OSHITOPOLWA SHOKUKONAKONWA 3
Ongundu onene yoonzi dhilwe tayi tanga Kalunga naKristus
“Ehupitho otali tu zile kuKalunga ketu ngoka a kuutumba koshipangelapundi, notali tu zile wo kOnzigona!” — EH. 7:10.
EIMBILO 14 Natu tangeni Omukwaniilwa gwuuyuni omupe
ELALAKANO LYOSHITOPOLWA *
1. Omulumentu gumwe omugundjuka okwa li a gumwa ngiini koshipopiwa shoka sha li sha gandjwa poshigongi shoshitopolwa mo 1935?
OMULUMENTU gumwe omugundjuka okwa li e na oomvula 18, sho a ninginithwa mo 1926. Aavali ye oya li Aakonakoni yOmbiimbeli, ngaashi Oonzapo dhaJehova dha li hadhi ithanwa pethimbo ndyoka. Aavali ye oya li ye na aamati yatatu naakadhona yaali, noye ya longo ya kale ye hole Jehova noya kale haya holele Jesus. Ngaashi owala Aakonakoni yOmbiimbeli yopethimbo lye, omulumentu omugundjuka ngoka naye okwa li ha li oshikwiila nokunwa omaviinu omumvo kehe pEdhimbuluko. Ihe etegameno lye lyonakuyiwa olya li lya lunduluka sho a pulakene oshipopiwa sha simana shi na oshipalanyolo tashi ti “Ongundu onene.” Oshipopiwa shoka osha li sha gandjwa mo 1935 komumwatate J. F. Rutherford poshigongi shoshitopolwa moWashington, D.C., shaAmerika. Poshigongi shoka Aakonakoni yOmbiimbeli oya li yi ilongo po shike?
2. Omumwatate Rutherford okwa li a yelitha oshili yini moshipopiwa she?
2 Omumwatate Rutherford moshipopiwa she okwa li e shi yelitha kutya “ongundu onene” ndjoka ya popiwa mEhololo 7:9, otayi ka thikama po moolye. Sigo ethimbo ndyoka, Aakonakoni yOmbiimbeli oya li yi itaala kutya ongundu onene oyi li ongundu ndjoka tayi ka ya megulu, ndjoka kaaya li naanaa ondhiginini ngaashi aagwayekwa. Omumwatate Rutherford okwa li a longitha Omanyolo a yelithe kutya ongundu onene inayi hogololwa yi ye megulu, ihe oyi li oonzi dhilwe dhaKristus * ndhoka tadhi ka hupa “puudhigu uunene” noku ka kala nomwenyo sigo aluhe kombanda yevi. (Eh. 7:14, NW) Jesus oku uvaneka a ti: “Oku na oonzi dhandje dhilwe ndhoka kaadhi mo moshigunda shika. Nadho wo ondi na oku dhi eta mo, notadhi ka uva ewi lyandje e tadhi ka ninga oshigunda shimwe nodhi na omusita gumwe.” (Joh. 10:16) Oonzi dhilwe otadhi ulike kOonzapo oondhiginini dhaJehova ndhoka dhi na etegameno lyoku ka kala nomwenyo sigo aluhe mOparadisa kombanda yevi. (Mat. 25:31-33, 46) Natu ka taleni nkene euvoko ndyoka epe kombinga yoshili yOmbiimbeli lya li lya lundulula onkalamwenyo yaapiya yaJehova oyendji, mwa kwatelwa wo omumwatate omugundjuka gwomimvo 18 ngoka twa zi nokupopya metetekelo. — Eps. 97:11; Omayel. 4:18.
EUVOKO EPE NDYOKA LYA LUNDULULA ONKALAMWENYO YAANTU OMAYOVI
3-4. Poshigongi shoshitopolwa shomo 1935, aantu omayovi oya li ya ndhindhilike shike kombinga yetegameno lyawo, noye shi ndhindhilike ngiini?
