1-2. (a) Jehova oha ndhindhilike shike, uuna a mono aantu omamiliyona ye ya kUulalelo wOmuwa? (Tala ethano lyokombanda.) (b) Oshike tatu ka kundathana moshitopolwa shino?

DHILADHILA owala kutya Jehova oha mono shike, uuna aantu omamiliyona muuyuni awuhe ya gongala pUulalelo wOmuwa. Iha tala owala kuuwindji waantu mboka haya kala po, ihe oha ndhindhilike omuntu kehe ngoka e li po. Pashiholelwa, oha mono mboka haya kala po omumvo kehe. Yamwe yomuyo oomboka haye ya, nonando otaya hepekwa noonkondo. Yamwe ihaye ya aluhe kokugongala, ihe Edhimbuluko ihaye li faula, oshoka oye li tala ko lya simanenena. Jehova oha mono wo mboka haye ya pEdhimbuluko oshikando shawo shotango, tashi vulika molwaashoka ya hala okumona kutya ohapu ningwa shike.

² Jehova oha kala a nyanyukwa shili, sho ha mono aantu oyendji ye ya kEdhimbuluko. (Luk. 22:19) Nonando ongawo, iha kala unene ti ipula nomwaalu gwaamboka haya kala po. Shoka shi na unene oshilonga kuye, etompelo ndyoka hali ya inyengitha ya kale po. Moshitopolwa shika, otatu ka kundathana epulo ndika lya simana tali ti: Omolwashike ihaatu ya owala kEdhimbuluko, ihe nokomakugongala wo galwe gegongalo, ngoka Jehova ha longekidhile mboka ye mu hole?

3-4. (a) Omolwashike hatu yi kokugongala? (b) Okuya kwetu kokugongala ohaku ulike shike kombinga yetu? (c) Shi ikolelela kAakorinto yotango 11:23-26, omolwashike kaatu na okufaula Edhimbuluko?

³ Ohatu yi kokugongala kwegongalo, molwaashoka oku li oshitopolwa sha simanenena shelongelokalunga lyetu. Ohatu yi ko wo, molwaashoka ohatu ka longwa kuJehova. Aantu mboka ye na uuntsa, oyi itaala kutya inaya pumbwa okulongwa sha.  (3 Joh. 9) Mepingathano naashono, tse otwa halelela okulongwa kuJehova nosho wo kehangano lye ndyoka ta longitha. — Jes. 30:20; Joh. 6:45.

⁴ Okukala pokugongala ohaku ulike kutya otu na eifupipiko, otwi ilongekidha notwa hala okulongwa. Shimwe ishewe, ihatu yi owala kEdhimbuluko ndyoka li li oshiningwanima sha simana, molwaashoka tu uvite kutya oshinima tu na oku shi ninga, ihe omolwaashono wo hatu vulika neifupipiko kelombwelo lyaJesus, ndyoka tali ti: “Shi ningeni nokudhimbulukwa ndje.” (Lesha 1 Aakorinto 11:23-26.) Okugongala hoka ohaku tu kwathele tu kale tu na etegameno lya kola nohaku tu dhimbulukitha kutya Jehova oku tu hole noonkondo. Nonando ongawo, Jehova oku shi shi kutya otwa pumbwa aluhe okutsuwa omukumo nokunkondopalekwa, shi vulithe owala lumwe momumvo. Onkee ano, okwe tu tulila po okugongala oshiwike kehe nohe tu ladhipike tu ye ko. Eifupipiko ohali tu inyengitha tu ye ko. Ohatu longitha oowili dhontumba oshiwike kehe, tu ilongekidhile okugongala hoka nokukala po.

5. Omolwashike aantu aaifupipiki haya taamba ko ehiyo lyaJehova?

⁵ Omumvo kehe, aantu oyendji aaifupipiki, ohaya taamba ko ehiyo lyaJehova lyokunongekwa kuye. (Jes. 50:4) Uuna ye ya kEdhimbuluko oshikando shotango, ohaya ka tsikila okuya kokugongala. (Sak. 8:20-23) Ohatu nyanyukilwa pamwe nayo okulongwa nokuwilikwa kuJehova, ngoka e li ‘omuhupithi nomukwathi gwetu.’ (Eps. 40:17) Kapu na sha shilwe tashi vulu oku tu nyanyudha nenge sha simana, shi vulithe okutaamba ko ehiyo lyokulongwa kuJehova naJesus, Omwana ngoka e hole noonkondo! — Mat. 17:5; 18:20; 28:20.

