1-2. (a) Omolwashike tatu vulu okutya Jesus okwe tu tulila po omukalo omupu gwokudhimbulukwa eso lye? (b) Omaukwatya gaJesus geni tatu ka kundathana?

MBELA oto vulu oku shi hokolola kutya oshike hashi ningwa po pEdhimbuluko lyeso lyaKristus lyokomumvo? Odhoshili kutya oyendji yomutse otatu vulu okudhimbulukwa iinima mbyoka hayi ningwa po. Omolwashike? Omolwaashono uulalelo mboka owanathangwa. Nonando ongawo, shoka oshiningwanima sha simanenena. Onkene otashi vulika tu pule tatu ti: ‘Omolwashike uulalelo mbuka wanathangwa?’

² Pethimbo lyuukalele we kombanda yevi, Jesus okwa li e shiwikile okulonga aantu ooshili dha simana momukalo gwa yela nomupu okuuviwa ko. (Mat. 7:28, 29) Momukalo gwa faathana, okwe tu tulila po omukalo omupu gwokudhana * Edhimbuluko lyeso lye nogu na eityo. Natu ka kundathaneni muule uulalelo mbuka wEdhimbuluko nosho wo iinima yilwe mbyoka Jesus a li a popi nokwa ningi. Otatu ka uva ko nawa nkene Jesus a li omwiifupipiki, omulaadhi nomunahole. Otatu ki ilonga wo nkene tatu vulu oku mu holela shi vulithe nale.

3. Ngaashi sha popiwa muMateus 26:26-28, uulalelo wEdhimbuluko ndyoka Jesus a dhike po, owa li wanathangwa momukalo guni, nomandhindhiliko gaali oga li taga thaneke shike?

³ Jesus okwa li naayapostoli ye aadhiginini 11, sho a dhike po Edhimbuluko lyeso lye. Okwa li a kutha shoka sha hupu po puulalelo  wOpaasa, e te li ningi. (Lesha Mateus 26:26-28.) Okwa longitha owala oshikwiila inaashi tulwa efulika nosho wo omaviinu ngoka ga li po nale. Jesus okwa li a lombwele aalongwa ye kutya omandhindhiliko ngoka gaali, otaga thaneke olutu lwe lwa gwanenena nosho wo ombinzi ye, iinima mbyoka a li ta ka yamba po masiku pehala lyawo. Aayapostoli otashi vulika kaaya li ya kumwa, sho oshiningwanima shoka sha simana sha li sha ningwa momukalo gwanathangwa. Omolwashike mbela?

4. Omayele ngoka Jesus a li a pe Marta, otage tu kwathele ngiini tu uve ko kutya omolwashike Jesus a kaleke uulalelo wEdhimbuluko wanathangwa?

⁴ Tala shoka sha li sha ningwa po moomwedhi dhopetameko dhomumvo omutitatu gwuukalele waJesus, sho a ka talela po ookuume ke yopothingo, Lasarus, Marta naMaria. Pompito ndjoka, Jesus okwa li a tameke oku ya longa. Marta opo a li, ihe okwa li i ipyakidhila unene nokulongekidhila omuyenda gwawo ngoka a simana iikulya oyindji. Sho Jesus e shi mono, okwa pukulula Marta nombili, e te mu kwathele a mone kutya shoka sha simana kashi shi ondumba yiikulya. (Luk. 10:40-42) Lwanima, manga owala kwa li ku na oowili dhontumba Jesus a se, Jesus okwa tula miilonga omayele ngoka a popi ye mwene. Okwa kaleke uulalelo wEdhimbuluko lyeso lye wanathangwa. Shika otashi tu longo shike kombinga yaJesus?

5. Uulalelo wanathangwa otawu ulike shike kombinga yaJesus, naashika otashi tsu kumwe ngiini nAafilippi 2:5-8?

⁵ Jesus okwa li omwiifupipiki mukehe shimwe shoka a li a popi nokwa ningi. Onkee ano, itashi kumitha sho a ulike eifupipiko enene uusiku we wahugunina kombanda yevi. (Mat. 11:29) Okwa li e shi kutya okwa li e li pokuninga eyambo enene mondjokonona, nonokutya Jehova okwa li te ke mu yumudha noku mu pa ondondo yopombanda megulu. Nonando ongawo, Jesus ka li a gandja eitulomo kuye mwene, ku longithwe iinima ya kitakana pEdhimbuluko lyeso lye. Pehala lyaashono, okwa lombwele aalongwa ye kutya omumvo kehe oye na oku mu dhimbulukwa, taya longitha omandhindhiliko ngoka ganathangwa. (Joh. 13:15; 1 Kor. 11:23-25) Uulalelo mboka wanathangwa, otawu ulike kutya Jesus ka li omuntu i iholele pombanda. Otatu vulu okukala twa nyanyukwa, molwaashono eifupipiko owo wumwe womuukwatya wa dhenga mbanda wOmukwaniilwa gwetu gwomegulu. — Lesha Aafilippi 2:5-8.