3 Osha li lela oshihokithi sho poshigongi shoshitopolwa omupopi a pula aakalipo a ti: “Mboka mu na etegameno lyoku ka kala nomwenyo sigo aluhe kombanda yevi, thikameni!” Omumwatate gumwe ngoka a li po okwa ti kutya etata lyaantu mboka ya li poshigongi shoka oya li ya thikama. Opo nduno omumwatate Rutherford okwe ya popi a ti “Ongundu onene oyo ndjoka!” Konima yaashono, kehe gumwe poshigongi okwa li ti igidha a nyanyukwa. Mboka ya li ya thikama oya li ye shi ndhindhilike kutya inaya hogololwa ya ye megulu. Oya li ye shi kutya inaya gwayekwa nombepo ondjapuki. Esiku lya landula ko lyoshigongi shoka, aantu 840 oya li ya ninginithwa, noyendji yomuyo oya li yomoonzi dhilwe.
4 Konima yoshipopiwa shoka, omulumentu omugundjuka ngoka twa zi nokupopya metetekelo nosho wo aantu yalwe omayovi, oye etha po okulya oshikwiila nokunwa omaviinu pEdhimbuluko. Omumwatate gumwe okwa popi neifupipiko kombinga yankene oyendji ya li yu uvite, a ti: “Oshikando shahugunina nda lya oshikwiila nokunwa omaviinu pEdhimbuluko, osha li mo 1935. Onde ke shi ndhindhilika kutya inandi gwayekwa nombepo ondjapuki, pehala lyaashono, ondi na etegameno lyoku ka kala kombanda yevi noku ka kutha ombinga miilonga yokutamununa mo oparadisa.” (Rom. 8:16, 17; 2 Kor. 1:21, 22) Okuza ethimbo ndyoka, omwaalu gwongundu onene ogwa kala tagu indjipala noya kala tayi longo pamwe naagwayekwa mboka ya thigala ko kombanda yevi. *
5. Jehova oha tala ko ngiini mboka ye etha po okulya oshikwiila nokunwa omaviinu pEdhimbuluko?
5 Jehova okwa tala ko ngiini mboka ya li ye etha po okulya oshikwiila nokunwa omaviinu pEdhimbuluko konima 1935? Jehova oha kala wo u uvitile ngiini Onzapo ya ninginithwa ndjoka yi itaala kutya oyi na okukutha ombinga mokulya oshikwiila nomokunwa omaviinu pEdhimbuluko, ihe lwanima tayi shi ndhindhilike mo kutya inayi gwayekwa shili nombepo ondjapuki? (1 Kor. 11:28) Yamwe ohaya li oshikwiila nokunwa omaviinu pEdhimbuluko, molwaashoka ye na eitaalo lya puka shi na ko nasha netegameno lyawo. Ihe ngele oye shi zimine kutya oya ninga epuko, e taya etha po okulya oshikwiila nokunwa omaviinu pEdhimbuluko nokutsikila okulongela Jehova nuudhiginini, Jehova ote ke ya taamba ko ye li yamwe yomoonzi dhe dhilwe. Nonando ihaya kutha we ombinga mokulya oshikwiila nokunwa omaviinu pEdhimbuluko, natango pEdhimbuluko opo haya kala molwaashoka oya pandula noonkondo shoka Jehova naJesus ye ya ningila.
ETEGEMENO LYI IKALEKELWA
6. Jesus ota wilike aayengeli ya ninge shike?
6 Molwaashoka uudhigu uunene owu li pokutameka, okukundathana kombinga yaashoka Ehololo ontopolwa 7 tali ti kombinga yaagwayekwa nosho wo ongundu onene yoonzi dhilwe, otashi ke tu tsa omukumo. Jesus oye ta wilike aayengeli ya tsikile okukeelela oombepo ne oohanaguli. Kaye na okweetha oombepo ndhoka dhi pepe kevi, sigo oosho aagwayekwa Aakriste ayehe ya tulwa iihako miipala, ano yu ulika kutya aadhiginini kuJehova. (Eh. 7:1-4) Omolwuudhiginini wawo, aamwahe yaKristus aagwayekwa otaya ka ninga aakwaniilwa naayambi pamwe naye megulu. (Eh. 20:6) Ayehe mboka ye li oshitopolwa shuukwanegumbo waKalunga womegulu otaya ka kala ya halelela okumona aagwayekwa 144 000, taya pewa ondjambi yawo yomegulu.
