MBELA opu na esiku limwe wa li wa taalela uupyakadhi moka wu li ongoye awike? Otu li ‘momathimbo omadhigu’ okukaliwa mugo, ngoka taga vulu oku tu ningitha tu kale tu uvite twa teka omukumo notu li otse atuke. (2 Tim. 3:1) Nonando ongawo, katu na okuungaunga nomashongo gomonkalamwenyo otse atuke. Ombiimbeli otayi popi nkene sha simana okukala nookuume kashili ye tu “kwathe moluhepo.” — Omayel. 17:17.

Omuyapostoli Paulus okwa li a mono mo uuwanawa, mekwatathano ndyoka a li e na nookuume ke mboka ya li haya ende pamwe naye. (Kol. 4:7-11) Sho Paulus a li mondholongo muRoma, ookuume ke oya li ya longo iilonga mbyoka Paulus a li itaa vulu oku yi longa. Pashiholelwa, Epafroditus okwa li a gandja iinima mbyoka Paulus a pumbwa, okuza kaamwatate yomuFilippi. (Fil. 4:18) Tikikus okwa li ha fala oontumwafo komagongalo gi ili nogi ili. (Kol. 4:7) Kekwatho lyookuume ke, Paulus okwa li a gwanitha po uukalele we, sho a li mondholongo yomegumbo, naasho a li mondholongo a ikalekelwa. Ongiini to vulu okukala kuume kashili kunena?

Opu na yamwe mboka ya ulika esimano lyokukala ookuume kashili kunena. Natu taleni koshiholelwa shomumwameme gumwe, ngoka a li a ulike kutya oku li kuume kashili kaElisabet, omukokolindjila gwondjigilile, ha zi moSpania. Sho yina a monika okankela itaayi vulu okupangwa, omumwameme ngoka, okwa li a tumine Elisabet omatumwalaka ogendji getsomukumo kongodhi ye, ga kankamena kOmbiimbeli. Elisabet okwa ti: “Omatumwalaka ngoka oga nkondopaleke ndje ndi taalele esiku kehe nopwaa na okukala ndi uvite ndi li ongame awike.” — Omayel. 18:24.

Otatu vulu okukoleka uukuume wetu nooitaali ooyakwetu, moku ya ambidhidha miilonga yegongalo. Pashiholelwa, oto vulu okwiiyamba wu faalele omumwatate, nenge omumwameme omukokele kokugongala nenge muukalele. Ngele owe shi ningi, otashi vulika mú ka nyanyukilwe okutsaathana omukumo. (Rom. 1:12) Ihe Aakriste yamwe ihaya vulu okuza mo momagumbo gawo. Ongiini tatu vulu okukala kuume kashili kuyo?

Ooitaali ooyakwetu yamwe, oye na omaunkundi nenge ye li moonkalo ndhoka tadhi ya imbi ya kale pokugongala oshipala noshipala. Natu taleni koshiholelwa shaDavid, ngoka a li a monika okankela yomombinzi hayi ithanwa lymphoma. Uule woomwedhi dhi vulithe puhamano, okwa kala hayi koshipangelo a ka fikwe. Momukokomoko gwepango lye, David nomukadhi Lidia, oya kala haya gongala okupitila momakwatathano gopaintaneta.

 Ookuume megongalo oye ya kwathele ngiini? Konima yokugongala, aamwatate naamwameme yamwe mboka ye li pOshinyanga shUukwaniilwa, oya li haya ningi oonkambadhala ya popye naDavid nomukadhi, okupitila momakwatathano gopaintaneta. Shimwe ishewe, uuna David naLidia ya gandja omatyokosha, oya li haya tuminwa omatumwalaka getsomukumo kooitaali ooyakwawo. Oshizemo? David naLidia, oya li ye uvite ye holike kaamwatate naamwameme.

Mbela otatu vulu okuuvitha pamwe naamboka ihaaya vulu okuza mo momagumbo? Otatu vulu okuninga omalunduluko gontumba, tu ulike kutya inatu dhimbwa mboka ye na omangambeko ngoka. (Omayel. 3:27) Oto vulu okutula po ethimbo wu nyole oontumwafo nayo, nenge mú uvithe okupitila mongodhi. Mboka ihaaya vulu okuza mo momagumbo, otaya vulu okukala po pelongekidho lyiilonga yokuuvitha, okupitila momakwatathano gopaintaneta. David naLidia, oya li ya pandula elongekidho ndyoka. David okwa ti: “Okukala po pelongekidho lyiilonga yokuuvitha nokupulakena koonkundathana pamwe negalikano, osha li hashi tu tsu lela omukumo.” Ngele otashi vulika, omathimbo nomathimbo, oto vulu okuya nomukonakoni gwoye kegumbo lyomuuvithi ngoka ihaa vulu okuza mo megumbo, mú ka konakonene hoka.

Uuna tatu longo pamwe naamwatate naamwameme mboka ihaaya vulu okuza mo momagumbo, ohatu ya tseya nawa nosho wo omaukwatya gawo omawanawa, nohatu ningi ookuume kopothingo. Pashiholelwa, uuna to longo pamwe naauvithi mboka, nokundhindhilika nkene haya longitha nawa Ombiimbeli ya adhe omitima dhayalwe, shono ohashi ku hedhitha lela popepi nayo. Oto vulu okupanga uukuume nayalwe, uuna wa ambidhidha ooitaali ooyakweni miinima yopambepo. — 2 Kor. 6:13.

Paulus okwa li a hekelekwa ku kuume ke Titus. (2 Kor. 7:5-7) Ehokololo ndyoka otali tu longo kutya otwa pumbwa okuhekeleka yalwe, mokukala tu ya uvitile olukeno uuna ye li mompumbwe nosho wo okukala pamwe nayo nokuninga ngaashi tatu vulu tu ya ambidhidhe. — 1 Joh. 3:18.

Aamwatate naamwameme yomoRusia, oya tula po oshiholelwa oshiwanawa shokwambidhidhathana. Natu taleni koshiholelwa shaSergey nomukulukadhi gwe Tatyana. Konima sho egumbo lyawo lya hadhwa kaapolisi, oye ya fala kositaasi yopolisi yaka pulwapulwe. Tatyana okwa li a mangululwa tango nokwa shuna kegumbo. Sergey ota hokolola ta ti: “Sho Tatyana a thiki megumbo, omumwameme gumwe omulaadhi okwe ya paandjetu. Lwanima, ookuume ketu oyendji, oye ya ye tu kwathele.”

Sergey okwa gwedha ko a ti: “ Ondi hole oohapu dhOmayeletumbulo 17:17, ndhoka tadhi ti: “Kuume oku na ohole aluhe, nomumwayina okwa valwa, opo a kwathe moluhepo.” Oohapu ndhoka odha gwanithilwa ndje pethimbo tandi hepekwa, sho nda li itaandi vulu okutaalela omahepeko ngoka kungaye mwene. Jehova okwa pa ndje ookuume aalaadhi mboka ya kala nokukwathela ndje.”

Otwa pumbwa ekwatho lyookuume ketu, sho tu li momathimbo omadhigu. Otatu ke ya pumbwa shi vulithe nale, pethimbo lyuudhigu uunene. Onkene natu ninge oonkambadhala kehe, tu kale kuume kashili ngashingeyi. — 1 Pet. 4:7, 8.