6. Ongiini tatu vulu okuholela eifupipiko lyaJesus, uuna twa taalelwa komaupyakadhi?

⁶ Ongiini tatu vulu okuholela eifupipiko lyaJesus? Omokupititha komeho uuwanawa wayalwe. (Fil. 2:3, 4) Dhiladhila kuusiku waJesus wahugunina kombanda yevi. Jesus okwa li e shi kutya ota  ka sa eso tali uvitha omwenyo omutoye. Nonando ongawo, okwa li ti ipula noonkondo kombinga yaayapostoli ye aadhiginini, mboka masiku ya li taya ka nika oluhodhi. Onkee ano, uusiku awuhe okwa kala te ya longo, te ya ladhipike noku ya kumika. (Joh. 14:25-31) Jesus okwa li e na ko nasha lela nonkalonawa yayalwe, pehala lyonkalonawa ye. Ine tu tulila po tuu oshiholelwa sha dhenga mbanda!

7. Ongiini Jesus a li a ulike kutya omulaadhi lela, konima owala sho a dhike po Uulalelo wOmuwa?

⁷ Konima owala sho Jesus a dhike po Uulalelo wOmuwa, okwa ulike kutya oku na uulaadhi lela. Ngiini mbela? Jesus okwa li a taamba ko shoka He a li a hala a ninge, nonando okwa li e shi shi kutya okuninga ngawo otaku ke mu dhipagitha, molwaashoka anuwa a tuku Kalunga. (Mat. 26:65, 66; Luk. 22:41, 42) Jesus okwa li a kakatele uudhiginini we mokusimanekitha edhina lyaJehova, mokuyukipalitha uunamapangelo We, nomoku shi ningitha tashi wapa, opo mboka yi itedhulula ya ka mone omwenyo gwaaluhe. Pethimbo olyo tuu ndyoka, Jesus okwa li a longekidha aalanduli ye, opo ya ka vule okuungaunga naashoka masiku ya li taye ki iyadha musho.

8. (a) Jesus okwa li a lombwele shike aayapostoli ye aadhiginini? (b) Konima yeso lye, aalanduli yaJesus oya li ya landula ngiini oshiholelwa she shuulaadhi?

⁸ Jesus okwa li wo a ulike kutya oku na uulaadhi, sho a li iti ipula niimpwiyu mbyoka tashi vulika a li e na, e ta gandja eitulomo koompumbwe dhaayapostoli ye aadhiginini. Uulalelo wanathangwa, mboka a li a dhike po konima sho a laleke Judas, owa li tawu ka dhimbulukitha aalanduli ye, mboka ya li taya ka gwayekwa notaya ka kala oshitopolwa shehangano epe, uuwanawa wombinzi yaJesus ndjoka ya tika. (1 Kor. 10:16, 17) Opo Jesus e ya kwathele ya tsikile okukala aadhiginini noya ka kale pamwe naye megulu, okwe ya lombwele shoka ye naHe ya tegelela ya ninge. (Joh. 15:12-15) Jesus okwa li wo a lombwele aayapostoli  ye kombinga yomaupyakadhi ngoka ga li tage ke ya adha. Opo nduno, okwe ya ladhipike ya landule oshiholelwa she, sho e ya lombwele a ti: “Inamu tila!” (Joh. 16:1-4a, 33) Konima yomimvo odhindji, aalongwa yaJesus oya li ya tsikile okulandula oshiholelwa she shombepo yeiyambo nokuulika kutya oye na uulaadhi. Nonando oya li yi iyadha muupyakadhi wi ili nowi ili, oya li ya ambidhidhathana. — Heb. 10:33, 34.

9. Ongiini tatu vulu okuholela Jesus mokuulika uulaadhi?

⁹ Sha faathana nokunena, natse ohatu landula oshiholelwa shaJesus shokukala tu na uulaadhi. Pashiholelwa, ohashi pula uulaadhi okwaambidhidha aamwatate mboka taya hepekwa, omolweitaalo lyawo. Omathimbo gamwe, aamwatate ohaya tulwa moondholongo kaashi li pauyuuki. Uuna shoka sha ningwa, natu ningeni ngaashi tatu vulu tu ya kwathele, ngaashi moku ya popila ko. (Fil. 1:14; Heb. 13:19) Omukalo gumwe hatu ulike kutya otu na uulaadhi, omokutsikila okuuvitha “nuulaadhi.” (Iil. 14:3) Ngaashi Jesus, natse otwa tokola toko tu uvithe etumwalaka lyUukwaniilwa, nonando aantu otashi vulika ye tu pataneke noku tu hepeka. Omathimbo gamwe, otashi vulika tu iyadhe twa teka omukumo. Oshike tatu vulu okuninga po?

