1-2. Omuyengeli okwa li a lombwele aakiintu shike pombila yaJesus, na Jesus okwe ya lombwele shike?

OSHA li ongula onene yo 16 Nisan, 33 E.N. Aakiintu yamwe mboka ya li ya nika oluhodhi noonkondo naatilikalunga, oya yi kombila yaJesus. Opwa adhika pwa pita oowili 36 konima sho Omuwa Jesus Kristus a fumvikwa. Sho ya thiki pombila ye, nelalakano lyokugwayeka omudhimba gwe iizimba ya nika nawa nomugwayo, oya haluka sho ya adha kaagu mo. Opo nduno oya lombwelwa komuyengeli kutya Jesus okwa yumudhwa kuusi, e ta gwedha ko ta ti: “Ote mu tetekele kuGalilea, oko tamu ke mu mona.” — Mat. 28:1-7; Luk. 23:56; 24:10.

² Konima sho aakiintu ya zi po pombila, oya tsakanene naJesus, e te ya lombwele ta ti: “Indeni, mu ka lombwele aamwatate, ya ye kuGalilea, oko taa ka mona ndje.” (Mat. 28:10) Oshinima shotango Jesus a ningi konima sho a yumudhwa, elongekidho a gongale naalongwa ye. Pokugongala mpoka, okwa li e ya pe omalombwelo gontumba ga simanenena.

3-4. Omolwashike tatu vulu okutya elombwelo ndyoka li li muMateus 28:19, 20, kalya li owala lya pewa aayapostoli? (Tala ethano lyokombanda.)

³ Lesha Mateus 28:16-20. Pokugongala hoka Jesus a li a unganeke, okwa lombwele aalongwa ye kombinga yiilonga ya simanenena mbyoka ya li taya ka longa, iilonga mbyoka natse tatu longo kunena, okwa ti: “Indeni ano, ka ningeni aantu ayehe aalongwa yandje, . . . ne mu ya longe okudhiginina ayihe mbyoka nde yi mu lombwele.”

⁴ Jesus okwa hala aalanduli ye ayehe ya uvithe. Elombwelo ndyoka kalya li owala lya nuninwa aayapostoli ye 11. Otu shi shi ngiini? Mbela aayapostoli oyo owala ya li po, sho Jesus a gandja  elombwelo ndyoka kondundu muGalilea? Dhimbulukwa kutya omuyengeli okwa lombwele aakiintu mbeyaka a ti: ‘Otamu  ke mu mona muGalilea.’ Onkee ano, aakiintu mboka nayo oye na okukala opo ya li. Ihe inashi hulila owala mpoka. Omuyapostoli Paulus okwa ti kutya Jesus “okwi ihololele ishewe aalanduli ye ye vule omathele gatano polumwe.” (1 Kor. 15:6) Openi mpoka?

5. Oshike tatu ilongo mAakorinto yotango 15:6?

⁵ Otu na omatompelo omawanawa okudhiladhila kutya Paulus okwa li e na momadhiladhilo okugongala hoka kwa ningilwe muGalilea, hoka kwa popiwa muMateus 28. Omatompelo ngoka ogeni? Lyotango, oyendji yomaalongwa yaJesus oya li Aagalilea. Onkee ano, osha li oshipu okugongalela kondundu muGalilea pehala lyokugongalela megumbo, oshoka aantu oya li oyendji. Etiyali, konima sho Jesus a yumudhwa, okwa adhika nale a tsakanena naayapostoli ye 11 megumbo muJerusalem. Andola Jesus okwa li a hala okulombwela owala aayapostoli ye oyo ya uvithe noya ninge aantu aalongwa, ando okwe shi ningi muJerusalem, pehala lyoku ya pula nosho wo aakiintu nayalwe, ya tsakanene naye muGalilea. — Luk. 24:33, 36.

6. Mateus 28:20 okwa ulika ngiini kutya elombwelo lyokuninga aantu aalongwa otali longo nokunena, nelombwelo ndyoka otali gwanithwa po shi thike peni?

