Meme natate oya li ya pwila mo omutse nothingo melongelokalunga lyaKatoolika. Ihe sho ya ilongo mOmbiimbeli kutya edhina lyaKalunga oJehova, oya ningi Oonzapo dhaJehova. Tate okwa hulitha po okuhonga omathano gaJesus. Pehala lyaashono, okwa longitha uunongo we wokuhonga iipilangi, a lundulule ondunda yopevi ndjoka ya li maandjetu yi ninge Oshinyanga shUukwaniilwa, nosho sha li shotango moSan Juan del Monte, oshitopolwa shaManila, shoka shi li oshilandopangelo shaFilipine.

Konima sho nda valwa mo 1952, aavali yandje oya tameke okulonga ndje kombinga yaJehova, ngaashi owala ya kala nokulonga aamwayinamati yandje yane, naamwayinakadhona yandje yatatu. Sho tandi ende tandi koko, tate okwa li ha ladhipike ndje ndi kale handi lesha ontopolwa yimwe yOmbiimbeli esiku kehe, nokwa li ha konakona nangame iileshomwa yetu oyindji. Omathimbo gamwe, aavali yandje oya li haya hiya aatonatelishikandjo naakalelipo ya za koshitayimbelewa, ya kale megumbo lyetu. Ngame noyaandjetu, otwa li hatu nyanyukilwa omatalelopo ngoka, nosha li hashi tu tsu omukumo okupulakena kiimoniwa yawo, shono she tu inyengitha tu pitithe komeho iilonga yokuuvitha monkalamwenyo yetu.

Aavali yandje oya tulila ndje po oshiholelwa oshiwanawa shokukala neitaalo. Konima sho meme a si kuuwehame, ngame natate otwa tameke okukokola ondjila mo 1971. Ihe mo 1973, sho ndi na omimvo 20, tate okwa mana oondjenda. Sho nda kanitha aavali yandje ayehe, onda li ndi uvite ndi li ongame awike nokanda li ndi shi kutya onda thikama peni. Ihe etegameno ndyoka ‘lya kwata lya dhiginina,’ tali adhika mOmbiimbeli, olya kwathele ndje ndi kale ndi na etaloko ewanawa nokuhedha popepi naJehova, pehala lyokukala ndi uvite nda gwililwa po unene. (Heb. 6:19) Omathimbo hamale, konima sho tate a si, onda ningi omukokolindjila a ikalekelwa, montuntu Coron ya ikalela, yi li moshitopolwa shaPalawan.

Onda li ndi na omimvo 21, sho nda thiki moCoron. Molwaashoka onda kala handi zi moshilando, onda li  nda kumwa sho nda mono kutya montuntu ndjono hamahala agehe, ga li ge na olusheno nomeya, nomwa li owala mu na iiyenditho iishona. Nonando omwa li aamwatate aashona, kanda li ndi na ngoka handi longo naye, nomathimbo gamwe onda li handi uvitha ongame awike. Omwedhi gwandje gwotango, onda li nda yuulukwa noonkondo yaandjetu nosho wo ookuume kandje. Kongulohi, onda li handi tala oonyothi kegulu, tandi lili. Onda li nda hala okweetha po oshinakugwanithwa shandje nokushuna kegumbo.

Pethimbo ndyoka, sho nda li ndi uvite uuwike, ohandi mbumbulile Jehova omutima gwandje. Ohandi dhimbulukwa oohapu tadhi tsu omukumo, ndhoka nda lesha mOmbiimbeli nomiileshomwa yetu. Onda li handi dhiladhila aluhe Episalomi 19:14. Onda mono kutya Jehova, ota ka kala ‘emanya lyandje nomukulili gwandje,’ ngele onda tedhatedha kiilonga ye nokomaukwatya ge. Oshitopolwa shOshungolangelo shi na oshipalonyolo, “You Are Never Alone,” a osha kwathela ndje noonkondo. Onde shi leshulula lwiikando. Onda li nda fa ndi li pamwe naJehova pomathimbo ngoka, naashoka osha pe ndje oompito dhokugalikana, dhokukonakona nodhokutedhatedha.

Onda langekwa po ndi li omukuluntugongalo, konima owala yethimbo efupi, sho nda kala moCoron. Molwaashoka ongame awike nda li omukuluntugongalo, onda li handi kwatele komeho oshiwike kehe Osikola yOkudheula Aauvithi, Okugongala kwoPailonga, Ekonakono lyEmbo lyEgongalo nosho wo Oshungolangelo yokukonakonwa. Onda li wo handi gandja oshipopiwa shomontaneho oshiwike kehe. Molwaashoka onda li handi kala nda ipyakidhila niinima mbyoka, kanda li ndi uvite ndi li ongame owike.

