1. Nonando Jehova oye omukombandambanda, ota hiya aantu ya ninge shike?

JEHOVA oye Omukombandambanda. Okwa shiti iinima ayihe noku na uunongo noonkondo dhaa shi kuyelekwa. Sho Job a kwathelwa u uve ko oshinima shika, okwa ti: “Omuwa, onda tseya kutya ayihe oto yi vulu; kaku na shoka tashi ku nyenge.” (Job 42:2) Jehova ota vulu okuninga kehe shimwe a hala pwaa na ekwatho lyomuntu. Ihe oha ulike kutya oku tu hole sho te tu hiya tu longe pamwe naye, opo tu gwanithe po elalakano lye.

2. Oshilonga shini sha simana Jehova a pe Jesus?

² Tango, Jehova okwa shiti Omwana, Jesus, manga inaa shita aantu niinima ayihe. Opo nduno okwa longo pamwe nOmwana sho ta shiti iinima yilwe ayihe. (Johannes 1:1-3, 18) Omuyapostoli Paulus okwa nyola ngeyi kombinga yaJesus: “Kalunga okwa shititha Kristus iinima ayihe yomegulu noyokombanda yevi, iinima mbyoka yi wetike naambyoka yaa wetike, ongele oonkondo  dhomombepo nenge aaleli nenge omapangelo. Kalunga okwe mu shititha ewangandjo alihe.” (Aakolossa 1:15-17) Ano Jehova ina pa owala Omwana oshilonga sha simana, ihe okwe shi lombwele wo aantu yalwe. Esimano oli thike peni!

3. Jehova okwa pe Adam oshinakugwanithwa shokuninga shike, nomolwashike?

³ Jehova okwa hiya wo aantu ya longe pamwe naye. Pashiholelwa, okwa pe Adam oshinakugwanithwa shokuluka iinamwenyo omadhina. (Genesis 2:19, 20) Dhiladhila kenyanyu ndyoka Adam a li u uvite sho te shi ningi! Okwa konakona nawa nkene iinamwenyo tayi monika nosho wo omainyengo gayo, opo ihe okwa luku oshinamwenyo kehe. Iinamwenyo ayihe oJehova e yi shita nokwa li ta vulu oku yi luka omadhina ye mwene. Nonando ongawo, oku ulukile Adam nkene e mu hole, sho e mu pe oshinakugwanithwa shokuluka iinamwenyo omadhina. Ishewe, Kalunga okwa pe Adam oshinakugwanithwa shokuninga evi alihe Oparadisa. (Genesis 1:27, 28) Hugunina, Adam okwa tokola kaa longele we kumwe naKalunga. Oshizemo? Okwi iyetele emono lyiihuna, pamwe noluvalo lwe. — Genesis 3:17-19, 23.

4. Ongiini aantu yalwe ya longo pamwe naKalunga ya gwanithe po ehalo lye?

⁴ Lwanima, Kalunga okwa hiya aantu yamwe ya longe pamwe naye. Pashiholelwa, Noa okwa tungu onguluwato a kale mo pamwe naanegumbo lye noya hupu pethimbo lyEyelu. Moses okwa mangulula oshigwana shaIsraeli muEgipiti. Josua okwa fala oshigwana shaIsraeli mEvi lyEuvaneko. Salomo okwa tungu otempeli muJerusalem. Maria okwa ningi yina yaJesus. Aantu ayehe mbaka aadhiginini nosho wo yamwe oyendji oya longo pamwe naJehova ya gwanithe po ehalo lye.

5. Iilonga yini tatu vulu okulonga, nomolwashike Jehova a hala tu longe iilonga mbyoka? (Tala kethano lyopetameko.)

⁵ Kunena, Jehova ote tu hiya tu ninge kehe shoka tatu vulu, opo tu ambidhidhe Uukwaniilwa we. Ope na omikalo odhindji moka tatu vulu oku mu longela. Nonando haatuhe tatu vulu oku mu longela momukalo gwa faathana, atuhe otatu vulu okuuvitha onkundana ombwanawa yUukwaniilwa. Jehova okwa li ta vulu okulonga oshilonga shoka ye mwene. Okwa li ta vulu okupopya naantu mboka ye li kombanda yevi meukililo okuza megulu. Jesus okwa ti kutya Jehova ota vulu nokuli okuninga omamanya ga lombwele aantu kombinga yOmukwaniilwa gwUukwaniilwa we. (Lukas 19:37-40) Nonando ongawo, Jehova okwe tu hiya tu ninge “aalongi pamwe” naye. (1 Aakorinto 3:9) Omuyapostoli Paulus okwa nyola a ti: “Tse sho tu li po aalongi pamwe naKalunga, otatu mu kumagidha, mwaa hepithe esilohenda lyaKalunga ndyoka mwe li taamba.” (2 Aakorinto 6:1) Oshi li uuthembahenda uunene okulonga pamwe naKalunga. Natu ka taleni komatompelo gamwepo kutya omolwashike shika tashi tu etele enyanyu enene.

