Kala wa nyanyukwa manga wa tegelela Jehova neidhidhimiko
MBELA oho kala ngaa wa halelela okumona ethimbo ndyoka sho Jehova ta ka hulitha po uukolokoshi awuhe nokuninga iinima ayihe iipe? (Eh. 21:1-5) Osho naanaa! Ihe nando ongawo, kashi shi oshipu okutegelela Jehova neidhidhimiko a katuke oonkatu, unene tuu uuna twa taalela omaupyakadhi. Ngele otwa tegelela oshinima shontumba shi ningwe, ihe itashi ningwa, ohashi gombokitha omwenyo. — Omayel. 13:12.
Ihe nando ongawo, Jehova okwa hala tu tegelele neidhidhimiko a katuke onkatu peuthwathimbo lye. Omolwashike a tegelela tu ninge ngawo? Oshike tashi vulu oku tu kwathela tu kale twa nyanyukwa, manga twa tegelela?
OMOLWASHIKE JEHOVA A HALA TU KALE TWA TEGELELA?
Ombiimbeli otayi ti: “Omuwa ota tegelele e mu sile ohenda. Okwi ilongekidha e mu sile olukeno, oshoka aluhe oha ningi ashike shoka shu uka. Aanelago oyo mboka ye mu inekela.” (Jes. 30:18) Oohapu dhaJesaja ndhoka odha li dha lombwelwa Aaisraeli aatangalali. (Jes. 30:1) Ihe mokati kAajuda omwa li mu na yamwe aadhiginini, noohapu ndhoka odha li dhe ya pe etegameno. Oohapu odho tuu ndhoka, ohadhi pe aapiya yaJehova aadhiginini yokunena etegameno.
Onkee ano otu na okutegelela neidhidhimiko, molwaashoka Jehova naye okwa tegelela neidhidhimiko. Okwa tula po ethimbo lyokondandalunde uuna ta ka hulitha po uuyuni mbuka nokwa tegelela esiku notundi ndyoka yi thike. (Mat. 24:36) Pethimbo ndyoka otashi ka kala shi iwetikile kutya Ondiyapoli otayi lundile Jehova naamboka haye mu longele. Opo nduno ota ka hanagula po Satana naamboka ya gama kuye, ihe tse ote ke tu ‘sila ohenda.’
Manga twa tegelela shono shi ningwe, Jehova otashi vulika kaa kuthe po omaupyakadhi getu, ihe nando ongawo, ohe tu shilipaleke kutya otatu vulu okukala twa nyanyukwa, manga twa tegelela. Ngaashi Jesaja e shi popi, otatu vulu okukala twa nyanyukwa, sho twa tegamena sha oshiwanawa shi ningwe. (Jes. 30:18) a Ongiini tatu vulu okukala twa nyanyukwa? Otatu ka kwathelwa kiinima ine.
NKENE TATU VULU OKUKALA TWA NYANYUKWA, MANGA TWA TEGELELA JEHOVA A KATUKE ONKATU
Dhiladhila kiinima iiwanawa mbyoka tayi vulu okuningwa monkalamwenyo yoye. Omukwaniilwa David okwa li a mono uukolokoshi owundji tawu ningwa monkalamwenyo ye. (Eps. 37:35) Ihe nando ongawo, okwa nyola a ti: “Idhidhimika e to tege Omuwa, a longe sha; ino impwiyika naambo taa piti nawa nenge mbo taa enditha oompangela dhawo dhuudhudhu.” (Eps. 37:7) David naye okwa li a taamba ko omayele ngoka, mokugandja eitulomo ketegameno lye li na ko nasha noku ka hupithwa. Okwa li ha pandula iinima ayihe mbyoka Jehova he mu ningile. (Eps. 40:5) Natse ngele otwa gandja eitulomo kiinima iiwanawa mbyoka Jehova e tu ningila, otashi ka kala oshipu okutegelela Jehova a katuke onkatu.
Kala wa ipyakidhila nokusimaneka Jehova. Omunyoli gwEpisalomi 71, David, okwa popi kombinga Jehova a ti: “Otandi kala aluhe nde ku inekela; otandi ku simaneke aluhe sigo aluhe.” (Eps. 71:14) Okwa li a simaneke ngiini Jehova? Okwa li ha lombwele yalwe kombinga yaJehova noku mu imbila omaimbilo gehambelelo. (Eps. 71:16, 23) Ngaashi David, otatu ka mona enyanyu, manga twa tegelela Jehova a katuke onkatu. Ohatu mu simaneke okupitila miilonga yokuuvitha, moonkundathana dhetu dhakehe esiku nomomaimbilo. Uuna to imbi omaimbilo gUukwaniilwa, pulakena neitulomo kwaashoka tage ku lombwele.
Mona etsomukumo kaamwatate naamwameme. Sho David a li a taalela omashongo, okwa lombwele Jehova a ti: “Megongalo lyaantu yoye otandi hokolola uuwanawa woye.” (Eps. 52:9) Natse otatu vulu okutsuwa omukumo kaamwatate naamwameme, kashi shi owala kokugongala nomiilonga yokuuvitha, ihe omokutalelathana po wo. — Rom. 1:11, 12.
Koleka etegameno lyoye. Episalomi 65:5 olya ti: “Omwenyo gwandje, omuKalunga amuke to mono evululuko; omuye awike u na etegameno.” Osha simana okukala tu na etegameno lya kola, unene tuu ngele ehulilo inali ya nziya ngaashi twa li twa tegelela. Otu na okukala twa tompwa kutya omauvaneko gaJehova otaga ka gwanithwa shili, kashi na nduno mbudhi kutya otwe ga tegelela ethimbo li thike peni. Otatu vulu okukoleka etegameno lyetu mokukonakona Oohapu dhaKalunga, omahunganeko ge, nkene aanyoli ya nyola iinima tayi tsu kumwe nosho wo uuyelele mboka Jehova a popya kombinga ye mwene. (Eps. 1:2, 3) Otwa pumbwa wo okutsikila ‘okugalikana metsokumwe nombepo ondjapuki,’ opo tu kaleke po ekwatathano lyetu naJehova, sho twa tegelela a gwanithe po euvaneko lye li na ko nasha nomwenyo gwaaluhe. — Jud. 20, 21.
Ngaashi omukwaniilwa David, otatu vulu okukala nuushili kutya Jehova oha tonatele mboka ye mu tegelela neidhidhimiko a katuke oonkatu noku tu sile ohenda. (Eps. 33:18, 22) Natu tsikileni okukala twa tegelela Jehova neidhidhimiko, mokugandja eitulomo kiinima mbyoka tayi ningwa monkalamwenyo yetu, moku mu simaneka, mokumona etsomukumo kaamwatate naamwameme nokukaleka etegameno lyetu lya kola.
a Oshitya shOshihebeli shoka sha tolokwa ‘tegelela’ otashi vulu wo okutolokwa “okukala wa halelela nenge wa tegamena sha shi ningwe,” shoka tashi ulike kutya oshi li paunshitwe okukala twa hala okuhupithwa.
