1. Ngaashi omukwaniilwa David, epulo lini yamwe yomutse tashi vulika tu pule?

ATUHENI otwa hala okukala nonkalamwenyo ya gundjila noyi na ombili. Kapu na ngoka ha nyanyukilwa okukala ti ipula unene. Nonando ongawo, omathimbo gamwe otashi vulika twi iyadhe tatu ipula unene. Nomolwaashono yamwe yomaapiya yaJehova tashi vulika ya pule epulo ndyoka lya pulilwe Jehova komukwaniilwa David, a ti: “Sigo uunake iimpwiyu yu udha momutima gwandje, omutenya nuusiku?” — Eps. 13:2.

2. Oshike tatu ka kundathana moshitopolwa shika?

² Nonando atuheni omathimbo gamwe ohatu kale tu na iimpwiyu, opu na iinima yimwe mbyoka tatu vulu okuninga, opo kaatu kale tatu ipula unene. Moshitopolwa shika, tango otatu ka kundathana yimwe yomiinima mbyoka tashi vulika yi tu ningithe tu kale tatu ipula unene. Opo nduno, otatu ka kundathana iinima ihamano mbyoka tayi vulu oku tu kwathela tu kale twa ngungumana sho tatu ungaunga nomaupyakadhi getu.

3. Omashongo geni hatu taalele, notatu vulu ngaa oku ga yanda?

³ Opu na iinima oyindji mbyoka tayi vulu oku tu ningitha tu kale tatu ipula unene, noyimwe yomiinima mbyoka itatu vulu oku yi keelela kaayi ningwe. Pashiholelwa, itatu vulu okukeelela ondando yiikulya, yiizalomwa noyomagumbo yi ye pombanda noitatu vulu okutseya kutya olungapi aaniilonga pamwe natse nenge aanasikola ooyakwetu taye ke tu thiminika tu popye iifundja nenge tu ninge sha sha nyata. Itatu vulu wo okukeelela omiyonena  kaadhi ningwe moshitopolwa shetu. Ohatu taalele omashongo ngoka, molwaashoka otu li muuyuni mbuka wu na aantu oyendji ihaayi iyutha komakotampango gOmbiimbeli. Omupangeli gwuuyuni mbuka, Satana, oku shi kutya aantu yamwe otaye ke etha ‘iimpwiyu yuuyuni mbuka’ yi ya imbe kaaya longele Jehova. (Mat. 13:22; 1 Joh. 5:19) Itashi kumitha sho muuyuni mu na omaupyakadhi ogendji ngoka haga ningitha aantu ya kale ye na iimpwiyu oyindji.

4. Oshike tashi ke tu ningilwa ngele otwa kala tatu ipula unene nomaupyakadhi getu?

⁴ Otashi vulika tu kale owala twa pwila momaupyakadhi getu, e tatu kale kaatu na ko nasha niinima yilwe. Pashiholelwa, otashi vulika tu kale tatu ipula ngele otatu ka kala ngaa tu na iimaliwa ya gwana tu gwanithe po oompumbwe dhetu nenge twi ipule kutya ngele otwa tameke okweehama, otatu ka kanitha iilonga yetu. Otashi vulika wo tu kale tatu ipula kutya esiku limwe ngele otwi iyadha meyeleko, ita tu ka kala aadhiginini kuJehova. Masiku Satana ota ka ningitha mboka ye li kombinga ye ya ponokele oshigwana shaKalunga, notashi vulika tu kale tatu dhiladhila kombinga yankene tatu ki inyenga uuna eponokelo ndyoka lya tameke. Otashi vulika twi ipule tatu ti: ‘Mbela osha puka okukala tandi ipula niinima mbyono?’

5. Jesus okwa li a hala okutya shike sho a ti: ‘Inamu kala mu na iimpwiyu’?

⁵ Otu shi kutya Jesus okwa lombwela aalanduli ye ‘kaaya kale ye na iimpwiyu.’ (Mat. 6:25) Mbela Jesus okwa li ta ti kutya katu na nando okukala tatu ipula nasha? Hasho! Dhimbulukwa kutya monakuziwa yamwe yomaapiya yaJehova aadhiginini nayo oya li ye na iimpwiyu, ihe natango oya kala ya hokiwa kuJehova. * (1 Aak. 19:4; Eps. 6:3) Jesus moohapu dhe ndhoka okwa li owala te tu shilipaleke, opo kaatu kale tu na unene iimpwiyu yonkalamwenyo, oshoka ohayi tu imbi kaatu gandje eitulomo kokulongela Jehova. Oshike nduno tatu vulu okuninga, opo kaatu kale tu na unene iimpwiyu? — Tala oshimpungu “ Nkene to vulu oku shi ninga.”

