1. Ohole yaKalunga yoku tu hola ohayi ku ningitha wu kale wu uvite ngiini?

OMUYAPOSTOLI Johannes okwa nyola a ti: “Kalunga oye ohole.” (1 Joh. 4:8) Otu shi kutya Kalunga oye Omushiti, ihe uutumbulilo mboka uufupi otawu tu kwathele tu dhimbulukwe wo kutya oye Onzo yohole. Jehova oku tu hole! Ohole ye yoku tu hola ohayi tu ningitha tu kale tu uvite twa gamenwa, twa nyanyukwa notwa gwanenwa.

2. Shi ikolelela kuMateus 22:37-40, iipango iyali iinene oyini, nomolwashike tashi vulika tu shi mone oshidhigu okuvulika kwaashoka oshitiyali?

² Tu li Aakriste, itatu vulu okuhogolola ngele otu na okuulika ohole nenge hasho. Oku shi ninga oku li oshitegelelwa. (Lesha Mateus 22:37-40.) Ngele otwa tseya Jehova nawa, otashi vulika tu shi mone oshipu okuvulika koshipango shoka shotango. Kakele kaashono, Jehova okwa gwanenena, oku nako nasha natse nohu ungaunga natse nolukeno. Ihe otashi vulika tu shi mone oshidhigu okuvulika koshipango oshitiyali. Omolwashike mbela? Omolwaashoka aamwatate naamwameme inaya gwanenena. Omathimbo gamwe otashi vulika ya popye nenge yu ungaunge natse kaashi li pahole. Jehova okwa li e shi kutya otashi ka kala oshidhigu kutse okuvulika koshipango shoka, onkee okwa nwetha mo yamwe yomaanyoli yOmbiimbeli ya nyole kombinga yankene tu na okuulukila yalwe ohole nosho wo kutya omolwashike tu na oku shi ninga. Gumwe gwomaanyoli mboka okwa li Johannes. — 1 Joh. 3:11, 12.

3. Johannes okwa popi shike kombinga yohole?

³ MomamboMmbiimbeli ngoka Johannes a nyola, okwa kala ta tsu omuthindo kutya Aakriste oye na okuulika ohole. Sho Johannes a nyola kombinga yonkalamwenyo yaJesus, okwa longitha iitya  “ohole” nenge “okuhola” iikando oyindji e vule aanyoli yEvaangeli ayehe kumwe. Johannes okwa nyola embo ndyoka a lukilwa nosho wo oontumwafo dhe ndatu, sho a li e na omimvo ethele lwaampono. OmamboMbiimbeli ngoka ota ge tu longo kutya tu li Aakriste, otu na okukala aluhe aanahole. (1 Joh. 4:10, 11) Nonando ongawo, osha pula Johannes ethimbo a tseye oshinima shoka.

4. Mbela Johannes okwa li ngaa aluhe hu ulukile yalwe ohole?

⁴ Sho Johannes a li omulumentu omugundjuka, ka li aluhe hu ulike ohole. Pashiholelwa, pompito yimwe, Jesus naalongwa ye oya li ya yi kuJerusalem noya pitile muSamaria. Omukunda gumwe gwomuSamaria kagwa li gwe ya taamba ko nawa. Johannes okwa li a ningi po shike? Ye nomumwayina, Jakob, oya li ya pula Jesus yi indile omulilo gu ze megulu, nogu fike po aakalimo ayehe yomomukunda ngono. (Luk. 9:52-56) Pompito yilwe, Johannes okwa li wo a ndopa okuulukila aayapostoli ooyakwawo ohole. Ye naJakob aniwa oya pula yina a pule Jesus e ya pe oondondo dha simana mUukwaniilwa. Sho aayapostoli ooyakwawo ye shi uvu, oya li ye ya geela. (Mat. 20:20, 21, 24) Nonando Johannes okwa li a ningi omapuko agehe ngoka, Jesus natango okwa li e mu hole. — Joh. 21:7.

