1, 2. (a) Jehova okwa ti oshike tashi ka ningwa pethimbo lyetu? (b) Omapulo geni taga yamukulwa moshileshwa shika? (Tala kethano lyopetameko.)

JEHOVA okwa ti kutya pethimbo lyetu “aakwiilongo omulongo otaye ya kOmujuda gumwe notaa ti: ‘Otwa hala okukala pamwe nane, oshoka tse otu uvu kutya Omuwa oku li nane.’” (Sakaria 8:23) ‘Omujuda’ oku lile po mboka ya gwayekwa kuKalunga nombepo ondjapuki. Ohayi ithanwa wo ‘aantu yaKalunga’ nenge ‘Israel yaKalunga.’ (Aagalati 6:16, yelekanitha OB-1954.) “Aakwiilongo omulongo” oye lile po mboka ye na etegameno lyoku ka kala nomwenyo sigo aluhe kombanda yevi. Oye shi shi kutya Jehova okwa yambeka okangundu haka kaagwayekwa noyu uvite kutya okulongela Kalunga pamwe nako, uuthembahenda uunene.

² Jesus naye okwa popi ngaashi omuhunganeki Sakaria kutya oshigwana shaKalunga otashi ka kala sha hangana. Mboka ye na etegameno lyoku ka kala megulu okwe yi ithana “oshigunda oshishona,” omanga mboka ye na etegameno lyoku ka kala kombanda yevi, okwe yi ithana ‘oonzi dhilwe.’ Jesus okwa ti kutya  ayehe otaya ka kala “oshigunda shimwe” notaya landula “omusita gumwe.” (Lukas 12:32; Johannes 10:16) Ihe molwaashoka opu na oongundu mbali, otashi vulika omuntu a tye: (1) Mbela oonzi dhilwe odha pumbwa okutseya omadhina gaagwayekwa ayehe mboka ye li ko? (2) Aakriste aagwayekwa oye na okukala yi iyuvitile ngiini? (3) Ngele omuntu megongalo lyetu okwa tameke okulya oshikwiila nokunwa omaviinu pEdhimbuluko, ondi na oku mu ihumbatela ngiini? (4) Mbela ondi na okukala nda limbililwa ngele onda mono omwaalu gwaamboka haya li oshikwiila nohaya nu omaviinu pEdhimbuluko tagu londo? Oshileshwa shika otashi yamukula omapulo ngoka.

3. Omolwashike itaatu vulu okutseya lela kutya omwaalu 144 000 ogwa thikama po moolye?

³ Mbela oonzi dhilwe odhi na okukala dhi shi omadhina gaagwayekwa ayehe mboka ye li ko? Aawe. Omolwashike? Omolwaashoka kapu na omuntu e shi shi lela ngele otaya ka pewa ngaa ondjambi yawo. ^[1] (Tala enyolo lyopehulilo.) Nonando Kalunga okwe yi ithana megulu, otaya ka mona owala ondjambi yawo, ngele oya kala aadhiginini. Satana oshinima shika oku shi shi. Onkee oha longitha “aahunganeki aafundja,” a kambadhale ‘okupukitha’ aagwayekwa. (Mateus 24:24) Aagwayekwa itaya vulu okutseya lela kutya otaya ka mona ondjambi, sigo oosho Jehova te ke ya lombwela sha yela kutya yo aadhiginini. Shika Jehova ohe shi ningi omanga inaaya sa. Mboka ye li momwenyo ote ke shi ya lombwela manga ‘omahepeko ngoka omanene’ inaaga tameka. — Ehololo 2:10; 7:3, 14.

4. Ngele nani itatu vulu okutseya omadhina gaagwayekwa ayehe mboka ye li kombanda yevi, otatu vulu ngiini okutya “otwa hala okukala pamwe” nayo?

⁴ Ngele nani itatu vulu okutseya omadhina gaagwayekwa ayehe mboka ye li ko, oonzi dhilwe otadhi vulu ngiini okutya “otwa hala okukala pamwe nane”? Ombiimbeli otayi ti kutya “aakwiilongo omulongo otaye ya kOmujuda gumwe notaa ti: ‘Otwa hala okukala pamwe nane, oshoka tse otu uvu kutya Omuwa oku li nane.’” Nonando Ombiimbeli oya ti Omujuda gumwe, sho ya tsikile oya popi aantu oyendji, oshoka oya ti “nane.” Shika otashi ti Omujuda ngoka ta popiwa ke shi owala omuntu gumwe, ihe oku lile po ongundu ayihe yaagwayekwa. Oonzi dhilwe oshinima shika odhi shi shi, onkee ohadhi longele Jehova pamwe nongundu ndjoka. Inadhi pumbwa okutseya omadhina gaagwayekwa ayehe, opo ando dhi landule kehe gumwe gwomuyo. Jesus oye omuwiliki gwetu, nOmbiimbeli otayi ti kutya oye awike tu na okulandula. — Mateus 23:10.