6. Shi ikolelela kAafilippi 4:6, 7, oshike tashi vulu oku tu kwathela kaatu kale tu na unene iimpwiyu?

⁶ (1) Kala ho galikana pandjigilile. Uuna to ipula unene nuupyakadhi wontumba, oto vulu okugalikana Jehova e ku kwathele. (1 Pet. 5:7) Jehova ota vulu okuyamukula omagalikano goye moku ku pa ‘ombili ye, ndjoka yi vule uunongo auhe wopantu.’ (Lesha Aafilippi 4:6, 7.) Jehova ote ke ku pa ombili ye ndjoka, okupitila mombepo ye ondjapuki ndjoka yi na oonkondo. — Gal. 5:22.

7. Oshike tu na okukaleka momadhiladhilo, uuna tatu galikana?

⁷ Uuna to popi naJehova megalikano, mu mbumbulila omutima gwoye. Kala ho tumbula iinima kondandalunde. Mu lombwela kutya uupyakadhi owu li peni, e to mu lombwele nkene wu uvite. Ngele uupyakadhi woye otawu vulu okukandulwa po, mu pula e ku pe oondunge nosho wo oonkondo wu vule oku shi ninga. Nongele itawu vulu okukandulwa po, mu pula e ku kwathele kuu kale to ipula unene nasho. Uuna ho popi iinima kondandalunde momagalikano goye, mokweendela ko kwethimbo oto ke shi mona sha yela nkene Jehova e ga yamukala. Ngele omagalikano goye inaga yamukulwa mbala, ino etha po okugalikana. Jehova ina hala owala wu kale ho popi iinima kondandalunde uuna to mu galikana, ihe okwa hala wo wu kale ho galikana pandjigilile. — Luk. 11:8-10.

8. Oshike tatu vulu okukala hatu kwatele momagalikano getu?

 ⁸ Sho to mbumbulile Jehova omutima gwoye megalikano, kala wo ho mu pandula. Otwa pumbwa okukala hatu dhimbulukwa uuwanawa awuhe mboka Jehova e tu ningila, nonando otwa taalela oonkalo oondhigu. Ngele omathimbo gamwe iho kala wu na iitya nomatumbulo wu lombwele Jehova nkene wu uvite, dhimbulukwa kutya Jehova ota ka yamukula egalikano lyoye, nonando owu mu galikane owala paufupi to ti: ‘Alikana kwatha ndje!’ — 2 Ondjal. 18:31; Rom. 8:26.

9. Ongiini tatu vulu okumona egameno lyashili?

⁹ (2) Inekela mewiliko lyaJehova, ihe hamungoye mwene. Pethimbo lyomuhunganeki Jesaja, aantu yomuJuda oya li ya tila okuponokelwa kAayassur. Molwaashoka aantu yomuJuda kaya li ya hala ya sindike kAayassur, oya pula Egipiti e ya kwathele. (Jes. 30:1, 2) Jehova okwa li e ya londodha kutya einekelo lyawo muEgipiti itali tompola sha. (Jes. 30:7, 12, 13) Jehova okwe ya lombwele okupitila muJesaja, nkene taya vulu okumona egameno lyashili. Okwe ya lombwele a ti: ‘Inekelii ndje meimweneneno, notamu kala mu na oonkondo e tamu hupithwa.’ — Jes. 30:15b.

10. Omoonkalo dhini tatu vulu okuulika einekelo lyetu muJehova?

¹⁰ Ongiini tatu vulu oku ulika kutya otwi inekela muJehova? Natu ka taleni kiiholelwa tayi landula: Natu tye ando owa pewa iilonga hayi futu nawa, mbyoka tayi ke ku pula wu kale ho longo oowili dha gwedhwa po. Shimwe ishewe, otayi ke ku imba wu longele Jehova ngaashi shito. Nenge pu na omuniilonga pamwe nangoye ha kala e ku hala, ihe ke shi Onzapo yaJehova. Nenge tu tye gumwe gwomaantu yaandjeni e ku lombwele kutya pokati ke nokulongela Jehova, hogolola po shimwe. Ngele owi iyadha wu li moonkalo ndhoka, otashi vulika wu kale kuu shi kutya ninga shike. Ihe moompito dha tya ngawo, Jehova ote ke ku kwathela. (Mat. 6:33; 10:37; 1 Kor. 7:39) Mbela oto ka vulika ngaa kuJehova nokulandula omalombwelo ge?

