1. Omolwashike wa pandula Ombiimbeli?

 INATU pandula tuu Jehova Kalunga sho e tu pa Ombiimbeli! Okupitila muyo, ohe tu pe omayele gopandunge ngoka hage tu kwathele tu mone shoka tu na okuninga, uuna twa iyadha momaupyakadhi kunena. Ohe tu pe wo etegameno ewanawa lyonakuyiwa. Shoka sha simanenena, Jehova okwa kala nokulongitha Ombiimbeli e tu hololele iinima oyindji kombinga yomaukwatya ge. Sho tatu tedhatedha komaukwatya ge omawanawa, omitima dhetu ohadhi gumwa lela nohashi tu inyengitha tu hedhe popepi naKalunga ketu, nokukala twa hala okuninga ookuume ke. — Eps. 25:14.

2. Omomikalo dha yoolokathana dhini Jehova a ihololele aantu?

² Jehova okwa hala aantu ye mu tseye. Monale, Jehova okwa li a ihololele aantu okupitila moondjodhi, momamoniko, nokuli nomaayengeli. (Num. 12:6; Iil. 10:3, 4) Ihe mbela ongiini twa li tatu vulu okukonakona oondjodhi, omamoniko nenge omatumwalaka ngoka ga za kaayengeli andola okwa li inee ga nyolitha? Onetompelo ewanawa Jehova a longitha aalumentu ya ‘nyolele membo’ lyontumba shoka a hala tu tseye. (Jer. 30:2) Molwaashoka “Kalunga oha longo nawa,” otatu vulu okukala tu na uushili kutya omukalo ngoka a longitha okupopya natse ogwa dhenga mbanda notagu tu kwathele. — Eps. 18:30.

3. Jehova okwe shi ningitha ngiini tashi wapa, opo Ombiimbeli yi kale po sigo onena? (Jesaja 40:8)

³ Lesha Jesaja 40:8. Oohapu dhaKalunga odha kala nokugandja omayele omawanawa kaalumentu naakiintu aadhiginini uule womimvo omayovi. Ongiini shoka sha kala tashi wapa? Nokuli Oohapu dhaKalunga odha li dha nyolwa nalenale kiinima hayi yonuka, onkee kapu na nando oyimwe yomoondokumende ndhoka tu yi na sigo okunena. Ihe Jehova okwe shi ningitha tashi  wapa, opo Omanyolo ge omayapuki ga ningwe ookopi. Nonando aanyoli yadho kaya li ya gwanenena, oya li ye ga tapa nuukeka. Pashiholelwa, omulongwantu gumwe gwOmanyolo gOshihebeli okwa nyola a ti: “Otu na uushili kutya kapu na nando omanyolo gonale ga nyolululwa ge li mondjila ngaashi ngaka.” Onkee nonando opwa pita ethimbo nosho wo kutya omanyolo omayapuki oga li ga nyolwa kiinima hayi yonuka, yo naanyolululi yago oya li inaaya gwanenena, otatu vulu okukala tu na uushili kutya oohapu ndhoka hatu lesha kunena mOmbiimbeli, odhi na omadhiladhilo gOmunyoli gwadho, Jehova.

4. Oshike tatu ka kundathana moshitopolwa shika?

⁴ Jehova oye Omugandji ‘gwoshipewa kehe oshiwanawa nomagano kehe ga gwana ga pwa.’ (Jak. 1:17) Ombiimbeli oyo yimwe yomomambo ga dhenga mbanda ngoka Jehova e tu pa. Omagano ohage tu lombwele sha kombinga yaangoka e ge tu pa kutya oku tu shi nawa noku shi wo shoka twa pumbwa. Ngoka e tu pa Ombiimbeli naye osho e li ngaaka. Uuna tatu konakona Ombiimbeli, ohatu ilongo mo oshindji kombinga yaJehova. Ohatu ilongo mo kutya oku tu shi nawa noku shi wo shoka twa pumbwa. Moshitopolwa shika, otatu ka kundathana shoka Ombiimbeli tayi popi kombinga yomaukwatya gatatu gaJehova ngaashi: uunongo, uuyuuki we nohole ye. Tango natu ka kundathaneni omikalo moka Ombiimbeli ya popya kombinga yuunongo waKalunga.