⁶ Natu tale ketompelo etitatu lya simana. Elombwelo lyaJesus lyokuninga aantu aalongwa, kalya li owala lya nuninwa Aakriste mboka ya li ko omimvo 2 000 nasha dha ka pita. Otu shi shi ngiini? Jesus okwa hulitha omalombwelo ge ngoka a pa aalanduli ye, noohapu tadhi ti: “Ngame otandi kala pamwe nane omasiku agehe sigo ehulilo lyuuyuni.” (Mat. 28:20) Ngaashi naanaa Jesus e shi popi, kunena oyendji otaya ningi aantu aalongwa. Dhiladhila kwaashika. Omumvo kehe, aantu 300 000 lwaampono, ohaya ninginithwa e taya ningi Oonzapo dhaJehova nokuninga aalongwa yaJesus Kristus.

7. Oshike tatu ka kundathana, nomolwashike?

⁷ Oyendji mboka haya konakona Ombiimbeli, ohaya ningi ehumokomeho sigo ya ninginithwa. Nonando ongawo, yamwe mboka hatu konakona nayo Ombiimbeli pandjigilile, ohaya kakadhala okuninga aalongwa. Oye hole okukonakona, ihe ihaya ningi ehumokomeho ya ninginithwe. Ngele owu na omukonakoni, uushili owo kutya oho kala wa hala oku mu kwathela a tule miilonga shoka ti longo noku ninge omulongwa gwaKristus. Moshitopolwa shika, otatu ka kundathana nkene tatu vulu okwaadha omutima gwomukonakonimbiimbeli nankene tatu vulu oku mu kwathela a kale e hole Jehova noku ninge ehumokomeho. Omolwashike twa pumbwa okukundathana oshinima shika? Omolwaashono poompito dhimwe, otashi vulika tu na okutokola ngele otatu tsikile nekonakono nenge hasho.

8. Omolwashike hashi vulu okukala oshidhigu okwaadha omutima gwomukonakoni?

⁸ Jehova okwa hala aantu ye mu longele, molwaashoka ye mu hole. Onkee ano, elalakano lyetu okukwathela aakonakoni yetu ya uve ko kutya Jehova oku na ko nasha lela nayo pauhandimwe noku ya hole noonkondo. Otwa hala oku ya kwathela ya mone kutya Jehova “oye he yoothigwa nomugameni gwaaselekadhi.” (Eps. 68:5) Uuna aakonakonimbiimbeli yoye ya tameke oku shi mona mo kutya Kalunga oku ya hole shi thike peni, otashi ka guma omitima dhawo notaya ka tameka wo okukala ye mu hole. Otashi vulika shi kale oshidhigu kaakonakonimbiimbeli yamwe ya tale ko Jehova e li Tate omunahole, molwaashoka inaya ulukilwa nale ohole nolukeno koohe. (2 Tim. 3:1, 3) Uuna to ningi ekonakonombiimbeli, kala ho tsu omuthindo omaukwatya gaJehova omawanawa. Kwathela aakonakoni yoye ya uve ko kutya Kalunga ketu omunahole okwa hala ya ka mone omwenyo gwaaluhe, nokwi ilongekidha oku ya kwathela ya adhe  elalakano ndyoka. Oshike ishewe tatu vulu okuninga?

9-10. Iileshomwa yini twa pumbwa okulongitha, uuna tatu konakona naantu Ombiimbeli, nomolwashike oyo tu na okulongitha?

⁹ Longitha embo “Ombiimbeli otayi tu longo shike?” nosho wo “Ikalekeni mohole yaKalunga.” Iileshomwa mbyoka oya nyanyangidhwa unene yi tu kwathele tu adhe omitima dhaakonakoni yetu. Pashiholelwa, ontopolwa 1 yembo Ombiimbeli otayi tu longo, oya yamukula omapulo ngaashi: Mbela Kalunga oku na ko nasha natse nenge oku na onyanya?, Mbela Kalunga okwa panda, sho aantu taya mono iihuna? nosho wo Mbela oto vulu okupanga uukuume naJehova? Ongiini kombinga yembo Ohole yaKalunga? Embo ndyoka otali ka kwathela omukonakoni a uve ko nkene okutula miilonga omakotampango gOmbiimbeli, taku vulu okuhwepopaleka onkalamwenyo ye noku hedhe popepi lela naJehova. Nonando owa konakona nale naantu momambo ngoka, kala ho ilongekidhile nawa kehe ekonakono nokukaleka momadhiladhilo oompumbwe dhokondandalunde dhomukonakoni gwoye.