Onda li handi tyapula iilonga yandje yokuuvitha. Oya eta iizemo iiwanawa, naakonakonimbiimbeli yandje yamwe, oya ninginithwa. Ihe opwa li wo omashongo. Omathimbo gamwe, onda li handi ende uule wetatasiku, opo ndi thike koshitopolwa hoka tandi ka longela, noihandi kala ndi shi kutya otandi ka lala peni uuna nda thiki. Oshitopolwa moka egongalo hali uvithile, osha li wo sha kwatela mo uuntuntu uushona owundji. Olundji onda li handi ende mombautu mefuta lya pindjala, opo ndi ye kuuntuntu mboka nonando kanda li ndi shi okuyoga. Jehova okwa li a gamene ndje nokukwathela ndje, sho nda li moonkalo adhihe ndhoka oondhigu. Lwanima, onde shi ndhindhilike kutya Jehova okwa li ta longekidhile ndje oonkalo oondhigu moshinakugwanithwa shandje sha landula ko.

Mo 1978, onda pewa oshinakugwanithwa koPapua New Guinea, shoka shi li kuumbangalantu waAustralia. Papua New Guinea, oshilongo sha udha oondundu, shi thike konyala poshilongo Spania. Onda li nda kumwa sho nda tseya kutya aakalimo ye li oomiliyona 3 lwaampono, ohaya popi omalaka ga konda po 800. Lago enene, aantu oyendji ohaya popi elaka lyoMelanesian Pidgin, ndyoka lyi shiwike nedhina Tok Pisin.

Onda tuminwa pakathimbo kegongalo lyOshiingilisa, koshilandopangelo shaPort Moresby. Ihe onda tembukile kegongalo lyoshiTok Pisin, hono nda ka ilonga elaka ndyoka. Onda li handi longitha shoka nda ilonga mootundi dhelaka ndyoka, miilonga yokuuvitha. Shono osha kwathele ndje ndi ilonge nziya elaka ndyoka. Omathimbo hamale, onda vulu okugandja oshipopiwa shomontaneho melaka lyoshiTok Pisin. Onda li nda kumwa sho nda pewa oshinakugwanithwa, ndi ninge omutonatelishikandjo gwomagongalo gelaka lyoshiTok Pisin miitopolwa oyindji iinene, nonando inapu pita omvula, konima sho nda thiki mo Papua New Guinea.

 Molwaashoka omagongalo ogi ili kokule, onda li handi longekidha iigongi oyindji yoshikandjo, nonda li handi yi momalweendo olundji. Petameko, onda li ndi uvite ndi li ongame awike, molwaashoka ondi li moshilongo oshipe moka aantu haya popi elaka lya yooloka ko kulyandje, nohaya ningi iinima momukalo gwa yooloka ko kugwandje. Kanda li handi vulu okutalela po omagongalo kolupadhi, omolwoondundu nomasilu. Onkene onda li handi yi ko nokandhila konyala oshiwike kehe. Omathimbo gamwe, ongame owala nda li omufaalelwa mokandhila hoka kali monkalo ombwiinayi. Onda li handi kala nda tila noonkondo sho ndi li molweendo ndoka, ngaashi owala nda li handi ende mombautu.

Aantu owala aashona ya li ye na oongodhi dhopeke, onkene onda li handi kwatathana nomagongalo okupitila moontumwafo. Olundji, onda li handi thiki ko manga oontumwafo inaadhi thika, nonda li handi pula aantu momudhingoloko, mpoka pwa gama Oonzapo. Oshikando kehe nda tsakanene naamwatate, oya li haya taamba ndje ko nolupandu, naashono osha li hashi dhimbulukitha ndje kutya omolwashike handi ningi oonkambadhala ndhoka. Onda mona nkene Jehova a ambidhidha ndje momikalo odhindji, naashono osha hedhitha ndje popepi lela naye.

Okugongala kwandje kwotango mokantuntu Bougainville, onda tsakanene po naaihokani yamwe. Oya li taya imemeha noya pula ndje taya ti: “Mbela oto tu dhimbulukwa ngaa?” Ote dhimbulukwa kutya sho opo nda thiki moPort Moresby, onde ya uvithila. Onda tameke ekonakonombiimbeli nayo, nokonima onda pula omumwatate gwomoshitopolwa a tsikile okukonakona nayo. Ngashingeyi ayehe yaali oya ninginithwa. Ndika olyo limwe lyomomalaleko nuuyamba ogendji ngoka Jehova a pa ndje, muule woomvula ndatu ndhoka nda kala moPapua New Guinea.