5. Oshike tatu ka kundathana moshitopolwa shika?

⁵ Moshitopolwa shika, otatu ka kundathana kombinga yoshiholelwa shaJohannes nosho wo yimwe yomiinima mbyoka a nyola kombinga yohole. Sho tatu shi ningi, otatu ki ilonga nkene tu na oku ulukila aamwatate naamwameme ohole. Otatu ki ilonga wo omukalo gwa simana nkene omitse dhomaukwanegumbo tadhi vulu okuulika kutya odhi hole omaukwanegumbo gadho.

6. Jehova okuulika ngiini kutya oku tu hole?

⁶ Otashi vulika hatu dhiladhila kutya okukala tu hole aantu, okukala tu ya uvitile nawa noku ya lombwela oohapu oombwanawa. Ihe opo tu ulike kutya otu ya ohole shili, otu na oku shi ulika miilonga. (Yelekanitha Jakob 2:17, 26.) Pashiholelwa, Jehova oku tu hole. (1 Joh. 4:19) Ohole ye yoku tu hola okwe yi tu hololela moohapu dhe, Ombiimbeli. (Eps. 25:10; Rom. 8:38, 39) Ihe otu shi kutya Kalunga ke tu hole owala pakupopya, ihe ohe shu ulike wo miilonga. Johannes okwa nyola a ti: “Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe.” (1 Joh. 4:9) Jehova okwa pitike Omwana a hepekwe noku tu sile. (Joh. 3:16) Mbela otu na ngaa okukala twa limbililwa ngele Jehova oku tu hole shili?

7. Jesus okwa ningi shike, opo u ulike kutya oku tu hole noonkondo?

⁷ Jesus okwa li a shilipaleke aalongwa ye kutya oku ya hole. (Joh. 13:1; 15:15) Oku ulike  kutya oku hole aalongwa ye shi thike peni natse twa kwatelwa mo, mwaashoka e tu ningila. Jesus okwa ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe molwawo.” (Joh. 15:13) Uuna tatu dhiladhila kwaashoka Jehova naJesus ye tu ningila, ohashi tu gumu ngiini?

8. Johannes gwotango 3:18, ote tu ladhipike tu ninge shike?

⁸ Ohatu ulike kutya otu hole Jehova naJesus mokuvulika kuyo. (Joh. 14:15; 1 Joh. 5:3) Jesus okwe tu pa elombwelo lyokondandalunde lyokukala tu holathane. (Joh. 13:34, 35) Katu na owala okukala hatu lombwele aamwatate naamwameme kutya otu ya hole, ihe otu na wo oku shi ulika miilonga. (Lesha 1 Johannes 3:18.) Oshike tatu vulu okuninga kondandalunde, tu ulike kutya otu ya hole?

9. Ohole oya li yi inyengitha Johannes a ninge shike?

⁹ Johannes okwa li ta vulu okuhogolola a kale natate gwe, nokuninga iimaliwa mongeshefa yaandjawo yokuyula oohi. Ihe okwa hogolola a longithe okukalamwenyo kwe mokukwathela yalwe yi ilonge oshili kombinga yaJehova naJesus. Onkalamwenyo ndjoka Johannes a hogolola kaya li ompu. Okwa li a patanekwa, nopehulilo lyethelemumvo lyotango sho a li omukokele, okwa tulwa mondholongo. (Iil. 3:1; 4:1-3; 5:18; Eh. 1:9) Naasho nokuli a li mondholongo omolwokuuvitha kombinga yaJesus, Johannes okwa li u ulike kutya oku na ko nasha nayalwe. Pashiholelwa, sho a li kokantuntu kaPatmos, okwa li a nyola kombinga yemoniko ndyoka a mono nokwa tumu ontumwafo ndjoka komagangalo, opo ga kale ge shi shoka “shi na okuningwa mbala.” (Eh. 1:1) Opu nduno, sho a mangululwa muPatmos, otashi vulika Johannes opo a tameke okunyola Evaangeli kombinga yonkalamwenyo nuukalele waJesus. Okwa li wo a nyola oontumwafo ndatu, opo a tse omukomo nokunkondopaleka aamwahe. Ongiini to vulu okuholela okwiiyamba kwaJohonnes?