11. Iiholelwa yini yopaMbiimbeli tatu vulu okukonakona, opo tu kale twa ngungumana uuna twa taalela omapataneko?

¹¹ (3) Ilonga kiiholelwa iiwanawa naambyoka iiwinayi. MOmbiimbeli omu na iiholelwa yankene okukala wa ngungumana nokwiinekela muJehova kwa simana. Sho to konakona iiholelwa mbyoka, ndhindhilika shoka sha li sha kwathele aapiya yaKalunga ya kale ya ngungumana, sho ya li ya taalele omapataneko ga kwata miiti. Pashiholelwa, sho ompangu yopombanda yAajuda ya lombwele aayapostoli kaayu uvithe we, kaya li ya kwatwa kuumbanda. Pehala lyaashono, oya popi nuulaadhi ya ti: “Otse otu na okuvulika kuKalunga, hakaantu.” (Iil. 5:29) Nokuli nokonima sho ya dhengwa, kaya li ya shuna omutse miipeta. Omolwashike mbela? Omolwaashoka oya li ye shi kutya Jehova ote ya ambidhidha. Jehova okwa li e ya hokwa. Onkee ano, oya li ya tsikile okuuvitha onkundana ombwanawa. (Iil. 5:40-42) Sha faathana, sho omulongwa Stefanus, a li pokudhipagwa, okwa kala owala e na ombili nokwa ngungumana noshipala she “osha li sha fa oshipala shomuyengeli.” (Iil. 6:12-15) Omolwashike mbela? Omolwaashoka okwa li e na uushili kutya Jehova okwe mu hokwa.

12. Shi ikolelela kuPetrus gwotango 3:14 nosho wo 4:14, omolwashike tatu vulu okukala twa nyanyukwa uuna tatu hepekwa?

¹² Aayapostoli oya li ye shi mono lela kutya Jehova okwa li pamwe nayo. Jehova okwa li e ya pe oonkondo, opo ya vule okulonga iikumithalonga. (Iil. 5:12-16; 6:8) Tse kunena ihe tu pe oonkondo dhokulonga iikumithalonga. Nonando ongawo, Jehova ote tu shilipaleke pahole mOohapu dhe kutya ota ka kala e tu hokwa note ke tu pa ombepo ye ondjapuki, uuna tatu monithwa iihuna molwaashono  tatu mu longele. (Lesha 1 Petrus 3:14; 4:14.) Onkee ano, katu na okukala tatu ipula unene nomapataneko ngoka tatu ka tsakaneka monakuyiwa. Pehala lyaashono, otu na okuninga ngaashi tatu vulu, tu koleke einekelo lyetu muJehova, nokukala tu shi kutya ote ke tu ambidhidha noku tu gamena. Ngaashi owala aalongwa yaJesus yonale ya li ya ningi, natse otu na okukala twi inekela meuvaneko lyaJesus ndyoka tali ti: “Ngame otandi ke mu pa iitya noondunge tadhi nyenge aatondi yeni ayehe oku mu kondjitha noku mu ludhikitha.” Otu na wo eshilipaleko ndika tali ti: “Mokwiidhidhimika otamu ihupithile oomwenyo dheni.” (Luk. 21:12-19) Katu na okudhimbwa nando kutya Jehova oha dhimbulukwa kehe okanima kombinga yomupiya gwe ngoka a sa omudhiginini kuye, opo a vule oku ke mu yumudha e li ngaashi a li.

13. Ongiini tatu vulu okumona mo uuwanwa mokukonakona iiholelwa yaamboka ya li ya ndopa okukala ya ngungumana nokukala yi inekela muJehova?

¹³ Otatu vulu wo okwiilonga sha miimoniwa yaamboka ya li ndopa okukala ya ngungumana nokukala yi inekela muJehova. Ngele otwa konakona iiholelwa yawo mbyoka iiwinayi, otashi ke tu kwathela tu yande okuninga omapuko ngoka ya li ya ningi. Pashiholelwa, omukwaniilwa gwaJuda, Asa, petameko lyelelo lye okwa li i inekela muJehova sho etangakwiita enene lya li lye mu ponokele. (2 Ondjal. 14:9-12) Ihe lwanima, sho etangakwiita eshona lyomukwaniilwa Baasha gwaIsraeli lye mu ponokele, okwa li a futu etangakwiita lyaSiria li mu kwathele, pehala lyokukonga ekwatho kuJehova ngaashi a ningile nale. (2 Ondjal. 16:1-3) Naasho a li te ehamenene, ka li i inekele muJehova. — 2 Ondjal. 16:12.