 ¹⁰ Natu tye andola omukonakoni oku na ohokwe moshinima shoka sha kundathanwa moshileshomwa shoka kaashi li mOkaketha kiilongitho yokulonga aantu. Oto vulu oku mu ladhipika a leshe oshileshomwa shoka paumwene, opo mu vule okutsikila okukonakona mushimwe shomiileshomwa mbyoka ya kankamena kOmbiimbeli twa zi nokupopya.

11. Uunake tu na okutameka nokuhulitha ekonakonombiimbeli negalikano, nongiini to vulu oku shi yelithila omukonakoni?

¹¹ Tameka ekonakonombiimbeli negalikano. Olundji ohashi kala oshiwanawa okutameka nokuhulitha ekonakonombiimbeli negalikano manga kuyele, unene tuu miiwike yopetameko sho wa tameke okukonakona nomuntu pandjigilile. Otu na okukwathela omukonakoni a uve ko kutya otatu vulu owala okuuva ko Oohapu dhaKalunga kekwatho lyombepo Ye. Aauvithi yamwe uuna taya konakona naantu, ohaya longitha Jakob 1:5, ndjoka tayi ti: “Ngele oku na gumwe gwomune a pumbwa oondunge, ne dhi indile kuKalunga.” Ohaye shi ningi, opo ya yelithe kutya omolwashike hatu galikana. Opo nduno, omuuvithi oha pula omukonakoni ta ti: “Ongiini tatu vulu okupula Kalunga oondunge?” Omukonakoni otashi vulika a zimine kutya omokugalikana kuKalunga.

12. Ongiini to vulu okulongitha Episalomi 139:2-4, wu kwathele omukonakoni gwoye a hwepopaleke omagalikano ge?

¹² Longa omukonakoni gwoye nkene e na okugalikana. Mu shilipaleka kutya Jehova okwa hala okupulakena komagalikano ge taga zi komutima. Mu yelithila kutya momagalikano getu gopaumwene, otatu vulu okumbumbulila Jehova omitima dhetu, moku mu lombwela iinima mbyoka tashi vulika inaatu hala okulombwela yalwe. Odhoshili kutya Jehova oku shi nale omadhiladhilo getu gomuule. (Lesha Episalomi 139:2-4.) Otatu vulu wo okuladhipika omukonakoni gwetu a pule Kalunga e mu kwathele a lundulule okudhiladhila kwe noku ethe po omikalondjigilile omiwinayi. Pashiholelwa, natu tye nduno omuntu ngoka a konakona uule wethimbo lyontumba, oku hole oshituthi shontumba shoka shi na ekwatathano nuupagani. Oku shi kutya osha puka, ihe oha nyanyukilwa iinima yontumba yi na ko nasha nasho. Mu ladhipika a lombwele Jehova nkene e uvite noku mu pule e mu kwathele a kale e hole shoka Kalunga e hole. — Eps. 97:10.

13. (a) Omolwashike tu na okuhiya aakonakoni yetu kokugongala, manga kuyele? (b) Ongiini tatu vulu oku ya kwathela ya kale ye uvite ya manguluka, uuna ye ya kokugongala?

¹³ Hiya omukonakoni gwoye kokugongala, manga kuyele. Shoka omukonakoni gwoye ta ka uva nota ka mona kokugongala kwopaKriste, otashi vulu okuguma omutima gwe, noku mu kwathela a ninge ehumokomeho. Mu ulukila okavidio Oshike hashi ningwa pokugongala kwOonzapo dhaJehova? e to mu hiya e ku wayimine. Mu kwathela mu ye pamwe naye kokugongala, ngele otashi vulika. Uuna to ka konakona naye, oshi li nawa wu kale ho yi ko naauvithi ya yoolokathana. Shoka otashi ke mu kwathela a tseye aantu yalwe megongalo, notashi vulika shi mu ningithe a kale e uvite a manguluka, uuna e ya kokugongala.

