1. Omolwashike oshidhigu okutseya shoka omuntu a hala okutya, uuna a ti kutya okwe tu dhimina po?

 “ONDE KU DHIMINA PO.” Oohapu ndhoka ohadhi talaleke, unene tuu ngele otwa popya, nenge twa ninga sha shoka sha uvitha nayi gumwe? Ihe mbela uutumbulilo “Onde ku dhimina po,” owa hala naanaa okutya ngiini? Mbela ngoka wa uvitha nayi, okwa hala okutya natango omu li ookuume aawanawa? Nenge okwa hala okutya ina hala we okupopya kombinga yaashoka sha ningwa po? Uuna aantu taya ti oye tu dhimina po, ihatu kala naanaa tu shi kutya oya hala okutya shike.

 2. Edhiminopo lyaJehova olya yelithwa ngiini mOmanyolo? (Tala wo enyolo lyopevi.)

² Omukalo moka Jehova he tu dhimine po tu li aantu inaatu gwanenena, ogwa yooloka ko kwaangoka hatu dhimine po yalwe. Omukalo moka Jehova he tu dhimine po ogwa ikalekelwa. Omupisalomi gumwe okwa popi kombinga yaJehova a ti: “Pungoye opu na edhimopo lyoondjo, opo u tilike nokusimanekwa.” a (Eps. 130:4) Eeno, edhiminopo lyaJehova olyashili lela. Okwa tula po ondondo ya dhenga mbanda yaashoka edhiminopo lyashili tali ti. Poompito dhimwe, aanyoli yOmbiimbeli oya longitha oshitya shOshihebeli ya ukitha kedhiminopo, oshitya shoka inaashi longithwa nando onale, okuukithwa kedhiminopo lyaantu, opo ya yelithe kombinga yedhiminopo lyaJehova.

 3. Edhiminopo lyaJehova olya yooloka ko ngiini kulyetu? (Jesaja 55:6, 7)

³ Uuna Jehova a dhimine po gumwe, omayono ge ohe ga dhimi po thiluthilu. Otatu vulu ishewe okukala nekwatathano lyopothingo naJehova. Otwa pandula sho he tu dhimine po thiluthilu, te shi ningi lwiikando. — Lesha Jesaja 55:6, 7.

 4. Jehova ohe tu kwathele ngiini tu uve ko kutya edhiminopo lyashili oshike?

 ⁴ Ngele omukalo gwaJehova gwokudhimina po ogwa yooloka ko kugwetu, ongiini aantu inaatu gwanenena tatu vulu okuuva ko kutya edhiminopo lyashili oshike? Jehova okwa longitha omathaneko, e tu kwathele tu uve ko nkene he tu dhimine po. Moshitopolwa shika, otatu ka konakona gamwe gomugo. Otage ke tu ulukila nkene Jehova ha dhimi po omayono getu, nopethimbo opo tuu mpono ohe tu pitike tu kale ishewe nekwatathano lyopothingo naye. Sho tatu konakona omathaneko ngaka, otatu ka kokeka olupandu lwetu lwokupandula Tate yetu omunambili nomunahenda, ngoka he tu dhimine po momikalo odhindji.

JEHOVA OHA DHIMI PO OMAYONO GETU

 5. Oshike hashi ningwa po, uuna Jehova a dhimi po omayono getu?

⁵ MOmbiimbeli, omayono olundji ohaga faathanithwa nomitenge omidhigu. Omukwaniilwa David, okwa hokolola omayono ge, a ti: “Otandi sile meyelu lyoondjo dhandje; odho omutenge omudhigu okuhumbata.” (Eps. 38:4) Ihe Jehova oha dhimi po omayono gaayoni mboka ya iyela ombedhi. (Eps. 25:18; 32:5) Uutumbulilo wOshihebeli mboka wa tolokwa “dhimi po,” otawu ti lelalela “okutumba po” nenge “okuhumbata.” Otatu vulu okutala ko Jehova onga omulumentu omunankondo, ngoka pathaneko te tu kutha komapepe omitenge dhomayono getu, e te dhi fala kokule.