Ongundu onene ya zala oonguwo oonde oontokele noyi na iiyale miikaha, ya thikama komeho yoshipangelapundi shaKalunga tashi adhima nosho wo komeho yonzigona (Tala okatendo 7)
7. Ngaashi sha popiwa mEhololo 7:9, 10, oolye Johannes a mono memoniko, noya li taya ningi shike? (Tala ethano lyokombanda.)
7 Konima sho a popi kombinga yaakwaniilwa naayambi 144 000, Johannes okwa mono oshinima shilwe shinyanyudha, ano “ongundu onene” ndjoka ya hupa puArmagedon. Oongundu ndhika mbali odha yoolokathana, molwaashoka “ongundu onene” oya thikama po maantu oyendji ye vule aagwayekwa 144 000, nokatu shi kutya omwaalu gwongundu onene otagu ka kala lela gu thike peni. (Lesha Ehololo 7:9, 10.) Memoniko lyaJohannes, mboka yomongundu onene ‘oya zala oonguwo oonde oontokele,’ shoka tashi ulike kutya inaya ‘nyatekwa kuuyuni’ waSatana noya kala aadhiginini kuKalunga nokuJesus. (Jak. 1:27) Otaya igidha wo kutya oya hupithwa omolwashoka Jehova naJesus, Onzigona yaKalunga, ya ninga. Pethimbo opo tuu mpoka, oye na iiyale momake, shoka tashi ulike kutya oya taamba ko nenyanyu Jesus, ngoka a langekwa po kuJehova e li Omukwaniilwa. — Yelekanitha Johannes 12:12, 13.
8. Ehololo 7:11, 12, otali tu lombwele shike kombinga yaayengeli megulu?
8 Lesha Ehololo 7:11, 12. Aayengeli megulu oya li yi inyenge ngiini, sho ya mono ongundu onene? Johannes okwa mono ayehe megulu ya nyanyukwa noya hambelele Kalunga, sho ya mono ongundu onene. Aayengeli otaya ka kala ya nyanyukwa noonkondo uuna ye wete emoniko ndyoka tali gwanithwa sho ongundu onene tayi ka pita mo muudhigu uunene.
9. Shi ikolelela kEhololo 7:13-15, ongundu onene otayi ningi shike kunena?
9 Lesha Ehololo 7:13-15. Johannes memoniko lye okwa ti kutya ongundu onene “oya yogo oonguwo dhawo noye dhi yelitha nombinzi yOnzigona.” Shoka otashi ulike kutya oye na eiyuvo lya yela nosho wo kutya oya hokiwa kuJehova. (Jes. 1:18) Oye li Aakriste yi iyapulila Jehova noya ninginithwa, ye na eitaalo lya kola mekuliloyambo lyaJesus noye na uukuume wopothingo naJehova. (Joh. 3:36; 1 Pet. 3:21) Onkee ano, oya gwana okuthikama komeho yoshipangelapundi shaKalunga, ye mu ‘yakule uusiku nomutenya’ kombanda yevi. Ngashingeyi, ohaya longo nuulaadhi miilonga yokuuvitha noyokuninga aantu aalongwa, molwaashoka Uukwaniilwa waKalunga owo wa simanenena monkalamwenyo yawo. — Mat. 6:33; 24:14; 28:19, 20.