14. Oshike tashi vulu okwiinyengitha omukonakoni a ninge ehumokomeho?

¹⁴ Elalakano lyetu okukwathela omukonakonimbiimbeli a ninge ehumokomeho. (Ef. 4:13) Uuna gumwe a zimine okukonakona Ombiimbeli, otashi vulika a kale e na ohokwe unene kombinga yankene ekonakono ndyoka tali ke mu etela uuwanawa paumwene. Ihe sho ohole ye yokuhola Jehova tayi ende tayi koko, otashi vulika a tameke okudhiladhila kunkene ta vulu okukwathela yalwe, mwa kwatelwa mboka ye li nale aakwanegongalo. (Mat. 22:37-39) Pethimbo tali opalele, ino kakadhala oku mu  lombwela kombinga yuuthembahenda wokwaambidhidha pashimaliwa iilonga yUukwaniilwa.

15. Ongiini tatu vulu okukwathela omukonakonimbiimbeli a kale e shi okuungaunga nonkalo, uuna pwa holoka uupyakadhi?

¹⁵ Longa omukonakoni gwoye shoka e na okuninga po, uuna pwa holoka uupyakadhi. Pashiholelwa, natu tye nduno omukonakoni gwoye ngoka e li omuuvithi inaa ninginithwa, okwe ku lombwele kutya okwa uvithwa nayi kugumwe megongalo. Pehala lyokugama ombinga, omolwashike itoo mu yelithile shoka Ombiimbeli tayi ti kombinga yaashoka omuntu ta vulu okuninga po? Ota vulu okudhimina po omumwatate ngoka, nenge ngele ita vulu oku shi ninga, na popye naye nombili nonohole nelalakano lyoku “mu likola.” (Yelekanitha Mateus 18:15.) Kwathela omukonakoni gwoye i ilongekidhile shoka ta ka popya. Mu ulukila nkene e na okulongitha o-JW Library, Embo lyokukonga uuyelele lyOonzapo dhaJehova nosho wo epandja lyetu lyokointaneta, jw.org, opo i ilonge omikalo omiwanawa moka ta vulu okuungaunga nonkalo. Ngele owe mu dheula nawa manga inaa ningithwa, ota ka kala e na ekwatathano ewanawa nayalwe megongalo konima ngele a ningithwa.

16. Omolwashike oshiwanawa okuya naauvithi yalwe komukonakonimbiimbeli gwoye?

¹⁶ Hiya yalwe megongalo wu ye nayo komukonakoni gwoye, mwa kwatelwa omutonatelishikandjo, uuna e ya okutalela po egongalo lyeni. Omolwashike? Kakele komatompelo ngoka ga tumbulwa metetekelo, aauvithi yalwe otashi vulika ya kwathele omukonakoni gwoye momikalo ndhoka ngoye itoo vulu oku shi ninga. Pashiholelwa, natu tye nduno omukonakoni gwoye otashi vulika a kala ta kambadhala lwiikando okweetha po okuhila omakaya, ihe okwa hulile muunyengwi. Inda ko kuye nOnzapo ndjoka ya pondola okweetha po omukalondjigilile ngoka, ndjoka nayo tashi vulika ya li ya kambadhala lwiikando. Onzapo onkweni otashi vulika yi kale yi na omayele taga longo, ngoka omukonakoni gwoye a pumbwa okuuva. Ngele ino manguluka okukwatela komeho ekonakono, uuna wu li nomumwatate ngoka a enda monkalo ndjoka, mu lombwela oye a kwatele komeho pompito ndjoka. Ngele oho yi nayalwe komukonakoni gwoye, ota vulu okumona mo uuwanawa miimoniwa yawo. Dhimbulukwa kutya elalakano lyetu okukwathela omukonakoni a ninge ehumokomeho.

17-18. Oshike wu na okuninga, uuna to tokola ngele oto etha po okukonakona nomuntu nenge hasho?