10. Miiwike mbyoka tayi tetekele Edhimbuluko, oshike tu na okuninga, nomolwashike?

¹⁰ Otatu vulu okukala twa nyatipala mokukala tu na uulaadhi, ngele otwa kala tatu dhiladhila kombinga yetegameno ndyoka tatu ka mona, omolwekuliloyambo lyaKristus. (Joh. 3:16; Ef. 1:7) Miiwike mbyoka tayi tetekele Edhimbuluko, otu na ompito yi ikalekelwa yokuulika olupandu lwetu lwekuliloyambo. Pethimbo ndyoka, kala to ningi elesho lyOmbiimbeli lyEdhimbuluko, e to tedhatedha pamwe negalikano kiiningwanima yopethimbo lyeso lyaJesus. Opo nduno, uuna twa gongala pUulalelo wOmuwa, otatu ka uva ko nawa lela esimano lyomandhindhiliko ngoka haga longithwa po nosho wo kutya otaga thaneke shike. Ngele otwa kala tu uvite ko shoka Jesus  naJehova ye tu ningila nankene tashi tu etele uuwanawa pamwe naaholike yetu, otatu ka kala tu na etegameno lya kola. Shimwe ishewe, otashi tu kwathele tu idhidhimike nomukumo sigo opehulilo. — Heb. 12:3.

11-12. Sigo opo mpaka, otwi ilonga shike?

¹¹ Sigo opo mpaka, otwi ilonga kutya Uulalelo wOmuwa itawu tu dhimbulukitha owala kutya ekuliloyambo oli na ondilo, ihe nuukwatya wo waJesus wa dhenga mbanda weifupipiko nowuulaadhi. Inatu pandula tuu sho Jesus ta tsikile okuulika omaukwatya ngoka e li Omuyambimukuluntu gwetu gwomegulu, ngoka he tu galikanene! (Heb. 7:24, 25) Opo tu ulike olupandu lwetu talu zi komutima, otu na okudhimbulukwa eso lyaJesus, ngaashi naanaa e tu lombwela tu shi ninge. (Luk. 22:19, 20) Edhimbuluko ohatu li ningi mesiku ndyoka tali tsu kumwe nomasiku 14 Nisan, esiku ndyoka lya simanenena momumvo.

¹² Komandhindhiliko ganathangwa ngoka haga longithwa pUulalelo wOmuwa, otatu vulu wo okwiilonga ko uukwatya wumwe mboka wi inyengitha Jesus e tu sile. Sho a li kombanda yevi, okwa li e shiwikile uukwatya mboka. Owuni?

13. MuJohannes 15:9 nosho wo muJohannes gwotango 4:8-10, omwa yelithwa ngiini ohole ndjoka Jehova naJesus ya ulika, noolye haya mono mo uuwanawa mohole yawo?

¹³ Jesus okwa li a ulike thiluthilu kutya Jehova oku tu hole noonkondo, mukehe shimwe shoka a li a ningi. (Lesha Johannes 15:9; 1 Johannes 4:8-10.) Shoka sha simana unene, Jesus okwa li i igandja tashi zi komutima a se pehala lyetu. Kutya nduno otu li aagwayekwa nenge ‘oonzi dhilwe,’ ohatu mono mo uuwanawa mohole ndjoka Jehova nOmwana ye tu ulukila okupitila mekuliloyambo ndyoka. (Joh. 10:16; 1 Joh. 2:2) Dhiladhila wo kombinga yomandhindhiliko ngoka haga longithwa pEdhimbuluko. Ohaga ulike kutya Jesus oku hole noku na ko nasha naalongwa ye. Ngiini mbela?

14. Omomukalo guni Jesus a li a ulike kutya oku hole aalongwa ye?

¹⁴ Jesus okwa li a ulike kutya oku hole aalanduli ye aagwayekwa, sho a dhike po uulalelo wanathangwa, opo ya kale haya dhimbulukwa eso lye. Mokweendela ko kwethimbo, aagwayekwa mboka oya kala nokudhimbulukwa eso lyaJesus omumvo kehe, nonando oye li moonkalo dha yoolokathana, mwa kwatelwa oku li dhimbulukwa ye li mondholongo. (Eh. 2:10) Mbela oya li ngaa ya vulu okuninga ngaashi Jesus e ya lombwele? Eeno!

