1-2. (a) Uunake hatu shi mono oshidhigu okudhimina po gumwe? (b) Denise okwa li a dhimine po ngiini?

 MBELA oho mono oshidhigu okudhimina po yalwe? Oyendji yomutse ohatu shi mono oshidhigu, unene tuu ngele gumwe okwa popi, nenge a ningi sha shoka she tu uvitha nayi noonkondo. Ihe nonando ongawo, otatu vulu okuninga iinima mbyoka tayi vulu oku tu ningitha kaatu kale tu uvite nayi, nokudhimina po yalwe. Pashiholelwa, natu taleni koshimoniwa shomumwameme gwedhina Denise, a ngoka a li a dhimine po yalwe. Mo 2017, Denise noyaandjawo opo owala ya li ya talelele po Oombelewa Oonene dhOonzapo dhaJehova muuyuni awuhe, ndhoka opo dha patulukile. Sho ye li mondjila taya shuna kegumbo, omuhingi gwohauto yimwe okwa li a nyengwa okupangela ohauto ye, nokwa ipumu mohauto yawo. Denise okwa li a kambukile poshiponga. Sho a penduka, okwa li a lombwelwa kutya oyana oya ehamekwa unene nomusamane gwe, Brian, okwa sa. Uuna ta dhiladhila kombinga yoshiponga shono, Denise okwa ti: “Onda li ndi uvite nda dhengwa pomutima nonda ngwangwana.” Lwanima, okwa ka uva kutya omuhingi gwoshihauto shoka she ya pumu ka li a mona nando oshiponga. Onkee okwa li a galikana kuJehova a kale e na ombili.

² Omuhingi ngoka e ya puma okwa kwatwa po nokupangulwa, sho a dhipaga omusamane gwe kaashi shi oshiningilawina. Ngele okwa monika ondjo, okwa li e na okutulwa mondholongo. Ihe nonando ongawo, Denise okwa lombwelwa kutya uunzapo mboka a gandja kombinga yoshiponga, owa li tawu ka utha ngele omulumentu ngono ota yi mondholongo nenge hasho. Denise okwa ti: “Onda li ndi uvite nda fa gumwe a teta oshilalo shandje e ta tile po ondumba yomongwa, oshoka onda li ndi na okupopya kombinga yoshiponga shono iikando niikando.” Konima owala yiiwike ya landula ko, Denise okwa yi kompangu a ilongekidha oku ka popya nomulumentu  ngoka e ya ehameka unene. Mbela okwa li a ti shike? Denise okwa pula omupanguli a ulikile ohenda omulumentu ngoka. b Sho a mana okupopya, omupanguli okwa tameke okulila. Okwa ti: “Onda kala omupanguli oomvula 25, ihe inandi uva nando onale oshinima sha tya ngeyi mompangu. Inandi uva nando onale uukwanegumbo wa ningilwa uuwinayi, e tawu pula ndje ndi sile ohenda ngoka e wu ninga nayi. Inandi uva nale iitya yohole nedhiminopo.”

 3. Mbela oshike sha li sha inyengitha Denise a dhimine po?

³ Oshike sha li sha kwathele Denise, a dhimine po? Okwa li a tedhatedha kunkene Jehova ha dhimine po. (Mika 7:18) Uuna twa pandula sho Jehova he tu dhimine po, ohashi tu inyengitha tu dhimine po wo yalwe.

 4. Jehova okwa hala tu ninge shike? (Aaefeso 4:32)

⁴ Jehova okwa hala tu kale hatu dhimine po yalwe, ngaashi owala he tu dhimine po nopwaa na ofuto yasha. (Lesha Aaefeso 4:32.) Okwa tegelela tu kale twa i longekidha okudhimina po mboka ye tu uvitha nayi. (Eps. 86:5; Luk. 17:4) Moshitopolwa shika, otatu ka kundathana iinima itatu, mbyoka tayi ke tu kwathela tu kale hatu dhimine po shi vulithe nale.