5. Omomukalo guni Ombiimbeli tayi ulike kutya oyi na uunongo waKalunga?

⁵ Jehova oku shi kutya otwa pumbwa omayele ge gopandunge. NOmbiimbeli ndjoka e tu pa omagano, oyu udha owino ye. Omayele gomOmbiimbeli ohaga kwathele aantu. Ombiimbeli ohayi lundulula oonkalamwenyo dhaantu. Sho embo lyotango lyOmbiimbeli lya nyolwa, Moses okwa li a lombwele oshigwana shaKalunga, Aaisraeli a ti: “Omalongo ngaka kage shi osima yowala; ogo omwenyo gweni.” (Deut. 32:47) Mboka ya li ya vulika kOohapu dhaKalunga oya li ya pondola monkalamwenyo yo oya li ya nyanyukwa. (Eps. 1:2, 3) Nonando Oohapu dhaKalunga odha nyolwa nalenale, natango odhi na oonkondo dhokuhwepopaleka oonkalamwenyo dhaantu. Pashiholelwa, kepandja lyetu lyokointaneta, jw.org, moshitopolwa “Ombiimbeli ohayi lundulula onkalamwenyo yaantu,” oto adha mo omahokololo giinima ya ningwa shili ge vulithe 50, taga popi kombinga yankene Ombiimbeli ‘ya kwathela aantu mboka ye yi itaala’ kunena. — 1 Tes. 2:13.

6. Omolwashike tatu vulu okutya Ombiimbeli inayi fa omambo galwe?

⁶ Kaku na embo limwe lya fa Oohapu dhaKalunga. Omolwashike tatu tile ngawo? Omolwaashoka Omunyoli gwembo ndika, Jehova Kalunga, omunankondo adhihe, omukwaaluhe noku na uunongo wu vule womuntu kehe. Omambo galwe ogendji ohaga tsikile okuleshwa, nokuli nokonima sho aanyoli yago ya sa nale. Nomayele ngoka ge li mo, olundji ohaga kala kaage na we oshilonga. Ihe omakotampango gopandunge gomOmbiimbeli ohaga kala aluhe ge na oshilonga; oga kwathela aantu mboka ya li ko momathimbo ga yoolokathana. Uuna tatu lesha embo ndyoka eyapuki nokutedhatedha kwaashoka hatu ilongo mo, Omunyoli gwalyo oha longitha ombepo ye ondjapuki yi na oonkondo, e tu kwathele tu mone nkene tatu vulu okutula miilonga omayele gOmbiimbeli monkalamwenyo yetu. (Eps. 119:27; Mal. 3:16; Heb. 4:12) Omunyoli gwOmbiimbeli omunamwenyo okwa halelela shili oku ku kwathela. Naashoka oshi na oku tu ningitha tu kale twa halelela okulesha Ombiimbeli pandjigilile.