Yamwe yomongundu onene yoonzi dhilwe ya nyanyukwa sho ya pita mo muudhigu uunene (Tala okatendo 10)
10. Uushili wuni ongundu onene yi na, neuvaneko lini tayi ka mona tali gwanithwa?
10 Ongundu onene ndjoka tayi ka pita mo muudhigu uunene oyi na uushili kutya Kalunga ota ka tsikila oku yi sila oshimpwiyu, molwaashoka “Ngoka a kuutumba koshipangelapundi, ote ya gamene nokukalapo kwe.” Euvaneko ndyoka oonzi dhilwe dha kala dha tegelela li gwanithwe, ndyoka tali ti: “[Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame,” otali ka gwanithwa. — Eh. 21:3, 4.
11-12. (a) Ngaashi sha popiwa mEhololo 7:16, 17, omalaleko nuuyamba geni ongundu onene ya tegelela? (b) Oonzi dhilwe pEdhimbuluko otadhi vulu okuninga shike, nomolwashike?
11 Lesha Ehololo 7:16, 17. Kunena, yamwe yomaapiya yaJehova otaya mono iihuna, molwaashoka kaye na iimaliwa ya gwana ya lande iikulya nenge molwaashoka miilongo yawo mu na omakuyunguto niita. Yamwe oya tulwa moondholongo omolweitaalo lyawo. Nonando ongawo, mboka yomongundu onene oya nyanyukwa, molwaashoka oye shi kutya konima ngele ya hupu pehanagulo lyuuyuni mbuka wa kolokosha, otaya ka kala aluhe ye na iipumbiwa yonkalamwenyo niikulya yopambepo ya gwana. Sho Jehova ta ka hanagula po uuyuni waSatana, ota ka shilipaleka kutya ongundu onene itayi ka gumwa kongeyo Ye ndyoka tayi ka kala ya fa “epupyu.” Konima yuudhigu uunene, Jesus ota ka fala mboka ya hupa ‘koothithiya dhomeya gwomwenyo gwaaluhe.’ Dhiladhila owala: Ongundu onene oyi na etegameno ewanawa. Mepingathano naantu omabiliyona mboka ya li nomwenyo, yo otashi vulika kaaya ka se we! — Joh. 11:26.
12 Oonzi dhilwe odhi na etegameno ewanawa noonkondo ndhoka dhi na okupandulila Jehova naJesus. Nonando Jehova ine dhi hogolola dhi ka kale megulu, natango oku dhi hole ngaashi owala e hole aagwayekwa. Aantu ayehe yomoongundu ndhoka mbali otaya vulu okutanga Jehova naKristus. Omukalo gumwe tadhi vulu oku shi ninga, omo ku kala po pEdhimbuluko.
TANGA JEHOVA NOMUTIMA GWOYE AGUHE PEDHIMBULUKO
Oshikwiila nomaviinu ngoka haga taambekidhwa pEdhimbuluko, ohage tu dhimbulukitha kutya Jesus okwa sa peha lyetu, opo tu ka mone omwenyo gwaaluhe (Tala okatendo 13-15)
13-14. Omolwashike atuheni kutya nduno oonzi dhilwe nenge aagwayekwa twa pumbwa okukala po pEdhimbuluko?
13 Momimvo opo dha zi ko, omuntu gumwe owala gwomaantu eyovi a li oshikwiila nokunwa omaviinu pEdhimbuluko. Momagongalo ogendji ihamu kala nando omuntu gumwe ngoka ha kutha ombinga mokulya oshikwiila nokunwa omaviinu pEdhimbuluko. Oyendji yomwaamboka haya kala pEdhimbuluko oye na etegameno lyoku ka kala nomwenyo sigo aluhe kombanda yevi. Ngele osho shi li ngawo, omolwashike nduno haya kala po pEdhimbuluko? Etompelo lyawo olya faathana nolyaamboka haye ya kohango yakuume kawo. Ookuume ohaye ya kohango yu ulike kutya oye hole nosho wo kutya oya hala okwaambidhidha aaihokani. Onkee ano, mboka ye li oshitopolwa shoonzi dhilwe ohaya kala pEdhimbuluko, molwaashoka ya hala okuulika kutya oye hole noya hala okwaambidhidha Kristus naagwayekwa. Ohaya kala po wo yu ulike olupandu omolwekuliloyambo lyaJesus ndyoka lye shi ningitha tashi wapa ya ka kale nomwenyo sigo aluhe kombanda yevi.
