Mat. 6:33) Otandi dhimbulukwa omumwameme gumwe ngoka a li e na owala iimaliwa ya gwana okulanda iikulya yawo noyana esiku ndyoka, ihe iimaliwa ye ayihe okwe yi gandja po komumwatate ngoka a li ta ehama nokwa pumbwa oshimaliwa shokulanda omiti dhe dhaMalaria. Lwanima mesiku tuu ndyoka, omukiintu gumwe okwe ya a ningwe nawa momutse komumwameme ngoka inaashi tegelelwa, e te mu futu. Opwa li lela oonkalo odhindji dha fa ndhoka.

MoSierra Leone otwa li twa kala mo omimvo omugoyi. Opo nduno otwa tuminwa koshitayimbelewa shaNigeria. Oshitayimbelewa shoka osha li oshinene. Onda li handi longo iilonga yomombelewa ya faathana naambyoka nda li handi longo moSierra Leone, ihe kuPauline, osha li elunduluko enene nokasha li oshipu. Okwa li ha longo oowili 130 omwedhi kehe miilonga yokuuvitha, nokwa li e na aakonakonimbiimbeli taya ningi ehumokomeho. Ihe ngashingeyi okwa li ta longo moshihondjelo, mono a kala ta hondjo oonguwo ndhoka dha tuuka. Osha li she mu pula ethimbo a igilile oshinakugwanithwa she oshipe, ihe okwe ke shi mona kutya yalwe ohaya kala ya pandula noonkondo iilonga ye mbyoka ha longo. Okwa li wo a ningi ngaashi ta vulu a tse Aabetele ooyakwawo omukumo.

Omuthigulwakalo gwAanigeria ogwa li omupe kutse, nopwa li iinima oyindji tu na oku yi ilonga. Oshikando shimwe mombelewa yandje omwi ile omumwatate a eta mo omumwameme ngoka opo a taambwa moBetel. Sho nda thikama andola ndi mu minike, omumwameme ngoka okwi inyongamene owala poompadhi dhandje. Onda li nda kumwa lela! Momadhiladhilo gandje omwe ya omanyolo gaali: Iilonga 10:25, 26 nosho wo Ehololo 19:10. Ondi ipula nda ti, ‘Nandi mu lombwele kee shi ninge we?’ Ihe onde shi ndhindhilike kutya molwaashoka okwa taambwa moBetel, oku na okukala e shi shoka Ombiimbeli tayi ti.

Onda li nda sa ohoni momukokomoko gwoonkundathana dhetu adhihe, konima yaashoka onda ka ninga omapekapeko. Onda uvu kutya omumwameme ngoka okwa landula omukalondjigilile ngoka pethimbo ndyoka gwa li natango hagu longithwa miitopolwa yimwe moshilongo. Aalumentu nayo oya li haya nyongamenathana momukalo ngoka. Ogwa li owala omukalo gwokuulika esimaneko. Kashi shi kutya okwa li ta galikana ndje; mOmbiimbeli omu na iiholelwa yayamwe mboka ya li ya ningi ngaaka. (1 Sam. 24:8) Onda li nda nyanyukwa,  sho inaandi popya sha oshiwinayi tashi sitha omumwameme ohoni.

Otwa li twa mono Aanigeria oyendji mboka ya li ya kala nokuulika eitaalo lya kola uule womimvo. Tala koshimoniwa shaIsaiah Adagbona. a Okwi ilongo oshili sho a li omumati omugundjuka, ihe okwa li a monika uuvu woshilundu. Okwa tuminwa kehala lyaanashilundu hoka oye owala a li ko Onzapo. Nonando okwa li ta patanekwa, okwa kwathele aanashilundu ye vulithe 30 ya taambe ko oshili, nokwa li a toto egongalo mehala ndyoka lyaanashilundu.

Mo 1996 otwa li twa tuminwa koshitayimbelewa shaKenya. Shika osho sha li oshikando shandje oshitiyali moshilongo shoka, okuza sho nda li mo tango ngaashi nde shi popi petameko. Otwa li hatu zi moBetel, moka mwa li hamu ya oondjima. Odha li hadhi yugu aamwameme iiyimati. Esiku limwe omumwameme gumwe okwa li a thigi ekende lyondunda ye lya eguluka. Sho a ka galuka, okwa adha mwi iteyelwa koondjima tadhi li iikulya mbyoka dha adha mo. Okwa zi mo ta kugu ta tondoka. Oondjima odha yayagana e tadhi nuka mo tadhi pitile pekende.

Ngame naPauline otwa wayimine egongalo lyOshiswahili. Konima yethimbo efupi, onda pewa oshinakugwanithwa shokukwatela komeho Ekonakono lyEmbo lyEgongalo (ngashingeyi hali ithanwa Ekonakonombiimbeli lyEgongalo). Nonando ongawo, kanda li handi popi Oshiswahili nawa. Onda li handi ilongekidha komeho yethimbo oshitopolwa shoka tashi ka konakonwa, onkee onda li handi vulu okulesha omapulo nawa. Ihe uuna aapulakeni ya gandja omayamukulo ga yooloka ko kashona kwaashoka sha nyolwa, kanda li handi kala ndi uvite ko. Osha li hashi sitha ndje lela ohoni! Onda li ndi uvitile aamwatate naamwameme ohenda. Ihe onda li nda kumwa, molwaashoka oya li yi idhidhimikile ndje nokutaamba ndje ko neifupipiko ndi kwatele komeho okugongala.

Otwa li twa kala moKenya uule woomwedhi dhontumba. Opo nduno mo 1997 otwa hiywa koBetel yaBrooklyn, moAmerika. Ngashingeyi otu li moshilongo shoka mu na aantu ye na omaliko ogendji ngoka haga vulu okweeta omaupyakadhi. (Omayel. 30:8, 9) Ihe nonando oshilongo shoka osha yambapala, aamwatate naamwameme ohaya ulike eitaalo lya kola. Ihaya longitha ethimbo lyawo niiniwe yawo yi iyambapaleke, ihe oya yambidhidhe iilonga iiwanawa yehangano lyaJehova.

Uule womimvo otwa kala nokumona nkene Oonzapo oonkwetu tadhi ulike eitaalo lyadho moonkalo dhi ili nodhi ili. MoIrlanda, aamwatate oya li ye na eitaalo lya kola, nonando moshilongo shoka omwa li mu na omakuyunguto. MuAfrika, aamwatate oya ulike eitaalo lya kola, nonando oya li ya hepa noyi ikalela. MoAmerika, aamwatate oye na eitaalo lya kola, nonando oshilongo shoka osha yambapala. Jehova iha kala tuu a nyanyukwa sho e wete oshigwana she tashi ulike kutya oshi mu hole moonkalo adhihe dhi ili nodhi ili!

Omimvo odha ‘tondoka po dhi vule okweenda kwonane mokuhondja.’ (Job 7:6) Ngashingeyi otatu longo pamwe nayalwe moombelewa oonene moWarwick, moAmerika, notwa nyanyukwa sho tatu tsikile okulonga pamwe naamboka ye holathane lela. Otwa nyanyukwa notwa mbilipalelwa okuninga ngaashi tatu vulu tu yambidhidhe Omukwaniilwa gwetu, Kristus Jesus, ngoka masiku ta ka pa ondjambi aapiya ye aadhiginini itaaya vulu okuyalulwa. — Mat. 25:34.