10. Ongiini to vulu okuulika kutya owu hole aantu?

¹⁰ Oto vulu okuulika kutya owu hole aantu mwaashoka wa pititha komeho monkalamwenyo yoye. Uuyuni waSatana owa hala wu ku ningithe wu longithe ethimbo noonkondo dhoye mokwiikongela iimaliwa oyindji nenge mokwiiningila edhina muuyuni mbuka. Ihe Aakriste mboka ye na ombepo yokwiiyamba ohaya longitha ethimbo lyawo olindji mokuuvitha onkundana ombwanawa nokukwathela aantu ya hedhe popepi naJehova. Yamwe ohaya vulu nokuli okuuvitha nokulonga aantu ethimbo lyu udha.

11. Aauvithi aadhiginini oyendji ohaya ulike ngiini kutya oye hole Jehova nosho wo ooitaali ooyakwawo?

¹¹ Aakriste aadhiginini oyendji oye na okulonga iilonga yokwiikongela omboloto, opo ya sile oshimpwiyu omaukwanegumbo gawo. Nonando ongawo, aauvithi mbaka aadhiginini ohaya ambidhidha ehangano lyaJehova momukalo kehe taya vulu. Pashiholelwa, yamwe ohaya vulu okukwathela miilonga yokukwathela mboka ya dhengwa kiiponga yopaunshitwe, yamwe ohaya vulu okukwathela mooproyeka dhokutunga, omanga yamwe haya vulu okugandja omayambidhidho gopashimaliwa ga ka longithwe miilonga yetu yomuuyuni awuhe. Ohaya ningi iinima ayihe mbyoka molwaashoka ye hole Kalunga nosho wo ooitaali ooyakwawo. Oshiwike kehe, ohatu ulike kutya otu hole aamwatate naamwameme, mokukala pomakugongala nokukutha ombinga muko. Nonando omathimbo gamwe ohatu kala twa vulwa, aluhe opo hatu kala. Nonando otashi vulika hatu kala twa tila okugandja omatyokosha, ohatu shi ningi. Shimwe ishewe, nonando ohatu kala tu na omaupyakadhi getu gopaumwene, ohatu tsu omukumo yalwe manga okugongala inaaku tameka nokonima yaasho kwa pita mo. (Heb. 10:24, 25) Inatu pandula tuu iilonga mbyoka ooitaali ooyakwetu haya longo!

12. Omomukalo gulwe ishewe guni Johannes u ulike kutya okuhole ooitaali ooyakwawo?

 ¹² Johannes ka li owala u ulike kutya okuhole ooitaali ooyakwawo moku ya pandula, ihe nomo ku ya pa wo omayele. Pashiholelwa, moontumwafo dhe, Johannes okwa li a pandula aamwatate naamwameme omolweitaalo lyawo niilonga yawo iiwanawa, ihe okwa li wo e ya pe omayele kombinga yokuyona. (1 Joh. 1:8–2:1, 13, 14) Sha faathana, otwa pumbwa okukala hatu pandula aamwatate naamwameme omolwiilonga iiwanawa mbyoka haya longo. Ihe ngele gumwe okwa tameke okukala e na iikala iiwinayi nenge ta ningi oshinima shontumba shoka tashi vulu okuteya po ekwatathano lye naJehova, otatu vulu oku mu ulukila ohole moku mu pukulula pahole. Ohashi pula uulaadhi okupa kuume koye omayele, ihe Ombiimbeli otayi ti ookuume yashili ohaya upikathana nenge tu tye haya pukululathana. — Omayel. 27:17.

