METITATU, mo 18 Januali 2023, kepandja lyetu, jw.org, okwa li kwa ningwa etseyitho lya ikalekelwa tali ti kutya omumwatate Gage Fleegle nosho wo Jeffrey Winder oya langekwa po ye li iilyo yOlutuwiliki lwOonzapo dhaJehova. Aamwatate ayehe yaali oya longela Jehova nuudhiginini uule womimvo odhindji.

Omumwatate Fleegle okwa putudhilwa kuuninginino waPennsylvania moAmerika, kaavali aatilikalunga. Sho a li e na omimvo omulongo nasha, yaandjawo oya tembukile kokandoolopa okashona, hoka kwa li ku na ompumbwe onene yaauvithi. Nziya konima yaashoka, okwa ninginithwa mo 20 Novomba 1988.

Aavali yomumwatate Fleegle oya kala aluhe haye mu ladhipike a ye miilonga yethimbo lya udha. Olundji aatonatelishikandjo nAabetel oya li haya kala maandjawo, nomumwatate Fleegle okwa li ha mono nkene aamwatate naamwameme mboka ya nyanyukwa. Nziya konima sho a ninginithwa okwa ningi omukokolindjila gwondjigilile mu 1 Septemba 1989. Konima yomimvo mbali, okwa adha elalakano lye ndyoka a li a itulila po sho a li e na omimvo 12, lyoku ka longa kObetel. MuKotoba 1991, okwa tameke okulonga kObetel yaBrooklyn.

Omumwatate Fleegle okwa li a longo mOshikondo shOkutula Kumwe Omambo uule womimvo hetatu mObetel, nolwanima okwa ka longa mOshikondo shIilonga. Pethimbo ndyoka, okwa kala megongalo lyOshirusia, uule womimvo dhontumba. Mo 2006 okwa hokana omumwameme Nadia, noya longo pamwe mObetel. Oya kala megongalo lyOshiputu, nolwanima oya yi kegongalo lyOshispania moka ya kala uule womimvo dhi vulithe pomulongo. Konima sho a kala mOshikondo shIilonga omimvo odhindji, omumwatate Fleegle okwa li a pulwa a ka longe mombelewa yOkomitiye yOkulonga aantu, nolwanima okwa ka longa mombelewa yOkomitiye yIilonga. MuMaalitsa 2022 okwa li a langekwa po e li Omukwatheli mOkomitiye yIilonga yOlutuwiliki.

Omumwatate Winder okwa putukila moMurrieta shaCalifornia, moAmerika. Okwa longwa  oshili kaavali ye, nokwa ninginithwa mo 29 Maalitsa 1986. Okuza sho a ninginithwa, omwedhi gwa landula ko okwa kutha uukwathelikokolindjila. Okwa li e gu nyanyukilwa, nokwa li a hala okutsikila. Konima yoomwedhi dhontumba, sho a kala ta longo e li omukwathelikokolindjila, okwa tameke uukokolindjila wondjigilile mu 1 Kotoba 1986.

Sho a li e na omimvo omulongo nasha, omumwatate Winder okwa li a ka talela po aamwayinamati aakuluntu, mboka ya li haya longo kObetel pethimbo ndyoka. Shoka oshe mu ningitha kale a hala okuudhithila kObetel, uuna a koko. MuMei 1990, okwa li a hiywa a ka longe kObetel yaWallkill.

KObetel omumwatate Winder okwa longa miikondo ya yoolokathana, mwa kwatelwa Oshikondo shOkwoopaleka, Oshikondo shUunamapya nUuniimuna nosho wo mOmbelewa yaBetel. Okwa hokana omumwameme Angela mo 1997, nokuza mpono oya kala taya longo pamwe mObetel. Mo 2014 oya li ya tuminwa koWarwick, hoka omumwatate Winder a li a kwathele miilonga yokutunga omatungo goombelewa dhetu oonene muuyuni. Mo 2016, omumwatate Winder okwa tuminwa koWatchtower Educational Center moPatterson, hoka a ka longa mOshikondo shIikwamawi nUuvidio. Konima yomimvo ne, oya shuna koWarwick, nomumwatate Winder okwa ka longa mOmbelewa yOkomitiye yOnkalonawa yaantu. MuMaalitsa 2022, okwa li a langekwa po e li Omukwatheli mOkomitiye yOnkalonawa yaantu yOlutuwiliki.

Otatu galikana opo Jehova a laleke nuuyamba ‘aantu mbaka ye li omagano,’ sho taya tsikile nokulonga nuudhiginini miilonga yUukwaniilwa. — Ef. 4:8.