5. Aagwayekwa oye na okudhiladhila muule kombinga yelondodho lini, nomolwashike?

⁵ Aagwayekwa oye na okudhiladhila muule kombinga yelondodho ndyoka lyi li 1 Aakorinto 11:27-29. (Lesha.) Ongiini tashi  vulika omugwayekwa a lye oshikwiila nokunwa omaviinu “pamukalo omwiinayi” pEdhimbuluko? Ngele ita kaleke po ekwatathano lye naJehova nokukala kee shi omudhiginini kuye, kungawo uuna ta li oshikwiila nokunwa omaviinu, ine mu simaneka. (Aahebeli 6:4-6; 10:26-29) Elondodho ndika otali dhimbulutha aagwayekwa kutya oye na okukala aadhiginini ngele oya hala ‘ondjambi yomwenyo gwomegulu, ngoka Kalunga e gu ya ithanena molwaJesus Kristus.’ — Aafilippi 3:13-16.

6. Aagwayekwa oye na okukala yi iyuvitile ngiini?

⁶ Omuyapostoli Paulus okwa lombwele aagwayekwa Aakriste a ti: “Ngame ngoka nda kwatwa molwaashoka tandi longele Omuwa, otandi mu kumagidha kutya okweenda kweni naku kale kwo opalathana neithano ndyoka Kalunga e mu ithana nalyo.” Ongiini ye na oku shi ninga? Paulus okwa yelitha a ti: “Kaleni aluhe aaifupipiki, aatalanteni naaidhidhimiki. Hololeni ohole yeni mokuyakulathana. Ningeni ashihe shoka tamu vulu okukoleka uukumwe weni wOmombepo Ondjapuki omolwombili ndjoka tayi mu mangele kumwe.” (Aaefeso 4:1-3) Ombepo ondjapuki yaJehova ohayi kwathele aapiya ye ya kale aaifupipiki, ihe haanuuntsa. (Aakolossa 3:12) Onkee, aagwayekwa ihaya dhiladhila kutya oye vule aantu yalwe. Oye shi shi kutya Jehova ihe ya pe ombepo oyindji yi vulithe ndjoka ha pe aapiya ye yalwe. Ihaya kala yu uvite kutya yo oyu uvite ko oshili yOmbiimbeli muule ye vule aantu yalwe. Natango, kaye na siku ya lombwele omuntu kutya ye omugwayekwa nenge kutya na tameke okulya oshikwiila nokunwa omaviinu pEdhimbuluko. Pehala lyaashono, ohaya kala aaifupipiki noye shi shi kutya oJehova awike ha ithana aantu ya ye megulu.

7, 8. Oshike shono Aakriste aagwayekwa inaaya tegelela ya ningilwe, nomolwashike?

⁷ Nonando aagwayekwa ohaya kala yu uvite kutya oshi li uuthembahenda okukala wu na eithano lyomegulu, inaya tegelela ya ungaungwe nayo momukalo gwi ikalekelwa. (Aaefeso 1:18, 19; lesha Aafilippi 2:2, 3.) Oye shi shi wo kutya sho Jehova e ya gwayeke, ine shi tseyithila yalwe. Onkee, omugwayekwa iha kala a kumwa ngele aantu yamwe inaye shi itaala kutya ye okwa gwayekwa. Oha dhimbulukwa kutya Ombiimbeli otayi tu lombwele kaatu itaale mbala omuntu ngoka ta ti kutya Kalunga okwe mu pe oshinakugwanithwa shi ikalekelwa. (Ehololo 2:2) Molwaashono omugwayekwa iha kala a tegelela aantu ye mu pe esimano lya pitilila, iha lombwele mboka ta tsakanene nayo oshikando shotango kutya ye omugwayekwa. Otashi vulika nokuli kee shi popye pomuntu. Iha kala wo ti inomene iinima iiwanawa mbyoka ta ka ninga megulu. — 1 Aakorinto 1:28, 29; lesha 1 Aakorinto 4:6-8.

⁸ Aakriste aagwayekwa ihaya kala yu uvite kutya oye na okukala owala naagwayekwa ooyakwawo, ongo iilyo yongundu yi ikalekelwa. Ihaya kambadhala ya tsakanene naagwayekwa ooyakwawo, opo ya popye kombinga yeithano lyawo nenge ya konakone Ombiimbeli ye li muungundu. (Aagalati 1:15-17) Ngele aagwayekwa oya ningi ngeyi, aantu megongalo itaya ka kala ya hangana. Kungawo otaya ka kala taya kondjitha ombepo ondjapuki, ndjoka hayi kwathele aapiya yaKalunga ya kale ye na ombili noya hangana. — Lesha Aaroma 16:17, 18.