 6. Jehova oha fala omayono getu kokule shi thike peni?

⁶ Ombiimbeli oya longitha ishewe ethaneko lilwe, ndyoka tali ulike kutya Jehova oha fala omayono getu kokule natse shi thike peni. Episalomi 103:12 otali ti: “Ngaashi uuzilo u li kokule nuuninginino, osho ta kaleke kokule natse oondjo dhetu.” Uuzilo owu li kokulekule nuuninginino. Oombinga ndhono mbali kadhi na siku dhi tsakanene. Niitya yimwe, Jehova oha hedhitha omayono getu kokule natse ngaashi tashi vulika. Shono otashi tu shilipaleke kutya Jehova ohe tu dhimine po thiluthilu.

 7. Ombiimbeli oya yelitha ngiini shoka Jehova ha ningile omayono getu? (Mika 7:18, 19)

⁷ Nonando Jehova oha fala pathaneko omayono getu kokule natse, mbela oha kala e tu kwatela onkone? Hasho nando. Omukwaniilwa Hiskia okwa nyola kombinga yaJehova a ti: “Oondjo dhandje adhihe ongoye we dhi umbile konima yoye.” (Jes. 38:9, 17) Shono osha hala okutya, Jehova oha ekelehi pathaneko kokule omayono gaamboka ya iyela ombedhi noihe ga dhimbulukwa we. Oohapu ndhoka otadhi vulu wo okutolokwa ngeyi: “Owa ningi omayono gandje ga kale ga fa inaaga ningwa.” Ombiimbeli oya tsu omuthindo oshitsa shika methaneko ekwawo ndyoka li li muMika 7:18, 19. (Lesha.) Menyolo ndyoka, Jehova okwa popiwa ta umbile omayono getu kondaandelo yefuta. Pethimbo lyonale, uuna omuntu a umbile oshinima kondaandelo yefuta, osha li hashi kala oshidhigu oku shi kutha mo.

 8. Oshike twa ilonga sigo oompaka?

⁸ Ombiimbeli otayi ti kutya uuna Jehova e tu dhimine po, oha kutha po omayono getu thiluthilu noihatu kala we tu uvite tu na ondjo. David okwa popi dhu uka sho a ti: “Aanelago aantu mboka Kalunga e ya dhimina po omayono gawo, oomboka oondjo dhawo dha siikilwa. Omuntu omunelago oye ngoka Omuwa itaa yalula we oondjo dhe.” (Rom. 4:7, 8) Ndyoka olyo edhiminopo lyashili.

JEHOVA OHA DHIMI PO OMAYONO

 9. Ombiimbeli oye tu kwathele ngiini tu mone kutya Jehova ohe tu dhimine po thiluthilu?

⁹ Jehova okwa longitha ishewe ethaneko lilwe, e tu kwathele tu kale tu na olupandu nkene okupitila mekuliloyambo, ha dhimi po omayono gaamboka ya iyela ombedhi. Jehova ota  popiwa pathaneko ha yogo nokukutha po omayono getu. Shono ohashi ningitha omuyoni a kale a yogoka. (Eps. 51:7; Jes. 4:4; Jer. 33:8) Jehova okwa yelitha nkene ha dhimi po omayono getu, a ti: “Oondjo dheni nando nadhi kale dha tiligana mbyumbyumbyumbyu, otadhi ka toka dha fa oompawe; nonando nadhi kale dha tiligana, otadhi yele dha fa omafufu omatokele goonzi.” (Jes. 1:18) Oshidhigu noonkondo okuyoga ko ontongo ontiligane konguwo. Ihe, mokulongitha ethaneko ndika, Jehova ote tu shilipaleke kutya, ota vulu okuyoga po omayono getu thiluthilu, e taga kala kaage po we.

10. Ombiimbeli oya yelitha ngiini omukalo moka Jehova he tu dhimine po?

¹⁰ Ngaashi sha popiwa moshitopolwa sha tetekele, omayono otaga faathanithwa wo ‘noondjo.’ (Mat. 6:12; Luk. 11:4) Onkene ethimbo kehe tatu yono kuJehova, osha fa andola oondjo dhetu tadhi ende tadhi ningi odhindji. Kuye, otu na oondjo odhindji lela. Ihe uuna Jehova e tu dhimine po, okwa fa e tu ku thila po oongunga ndhoka twa li tu na oku dhi futa. Iha kala a tegelela tu fute ishewe oondjo ndhoka a dhima po nale. Ngaashi owala omuntu ha kala a pepelelwa uuna oondjo dhe dha futwa, natse ohatu kala twa pepelelwa, uuna twa dhiminwa po oondjo dhetu.