7. Ombiimbeli oya li ya hanganitha ngiini oshigwana shaKalunga pethimbo lyonale?

⁷ Omukalo gulwe gwa dhenga mbanda moka  Ombiimbeli tayi ulike kutya oyi na owino yopakalunga, ogwo kutya ohayi vulu okukwathela oshigwana shaKalunga shi kale sha hangana. Sho Aaisraeli ya li ya yi mEvi lyEuvaneko, oya kala miitopolwa yi ili noyi ili. Yamwe oya li ya ningi aayuli yoohi, yalwe aanafaalama, omanga yalwe ya ningi aalongi yomapya. Aaisraeli mboka ya li moshitopolwa shimwe, osha li oshipu kuyo ya ethe po okudhiladhila kombinga yonkalonawa yAaisraeli ooyakwawo mboka ya li miitopolwa yilwe yoshilongo. Ihe Jehova okwa li a ningi elongekidho, opo Aaisraeli mboka ya kale haya gongala pamwe poompito dhi ili nodhi ili ya pulakene Oohapu dhe, sho taye dhi leshelwa noku dhi yelithilwa. (Deut. 31:10-13; Neh. 8:2, 8, 18) Dhiladhila owala nkene Omuisraeli omudhiginini a li ha kala e uvite, uuna a thiki muJerusalem e ta mono ooitaali ooyakwawo omamiliyona, tashi vulika ya za koshitopolwa kehe shomoshilongo! Momukalo ngoka, Jehova okwa li e ya kwathele ya kale ya hangana. Konima yethimbo, sho egongalo lyopaKriste lya totwa po, olya li li na aalumentu naakiintu mboka haya popi omalaka ogendji. Yamwe oya li aayamba, nayamwe oya li oohepele. Ihe molwaashoka oya li ye hole Omanyolo, oya li ya hangana mokulongela Kalunga kashili. Mboka ya ningi ooitaali oya li ya vulu okuuva ko Oohapu dhaKalunga, molwaashoka owala ya li ya kwathelwa kooitaali ooyakwawo naasho ya li haya gongala pamwe nayo. — Iil. 2:42; 8:30, 31.

8. Ombiimbeli ohayi hanganitha ngiini oshigwana shaJehova kunena?

⁸ Kalunga ketu omunandunge ota tsikile oku  tu longa nokuhanganitha oshigwana she okupitila mOmbiimbeli. Ombiimbeli oyi na iinima ayihe yi li paushili kombinga yaJehova mbyoka twa pumbwa okutseya. Ohatu gongala pandjigilile megongalo, piigongi iinene niishona tu uve sho Omanyolo taga leshwa, taga yelithwa notaga kundathanwa. Kungawo, Ombiimbeli ohayi dhana onkandangala ya simana melalakano lyaJehova lyokukwathela oshigwana she, shi ‘mu longele sha tegamathana.’ — Sef. 3:9, OB-1954.

9. Uukwatya wuni twa pumbwa, opo tu uve ko etumwalaka lyOmbiimbeli? (Lukas 10:21)

⁹ Natu taleni kuuyelele wulwe mboka tawu ulike kutya Jehova oku na uunongo. Okwa nyolitha iitopolwa oyindji yOmanyolo momukalo ngoka taga vulu owala okuuviwa ko kaantu mboka aaifupipiki. (Lesha Lukas 10:21.) Aantu shaampono ohaya lesha Ombiimbeli. Omulongwantu gumwe okwa ti kutya aantu oyendji oya kala haya lesha Ombiimbeli shi vulithe pomambo galwe, noya kala haye yi lesha nuukeka shi vulithe pugalwe. Ihe aantu owala mboka aaifupipiki taya vulu oku yi uva ko shili nokutula miilonga shoka tayi popi. — 2 Kor. 3:15, 16.

10. Omomukalo ishewe guni Ombiimbeli tayi ulike kutya oyi na uunongo waJehova?

¹⁰ Ohatu ilongo kombinga yowino yaJehova mOmbiimbeli momukalo gulwe ishewe. Jehova iha longitha owala omanyolo e tu longe tu li ongundu, ihe ohe tu longo wo noku tu hekeleka pauhandimwe. Atuheni ohatu vulu okumona kutya Jehova oku na ko nasha nakehe gumwe gwomutse, uuna tatu lesha Oohapu dhe. (Jes. 30:21) Sho wa li muupyakadhi wontumba, iikando ingapi wa tala mOmbiimbeli e to lesha mo ovelise ndjoka ya fa owala ongoye ya nyolelwa? Ombiimbeli oya nyolwa momukalo ngoka aantu omamiliyona taya vulu oku yi uva ko. Oshe ende ngiini opo yi kale yi na uuyelele wu li pethimbo mboka owo naanaa wa pumbwa? Omolwaashoka Omunyoli gwOmbiimbeli oye omunandunge a shiga ko. — 2 Tim. 3:16, 17.