Mo 1978, manga inaandi za mo moCoron, onda li nda tsakanene nomumwameme omwaanawa, gwedhina Adel, e na ombepo yeiyambo. Okwa li omukokolindjila gwondjigilile nokwa li ta putudha oyana yaali Samuel naShirley. Pethimbo opo tuu mpoka, okwa li ta sile oshimpwiyu meme gwe ngoka a kulupa. MuMei 1981, onda shuna koFilipine, opo ndi ka hokane Adel. Konima sho twa hokana, atuhe otwa kokola ondjila notwa kala nokusila oshimpwiyu uukwanegumbo wetu.

Nonando otwa li tu na uukwanegumbo, mo1983, onda langekwa po ndi li omukokolindjila a ikalekelwa nonda tuminwa kokantuntu Linapacan, moshitopolwa shaPalawan. Uukwanegumbo wetu awuhe owa tembukile kehala ndika lya ikalela hoka kaa kwa li ku na Oonzapo. Yina yaAdel okwa hulitha konima yomumvo gumwe. Nonando ongawo, otwa tsikile okukala twa ipyakidhila muukalele naashono oshe tu kwathela tu idhidhimikile onkalo ndjoka. Otwa tameke omakonakonombiimbeli taga humu komeho moLinapacan, nomeni lyethimbo efupi aantu oya li ya pumbwa ehala lyokugongalela. Onkee otwa tungu po ehala tse yene. Konima yoomvula ndatu sho twa kala moLinapacan, otwa li twa nyanyukwa noonkondo okumona aantu 110, pEdhimbuluko. Oyendji yomuyo oya ningi ehumokomeho noya ka ninginithwa sho twa za ko.

Mo1986, onda tuminwa kokantuntu kedhina Culion, hoka kwa li haku ikalekelwa aanuuvu yoshilundu. Konima yaashono, Adel naye okwa langekwa po e li omukokolindjila a ikalekelwa. Petameko otwa li twa tila okuuvithila aantu mboka ye na oshilundu. Ihe aauvithi yomoshitopolwa oye tu shilipaleke kutya aantu mboka ya li taya ehama oya pangwa, nomukithi ngoka itagu vulu okutaandela nuupu. Yamwe yomaanuuvu  mboka, oya li haya gongala megumbo lyomumwameme gumwe. Nziya otwa li twa manguluka okuuvithila aantu mboka kombinga yetegameno lyetu lyopaMbiimbeli, ndyoka ta li vulu okukwathela aantu mboka ye uvite ya ethiwa kuKalunga nosho wo kuyalwe. Osha li shinyanyudha okumona aantu mboka ya kala taya ehama unene, taya ilongo kutya esiku limwe otaya ka kala ye na uukolele wa ihwapo. — Luk. 5:12, 13.

Aanona yetu oya li ya igilile ngiini okukala mokantuntu kedhina Culion? Ngame naAdel, otwa hiya aamwameme yaali aagundjuka yokokantuntu kedhina Coron, ya endathane naanona yetu. Samuel, Shirley nosho wo aamwameme yaali aagundjuka, oya kala taya tyapula okuuvithila aanona ooyakwawo oyendji, omanga ngame naAdel tatu konakona naavali yawo. Pompito yimwe, otwa iyadha tatu konakona nomaukwanegumbo ge li omulongo 11. Meni lyethimbo efupi, otwa tameke okuninga omakonakonombiimbeli ogendji taga humu komeho, notwa li twa vulu okutota po egongalo epe.

Petameko, ongame awike nda li omukuluntugongalo moshitopolwa shoka. Onkee oshitayimbelewa osha pula ndje ndi kwatele komeho okugongala kwomokati koshiwike kwaauvithi yahetatu, mokantuntu kedhina Culion nosho wo kwaauvithi omugoyi yokomukunda gwedhina Marily, mpoka pwa li hapu endwa oowili ndatu nombautu. Konima ngele twa zimbuka, tu li uukwanegumbo otwa li hatu ende moshitopolwa shu udha oondundu uule woowili odhindji tu ka ninge omakonakonombiimbeli momukunda gwedhina Halsey.

Lwahugunina, otwa mona nkene aantu oyendji ye ya moshili momukunda Marily nosho wo moHalsey, nomwa tungwa Iinyanga yUukwaniilwa miitopolwa mbyoka iyali. Ngaashi sha li sha ningwa koLinapacan, aamwatate naamboka ye na ohokwe, oya gandja iilongitho yokutunga noya li ya longo nuudhiginini miilonga yokutunga. Moshinyanga shUukwaniilwa shomuMarily, ohamu gwana aantu ye thike po 200 notashi vulu okutamununwa mo shi ninge oshinene. Onkee otwa vulu okuningila mo iigongi.