INO IPWILILIKILA OMAIYUVO GOYE

 5. Sha ikolelela kOmayeletumbulo 12:18, ohatu kala tu uvite ngiini, uuna gumwe e tu uvitha nayi?

⁵ Ohashi tu uvitha nayi noonkondo, unene tuu ngele ngoka e tu ula, nenge e tu ninga nayi okuume ketu kopothingo, nenge nokuli omukwanezimo. (Eps. 55:12-14) Omathimbo gamwe, otashi vulika tu kale twa geya nenge twa uvithwa nayi, e tatu kala twa fa twa tsuwa. (Lesha Omayeletumbulo 12:18.) Otashi vulika tu kambadhale okwiipwililikila omaiyuvo getu, uuna twa uvithwa nayi. Ihe okuninga ngawo, ohatu kala twa fa twa tsuwa, e ta tu thigwa oshimbele moshilalo. Sha faathana, inatu tegelela tu tye po hwepo ngele otwa kambadhala okwiipwililikila omaiyuvo getu, uuna twa uvithwa nayi.

 6. Otashi vulika tu inyenge ngiini, uuna gumwe e tu uvitha nayi?

⁶ Uuna gumwe e tu ninga nayi, oshinima shotango hatu kala twa hala okuninga, okugeya. Ombiimbeli oya ti kutya otashi vulika tu kale tu na ondjahi. Ihe nonando ongawo, otayi tu londodha kaa tu ethe ondjahi yi tu pangele. (Eps. 4:4; Ef. 4:26) Omolwashike mbela? Omolwaashoka, omaiyuvo getu ohage tu ningitha tu katuke oonkatu dhi ili nodhi ili. Ondjahi ihayi e ta iizemo iiwanawa. (Jak. 1:20) Dhimbulukwa kutya ongoye mwene to ka tokola kutya oto ka kala wa geela ngoka e ku ninga nayi nenge hasho.

 7. Ohatu kala ishewe tu uvite ngiini, uuna gumwe e tu uvitha nayi?

⁷ Uuna twa ungaungiwa natse nayi, otashi vulika tu kale tu uvite nayi noonkondo. Pashiholelwa, omumwameme gwedhina Ann okwa ti: “Sho nda li okanona, tate okwa li a thigi po meme, e ta hokana po omukulukadhi ngoka a li ha sile ndje oshimpwiyu. Onda li ndi uvite nda ekelwahi. Sho ya mono aanona, onda li ndi uvite kaandi niwe nangame. Naasho tandi koko, onda li ndi uvite inaandi halika.” Omumwameme gwedhina Georgette, okwa hokolola nkene a li e uvite sho omusamane gwe a kala kee shi omudhiginini kuye, okwa ti: “Otwa kala ookuume okuza sho twa li aashona. Otwa li hatu kokola ondjila pamwe. Onda li nda dhengwa pomutima.” Omumwameme gwedhina Naomi okwa ti: “Inandi dhiladhila nando onale kutya omusamane gwandje one ku uvithe ndje nayi. Sho a lombwele ndje kutya okwa kala nokutala omathano giipala noku shi holeka ndje, onda li ndi uvite nda kotokelwa nonda kengelelwa.”

 8. (a) Mbela omatompelo geni tu na gokudhimina po yalwe? (b) Uuwanawa wuni hatu mono uuna twa dhimine po? (Tala oshimpungu “ Ongiini ngele gumwe okwe tu uvitha nayi noonkondo?”)

 ⁸ Itatu vulu okupangela shoka yalwe haya ningi noku tu ula, ihe otatu vulu okupangela nkene hatu inyenge kwaashoka. Olundji onkatu ya dhenga mbanda, okudhimina po. Omolwashike mbela? Omolwaashoka otu hole Jehova, nokwa hala tu kale hatu dhimine po. Ngele otwa kala twa geya pehala lyokudhimina po, otashi vulika tu katuke oonkatu dha nika uusama, nokwiiyehameka. (Omayel. 14:17, 29, 30) Tala koshiholelwa shomumwameme gwedhina Christine. Okwa ti: “Uuna nda geya nenge nda uvithwa nayi, ihandi imemeha lela. Ohandi li iikulya kaayi na uukolele. Ihandi kotha sha gwana, nohashi kala oshidhigu okupangela omaiyuvo gandje, shono hashi ningitha ndje ndi ungaunge nayi nomusamane gwandje nosho wo yalwe.”

 9. Omolwashike tu na okweetha po onkone?

⁹ Nonando omuntu ngoka e tu uvitha nayi ine tu pa ombili, otatu vulu okushonopeka uuwinayi mboka e tu ningila. Ngiini mbela? Georgette, ngoka a popiwa metetekelo, okwa ti: “Osha li sha pula ndje ethimbo, ihe onda li nda etha po onkone, nokanda li we nda geela omusamane gwandje gwonale. Oshizemo, onda li ndi uvite nda pepelelwa.” Uuna twa etha po onkone, ohatu gamene omitima dhetu kaadhi kale we dha lulilwa. Ohatu etha po okudhiladhila kombinga yoshinima shono, e tatu tyapula ishewe onkalamwenyo yetu. (Omayel. 11:17) Ihe oshike wu na okuninga, ngele natango ino ilongekidha okudhimina po?