¹⁷ Ngele omukonakoni ita ningi ehumokomeho, otashi vulika wu ipule to ti: ‘Nandi ethe po okukonakona naye?’ Manga inoo ninga etokolo, owu na okudhiladhila kombinga yaampoka pu thike okuvula kwe. Aantu yamwe ohashi ya pula ethimbo ele ya ninge ehumokomeho shi vulithe yalwe. Ipula to ti: ‘Mbela omukonakoni gwandje ota humu komeho shi thike pokuvula kwe?’ ‘Mbela okwa tameka “okudhiginina” nenge okutula miilonga iinima mbyoka ti ilongo?’ (Mat. 28:20) Omukonakoni otashi vulika a ende kashona mokuninga ehumokomeho, ihe oku na okukala ta ningi omalunduluko.

 ¹⁸ Ongiini ngele omuntu ngoka a konakona uule wethimbo lyontumba, ota ulike kashona nenge itee shi ulike nandonando kutya ekonakono olya simana kuye? Natu tale koshiholelwa shika: Omukonakoni gwoye okwa mana ko embo Ombiimbeli otayi tu longo, notashi vulika nokuli a tameka membo ‘Ohole yaKalunga,’ ihe kokugongala natango ina enda ko nenge nokuli pEdhimbuluko. Olundji oha faula ekonakono, omolwomatompelo gaafele. Monkalo ndjoka, owu na okukundathana naye oshili ndjoka yi li po. *

19. Oshike to vulu okulombwela gumwe ngoka inaa tala ko ekonakonombiimbeli lya simana, nowa pumbwa okutala kushike?

¹⁹ Oto vulu okutameka oonkundathana moku mu pula to ti: ‘Oshinima shini unene oshidhigu kungoye okuninga, opo wu ninge Onzapo yaJehova?’ Omukonakoni otashi vulika a yamukule ta ti: ‘Kandi na uupyakadhi nokukonakona Ombiimbeli, ihe kandi esiku ndi ninge Onzapo yaJehova!’ Ngele iikala ye osho ya tya ngawo konima sho a konakona uule wethimbo lyontumba, onawa wu hulithe po ekonakono. Kombinga onkwawo, omukonakoni otashi vulika shi kale oshikando she shotango e ku lombwele shoka tashi mu imbi. Pashiholelwa, otashi vulika e uvite kutya ita ka vula okuuvitha egumbo negumbo. Uuna wa tseya nkene e uvite, oto ka mona kutya openi wu na oku mu kwathela.

20. Iilonga 13:48, otayi vulu ngiini oku tu kwathela tu mone ngele natu tsikile okukonakona nomuntu nenge hasho?

²⁰ Shiyemateka, aakonakonimbiimbeli yamwe oya fa Aaisraeli yopethimbo lyaHesekiel. Ndhindhilika shoka Jehova a lombwele Hesekiel kombinga yAaisraeli. Okwa ti: “Kuyo ku shi sha shilwe shaa shi omuholi gwokwiimba omaimbilo taga nyanyudha nenge okuhika okaharpa. Otaa pulakene oohapu dhoye adhihe, ihe itaa vulika nando okuyimwe yomudho.” (Hes. 33:32) Otashi vulika tu shi mone oshidhigu okulombwela omuntu kutya otatu ka etha po okukonakona naye. Nonando ongawo, “ethimbo ndyoka lya hupa ko efupi.” (1 Kor. 7:29, NW) Pehala lyokulongitha ethimbo olindji mokukonakona nomuntu ngoka itaa ningi ehumokomeho, otwa pumbwa okumona po gulwe ngoka a “[“halelela oku ka mona,” NW] omwenyo gwaaluhe.” — Lesha Iilonga 13:48.

21. Enyolo lyetu lyomumvo 2020 olini, nomolwashike tali opalele?

²¹ Momukokomoko gwomumvo 2020, enyolo lyetu lyomumvo otali ke tu kwathela tu gandje eitulomo kokuhwepopala miilonga yokuninga aantu aalongwa. Olya kwatela mo oohapu dhimwe ndhoka Jesus a popi pokugongala kwa simana hoka kwa li kwa ningwa kondundu muGalilea, tadhi ti: ‘Indeni ano, ka ningeni aantu aalongwa, ne mu ya ninginithe.’ — Mat. 28:19.