9. Omolwashike wu na okukotokela omukalo moka ho ungaunga naamboka haya li oshikwiila nohaya nu omaviinu pEdhimbuluko? (Tala oshimpungu “ Ohole ihayi holoka nayi.”)

⁹ Otu na okukala ngiini naamwatate nosho wo naamwameme aagwayekwa? Jesus okwa lombwele aalongwa ye a ti: “One amuhe aamwayinathana.” Okwa gwedha ko: “Oshoka ngoka ti inenepeke, ota shonopekwa, naangoka ti ishonopeke, ota nenepekwa.” (Mateus 23:8-12) Ano osha puka okugandja esimano lya pitilila komuntu, kutya nduno omumwahe gwaKristus omugwayekwa. Uuna Ombiimbeli tayi popi kombinga yaakuluntugongalo, otayi tu tsu omukumo tu holele eitaalo lyawo, ihe inayi tu lombwela tu ninge omuntu omuwiliki gwetu. (Aahebeli 13:7) Ombiimbeli otayi popi kutya yamwe “oyi ilongela okusimanekwa.” Ohaya simanekwa, oshoka ‘oya monika aadhiginini miilonga yawo nohaa ihepeke mokuuvitha nomokulonga aantu,’ ihe hamolwaashoka ya gwayekwa. (1 Timoteus 5:17) Ngele otwa kala hatu pandula unene aagwayekwa nohatu ya simaneke sha pitilila, otatu ya sitha ohoni. Nenge nokuli tu ya ningithe ya kale ye na uuntsa. (Aaroma 12:3) Kapu na nando ogumwe gwomutse a hala okufala omumwahe gwaKristus meyono lya kwata miiti li thike mpo. — Lukas 17:2.

10. Ongiini to vulu okuulika kutya owa simaneka Aakriste aagwayekwa?

¹⁰ Ongiini tatu vulu okuulika kutya otwa simaneka aagwayekwa? Katu na oku ya pula kutya oya ningi aagwayekwa momukalo guni? Shoka oshinima shopaumwene nokatu na uuthemba woku shi tseya. (1 Aatessalonika 4:11; 2 Aatessalonika 3:11) Oshikwawo, katu na okwiipula kutya aasamane nenge aakulukadhi yawo, aavali nenge iilyo yuukwanegumbo wawo nayo aagwayekwa. Omuntu iha thigulula etegameno lyokuya megulu kuukwanegumbo we. (1 Aatessalonika 2:12) Natu kambadhale wo kaatu pule omapulo tage ehameke aantu ooyakwetu. Pashiholelwa, katu na okupula omukulukadhi gwomumwatate omugwayekwa kutya ye oku uvite ngiini sho ta ka kala kombanda yevi kee li nomusamane gwe. Otu shi shi kutya muuyuni uupe, Jehova ota ka ‘kutitha iinamwenyo ayihe kesilohenda lye.’ — Episalomi 145:16.

11. Ngele otwa henuka okukala hatu “fundjaleke aantu,” otashi tu gamene ngiini?

¹¹ Ngele ihatu tala ko aagwayekwa ya simana ye vule aantu yalwe, otashi tu gamene. Ngiini mbela? Ombiimbeli otayi holola kutya otashi vulika megongalo mu kale ‘aalumentu yamwe mboka tayi iningi ya fa aakriste,’ notashi vulika nokuli ya tye yo aagwayekwa. (Aagalati 2:4, 5; 1 Johannes 2:19) Ishewe, aagwayekwa yamwe otashi vulika kaaya kale aadhiginini sigo opehulilo. (Mateus 25:10-12; 2 Petrus 2:20, 21) Onkee ngele otwa henuka okukala hatu “fundjaleke aantu,” itatu ka kala nando twe ya lamba twa hala oku ya opalela, kutya nduno aagwayekwa nenge oomboka ya tseyika nawa nenge mboka ya kala taya longele Jehova oomvula odhindji. Nongele oya kala kaaye shi aadhiginini nenge ya thigi po egongalo, eitaalo lyetu itali ka teka nenge tu ethe po okulongela Jehova. — Judas 16.

12, 13. Omolwashike kaatu na okukala tatu ipula unene nomwaalu gwaamboka haya li oshikwiila nohaya nu omaviinu pEdhimbuluko?

¹² Uule womimvo odhindji, omwaalu gwaamboka haya li oshikwiila nohaya nu  omaviinu pEdhimbuluko ogwa kala tagu shonopala. Ihe ngashingeyi omumvo kehe, otagu indjipala. Mbela shika oshi na oku tu limbilika? Aawe. Natu tale kutya omolwashike.