OKUUNGAUNGA NOMAIYUVO GOYE

10. Omolwashike twa pumbwa okuyanda okukala twa geya? (Tala wo omathano.)

¹⁰ Ongiini to vulu okusinda ongeyo? Omukalo gumwe moka to vulu oku shi ninga, omo ku etha wu fululuke. Uuna omuntu ngoka a mona oshiponga oshinene a pangwa, ohashi pula ethimbo a aluke. Sha faathana, otwa pumbwa ethimbo tu fululuke, omanga inaatu dhimina po gumwe tashi zi komutima. — Omuuv. 3:3; 1 Pet. 1:22.

11. Ongiini egalikano tali vulu oku ku kwathela wu kale ho dhimine po?

¹¹ Galikana kuJehova e ku kwathele wu kale ho dhimine po. c Ann, ngoka a popiwa metetekelo,  okwa yelitha nkene egalikano lya li lye mu kwathele. Okwa ti: “Onda pula Jehova e tu dhimine po muukwanegumbo wetu, omolwiinima mbyoka twa popya nenge twa ninga inaayi uka. Onda nyolele tate ontumwafo nomukulukadhi gwe, ngoka e na ngashingeyi, e tandi ya lombwele kutya onde ya dhimina po.” Ann okwe shi zimine kutya okuninga ngawo kasha li oshipu kuye. Ihe okwa ti: “Ondi na einekelo kutya ngele onda holele okudhimina po kwaJehova, tate nomukulukadhi gwe otashi ke ya inyengitha ya ilonge oshindji kombinga yaJehova.”

12. Omolwashike tu na okukala twa inekela muJehova, pehala lyomaiyuvo getu? (Omayeletumbulo 3:5, 6)

¹² Inekela muJehova, ihe hamaiyuvo goye. (Lesha Omayeletumbulo 3:5, 6.) Jehova oku shi aluhe shoka sha dhenga mbanda kutse. (Jes. 55:8, 9) Ke na esiku e tu pule tu ninge sha shoka tashi vulu oku tu etela oshiponga. Onkee sho te tu ladhipike tu kale hatu dhimine po, otatu vulu okukala twa tompwa kutya okuninga ngawo otaku ke tu etela uuwanawa. (Eps. 40:4; Jes. 48:17, 18) Shimwe ishewe, ngele otwa kala twa inekela omaiyuvo getu, otashi vulika kaatu ka vule okudhimina po nandonando. (Omayel. 14:12; Jer. 17:9) Naomi, ngoka a popiwa metetekelo, okwa ti: “Petameko onda li ndi uvite kutya inandi pumbwa okudhimina po omusamane gwandje, sho a li ha tala omathano giipala. Onda li nda tila kutya pamwe ota ka uvitha ndje ishewe nayi, nenge a dhimbwe kutya okwa ehameka ndje shi thike peni. Onda li wo tandi ipopile kutya Jehova oku uvite ko omaiyuvo gandje. Ihe onda mono kutya nonando Jehova oku uvite ko omaiyuvo gandje, shoka itashi ti kutya ota tsu kumwe nago. Oku shi nkene ndi uvite, noku shi kutya ohashi pula ethimbo opo omuntu a fululuke, ihe okwa hala wo ndi kale handi dhimine po.” d

KOKEKA OMAIYUVO OMAWANAWA

13. Sha ikolelela kAaroma 12:18-21, oshike twa pumbwa okuninga?

¹³ Uuna tatu dhimine po omuntu ngoka e tu uvitha nayi noonkondo, otwa hala okuninga oshindji kaashi shi owala okutokola kaatu popye kombinga yoshinima shoka. Ngele omuntu ngoka e tu uvitha nayi Omukriste omukwetu, natu itulile po elalakano lyokupanga ombili naye. (Mat. 5:23, 24) Pehala lyokukala twe mu geela notwe mu kwatela onkone, natu mu sile ohenda noku mu dhimina  po. (Lesha Aaroma 12:18-21; 1 Pet. 3:9) Oshike tashi ke tu kwathela tu ninge ngawo?