6. Eifupipiko olya kwathele ngiini omulumentu gumwe a ye kEdhimbuluko?

⁶ Omumvo kehe, ohatu kambadhala okuhiya aantu oyendji ye ye kEdhimbuluko lyeso lyaJesus. Aantu oyendji mboka aaifupipiki, oya mona uuwanawa, sho ya taamba ko ehiyo ndyoka. Natu taleni koshiholelwa shika. Omimvo dhontumba dha ka pita, omulumentu gumwe okwa li a pewa okafo kehiyo lyEdhimbuluko, ihe okwa lombwele omumwatate ngoka e ke mu pe kutya ita vulu oku ya ko. Nonando ongawo, ongulohi yEdhimbuluko omumwatate okwa li a kumwa, sho a mono omulumentu ngoka te ya mOshinyanga shUukwaniilwa. Omulumentu ngoka okwa li a panda omukalo gwopahole moka a popithwa kaamwatate, noshe mu inyengitha a tameke okuya kokugongala. Nokuli okwa li owala a faula okugongala iikando itatu, momumvo gwa ka landula ko. Oshike sha li she mu kwathele a tokole okukala ha yi kokugongala kehe? Eifupipiko olyo lye mu inyengitha a ninge omalunduluko. Lwanima, omumwatate ngoka a li e mu hiya, okwa ti: “Ye omulumentu omwiifupipiki shili.” Kapu na omalimbililo kutya Jehova oye a nana omulumentu ngoka, opo e mu longele, nongashingeyi oku li omumwatate a ninginithwa. — 2 Sam. 22:28; Joh. 6:44.

7. Shoka hatu ilongo kokugongala naashoka hatu lesha mOmbiimbeli, otashi tu kwathele ngiini tu kale aaifupipiki?

⁷ Shoka hatu ilongo kokugongala naashoka hatu lesha mOmbiimbeli, otashi vulu oku tu kwathela tu kale aaifupipiki. Miiwike mbyoka hayi tetekele Edhimbuluko, pokugongala ohapu kundathanwa unene oshiholelwa shaJesus nosho wo eifupipiko lye ndyoka a ulike moku tu kulila. Momasiku ngoka haga tetekele Edhimbuluko, ohatu ladhipikwa tu leshe mOmbiimbeli kombinga yiiningwanima mbyoka ya ningwa peso lyaJesus nopeyumuko lye. Shoka hatu ilongo pokugongala hoka nomomahokololo ngoka gomOmbiimbeli, ohashi tu ningitha lela tu kale tu na olupandu lweyambo ndyoka Jesus e tu ningila. Ohashi tu inyengitha tu holele eifupipiko lye nokulonga ehalo lyaJehova,  nonando otu li moonkalo oondhigu. — Luk. 22:41, 42.

8. Jesus okwa li a ulike ngiini uulaadhi?

⁸ Ohatu kambadhala wo okuholela Jesus, mokukala tu na uulaadhi. Dhiladhila kuulaadhi mboka a li a ulike momasiku ga tetekele eso lye. Okwa li lela e shi shi kutya aatondi ye masiku oya li taye ku mu sitha ohoni, taye ke mu dhenga noku mu dhipaga. (Mat. 20:17-19) Nonando ongawo, ka li a tila okusa. Sho ethimbo lya thikana, okwa lombwele aalongwa ye aadhiginini, mboka a li nayo meyana lyaGetsemane, a ti: “Thikameni, tu yeni. Ngoka ta gwaaleke ndje, oku li popepi.” (Mat. 26:36, 46) Sho ongundu yaantu ye na iikondjitho ye ya oku mu kwata po, okwi iyoolola mo e ta lombwele aakwiita mboka ya ethe aayapostoli ye ya ye. (Joh. 18:3-8) Jesus ka li tuu a ulike lela kutya oku na uulaadhi! Kunena, aagwayekwa nosho wo oonzi dhilwe, ohaya kambadhala okuholela Jesus, mokuulika uulaadhi. Ngiini?