Mo 1993, sho aanona ya koko, ngame naAdel otwa tameke niilonga yuutonatelishikandjo moFilipine. Opo ihe mo 2000, onda yi kOsikola yOkudheula mUukalele, ndjoka ngashingeyi hayi ithanwa (Osikola yOkudheula Aauvithi) hoka nda dheulilwa okuninga omunongeki mosikola ndjoka. Onda li ndi uvite inaandi gwana okukala omunongeki, ihe Adel okwa li ha tsu ndje omukumo aluhe. Okwa li ha dhimbulukitha ndje kutya Jehova ota ka pa ndje oonkondo ndi  gwanithe po oshinakugwanithwa shika oshipe. (Fil. 4:13) Adel okwa li e shi kutya shoka oshoshili, molwaashoka okwa li ta gwanitha po oshinakugwanithwa she nopethimbo uukolele we tawu nyangwanyangwa.

Mo 2006, sho nda li omunongeki, Adel okwa kwatwa kuuvu hawu ithanwa Parkinson. Oshinima shoka oshe tu halutha. Sho nda li nda hala okweetha po oshinakugwanithwa shetu opo ndi mu sile oshimpwiyu, Adel okwa lombwele ndje a ti: “Kwathela ndje wu kongele ndje ndohotola ngoka ta vulu okukwathela ndje nuuvu mbuka, nondi shi kutya Jehova ote ke tu kwathela tu tsikile noshinakugwanithwa shetu.” Uule womimvo hamano dha ka landula, Adel okwa tsikile okulongela Jehova nopwaa na okutula omutse kepepe. Uuna kaa li we ta vulu okweenda, okwa li ha uvitha e li mokatemba. Sho kaa li we ha vulu okupopya lela, okwa li ha yamukula noshitya shimwe nenge iyali pokugongala. Aamwatate naamwameme oyendji oya li haya tumine Adel omatumwalaka taye mu pandula, sho a tula po oshiholelwa oshiwanawa sheidhidhimiko sigo oosho a si mo 2013. Otwa kala pamwe uule womimvo dhi vulithe po 30 naAdel, omukulukadhi gwandje omudhiginini, kuume kandje omuholike, onkee sho a hulitha onda li ndi uvite ishewe nda yemata unene nondi na uuwike.

Adel okwa li a hala ndi tsikile noshinakugwanithwa shandje, naashono osho nda ningi. Onda kala aluhe nda ipyakidhila, shono sha kwathele ndje kaandi kale ndi uvite uuwike unene. Okuza mo 2014 sigo 2017, onda tumwa ndi ka talele po omagongalo gelaka lyOshitagalog miilongo moka iilonga yetu ya li ya indikwa. Lwanima, onda ka talela po omagongalo gOshitagalog moTaiwan, moAmerika nosho wo moKanada. Mo 2019, onda li omunongeki gwootundi dhOshiingilisa dhOsikola yAauvithi yUukwaniilwa, moIndia nosho wo moThailand. Iinakugwanithwa ayihe mbika oya etela ndje enyanyu enene. Ohandi kala nda nyanyukwa noonkondo, uuna tandi gandja eitulomo thiluthilu kiilonga yaJehova.

Oshinakugwanithwa kehe oshipe, ohashi hedhitha ndje popepi naamwatate naamwameme, onkee ohashi kala aluhe oshidhigu oku ya thiga po. Pomathimbo ngono, onda ilongo okwiinekela muJehova thiluthilu. Onda kala aluhe handi mono nkene ta ambidhidha ndje, naashono osha kwathela ndje ndi taambe ko nomutima aguhe omalunduluko kehe monkalamwenyo yandje. Ngashingeyi, ondi li omukokolindjila a ikalekelwa moFilipine. Ondi uvite uugumbo megongalo lyetu, ndyoka hali ambidhidha ndje noli na ko nasha nangame. Onda nyanyukwa wo okumona nkene Samuel naShirley taya holele eitaalo lyayina. — 3 Joh. 4.

Onda pita momashongo ogendji monkalamwenyo yandje, mwa kwatelwa okumona omukulukadhi gwandje omuholike ta hepekwa kuuvu uunyanyalithi mboka wa fala sigo omeso. Onda li wo ndi na okwiigilila oonkalo odhindji oompe. Ihe onda mona kutya Jehova “ke li kokule nomuntu nando ogumwe.” (Iil. 17:27) Oshikaha shaJehova itashi “nyengwa” okwaambidhidha nokunkondopaleka aapiya ye, nokuli nonando oye li kiitopolwa ya ikalela. (Jes. 59:1) Jehova, emanya lyandje, okwa kala pamwe nangame mokukalamwenyo kwandje akuhe notandi mu pandula noonkondo. Kapu na esiku nda li ongame awike.