¹³ “Omuwa oku ya shi mboka ye.” (2 Timoteus 2:19) Jehova oye awike e shi mboka a gwayeka. Aamwatate mboka haya yalula mboka taya li oshikwiila nokunwa omaviinu pEdhimbuluko, kaye ya shi. Omwaalu ogwa kwatela mo mboka taya dhiladhila kutya oya gwayekwa, ihe nani inaya gwayekwa. Pashiholelwa, yamwe mboka ya li haya li oshikwiila nohaya nu omaviinu, oye shi etha po. Yalwe otashi vulika ye na uuvu wopamadhiladhilo mboka we ya itaalitha kutya otaya ka pangela pamwe naKristus megulu. Osha yela kutya katu shi shi kutya kombanda yevi okwa thigala aagwayekwa ye li yangapi.

14. Ombiimbeli otayi ti aagwayekwa yangapi taya ka adhika kombanda yevi sho uudhigu uunene tawu ka tameka?

¹⁴ Sho Jesus te ke ya kombanda yevi otaku ka adhika aagwayekwa mboka ta ka fala megulu. Ombiimbeli otayi popi kutya Jesus ‘ota ka tuma ko aayengeli ye, ya ka gongele aahogololwa ye koombinga ne dhevi, okuza kombinga yimwe sigo okonkwawo.’ (Mateus 24:31) Ombiimbeli otayi ti wo kutya pomasiku gahugunina, kombanda yevi otaku ka adhika okangundu kaagwayekwa. (Ehololo 12:17) Ombiimbeli inayi popya kutya yangapi taya ka adhika ko sho uudhigu uunene tawu tameke.

15, 16. Oshike twa pumbwa okuuva ko kombinga yomwaalu 144 000 mboka Jehova ta hogolola?

¹⁵ Jehova oye ha tokola kutya uunake e na okuhogolola aagwayekwa. (Aaroma 8:28-30) Jehova okwa tameke okuhogolola aagwayekwa  konima yeyumuko lyaJesus. Otashi monika sha fa shi li ngeyi kutya methelemumvo lyotango nenge pethimbo lyaayapostoli, Aakriste ayehe yashili oya li ya gwayekwa. Konima yoomvula omathele okuza mpono, oyendji yomwaamboka ya popya kutya yo Aakriste, kaya li shili aalanduli yaKristus. Nonando ongawo, momimvo ndhono Jehova okwa gwayeke Aakriste yashili noya li aashona yowala. Jesus okwa ti kutya oya fa iilya mbyoka ya mena mumwe nomawu. (Mateus 13:24-30) Pethimbo lyomasiku gahugunina, Jehova onkee ngaa ta tsikile okuhogolola aantu ya kale iilyo yo 144 000. ^[2] (Tala enyolo lyopehulilo.) Ngele Kalunga okwa tokola okuhogolola aantu yamwe manga ehulilo inaali ya, osha yela kutya itatu limbililwa tu tye shono ta ningi kashi li mondjila. (Jesaja 45:9; Daniel 4:35; lesha Aaroma 9:11, 16.) ^[3] (Tala enyolo lyopehulilo.) Natu kotoke kaatu ihumbate ngaashi aaniilonga mboka ya nyenyeta kombinga yankene omugandji gwiilonga u ungaunga naamboka ya longo owili yahugunina. — Lesha Mateus 20:8-15.

¹⁶ Haayehe mboka ye na etegameno lyoku ka kala megulu ye li iilyo ‘yomumati omudhiginini nomunandunge.’ (Mateus 24:45-47) Ngaashi owala pethimbo lyaayapostoli, kunena Jehova naJesus otaya longitha aantu aashona ya paluthe nenge ya longe aantu oyendji ngaashi tashi vulika. Aakriste aagwayekwa owala aashona, methelemumvo lyotango, ya longithilwe okunyola Etestamendi Epe. Nokunena omwaalu owala omushona gwAakriste aagwayekwa ye na oshinakugwanithwa shokugandja “iikulya pethimbo lyo opala” koshigwana shaKalunga.

17. Moshileshwa shika otatu ilongo mo shike?

¹⁷ Otatu ilongo mo shike moshileshwa shika? Jehova okwa tokola a pe oyendji yomaapiya ye omwenyo gwaaluhe kombanda yevi nosho wo omwenyo megulu kumboka taya ka pangela pamwe naJesus. Jehova ota yambeke aapiya ye ayehe, kutya nduno “Omujuda” nenge “aakwiilongo omulongo,” nokwa tegelela ya kale aavuliki naadhiginini koompango dhe. Ayehe oye na okukala aaifupipiki noye na oku mu longela ya hangana. Ayehe oya pumbwa okukaleka po ombili megongalo. Sho tatu hedha popepi nehulilo, atuheni natu tsikile okulongela Jehova nokulandula Kristus tu li moshigunda shimwe.