9. (a) Omolwashike tashi vulika twa pumbwa uulaadhi, opo tu kale hatu yi kokugongala pandjigilile? (b) Oshiholelwa shetu otashi vulu ngiini okuguma aamwatate mboka ya tulwa mondholongo, omolweitaalo lyawo?

⁹ Opo tu kale pokugongala aluhe, otashi vulika twa pumbwa okukala tu na uulaadhi, uuna tu li moonkalo oondhigu. Aamwatate naamwameme yamwe, ohaya yi kokugongala, nonando oya nika oluhodhi, oya teka omukumo nenge taye ehama. Yalwe ohaya yi ko, nonando otaya patanekwa sha kwata miiti kaakwanezimo nenge kaakwanepangelo. Dhiladhila nkene iiholelwa yetu hayi gumu aamwatate mboka ya tulwa moondholongo, omolweitaalo lyawo. (Heb. 13:3) Uuna ya uvu kutya otatu tsikile okulongela Jehova nonando otu li momashongo, ohashi ya ningitha ya dhiginine eitaalo lyawo, ya kale ye na uulaadhi nokukala aadhiginini. Shoka osho sha li sha ningilwa omuyapostoli Paulus. Sho a li mondholongo muRoma, okwa li ha kala a nyanyukwa kehe ethimbo ta uvu kutya aamwahe otaya longele Kalunga nuudhiginini. (Fil. 1:3-5, 12-14) Konima yokathimbo manga inaa mangululwa mo nenge tashi vulika konima sho a mangululwa mo, okwa nyolele Aahebeli ontumwafo. Montumwafo ndjoka okwa li a ladhipike Aakriste aadhiginini a ti: “Kaleni mu holathane, oshoka one aamwayinathana.” Okwe ya lombwele wo kaaye ethe po okugongala. — Heb. 10:24, 25; 13:1.

10-11. (a) Oolye tu na okuhiya kEdhimbuluko? (b) Omolwashike tu na oku shi ninga, ngaashi sha popiwa mAaefeso 1:7?

¹⁰ Ohatu ulike uulaadhi, uuna tatu hiya aapambele, aaniilonga pamwe natse nosho wo aashiinda yetu kEdhimbuluko. Omolwashike hatu ya hiya? Ohatu kala twa pandula kwaashoka Jehova naJesus ye tu ningila. Ohatu kala twa hala nayo yi ilonge nkene taya vulu okumona mo uuwanawa ‘mesilohenda’ lyaJehova lyekuliloyambo. — Lesha Aaefeso 1:7; Eh. 22:17.

¹¹ Uuna tatu ulike uulaadhi mokugongala pamwe, ohatu ulike wo uukwatya wulwe, mboka hawu ulikwa kuKalunga nOmwana momikalo dha dhenga mbanda.

12. (a) Okugongala ohaku koleke ngiini ohole yetu yokuhola Jehova naJesus? (b) Aakorinto aatiyali 5:14, 15, otaye tu ladhipike tu ninge shike mokuholela Jesus?

¹² Ohole yetu yokuhola Jehova naJesus, ohayi tu inyengitha tu ye kokugongala. Shoka hatu ilongo ko, ohashi koleke lela ohole yetu yoku ya hola. Olundji pokugongala ohatu dhimbulukithwa po shoka Jehova nOmwana ye tu ningila. (Rom. 5:8) Edhimbuluko lyeso lyaJesus, ohali tu dhimbulukitha ohole yawo yomuule yoku tu hola, mwa kwatelwa naamboka inaaya lenga ekuliloyambo. Ohatu kambadhala okuholela Jesus esiku kehe, molwaashono otu na olupandu. (Lesha 2 Aakorinto 5:14, 15.) Shimwe ishewe, omitima dhetu ohadhi tu inyengitha tu tange Jehova, omolwekuliloyambo ndyoka e tu pa. Omukalo gumwe moka tatu vulu oku mu tanga, omokugandja omatyokosha taga zi komutima pokugongala.

