Mary nomusamane gwe John, aohaya zi moshilongo moka onkundana ombwanawa hayi vulu okuuvithilwa aaniilonga oyendji aakwiilongo, ya za ko Filipine. Pethimbo lyomukithi gwoCOVID-19, Mary okwa li a pondola mokutameka omakonakono moshilongo moka ha zi, nomomahala galwe muuyuni. Okwe shi ende ngiini?

Mary okwa li ha pula aakonakonimbiimbeli ye kutya: “Owu shi gumwe ngoka a hala okukonakona Ombiimbeli?” Ngele oya ti eeno, ohe ya pula ta ti: “Oto vulu okukwathela ndje ndi kwatathane nayo?” Okupula epulo ndyoka lyanathangwa, olundji ohaku eta iizemo iiwanawa. Omolwashike mbela? Oshoka aantu mboka ye na olupandu lwOohapu dhaKalunga, ohaya kala ya hala okulombwela yaandjawo nosho wo ookuume kawo, shoka ya ilonga. Mary okwa mono iizemo yini, mokupula epulo ndyoka?

Omukonakonimbiimbeli gwaMary Jasmin, okwe mu kwathele a kwatathane naantu yane mboka ya li ya hala okukonakona Ombiimbeli. Gumwe gwomuyo, Kristine, okwa li ha nyanyukilwa ekonakono lye noonkondo nokwa pula Mary a konakone naye lwaali moshiwike. Sho Mary a pula ngele opu na ishewe gumwe ngoka a hala okukonakona Ombiimbeli, Kristine okwa ti: “Eeno, otandi ku kwathele wu kwatathane nookuume kandje.” Konima owala yiiwike iishona, Kristine okwa kwathele Mary a kwatathane nookuume ke yane, mboka ya li ya hala okukonakona. Lwanima, Kristine okwe mu kwathele a kwatathane nookuume ke yalwe, mboka yamwe yomuyo ya ningi sha faathana, mokukwatathana nookuume kawo mboka ya li ya hala okukonakona.

Kristine okwa li wo a hala yaandjawo koFilipine, ya ilonge kombinga yOmbiimbeli. Onkene okwa popi nomwanakadhona Andrea. Petameko, Andrea okwa li ta dhiladhila kutya, ‘Oonzapo odha nika oshiponga, inadhi itaala muJesus nohadhi longitha owala Etestamendi Ekulu.’ Ihe konima owala sho ya konakona lumwe, okwe shi mono kutya shoka a li ta dhiladhilile Oonzapo osha puka. Uuna taya konakona, okwa li ha ti: “Shampa owala Ombiimbeli ye shi popya, oshi na okukala shoshili.”

Lwanima, Andrea okwa kwathele Mary a kwatathane nookuume ke yaali nosho wo omuniilonga pamwe naye, ngoka a li a tameke okukonakona. Shimwe ishewe, shoka Mary a li kee shi, osho kutya yinagona yaAndrea, ngoka omuposi, okwa li ha kala po sho taya konakona. Opo nduno esiku limwe, Angela okwa pula Andrea a pule Mary ngele ota vulu a kale ha konakona naye. Angela okwa li e hole shoka ta ilongo. Muule womwedhi gumwe, okwa li a koneka oovelise odhindji nokwa li a hala okukonakona lune moshiwike. Kekwatho lyaAndrea, Angela okwa tameke okukala pokugongala  pandjigilile, okupitila momakwatathano gopaintaneta.

Sho Mary a mono kutya omusamane gwaKristine, Joshua, oha kala lopopepi a pulakena sho taya konakona, Mary okwa pula Joshua, ngele okwa hala okukala ha kala po pekonakono lyawo. Joshua okwa ti: “Otandi kala owala nda pulakena, ihe ino pula ndje omapulo, oshoka ngele owe shi ningi, otandi yi.” Muule owala wominute ntano dhekonakono, Joshua okwa li a pula omapulo ogendji e vule Kristine, nokwa li a hala okutsikila oonkundathana dhopaMbiimbeli.

Epulo lyaMary lyi li paunathangwa, olye mu etele aakonakonimbiimbeli oyendji. Kekwatho lyoyendji yomuyo, okwa ningi omalongekidho, opo aakonakoni ya kwathelwe kOonzapo dhilwe. Mary okwa li a tameke okukonakona Ombiimbeli naantu ye li 28, miilongo ine ya yoolokathana.

Jasmin, omukonakoni gwotango, ngoka a popiwa moshimoniwa shika, okwa ninginithwa muApilili 2021. Kristine okwa ninginithwa muMei 2022 nokwa li a shuna koFilipine, a ka kale nooyandjawo. Aakonakonimbiimbeli yalwe yaali, mboka ya pulwa kuKristine ya kwatathane naMary, nayo oya li ya ninginithwa. Angela okwa ninginithwa konima yoomwedhi oonshona, nongashingeyi oku li omukokolindjila gwondjigilile. Omusamane gwaKristine, Joshua, omwanakadhona Andrea, nosho wo aakonakoni yalwe oyendji, otaya ningi ehumokomeho.

Methelemumvo lyotango, onkundana ombwanawa oya taandele meendelelo pokati kaakwanezimo nookuume. (Joh. 1:41, 42a; Iil. 10:24, 27, 48; 16:25-33) Omolwashike itoo pula aakonakonimbiimbeli yoye nosho wo yalwe mboka ye na ohokwe kutya: “Mbela owu shi gumwe ngoka a hala okukonakona Ombiimbeli?” Ngele owa pula epulo ndyoka lyanathangwa, otashi vulika nangoye wu ka mone aantu oyendji mboka ya hala okukonakona Ombiimbeli.