13. Otu na okuyanda okuninga shike?

¹³ Omathimbo gamwe ohatu ulike kutya otu hole ooitaali ooyakwetu mwaashoka ihatu ningi. Pashiholelwa, ihatu geyithwa mbala kwaashoka haya popi. Dhiladhila kombinga yaashoka sha ningwa po sho Jesus a li pokudhipagwa. Okwa li a lombwele aalongwa ye kutya opo ya ka mone omwenyo gwaaluhe oye na okulya onyama ye nokunwa ombinzi ye. (Joh. 6:53-57) Oohapu ndhoka odha li dhe ya halukitha, noyendji yomaalongwa ye oye mu thigi po, ihe ookuume ke kashili mwa kwatelwa Johannes, oya tsikile okweenda pamwe naye. Kaya li yu uvite ko shoka Jesus a ti, notashi vulika wo sha li she ya kumitha. Ihe ookuume aadhiginini yaJesus mboka kaya li tayi ipula kutya shoka a popya osha puka nokasha li she ya uvitha nayi. Pehala lyaashono, oya li ye mu inekela, oshoka oya li ye shi kutya oha popi oshili. (Joh. 6:60, 66-69) Inashi simanenena tuu kaatu kale hatu uvithwa nayi mbala kwaashoka ookuume ketu tashi vulika ya popye! Pehala lyaashono, otu na okukala hatu ya pe ompito ya yelithe shoka ya hala okutya. — Omayel. 18:13; Omuuv. 7:9.

14. Omolwashike kaatu na okukala tu tonde ooitaali ooyakwetu?

¹⁴ Johannes okwe tu ladhipika wo kaatu kale tu tonde ooitaali ooyakwetu. Ngele otwa ndopa okutula miilonga omayele ngono, nena otatu ka pa Satana ompito e tu nwethe mo. (1 Joh. 2:11; 3:15) Shoka osho sha li sha ningilwa yamwe pehulilo lyethelemumvo lyotango E.N. Pethimbo ndyoka Satana okwa li ta ningi ashihe shoka ta vulu a ningithe aapiya yaKalunga ya kale ye tondathane noya kale ya topoka. Sho Johannes a mana okunyola oontumwafo dhe, aalumentu  mboka ya li ya tameke okukala ye na iikala ya fa yaSatana oya li nale ya ninga oshitopolwa shegongalo. Pashiholelwa, Diotrefes okwa li ta ningitha egongalo li kale lya topoka. (3 Joh. 9, 10) Ka li a simaneka nando aakalelipo aayendi mboka ya li haya kalele po olutuwiliki. Okwa li nokuli a kambadhala okutidha mo megongalo mboka ya li haya ambidhidha mboka kee hole. Mbyoka kayi shi tuu iikala iiwinayi! Nokunena Satana ota kambadhala a mana mo e ete etopoko mokati koshigwana shaKalunga. Inatu etha nando uutondwe wu ete etopoko mokati ketu.

15. Oshike omutse gwuukwanegumbo gu na okudhimbulukwa?

¹⁵ Omukalo gumwe moka ngoka e li omutse gwuukwanegumbo ta vulu okuulika kutya oku hole uukwanegumbo we, omoku wu sila oshimpwiyu palutu. (1 Tim. 5:8) Ihe oku na okudhimbulukwa kutya okukwathela uukwanegumbo we wu kale nekwatathano ewanawa naJehova osho oshinima sha simanenena. (Mat. 5:3) Dhiladhila koshiholelwa oshiwanawa shoka Jesus a tulila po omitse dhomaukwanegumbo. EmboMbiimbeli lyaJohannes otali tu lombwele kutya sho Jesus a li komuti gwomahepeko nokuli pokusa, okwa li natango ti ipula noyaandjawo. Pethimbo ndyoka Johannes okwa li a tegama naMaria sho Jesus ta dhipagwa. Nonando pethimbo ndyoka Jesus okwa li muuwehame uunene, okwa ningi elongekidho, opo Johannes a sile oshimpwiyu Maria. (Joh. 19:26, 27) Jesus okwa li e na aamwayina mboka ya li taya vulu okusila Maria oshimpwiyu, ihe osha fa shi li ngeyi kutya pethimbo ndyoka ayehe kaya li natango ya ninga aalanduli yaJesus. Onkene Jesus okwa li a hala a shilipaleke kutya Maria ota ka silwa oshimpwiyu palutu nopambepo.