13. Ongiini tatu vulu okuulika kutya otu hole Jehova nOmwana? Shi yelitha.

¹³ Otatu vulu okuulika kutya otu hole Jehova nOmwana, mokukala tu na ehalo lyoku ya ningila omayambo. Olundji otwa pumbwa okuninga omaiyambo gi ili nogi ili, opo tu vule okukala pokugongala. Omagongalo ogendji ohaga gongala komatango, ethimbo twa zimbuka kiilonga nohashi vulika tu kale twa vulwa. Okugongala kumwe ohaku ningwa mehuliloshiwike, ethimbo aantu yalwe taya vululukwa po. Mbela Jehova ohe shi mono ngaa kutya ohatu yi kokugongala, nonando otwa vulwa? Eeno! Ngele otwa kala hatu kambadhala twa mana mo tu kale pokugongala, Jehova ote ke tu pandula lela, sho hatu ulike kutya otu mu hole. — Mark. 12:41-44.

14. Jesus okwe tu tulila po ngiini oshiholelwa, mokuulika ombepo yopahole yeiyambo?

¹⁴ Jesus okwe tu tulila po oshiholelwa, mokuulika ombepo yopahole yeiyambo. Ka li owala e na ehalo lyokusila aalongwa ye, ihe aluhe okwa li ha ulike kutya okwa pititha komeho oompumbwe dhayalwe. Pashiholelwa, okwa li ha tsakanene naalongwa ye, nonando okwa vulwa palutu nenge a gwililwa po pamadhiladhilo. (Luk. 22:39-46) Okwa li wo a gandja eitulomo kokuyakula yalwe, pehala lyokuyakulwa kuyo. (Mat. 20:28) Ngele ohole yetu yokuhola Jehova nosho wo aamwatate naamwameme oya kola, otatu ka ninga ngaashi tatu vulu tu kale pUulalelo wOmuwa nosho wo pomakugongala galwe.

15. Oolye unene hatu kwathele?

 ¹⁵ Tse otu li muukumwe wopaKriste mboka owo owala washili, nohatu nyanyukilwa okulongitha ethimbo olindji ngaashi tatu vulu, tu hiye yalwe ye tu wayimine. Ohatu kwathele unene mboka “tu li nayo meitaalo limwe,” mboka inaayi ipyakidhila we. (Gal. 6:10) Ohatu ya ulukile kutya otu ya hole, moku ya ladhipika ya ye kokugongala, na unene tuu kEdhimbuluko. Ngaashi Jehova naJesus, natse ohatu kala twa nyanyukwa noonkondo, uuna ngoka ini ipyakidhila we a galukile kuJehova, Tate gwetu omunahole nOmusita gwetu. — Mat. 18:14.

16. (a) Ongiini tatu vulu okutsaathana omukumo, nokugongala otaku ke tu kwathela ngiini? (b) Omolwashike ndika olyo ethimbo ewanawa momumvo lyokudhimbulukwa oohapu dhaJesus ndhoka dhi li muJohannes 3:16?

¹⁶ Miiwike tayi landula, hiya aantu oyendji ngaashi tashi vulika kEdhimbuluko ndyoka tali ka kala ko mEtitano kongulohi, 19 Apilili 2019. (Tala oshimpungu “ Mbela oto ka hiya ngaa aantu?”) Momukokomoko gwomumvo tagu ya, natu tsaathaneni omukumo, mokuya pandjigilile kokugongala hoka Jehova e tu longekidhila. Sho uuyuni mbuka wu li pokuhula po, otwa pumbwa okukala hatu gongala, opo ku tu kwathele tu kale aaifupipiki, aalaadhi naanahole. (1 Tes. 5:8-11) Natu ulike nkene tu uvitile Jehova nOmwana nomutima gwetu aguhe, sho ye tu hole noonkondo! — Lesha Johannes 3:16.