MBELA owa ndhindhilika ngaa kutya aantu oyendji muuyuni oye hole okupewa oondondo dhontumba dha ikalekelwa, uuthemba wontumba nosho wo okuungaungiwa nayo momukalo gwa ikalekelwa? Nonando oya ningilwe iinima mbyono, natango ohaya kala ye uvite kutya oya gwana okuningilwa oshindji. Aantu mboka haya dhiladhila ngawo, oyi ihole yo yene noihaya pandula shoka ye na. Ombiimbeli oya ti kutya aantu osho taya ka kala ngawo momasiku gahugunina. — 2 Tim. 3:2.

Odhoshili kutya okwiihola mwene kashi shi oshinima oshipe. Adam naEva, oya li ya tokola okuhogolola shoka shi li mondjila naashoka sha puka, shoka sha etitha iilanduliko yi nikitha oluhodhi. Omathelemimvo ga ka pita, omukwaniilwa Ussia gwaJuda, okwa li ta dhiladhila kutya oku na uuthemba wokufikila Omuwa iitsinino motempeli, ihe okwa li a puka. (2 Ondjal. 26:18, 19) Sha faathana, Aafarisayi nAasadukayi, oya li ya itaala kutya Kalunga oku na okuungaunga nayo momukalo gwa ikalekelwa, molwaashoka yo oluvalo lwaAbraham. — Mat. 3:9.

Otwa dhingililwa kaantu mboka yi ihole yoyene, niikala yawo otayi vulu oku tu nwethamo. (Gal. 5:26) Otashi vulika tu tameke okudhiladhila kutya otwa gwana okupewa uuthembahenda wontumba, nenge tu ungaungiwe natse momukalo gontumba. Ongiini tatu vulu okuyanda okudhiladhila kwa tya ngawo? Otwa pumbwa okuuva ko nkene Jehova a tala ko oshinima shoka. Opu na omakotampango gaali gOmbiimbeli ngoka tage tu kwathele.

 Jehova oye mwene ha hogolola shoka twa gwana okupewa. Tala kiiholelwa yimwe po.

• Megumbo, omusamane okwa pumbwa okukala e uvite a simanekwa komukulukadhi gwe, nomukulukadhi okwa pumbwa okukala e uvite e holike komusamane gwe. (Ef. 5:33) Aaihokani oya pumbwa okuulukilathana ohole. (1 Kor. 7:3) Aavali oye na okukala ya tegelela oyana ya kale haya vulika kuyo, naanona oye na okuulukilwa ohole nokuyambidhidhwa kaavali yawo. — 2 Kor. 12:14; Ef. 6:2.

• Aakuluntugongalo oya pumbwa okusimanekwa, oshoka ohaya longo nuudhiginini. (1 Tes. 5:12) Nonando ongawo, kaye na uuthemba wokupangela aamwatate naamwameme. — 1 Pet. 5:2, 3.

• Kalunga okwa pa omapangelo uuthemba wokupula iifendela, nokupewa esimano kaalelwa yago. — Rom. 13:1, 6, 7.

Omolwohole ye, Jehova ohe tu pe shi vulithe pwaashoka twa gwana okupewa. Omolwokwaagwanenena kwetu, otwa gwana owala okusa. (Rom. 6:23) Ihe Jehova ohe tu pe omalalekonuuyamba ogendji, omolwohole ye yuudhiginini. (Eps. 103:10, 11) Elalekonuuyamba nenge uuthembahenda kehe tatu pewa kuye, ohatu wu pewa omolwuuwanawahenda we. — Rom. 12:6-8; Ef. 2:8.

Kotokela iikala yaantu yomuuyuni: Otatu vulu okutameka okudhiladhila kutya otwa gwana okuningilwa oshindji tu vule yalwe, inaatu shi nongela. Jesus okwa li e shi ulike nkene oshipu okutameka okudhiladhila ngawo, sho a longitha eyele lyaaniilonga mboka ya futwa ondenari. Aaniilonga yamwe oya tameke okulonga ongulonene noya longo esiku alihe moshanga shomutenya, omanga yamwe ya longo owala owili yimwe. Mboka yongundu yotango oya li taya dhiladhila kutya otaya futwa oshindji, omolwiilonga mbyoka ya longa. (Mat. 20:1-16) Okutula miilonga eyele ndika, Jesus okwa li a ulike kutya aalongwa ye oye na okukala ya gwanenwa kwaashoka Kalunga teya pe.

Kala ho pandula, pehala lyokuthiminika yalwe ye ku pe. (1 Tes. 5:18) Landula oshiholelwa shomuyapostoli Paulus, ngoka inaa pula aamwahe yomuKorinto iikwatha yopalutu, nonando okwa li e na uuthemba woku shi ninga. (1 Kor. 9:11-14) Otu  na okupandula elalekonuuyamba kehe tatu pewa nokuyanda okuthiminika yalwe ye tu pe.

Kala omwiifupipiki. Omuntu ngoka ihole ye mwene, oha tameke okudhiladhila kutya oku na okukala e na oshindji shi vulithe pwaashoka e na. Eifupipiko otali ke tu kwathela tu yande okudhiladhila kwa tya ngaaka.

Omuhunganeki Daniel okwa tula po oshiholelwa oshiwanawa sheifupipiko. Okwa li ta vulu okukala e uvite kutya oku na okupewa esimano lya ikalekelwa nomauthembahenda ngoka a pewa, molwaashoka okwa za megumbo lya simana, oku na ondjelo ombwanawa, oondunge nosho wo uunkulungu owundji. (Dan. 1:3, 4, 19, 20) Nonando ongawo, Daniel okwa kala omwiifupipiki, nuukwatya mbono owa li we mu ningitha a kale e holike kuJehova. — Dan. 2:30; 10:11, 12.

Natu yande iikala yokwiihola mwene noyokukala tu ishi uungame, mbyoka yi li apehe muuyuni kunena. Pehala lyaashono, natu tsikile okumona enyanyu ndyoka hali zi momalekonuuyamba agehe tatu pewa kuJehova omolwuuwanawahenda we.