16. Johannes okwa li e na iinakugwanithwa oyindji yini?

¹⁶ Johannes okwa li e na iinakugwanithwa oyindji. Okwa li omuyapostoli nokwa li e na kulonga nuulaadhi miilonga yokuuvitha. Otashi vulika a li a hokana, onkene okwa li e na okusila oshimpwiyu uukwanegumbo we palutu nopambepo. (1 Kor. 9:5) Oshike shono omitse dhomaukwanegumbo kunena tadhi vulu okwiilonga koshiholelwa shaJohannes?

17. Omolwashike sha simana omutse gwuukwanegumbo gu kale hagu sile oshimpwiyu uukwanegumbo wago pambepo?

¹⁷ Omumwatate ngoka e li omutse gwuukwanegumbo otashi vulika a kale e na iinakugwanithwa ya simana oyindji. Pashiholelwa, oku na okulonga nuudhiginini miilonga ye yokwiikongela omboloto, opo a simanekithe Jehova.  (Ef. 6:5, 6; Tit. 2:9, 10) Otashi vulika wo a kale e na iinakugwanithwa megongalo, ngaashi okuninga omatalolopo guusita nokukwatela komeho iilonga yokuuvitha. Osha simana wo a kale ha konakona Ombiimbeli pamwe nuukwanegumbo we pandjigilile. Aanegumbo lye otaya ka kala ye mu pandula sho ha ningi oonkambadhala, e ya sile oshimpwiyu palutu, pamadhiladhilo nopambepo. — Ef. 5:28, 29; 6:4.

18. Johannes okwa li a tompwa kushike?

¹⁸ Johannes okwa kala nomwenyo ethimbo ele, nokwa li a mono iimoniwa oyindji yi nyanyudha. Okwa li a piti momashongo ogendji ngoka ga li taga vulu okunkundipaleka eitaalo lye. Ihe okwa li ha ningi ngaashi ta vulu a vulike komalombwelo gaKristus mwa kwatelwa elombwelo lyokukala tu hole ooitaali ooyakwetu. Shoka osha ningitha Johannes a kale a tompwa kutya Jehova naJesus oye mu hole notaye ke mu pa oonkondo a sinde eshongo kehe ti iyadha mulyo. (Joh. 14:15-17; 15:10; 1 Joh. 4:16) Satana nuuyuni we kaya li taya vulu okwiimba Johannes a kale e hole ooitaali ooyakwawo. Ohole ye okwa li e yi ya ulukile moohapu nomiilonga ye.

19. Johannes gwotango 4:7, ote tu ladhipike tu ninge shike, nomolwashike?

¹⁹ Ngaashi owala Johannes, otu li muuyuni mbuka tawu pangelwa kuSatana, kalunga konyanya kuuyuni mbuka. (1 Joh. 3:1, 10) Satana ita vulu oku tu ningitha tu kale kaatu hole aamwatate naamwameme, shila ongele twe mu etha e shi ninge. Natu kale twa tokola toko tu kale tu hole ooitaali ooyakwetu. Natu kale hatu shi ulike mwaashoka hatu popi nosho wo mwaashoka hatu ningi. Ngele otwa kala hatu shi ningi, otatu ka nyanyukilwa okukala oshitopolwa shuukwanegumbo waJehova nonkalamwenyo otayi ka kala yi nyanyudha. — Lesha 1 Johannes 4:7.