11. Kalunga oku ulike ngiini kutya ke na okatongo sho Ombiimbeli ya li tayi nyolwa?

¹¹ Uuyuki owo uukwatya wulwe waJehova. (Deut. 32:4) Omuntu ngoka omuyuuki olundji oha kala wo kee na okatongo, Jehova naye ke na okatongo. (Iil. 10:34, 35; Rom. 2:11) Otatu vulu okumona kutya Jehova ke na okatongo, molwaashoka okwa li a nyolitha Ombiimbeli momalaka ngoka ga li haga popiwa kaatu oyendji pethimbo tayi nyolwa. Omambo gotango 39 oga li ga nyolwa konyala mOshihebeli, elaka ndyoka lya li hali uviwa ko nuupu koshigwana shaKalunga pethimbo ndyoka. Ihe pethimbo lyAakriste yotango, aantu oyendji oya li haya popi Oshigreka, onkee omambo gahugunina 27 oga li ga nyolwa unene melaka ndyoka. Jehova ka li owala a tokola Oohapu dhe dhi nyolwe melaka limwe alike. Kunena, aantu omabiliyona gahetatu lwaampono kombanda yevi, ohaya popi omalaka ogendji. Ongiini nduno aantu mboka oyendji noonkondo taya vulu okwiilonga kombinga yaJehova?

12. Omomukalo gumwe guni ehunganeko ndyoka li li muDaniel 12:4, lya gwanithwa momasiku ngaka ga hugunina?

¹² Jehova okwa li a uvaneke okupitila momuhunganeki Daniel kutya pethimbo lyehulilo, ‘ontseyo yashili’ ndjoka yi li mOmbiimbeli ‘otayi indjipala.’ Aantu oyendji oya li taye ke yi uva ko. (Lesha Daniel 12:4.) Omukalo gumwe ontseyo ndjoka ya indjipala, okupitila mokutolokwa, mokunyanyangidhwa nomokwaandjaganekwa kwOombiimbeli niileshomwa ya kankamena kOmbiimbeli. Ombiimbeli oyo embo ndyoka ngashingeyi lya tolokwa momalaka ogendji noya andjaganekwa muuyuni awuhe. Oombiimbeli ndhoka hadhi nyanyangidhwa komandiki goongeshefa omathimbo gamwe ohadhi kala dhi na ondilo noonkondo. Ihe sigo oompaka oshigwana shaJehova osha toloka Oohapu dhaKalunga dha gwana po nenge iitopolwa yadho yimwe,  momalaka ge vulithe po 240, nakehe gumwe ota vulu oku yi imonena oshali. Omolwoshinima shoka, aantu yomiigwana ayihe otayi ilongo kombinga ‘yelaka etoye lyoshilongo’ manga ehulilo inaali ya. (Mat. 24:14) Kalunga ketu omuyuuki okwa hala okupa aantu oyendji ompito ngaashi tashi vulika ye mu tseye, okupitila mokulesha Oohapu dhe. Okwa hala shoka sha ningwa, molwaashoka oku tu hole noonkondo.

13. Omolwashike tatu vulu okutya Ombiimbeli otayi ulike kutya Jehova omunahole? (Johannes 21:25)

¹³ Ombiimbeli otayi tu kwathele tu uve ko kutya uukwatya waJehova wa simanenena, owo hole. (1 Joh. 4:8) Tala kwaashoka Jehova a nyolitha mOmbiimbeli naashoka inaa nyolitha mo. Okwe tu pa owala uuyelele mboka twa pumbwa, opo tu kale tu na ekwatathano ewanawa naye, tu kale twa nyanyukwa ngashingeyi notu ka mone omwenyo gwaaluhe. Ihe molwaashoka Jehova oku tu hole, ine tu pa uuyelele owundji mboka inaatu pumbwa, opo tu mu longele. — Lesha Johannes 21:25.

14. Ohole yaKalunga oyi iwetikile ishewe ngiini mwaashoka shi li mOmbiimbeli?

¹⁴ Jehova oku ulika wo kutya oku tu hole mokupopya natse momukalo ngoka tagu ulike kutya okwe tu simaneka. MOmbiimbeli, ine tu pa oompango odhindjidhindji tadhi tu lombwele shoka tu na lela okuninga naashoka kaatu na okuninga moshinima kehe monkalamwenyo yetu. Pehala lyaashono, oha longitha omahokololo giinima ya ningwa shili, omahunganeko taga nyanyudha nosho wo omayele ngoka hage tu kwathele tu ninge omatokolo omawanawa. Momukalo ngoka Oohapu dhaKalunga ohadhi tu inyengitha tu kale tu mu hole notu vulike kuye tashi zi komutima.