14. Oshike tatu vulu okwiilonga komapuko gaAsa?

¹⁴ Petameko, Asa okwa li ha kongo ekwatho kuJehova uuna a taalelwa komaupyakadhi. Ihe lwanima okwe ke shi etha po, e ta tokola okukala hu ungaunga nomaupyakadhi kuye mwene. Ondunge yaAsa yokupula ekwatho kAayassur, opo a ka kondjithe Aaisraeli, oya li tayi monika ya fa yi li nawa. Ihe ondunge ye ndjoka inayi longa ethimbo ele. Jehova okwe mu lombwele okupitila momuhunganeki, a ti: “Molwashoka wi itula omukwaniilwa gwaSiria peha lyokwiinekela Omuwa, Kalunga koye, etangakwiita lyomukwaniilwa gwaIsrael olye ku yi ontuku.” (2 Ondjal. 16:7) Otu na okukala twa kotoka kaatu dhiladhile kutya otatu vulu okukandula po omaupyakadhi getu kutse yene, kaapu na okupula ekwatho kuJehova. Nokuli nuuna tu na okuninga etokolo meendelelo, otwa pumbwa okukala twa ngungumana notwi inekela muJehova, note ke tu kwathela tu ninge etokolo lyopandunge.

15. Oshike tatu vulu okuninga uuna tatu lesha Ombiimbeli?

¹⁵ (4) Ilonga momutse oovelise dhOmbiimbeli. Uuna wa mono oovelise dhOmbiimbeli ndhoka tadhi popi kombinga yankene sha simana okukala twa ngungumana notwi inekela muJehova, dhi ilonga momutse. Opo shi kale oshipu oku shi ninga, kala ho dhi lesha muule nenge wu dhi nyole pokuma, e to kala ho dhi leshulula omathimbo nomathimbo. Jehova okwa li a lombwele Josua a kale ha lesha aluhe embo lyompango newi lyopevi, opo a katuke pandunge. Shoka osha li tashi ke mu kwathela a kale inaa tila noku kale e na uulaadhi sho ta wilike oshigwana shaKalunga. (Jos. 1:8, 9) Oovelise odhindji dhomOohapu dhaKalunga otadhi vulu oku ku kwathela wu kale wa ngungumana moonkalo ndhoka tashi vulika dhi ku ningithe wu kale wa tila nenge to ipula unene. — Eps. 27:1-3; Omayel. 3:25, 26.

16. Jehova oha longitha ngiini egongalo e tu kwathele tu kale twa ngungumana notwe mu inekela?

¹⁶ (5) Kala ho endathana noshigwana shaKalunga. Jehova oha longitha aamwatate naamwameme, ye tu kwathele tu kale twa ngungumana noku mu inekela. Pokugongala ohatu  mono uuwanawa miipopiwa mbyoka hayi gandjwa kaamwatate naamwameme komutuni, momatyokosha gawo nosho wo okuptila moonkundathana tadhi tungu ndhoka hatu kala tu na nayo. (Heb. 10:24, 25) Okupopya wo nookuume ketu aainekelwa megongalo nkene tu uvite, ohaku tu kumike. “Oohapu dhuukuume” ohadhi vulu oku tu kwathela kaatu kale tatu ipula unene. — Omayel. 12:25.

17. Shi ikolelela kAahebeli 6:19, ongiini etegameno lyetu lyUukwaniilwa tali vulu oku tu kwathela twi idhidhimikile oonkalo oondhigu?

¹⁷ (6) Kaleka etegameno lyoye lya kola. Etegameno lyetu lyUukwaniilwa “olya kwata lya dhiginina oomwenyo dhetu,” nohali tu kwathele tu idhidhimikile oonkalo oondhigu nokaatu kale tatu ipula unene. (Lesha Aahebeli 6:19.) Kala ho tedhatedha konakuyiwa ndjoka Jehova e tu uvanekela muuyuni uupe, moka itaatu ka kala we tatu ipula nasha. (Jes. 65:17) Kala wa fa wi iwete wu li muuyuni uupe, moka itaamu ka ningwa uuwinayi. (Mika 4:4) Uuna to lombwele yalwe kombinga yuuyuni uupe, etegameno lyoye otali ka kola. Ninga ashihe shoka to vulu miilonga yokuuvitha noyokuninga aantu aalongwa. Ngele owa kala ho shi ningi, otashi ke ku kwathela wu ‘dhiginine sigo okehulilo, opo wu adhe shoka wa kala we shi tegamena.’ — Heb. 6:11.

18. Omashongo geni tashi vulika tu ka taalele monakuyiwa, nongiini tatu vulu oku gi idhidhimikila?

¹⁸ Sho uuyuni mbuka tawu ende wu uka kehulilo, otatu ka adhika komaupyakadhi ogendji ngoka taga vulu oku tu ningitha tu kale tatu ipula unene. Enyolo lyetu lyomumvo 2021 otali tu kwathele tu kale twi inekela muJehova, ihe hamoonkondo dhetu yene, sho tatu idhidhimikile omaupyakadhi ngoka notu kale twa ngungumana. Momumvo tagu ya, natu shi ulikeni miilonga yetu kutya otwi itaala meuvaneko lyaJehova ndyoka tali ti: ‘Inekelii ndje meimweneneno, notamu kala mu na oonkondo.’ — Jes. 30:15.