11. Mbela osha hala okutya ngiini, sho Ombiimbeli ya ti kutya oondjo dhetu odha ‘dhimwa po’? (Iil. 3:19)

¹¹ Jehova iha kutha po owala omayono getu nenge oongunga dhetu, ihe ohe dhi dhimi po wo. (Lesha Iilonga 3:19.) Natu shi thaneke ngeyi: Dhiladhila kugumwe ngoka wu na oondjo dhe, e te dhi tende po nomusinda. Nonando ongawo, oonomola ndhoka a tenda po nomusinda natango odhi iwetikile. Ihe okudhima po oshinima shontumba osha yooloka ko. Opo tu uve ko ethaneko ndika, otwa pumbwa okudhimbulukwa kutya pethimbo lyonale ohinga oya li hayi tulwa mumwe nokabona, onka nomeya. Gumwe oha vulu okukutha okafulafula ka tuta, e ta dhimi po shoka sha nyolwa. Onkee ano uuna oondjo dha “dhimwa po,” ohadhi kana po thiluthilu. Aantu itaya ka mona shoka sha li sha nyolwa po manga inaapu dhimwa. Ohashi kala sha fa oondjo ndhoka inaadhi ningwa nandonando. Ihashi nyanyudha tuu omitima dhetu okutseya kutya Jehova iha kutha po owala oondjo dhetu, ihe ohe dhi dhimi po thiluthilu. — Eps. 51:9.

12. Mbela ethaneko lyosheentsi shongula olya hala okutya shike kutse?

¹² Jehova okwa longitha ethaneko lya faathana, a yelithe nkene ha dhimi po thiluthilu omayono getu. Okwa ti: “Otandi dhimi po omayono goye ngashika oshikogo, noondjo dhoye ngashika osheentsi shongula.” (Jes. 44:22) Uuna Jehova e tu dhimine po, oha kala a fa a longitha osheentsi shongula a holeke omayono getu, opo kaaga monike we.

13. Ohatu kala tu uvite ngiini, uuna Jehova a dhimi po omayono getu?

¹³ Shika osha hala okutya shike kutse? Uuna Jehova a dhimi po omayono getu, inatu pumbwa we okukala tu uvite ondjo omolwomayono getu okukalamwenyo kwetu akuhe. Okupitila mombinzi yaJesus Kristus, omayono getu oga dhimwa po thiluthilu. Uuna Jehova a dhimi po omayono getu, ohatu kala twa fa inaatu ga ninga. Uuna twa iyele ombedhi omolwomayono getu, Jehova ohe tu dhimine po momukalo ngoka.

JEHOVA OHE TU PITIKE TU KALE ISHEWE NEKWATATHANO EWANAWA NAYE

14. Omolwashike tatu vulu okwiinekela edhiminopo lyaJehova? (Tala wo omathano.)

¹⁴ Edhiminopo lyashili ndyoka hali zi kuJehova, ohali tu pitike tu kale nekwatathano ewanawa naye. Ohali tu kwathele tu yande okukala tu uvite twa gwililwa po. Inatu pumbwa okukala twa tila, tu uvite kutya Jehova okwe tu geela  natango, nota kongo omukalo e tu geele. Shoka kashi na esiku shi ningwe. Omolwashike tatu vulu okwiinekela Jehova, uuna ta ti kutya okwe tu dhimina po? Omuhunganeki Jeremia okwa popi shi na sha naJehova a ti: “Otandi dhimi po omayono gawo, nuulunde wawo itandi u dhimbulukwa we.” (Jer. 31:34) Omuyapostoli Paulus okwa endulula oohapu ndhoka sho a ti: ‘Itandi ka dhimbulukwa we oondjo dhawo.’ (Heb. 8:12) Ihe mbela shoka osha hala naanaa okutya ngiini?