6. Omwana gwaKalunga omutango okwa hokolola ngiini nkene a li u uvite sho ta longo naHe?

⁶ Okulonga pamwe naKalunga okwa kala aluhe haku nyanyudha aapiya ye. Manga Omwana gwaKalunga omutango inee ya kombanda yevi, okwa ti: “Omuwa okwa shiti ndje omutango gwiilonga ye . . . oko nda li nale nda fa engomba nda tegama naye, onde mu nyanyudha esiku nesiku, naaluhe nda dhanene koshipala she.” (Omayeletumbulo 8:22, 30) Sho Jesus a li ta longo naHe,  okwa li ha kala a nyanyukwa, oshoka okwa li ha gwanitha po iilonga oyindji nokwa li e shi shi kutya Jehova oku mu hole. Ongiini kombinga yetu?

7. Omolwashike okuuvitha haku tu etele enyanyu?

⁷ Jesus okwa ti kutya ohatu kala twa nyanyukwa uuna tatu gandja nenge tatu pewa sha. (Iilonga 20:35) Oshe tu etela enyanyu sho twa tseya oshili. Ihe omolwashike hatu kala wo twa nyanyukwa sho tatu yi tseyithile yalwe? Omolwaasho ohatu ya mono ya nyanyukwa uuna yu uvu ko shoka shi li mOmbiimbeli naasho taya tameke okukala ye na ekwatathano naKalunga. Ohatu kala twa nyanyukwa oku ya mona sho taya lundulula oonkalamwenyo dhawo naashoka shi li momadhiladhilo gawo. Okuuvitha okwo oshinima sha simana kaaku na we notashi nyanyudha. Otaku gandja ompito kwaayehe mboka taya panga uukuume naKalunga, ya mone omwenyo gwaaluhe. — 2 Aakorinto 5:20.

8. Aantu yamwe otaya ti ngiini kombinga yenyanyu ndyoka ye na sho taya longo pamwe naJehova?

⁸ Uuna tatu kwathele aantu ya tseye Kalunga, otu shi shi kutya otatu mu nyanyudha. Okwa lenga wo oonkambadhala ndhoka tatu ningi, opo tu mu longele. Shika natse ohashi tu nyanyudha. (Lesha 1 Aakorinto 15:58.) Marco, ngoka ha kala moItalia, ota ti: “Ohandi kala nda shambukwa sho ndi shi shi kutya otandi longele Jehova nda mana mo, pehala lyokulongela omuntu ngoka ta ka dhimbwa nziya shoka nde mu longela.” Franco, ngoka naye ha longele moItalia, ota ti: “Jehova ote tu dhimbulutha esiku kehe, okupitila mOohapu dhe nomiinima yilwe yopambepo, kutya oku tu hole nonokutya ashihe shoka tatu mu longele osha simana, nonando otu kale tu wete oonkambadhala dhetu itaadhi ti sha. Shika osho hashi etele ndje enyanyu neityo monkalamwenyo yandje, sho tandi longo pamwe naKalunga.”

9. Jehova naJesus oya kala nekwatathano lya tya ngiini, nomolwashike?

⁹ Uuna tatu longo pamwe naamboka tu hole, ohatu hedha popepi nayo. Ohatu tseya  nawa uuntu wawo nuukwatya wawo. Ohatu tseya wo omalalakano gawo nankene taya kambadhala oku ga gwanitha po. Jesus okwa longo naJehova, tashi vulika uule woomvula omabiliyona. Shika osha koleke ohole yawo. Pokati kawo ito tile po omeya. Jesus okwa yelitha nkene ekwatathano lyawo lya kola, sho a ti: “Tse naTate gumwe.” (Johannes 10:30) Oya kala taya longele kumwe shili nokutsa kumwe.