15. (a) Jehova oku ulike ngiini kutya oku na ohokwe mwaamboka haya lesha Oohapu dhe? (b) Methano ndika, okakadhona, omumwatate omugundjuka nomumwameme omukokele otaya dhiladhila kaantu yeni yomOmbiimbeli? (Gen. 39:1, 10-12; 2 Aak. 5:1-3; Luk. 2:25-38)

 ¹⁵ Ombiimbeli otayi tu hololele kutya Jehova oku na ko nasha natse noonkondo. Ngiini mbela? Oohapu dhe odhu udha omahokololo ngoka taga popi kombinga yomaiyuvo gaantu. Otatu vulu okuuva ko nkene aantu mboka ya popiwa mOmbiimbeli ya li ye uvite, molwaashoka oya li aantu ‘ye tu fa.’ (Jak. 5:17) Shoka sha simanenena, ngele otwa konakona nkene Jehova a li a ungaunga naantu ye tu fa, otatu vulu okuuva ko nawa kutya ye “omunesilohenda nomunalukeno.” — Jak. 5:11.

16. Oshike tatu ilongo kombinga yaJehova uuna tatu lesha mOmbiimbeli kombinga yoohandimwe mboka ya li ya ningi omapuko? (Jesaja 55:7)

¹⁶ Ombiimbeli otayi shi ulike kutya Jehova oku tu hole ishewe momukalo gulwe. Omanyolo otage tu shilipaleke kutya Kalunga ke na esiku e tu ethe uuna twa ningi omapuko. Aaisraeli oya li ya yono kuJehova iikando niikando, ihe sho yi itedhulula, Kalunga okwe ya dhimine po. (Lesha Jesaja 55:7.) Aakriste yomethelemumvo lyotango nayo oya li ye shi kutya Kalunga oku ya hole noonkondo. Omuyapostoli Paulus okwa li a nwethwa mo a nyole ta ladhipike ooitaali ooyakwawo ya ‘dhimine po nokuhekeleka’ omulumentu gumwe ngoka a kala ta yono eyono lya kwata miiti, ihe okwe ki itedhulula. (2 Kor. 2:6, 7; 1 Kor. 5:1-5) Kashi shi tuu oshikumithi sho Jehova ihaa ekelehi aalongeli ye molwaashoka owala ya ningi omapuko! Pehala lyaashono, ohe ya kwathele pahole, ohe ya pukulula nohe ya hiya ya ninge ishewe ookuume ke. Oku uvaneka kutya ota ningile sha faathana aayoni ayehe mboka yi itedhulula kunena. — Jak. 4:8-10.

17. Omolwashike Ombiimbeli yi li omagano ga dhenga mbanda?

¹⁷ Jehova okwe tu pa omagano omawanawa. Omolwashike Oohapu dhe dha dhenga mbanda noonkondo? Otwa ilonga mOmbiimbeli kutya Kalunga omunongo, omuyuuki noku tu hole noonkondo. Embo ndika otali shi ulike kutya Jehova okwa hala tu mu tseye. Okwa hala tu ninge ookuume ke.

18. Ongiini tatu vulu okuulika kutya otwa pandula ‘omagano omawanawa’ gaJehova gOmbiimbeli?

¹⁸ Inatu hala tu dhimbwe kutya Oohapu dhaKalunga ‘omagano omawanawa.’ (Jak. 1:17) Onkee natu tsikile okuulika kutya otwe dhi pandula. Otatu vulu oku shi ninga mokulesha pamwe negalikano oohapu ndhoka oondjapuki nokutedhatedha kudho. Ngele osho twa ningi, otatu vulu okukala tu na uushili kutya Omunyoli gwadho omunenenene, ota ka yambeka oonkambadhala dhetu notatu “ka mona ontseyo okutseya Kalunga.” — Omayel. 2:5.