14 Etompelo limwe lya simana kutya omolwashike oonzi dhilwe hadhi kala po pEdhimbuluko, oosho dha hala dhi vulike kelombwelo lyaJesus. Sho Jesus a dhiki po uulalelo mboka wi ikalekelwa pamwe naayapostoli ye aadhiginini, okwe ya lombwele a ti: “Shi ningeni nokudhimbulukwa ndje.” (1 Kor. 11:23-26) Onkee ano, oonzi dhilwe otadhi ka tsikila okukala po pEdhimbuluko sigo oosho aagwayekwa ayehe aadhiginini ya yi megulu. Oonzi dhilwe ohadhi hiya aantu ayehe ya kale pEdhimbuluko pamwe nadho.
15. Ongiini tatu vulu okutanga Kalunga naKristus pEdhimbuluko pauhandimwe?
15 PEdhimbuluko, ohatu kala tu na ompito tu tange Kalunga naKristus okupitila mokwiimba nomokugalikana. Oshipopiwa shoka tashi ka gandjwa pEdhimbuluko nuumvo, oshi na oshipalanyolo tashi ti: “Ulika kutya owa pandula shoka Kalunga naKristus ye ku ningila.” Oshipopiwa shoka otashi ke tu kwathela tu kale tu hole Jehova naKristus shi vulithe nale. Sho tatu taambathana oshikwiila nomaviinu esiku ndyoka, otatu ka dhimbulukithwa shoka taga thaneke, ano olutu nombinzi yaJesus. Otatu ka dhiladhila wo kohole ndjoka Jehova e tu ulukila sho a gandja Omwana e tu sile. (Mat. 20:28) Kehe ngoka e hole Tate yetu gwomegulu nOmwana, ota ka kala a halelela okukala po pEdhimbuluko.
PANDULA JEHOVA OMOLWETEGAMENO NDYOKA E KU PA
16. Omomikalo dhini aagwayekwa noonzi dhilwe ya faathana?
16 Eyooloko ndyoka li li pokati kaagwayekwa noonzi dhilwe inali ningitha Jehova a kale e hole uunene ongundu yimwe shi vulithe onkwawo. Jehova oongundu adhihe mbali okwe dhi tala ko dhi thike pamwe noku dhi hole adhihe. Uushili waashoka otu wu shi, molwaashoka sho a kulile aagwayekwa noonzi dhilwe, okwa futu ofuto yi thike pamwe, ano omwenyo gwaJesus. Eyooloko ndyoka li li pokati koongundu ndhoka mbali, oosho owala dhi na omategameno ga yoolokathana. Ihe oongundu adhihe mbali odhi na okukala oondhiginini kuKalunga nokuKristus. (Eps. 31:23) Inatu dhimbwa wo kutya Jehova oha gandja ombepo ye ondjapuki kukehe gumwe, kashi na nduno mbudhi kutya oku li omugwayekwa nenge ogwomoonzi dhilwe.
17. Aagwayekwa mboka ya thigala kombanda yevi oya tegelela nondjuulukwe oku ka ninga shike?
17 Aakriste aagwayekwa ihaya valwa ye na etegameno lyoku ka kala megulu. Jehova oye he ya pe etegameno ndyoka. Ohayi ipula kombinga yetegameno lyawo, ohaya galikana kombinga yalyo nohaya kala ya halelela oku ka mona ondjambi yawo megulu. Kaye shi kutya megulu omalutu gawo otaga ka kala ga fa peni. (Fil. 3:20, 21; 1 Joh. 3:2) Nonando ongawo, oya tegelela nondjuulukwe oku ka tsakanena naJehova, Jesus, aayengeli naagwayekwa yalwe noya halelela oku ka kala pamwe nayo mUukwaniilwa womegulu.