15. Omeityo lini Jehova itaa dhimbulukwa we omayono getu?

¹⁵ MOmbiimbeli, uutumbulilo “dhimbulukwa,” haaluhe tawu ti okudhimbulukwa oshinima shontumba nenge, okudhiladhila kombinga yasho. Pehala lyaashono, osha kwatela mo okukatuka oonkatu. Omukolokoshi ngoka a li a alelwa pamwe naJesus, okwa pula Jesus a ti: “Jesus, dhimbulukwa ndje, uuna wa yi mUukwaniilwa woye.” (Luk. 23:42, 43) Ka li owala ta pula Jesus a dhiladhile kombinga ye pethimbo mpoka. Eyamukulo lyaJesus olya ulike kutya ota ka katuka oonkatu, opo a yumudhe omukolokoshi ngoka. Onkee ano uuna Jehova ta ti kutya ita ka dhimbulukwa we omayono getu, okwa hala okutya ite ke tu katukila we onkatu omolwomayono ngoka. Ite ke tu geela we monakuyiwa omolwomayono ngoka a dhima po nale.

16. Ombiimbeli oya yelitha ngiini kombinga yemanguluko ndyoka hali zi medhiminopo lyashili?

¹⁶ Ombiimbeli oya longitha wo ethaneko lilwe, yi tu kwathele tu uve ko emanguluko ndyoka hali zi medhiminopo lyashili. Molwaashoka otu na egamo lyokuyona paunshitwe, noina tu gwanenena, otu li “aapika yuulunde.” Ihe uuna Jehova e tu dhimine po, otwa fa aapika mboka ya “mangululwa muulunde.” (Rom. 6:17, 18; Eh. 1:5) Eeno, uuna twa tseya kutya Jehova okwe tu dhimina po, ohatu kala twa nyanyukwa ongomupika ngoka a mangululwa.

17. Mbela edhiminopo ohali aludha ngiini? (Jesaja 53:5)

¹⁷ Lesha Jesaja 53:5. Ethaneko lyahugunina ndyoka tatu ka kundathana, otali tu faathanitha naantu mboka ye na omukithi omudhipagi.  Omolwofuto yekuliloyambo ndjoka Jehova e tu pa okupitila mOmwana, otwa fa twa aludhwa pathaneko. (1 Pet. 2:24) Uuna twa yono, ohatu yonagula po ekwatathano lyetu naJehova. Omolwekuliloyambo, ota vulu oku tu dhimina po notatu vulu ishewe okukala nekwatathano ewanawa naye. Ngaashi owala omuntu ngoka ta ehama ha kala a nyanyukwa uuna a aluka, natse ohatu kala twa nyanyukwa uuna twa aludhwa pambepo nokukala ishewe twa hokiwa kuJehova omolwedhiminopo lye.

SHOKA EDHIMINOPO LYAJEHOVA TALI TI KUTSE?

18. Otwa ilongo shike mokukonakona omathaneko ga yoolokathana, ngoka taga adhika mOmbiimbeli, ge na ko nasha nedhiminopo lyaJehova? (Tala wo oshimpungu “Nkene Jehova he tu dhimine po.”)

¹⁸ Otwa ilongo shike mokukonakona omathaneko ga yoolokathana, ngoka taga adhika mOmbiimbeli, ge na ko nasha nedhiminopo lyaJehova? Uuna e tu dhimine po, ohe shi ningi thiluthilu notatu vulu okukala nuushili kutya ite ke tu geela we monakuyiwa omolwomayono ngoka. Shoka ohashi tu pitike tu kale nekwatathano ewanawa naTate yetu gwomegulu. Ihe nonando ongawo, otu shi kutya edhiminopo ndyoka lya za kuJehova oli li omagano ngoka he tu pe, molwaashoka oku tu hole noha gandja, ihe hamolwaashoka andola twe ga ilongela. — Rom. 3:24.

19. (a) Otu na okukala tu na olupandu lwashike? (Aaroma 4:8) (b) Oshike tatu ka kundathana moshitopolwa tashi landula?

¹⁹ Lesha Aaroma 4:8. Otwa pandula noonkondo sho Jehova he tu dhimine po. (Eps. 130:4) Ihe nonando ongawo, ngele otwa hala Jehova e tu dhimine po, otu na okuninga oshinima shontumba sha simana. Jesus okwe shi yelitha a ti: “Ihe ngele ihamu dhimine po aantu omayono gawo, nena Ho yeni yomegulu ite mu dhimine po omayono geni.” (Mat. 6:14, 15) Onkee ano otu na okuholela Jehova, mokukala hatu dhimine po yalwe. Mbela shono otu na oku shi ninga ngiini? Oshitopolwa sha landula ko otashi ke tu kwathela nkene tu na oku shi ninga.