14. Otu na okukambadhala tu ninge shike, nomolwashike?

¹⁴ Otu na okukambadhala tu tale ko omuntu ngoka e tu uvitha nayi, ngaashi Jehova e mu tala ko. Jehova oha tala komaukwatya getu omawanawa. (2 Ondjal. 16:9; Eps. 130:3) Ngele otwa kala tu na etaloko ewinayi li ko nasha nomuntu gwontumba, otatu ka mona owala omaukwatya ge omawinayi, ihe ngele otu na etaloko ewanawa, otatu ka mona omaukwatya ge omawanawa. Ngele ohatu tala komaukwatya gayalwe omawanawa, otashi ka kala oshipu kutse tu ya dhimine po. Pashiholelwa, omumwatate gwedhina Jarrod okwa ti: “Ohandi mono oshipu okudhimina po omumwatate, uuna nda yelekanitha epuko ndyoka a ninga niinima iiwanawa mbyoka ndi hole kombinga ye.”

15. Omolwashike hashi kwathele, shampa wa lombwele gumwe kutya owe mu dhimina po?

¹⁵ Oshinima shimwe sha simana shoka to vulu okuninga, okulombwela ngoka e ku uvitha nayi kutya owe mu dhimina po. Omolwashike mbela? Tala shoka Naomi, ngoka a tumbulwa metetekelo, a ti: “Omusamane gwandje okwa pula ndje a ti, ‘Owa dhimina ndje po ngaa?’ Sho nda makula  okana kwandje andola ndi tye, ‘Onde ku dhimina po,’ noshitya shimwe osho ngaa inaashi za mo. Onda mono kutya nani momutima gwandje inandi mu dhimina po natango. Mokweendela ko kwethimbo, onda li nda vulu oku mu lombwela kutya, ‘Onde ku dhimina po.’ Sho nde shi ningi, onda li nda kumwa sho omusamane gwandje, ngoka a li a kengeleka omahodhi, a li e uvite a pepelelwa nonda li wo ndi uvite ombili. Okuza mpono, onda kala nde mu inekela, notwa ningi ishewe ookuume kopothingo.”

16. Oshike wa ilongo kombinga yokudhimina po?

¹⁶ Jehova okwa hala tu kale hatu dhimine po. (Kol. 3:13) Ihe nonando ongawo, otashi vulika tu kakadhale okudhimina po yalwe. Ihe otatu vulu oku shi ninga ngele ihatu ipwililikile omaiyuvo getu, nokuninga oonkambadhala tu ethe po okugeya. Kungawo otatu ka kala twa nyanyukwa. — Tala oshimpungu “ Omikalo ndatu moka tatu vulu okudhimina po.”

GANDJA EITULOMO KUUWANAWA MBOKA HAWU ZI MOKUDHIMINA PO

17. Ongiini okudhimina po haku tu etele uuwanawa?

¹⁷ Otu na omatompelo ogendji gokukala hatu dhimine po. Natu taleni kugamwe gomugo. Lyotango, ohatu holele nokunyanyudha Tate yetu omunahenda, Jehova. (Luk. 6:36) Etiyali, ohatu ulike olupandu omolwedhiminopo ndyoka Jehova e tu pa. (Mat. 6:12) Etitatu, ohatu nyanyukilwa uukolele wu li nawa nokukaleka uukuume wetu wa kola.

18-19. Oshike tashi vulu okuningwa po, uuna twa dhimine po?

¹⁸ Uuna twa dhimine po yalwe, otashi vulika tu ka mone omalalekonuuyamba inaatu shi tegelelwa. Pashiholelwa, tala shoka sha li sha ningilwa Denise, ngoka a popiwa metetekelo. Omulumentu ngoka e ya etela oshiponga okwa li ta dhiladhila okwiidhipaga konima yompangu, ihe Denise ka li e shi tseya. Ihe nonando ongawo, sho Denise e mu dhimine po, osha li sha inyengitha omulumentu ngoka a tameke okukonakona Ombiimbeli nOonzapo dhaJehova.

¹⁹ Otashi vulika tu kale tu uvite kutya okudhimina po gulwe oshinima oshidhigu kutse, ihe otashi vulika wo shi tu etele uuwanawa. (Mat. 5:7) Onkee ano, atuheni natu ninge ngaashi tatu vulu tu holele okudhimina po kwaJehova.