18. Oonzi dhilwe odha tegelela nondjuulukwe oku ka ninga shike?
18 Oonzi dhilwe odha tegelela nondjuulukwe oku ka kala nomwenyo sigo aluhe kombanda yevi, shoka shi li ehalo lyomuntu kehe. (Omuuv. 3:11) Oya nyanyukwa sho ye shi kutya otaya ka kutha ombinga mokuninga evi alihe oparadisa. Oya tegelela sho taya ka tunga omagumbo gawo yene, ye na iikunino yawo nokuputudha oyana ye na uukolele wi ihwapo. (Jes. 65:21-23) Oya tegelela wo sho taye ke endaenda nevi alihe nokutala oondundu, omakuti, omafuta nokukonakona eshito lyaJehova. Shoka sha simanenena, oya nyanyukwa noonkondo, sho taya ka kala ye na ekwatathano lyopothingo naJehova shi vulithe nale.
19. Edhimbuluko ohali pe kehe gumwe gwomutse ompito yashike, notali ka kala ko uunake nuumvo?
19 Jehova okwa pa aapiya ye ayehe etegameno ewanawa noonkondo. (Jer. 29:11) Edhimbuluko lyeso lyaKristus ohali tu pe ompito tu tange Kalunga naKristus, omolwashoka ye tu ningila, opo tu ka nyanyukilwe omwenyo gwaaluhe. Kapu na omalimbililo kutya Edhimbuluko oli li okugongala kwa simana kAakriste ayehe yashili. Nuumvo otali ka ningwa komatango mOlyomakaya, 27 gaMaalitsa 2021. Aantu oyendji muuyuni awuhe otaya ka vula okukala po. Yalwe otaya ka kala po nonando otaya patanekwa, nayalwe otaye ke li ningila moondholongo. Jehova, Jesus naayengeli otaya ka kala ye tu tala, onkee ano, kutya otu li egongalo, ongundu nenge otse atuke, natu nyanyukilwe esiku ndyoka lyi ikalekelwa!
EIMBILO 150 Kongeni Kalunga, opo mu ka hupithwe
^ okat. 5 Omasiku 27 Maalitsa 2021, oli li esiku lyi ikalekelwa kOonzapo dhaJehova. Uusiku wesiku ndyoka otatu ka dhimbulukwa eso lyaJesus. Oyendji yomwaamboka taya ka kala po, oye li oshitopolwa shongundu ndjoka Jesus a popi kutya “oonzi dhilwe.” Oshili yini kombinga yongundu ndjoka ya li ya tseyithwa mo 1935? Oonzi dhilwe odha tegelela shike shi ka ningwe konima yuudhigu uunene? Nongiini oonzi dhilwe tadhi vulu okusimanekitha Kalunga nosho wo Kristus pEdhimbuluko?
^ okat. 2 OMAUTUMBULILO GA YELITHWA: Oonzi dhilwe odha kwatela mo mboka ya ningi wo ooitaali momasiku gahugunina. Oye li aalanduli yaKristus noye na etegameno lyoku ka kala nomwenyo sigo aluhe kombanda yevi. Ongundu onene oyo oonzi dhilwe ndhoka tadhi ka kala nomwenyo sho Kristus ta ka pangula aantu puudhigu uunene, notadhi ka pita mo wo muwo.
^ okat. 4 UUTUMBULILO WA YELITHWA: Uutumbulilo “mboka ya thigala ko” otawu ulike kaagwayekwa mboka natango ye na omwenyo kombanda yevi nohaya kutha ombinga mokulya oshikwiila nokunwa omaviinu pEdhimbuluko.