15-16. Ooitaali yamwe oya li ya vulu ngiini okudhimbulukwa Uulalelo wOmuwa, nonando oya li moonkalo oondhigu?

¹⁵ Okuza methelemimvo lyotango sigo opethimbo lyetu, Aakriste yashili oya ninga oonkambadhala ya dhimbulukwe eso lyaJesus. Oya landula omukalo ngoka gwa li gwa longithwa pUulalelo wOmuwa ngaashi taya vulu, nomathimbo gamwe nokuli nomoonkalo oondhigu. Natu ka taleni kiiholelwa tayi landula. Sho omumwatate Harold King a li a edhililwa mokandunda oye awike, mondholongo yomoChiina, okwa kongo po ondunge a dhimbulukwe eso lyaJesus. Okwa li a longekidha monanguwi omandhindhiliko gopEdhimbuluko, ihe okwa longitha iinima mbyoka a li e na. Okwa li wo a kambadhala ngaashi ta vulu, a yalule nawa esiku moka tamu ka ningwa Edhimbuluko. Edhimbuluko sho lya thiki, okwi imbi, okwa galikana nokwa gandja oshipopiwa shopaMbiimbeli, nonando mokandunda okwa li mo oye awike.

¹⁶ Mpaka otapu landula natango oshiholelwa shimwe. Oshiholelwa shika oshaamwameme yamwe mboka ya li mokamba yoonkwatwa pethimbo lyIita Iitiyali yUuyuni. Oya li ya tula oomwenyo dhawo moshiponga, opo ya dhimbulukwe Uulalelo wOmuwa. Molwaashoka Edhimbuluko ohali ningwa taku longithwa iinima kaayi shi yondilo, oya li ya vulu oku li ninga monanguwi. Oya ti: “Otwa thikama twa dhingoloka okapundi twe ka yala elapi etokele, twa tula ko omaviinu  noshikwiila. Otwa li twa longitha okalehite, opo kaatu monike. . . . Otwa popi tatu endulula shoka twa uvanekela Tate gwetu, tu ninge ngaashi tatu vulu, opo tu yapulithe edhina lye eyapuki.” Ooitaali mboka inaya ulika tuu eitaalo lya dhenga mbanda! Jesus ina ulika tuu kutya oku tu hole, sho e tu tulila po omukalo omupu gwokudhana Edhimbuluko, nonando otu kale moonkalo oondhigu!

17. Omapulo geni tatu vulu okwiipula?

¹⁷ Sho Edhimbuluko li li popepi, oshi li nawa tu ipule omapulo taga landula: ‘Ongiini tandi vulu okuholela Jesus shi vulithe nale, mokuulika ohole? Mbela ohandi dhiladhila ngaa kombinga yoompumbwe dhooitaali ooyakwetu, shi vulithe pudhandje? Mbela ohandi kala nda tegelela aamwatate naamwameme ya ningile ndje oshindji, shi vulithe pwaashono taya vulu okuninga nenge ondi shi ngaa omangambeko gawo?’ Natu holeleni aluhe Jesus nokuulika ‘euvitopamwe.’ — 1 Pet. 3:8.

18-19. (a) Otatu vulu okukala nuushili wuni? (b) Owa tokola toko okuninga shike?

¹⁸ Masiku itatu ka kala we hatu dhimbulukwa eso lyaKristus. Sho Jesus te ke “ya” puudhigu uunene, ota ka gongela “aahogololwa” mboka ya hupa ko, ya ye megulu. Okuza mpono, Edhimbuluko dhimbwa. — 1 Kor. 11:26; Mat. 24:31.

¹⁹ Nokuli nopethimbo Edhimbuluko itaali ka dhanwa we, otatu vulu okukala nuushili kutya aapiya yaJehova, itaya ka dhimbwa uulalelo wanathangwa mboka Jesus a li a dhike po kutya owu li endhindhiliko lyuukwatya we kaaku na we. Uukwatya mboka ongaashi eifupipiko, uulaadhi nohole ye. Pethimbo ndyono, mboka ya li haye li dhana, otaye ke li lombwela mboka taya ka yumudhwa, omolwuuwanawa wawo. Ihe ngashingeyi opo tu mone mo uuwanawa muulalelo mboka, otu na okukala twa tokola toko tu holele eifupipiko lyaJesus, uulaadhi we nohole ye. Ngele osho twa ningi, otatu vulu okukala neinekelo kutya Jehova ote ke tu pa ondjambi. — 2 Pet. 1:10, 11.