10. Omolwashike iilonga yokuuvitha hayi tu hedhitha popepyeelela naKalunga nonayalwe?

¹⁰ Omolwashike Jesus a pula Jehova a gamene aalongwa ye? Okwa galikana a ti: “Opo ya ninge omuntu gumwe naanaa, ngashi ngame nangoye tu li gumwe.” (Johannes 17:11) Uuna tatu vulika komithikampango dhaKalunga nokukutha wo ombinga miilonga yokuuvitha, otatu ka uva ko nawa uukwatya we wa dhenga mbanda. Ohatu mono kutya omolwashike shi li pandunge oku mu inekela nokulandula ewiliko lye. Uuna tatu hedha popepi naKalunga, naye oha hedha kutse. (Lesha Jakob 4:8.) Ohatu hedha wo popepi naamwatate nosho wo naamwameme, molwaashono ohatu adhika komaupyakadhi ga faathana nosho wo kenyanyu lya faathana, nonokutya otu na elalakano limwe. Ohatu longele kumwe, hatu nyanyukilwa pamwe nohatu idhidhimikilathana. Octavia, gwokoBritania, ota ti: “Okulonga pamwe naJehova okwa ningitha ndje ndi hedhe popepi nayalwe.” Okwa yelitha kutya omolwashike, sho a ti ookuume ke ngashingeyi oye na “elalakano limwe notaya wilikwa kuJehova.” Osha yela kutya natse osho tatu lalakanene. Uuna twa tala oonkambadhala ndhoka aamwatate taya ningi ya nyanyudhe Jehova, ohashi tu hedhitha popepi nayo.

11. Omolwashike tatu ka hedha popepyeelela naJehova nosho wo naamwatate muuyuni uupe?

¹¹ Ohole yetu yokuhola Kalunga nosho wo aamwatate oya kola ngashingeyi, ihe otayi ka kola shi vulithe mpoka muuyuni uupe. Dhiladhila kiilonga ayihe yi nyanyudha mbyoka tatu ka longa monakuyiwa! Otatu ka hambelela mboka taya yumudhwa, e tatu ya longo kombinga yaJehova. Otatu ka kala wo twi ipyakidhila niilonga, opo tu ninge evi oparadisa. Otashi ka kala enyanyu enene okulongela kumwe sho tu uka megwaneneno tu li kohi yepangelo lyaKristus. Omuntu kehe ota ka hedha popepyeelela nomuntu omukwawo nosho wo naJehova, ngoka ta ka ‘kutitha iinamwenyo ayihe kesilohenda lye.’ — Episalomi 145:16.

12. Iilonga yokuuvitha ohayi tu gamene ngiini?

¹² Otwa pumbwa okugamena ekwatathano lyetu naJehova. Otu li muuyuni waSatana noinatu gwanenena. Onkee oshipu kutse tu tameke okudhiladhila nokukatuka ngaashi aantu yomuuyuni. Shika otatu vulu oku shi yeleka nomuntu ta mbwindi momulonga, ta falwafalwa kekunguluko lyomeya kombinga hoka inaa hala. Onkee otu na okulongitha  oonkondo dhetu tu mbwinde tu uka hoka twa hala. Sha faathana, otwa pumbwa okulonga nuudhiginini, opo twaa nwethwe mo kuuyuni waSatana. Mbela okuuvitha ohaku tu gamene ngiini? Uuna tatu popi kombinga yaJehova nosho wo kombinga yOmbiimbeli, otatu gandja eitulomo lyetu kiinima iiwanawa noya simana, ihe hakiinima mbyoka tayi ka nkundipaleka eitaalo lyetu. (Aafilippi 4:8) Okuuvitha ohaku koleke eitaalo lyetu, molwaashono ohaku tu dhimbulutha omauvaneko gaKalunga nomithikampango dhe dhopahole. Ohaku tu kwathele wo tu kale nomaukwatya ngoka twa pumbwa, opo tu igamene kuSatana nuuyuni we. — Lesha Aaefeso 6:14-17.

13. Onzapo yimwe yokoAustralia oyu uvitile ngiini okuuvitha?

¹³ Ngele otwa kala twi ipyakidhila nokuuvitha, okukonakona Ombiimbeli nokukwathela yalwe megongalo, otatu ka kala twa gamenwa, oshoka katu na ethimbo lyokwiipula unene kombinga yomaupyakadhi getu. Joel, gwokuAustralia, ota ti: “Iilonga yokuuvitha oya kwathela ndje kaandi dhimbwe kutya otu li pethimbo lini. Ohayi dhimbulutha ndje omashongo ngoka taga adha aantu nosho wo kuuwanawa mboka nda mona, sho nda tula miilonga omakotampango gOmbiimbeli monkalamwenyo yandje. Iilonga yokuuvitha oya kwathela ndje wo ndi kambadhale okukala omwiifupipiki; oya pa ndje ompito ndi kale ndi inekela Jehova nosho wo aamwatate naamwameme.”

