OMASIKU sho ga li 24 gaJanuali 2018, Etitatu koshiwike, ethimbo lyoshitumbetango, uukwanegumbo waBetel moAmerika nomoKanada owa li wa nyanyudhwa ketseyitho li ikalekelwa. Etseyitho olya ti kutya omumwatate Kenneth Cook, Jr., oku li oshilyo oshipe shOlutuwiliki lwOonzapo dhaJehova.

Omumwatate Cook okwa valelwa nokwa putukila moAmerika, moPennsylvania. Okwa longwa oshili komumati gwomongundu yawo, sho e li pokumana osikola. Okwa ninginithwa mo 7 gaJuni 1980. Mesiku 1 Septemba 1982, okwa tameke iilonga yethimbo lyu udha, e li omukokolindjila gwondjigilile. Okwa kokola ondjila uule womimvo mbali. Mo 12 Kotoba 1984, okwa tameke iilonga yaBetel moWallkill, shaNew York.

Uule womimvo 25, omumwatate Cook okwa kala ta longo iilonga yi ili noyi ili moshinyanyangidho nokwa kala omutonateli moBetel. Momumvo 1996, omumwatate Cook okwa zi ko kuumati, sho a hokana meme Jamie, ngoka naye e mu wayimine miilonga yaBetel, moWallkill. MuDesemba 2009, oya ka longa kendiki lyelongo lyo-Watchtower Educational Center, moPatterson, moNew York. Omumwatate Cook okwa pewa uuthembahenda wokulonga mOshikondo shOkuungaunga nOmapulo. MuApilili 2016, oya galukile ishewe koWallkill. Okuza mpono, oya tuminwa natango koBrooklyn, moNew York. Konima yoomwedhi ntano, oya tembukile koombelewa dhetu oonene moWarwick, moNew York. MuJanuali 2017, omumwatate Cook okwa langekwa po e li omukwatheli gwOkomitiye yOkunyola yOlutuwiliki lwOonzapo dhaJehova.