14. Omolwashike okudhiginina kwetu miilonga yokuuvitha taku ulike kutya ombepo yaKalunga oyi li pamwe natse?

¹⁴ Okuuvitha ohaku tu pe wo einekelo kutya ombepo yaKalunga oyi li pamwe natse. Natu shi thaneke ngeyi: Natu tye nee ando owu na oshinakugwanithwa shokutopolela aantu oomboloto momudhingoloko gweni. Moku shi longa ito futwa sha, naayihe mbyoka wa pumbwa ongoye mwene wu na oku yi landa. Ishewe, aantu oyendji inaya hala oomboloto dhoye nayalwe otashi vulika ye ku huge, sho ho ya etele oomboloto ndhoka. Mbela oto ka tsikila ngaa niilonga mbyono? Otashi ke ku teya omukumo nziya notashi vulika wu yi ethe. Mekondjithathano naashono, oyendji yomutse otatu tsikile niilonga yokuuvitha oomvula noomvula, mbyoka hayi tu pula ethimbo niimaliwa nonando yamwe ohaye tu yolo nenge ye tu geele. Shika otashi ulike kutya ombepo yaKalunga oyo hayi tu kwathele.

15. Okuuvitha onkundana ombwanawa okwa kwatathana ngiini nelalakano lyaKalunga li nasha naantu?

¹⁵ Iilonga yokuuvitha oya kwatathana ngiini nelalakano lyaJehova li nasha naantu? Jehova okwa li a hala aantu ya kale nomwenyo sigo aluhe. Nonando Adam okwa yono, elalakano ndyoka inali lunduluka. (Jesaja 55:11) Kalunga okwa ningi po elongekidho, opo tu mangululwe mo muulunde nomeso. Ngiini mbela? Jesus okwa li e ya kombanda yevi, e  ta yamba po omwenyo gwe. Ihe opo tu mone mo uuwanawa meyambo ndyoka, otwa pumbwa okuvulika kuKalunga. Onkee, Jesus okwa longo aantu shoka Jehova a hala ya ninge nokwa lombwele aalongwa ye nayo ye shi ninge. Kunena, uuna tatu uvitha nokukwathela yalwe ya ninge ookuume kaKalunga, kungawo otatu longo pamwe naKalunga metsokumwe nelongekidho lye, opo a hupithe aantu muulunde nomeso.

16. Okuuvitha kwetu okwa kwatathana ngiini niipango iinene yaKalunga?

¹⁶ Uuna tatu kwathele yalwe ya mone ondjila ndjoka tayi fala komwenyo gwaaluhe, kungawo otatu ulike kutya otu ya hole notu hole Jehova, “ngoka a hala, aantu ayehe ya hupithwe noya tseye oshili.” (1 Timoteus 2:4) Sho Omufarisayi a pula Jesus kutya oshipango shaKalunga oshinene oshini, Jesus okwa ti kuye: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango. Oshitiyali shi thike pusho osho shika: ‘Hola mukweni ngaashi ngoye wi ihole mwene.’” (Mateus 22:37-39) Ngele ohatu uvitha onkundana ombwanawa, otashi ti kutya otatu vulika kiipango mbika. — Lesha Iilonga 10:42.

17. Owu uvitile ngiini uuthembahenda wokuuvitha onkundana ombwanawa?

¹⁷ Jehova okwe tu pa oshilonga shoka tashi tu etele enyanyu, tashi tu hedhitha popepyeelela naye nonaamwatate notashi gamene wo ekwatathano lyetu naye. Otashi tu pe wo ompito tu ulike ohole yetu yokuhola Kalunga nosho wo yalwe. Uuthembahenda owu thike peni! Jehova oku na aapiya ye oyendji noonkondo kongonga yevi alihe nakehe gumwe gwomuyo oku li monkalo yi ili. Ihe kutya nduno tse aanona nenge aakuluntu, aayamba nenge oohepele, aanankondo nenge aankundi, natu ninge ngaashi tatu vulu tu tseyithile yalwe eitaalo lyetu. Otu uvite ngaashi Chantel, gwokoFulaanisa, ngoka a ti: “Omunankondonkondo meshito alihe, Omushiti gwiinima ayihe, Kalunga omunyanyukwi, okwa ti kungame: ‘Inda! Ka popye! Ka popye peha lyandje, tashi zi komutima. Onde ku pa oonkondo dhandje, Oohapu dhandje, Ombiimbeli, ekwatho lyopombandambanda, aantu ooyakweni, edheulo tali tsikile nosho wo omalombwelo gothaathaa pethimbo tali opalele.’ Katu na tuu uuthembahenda uunene wokuninga shoka Jehova te tu pula tu ninge nokulongela kumwe naye!”