1. Oshike tashi ulike kutya momaukwanegumbo ogendji kamu na ohole?

OMBIIMBELI oya hunganeka kutya momasiku gahugunina, aantu otaya ka kala kaaye na “olukeno” nenge ohole. (2 Tim. 3:1, 3) Ehunganeko ndyoka otu wete sho tali gwanithwa kunena. Pashiholelwa, omaukwanegumbo ogendji oga topoka, omolwoondjokana ndhoka tadhi teka. Aavali ohaya kala ya geelathana, noyana ohaya kala yu uvite kutya kaye holike. Nokuli naantu mboka haya zi megumbo limwe, otashi vulika kaaya kale ye na ekwatathano ewanawa. Pashiholelwa, omugandjimayele gwomaukwanegumbo gumwe okwa ti: “Aavali naanona ihaya kala we ye na ethimbo lyokupopya, oshoka olundji ohaya kala owala ye li pookompiuta, taya longitha uutableta, ye li moongodhi nenge taya dhana uudhano wuuvidio. Nonando ohaya zi megumbo limwe, kaye shaathane nawanawa.”

2-3. (a) Ngaashi sha popiwa mAaroma 12:10, oolye tu na okuulukila ohole yuumwayinathana? (b) Oshike tatu ka kundathana moshitopolwa shika?

² Inatu hala okukala kaatu na ohole ngaashi aantu oyendji muuyuni mbuka. (Rom. 12:2) Pehala lyaashono, otwa pumbwa okukokeka ohole yuumwayinathana pokati ketu noyaandjetu nosho wo nooitaali ooyakwetu. (Lesha Aaroma 12:10.) Ohole yuumwayinathana oshike? Uutumbulilo mbuka otawu ulike unene kohole ndjoka aanegumbo haya kala ye ninathane, molwaashoka ye na ekwatathano lyopothingo. Ohole ndjoka oyo tu na okukala tu nine aamwatate naamwameme megongalo. Ngele ohatu ulike ohole yuumwayinathana, otatu ka kaleka po uukumwe mboka twa pumbwa okukala tu na melongelokalunga lyashili. — Mika 2:12.

³ Opo tu kokeke notu ulukilathane ohole yuumwayinathana, natu ka tale kwaashoka tatu ilongo kiiholelwa yopaMbiimbeli.

4. Jakob 5:11 ote tu kwathele ngiini tu mone nkene Jehova e tu hole noonkondo?

⁴ Ombiimbeli oya popya kombinga yomaukwatya gaJehova omawanawa. Pashiholelwa, oya ti kutya “Kalunga oye ohole.” (1 Joh. 4:8) Uukwatya mboka ohawu tu inyengitha tu hedhe popepi naye. Ihe Ombiimbeli oya ti wo kutya Jehova ‘omunalukeno.’ (Lesha Jakob 5:11.) Shoka otashi ulike nkene Jehova e tu hole noonkondo!

5. Jehova ohe tu sile ngiini ohenda, nongiini tatu vulu oku mu holela?

⁵ Ndhindhilika kutya Jakob 5:11 okwa kwatakanitha uukwatya waJehova wolukeno kumwe nuukwatya wulwe mboka hawu tu inyengitha tu hedhe popepi naye, ano esilohenda lye. (Eks. 34:6) Omukalo gumwe moka Jehova he tu ulukile esilohenda lye, omoku tu dhimina po omayono getu. (Eps. 51:1) Ngele tatu tala mOmbiimbeli, okusila omuntu ohenda kashi shi owala oku mu dhimina po epuko ndyoka a ninga. Esilohenda olyo eiyuvo lyomuule ndyoka omuntu ha kala e na momutima gwe uuna e wete omuntu e li muudhigu, nohali mu inyengitha a gandje ekwatho. Jehova okwa ti kutya oha kala a halelela oku tu kwathela shi vulithe yina ngoka ha kala e na ehalo a kwathele omwana. (Jes. 49:15) Uuna tu li muudhigu, esilohenda lyaJehova ohali mu inyengitha e tu kwathele. (Eps. 37:39; 1 Kor. 10:13) Natse otatu vulu okusila ohenda aamwatate naamwameme moku ya dhimina po, uuna ye tu uvitha nayi nomokukala ihaatu ya kwatele onkone. (Ef. 4:32) Ihe omukalo gulwe gwa simana moka tatu vulu oku ya sila ohenda, omoku ya kwathela uuna ye li muudhigu. Uuna tatu inyengithwa kohole tu sile yalwe ohenda, otatu holele Jehova ngoka e tu tulila po oshiholelwa sha dhenga mbanda shokuulika ohole. — Ef. 5:1.

6. Jonatan naDavid oya li yu ulukilathana ngiini ohole yuumwayinathana?

⁶ MOmbiimbeli omu na iiholelwa yaantu inaaya gwanenena mboka ya li ye na ohole yuumwayinathana. Natu tale koshiholelwa shaJonatan naDavid. Ombiimbeli otayi ti: “Jonatan  yaSaul okwa panga uukuume wa kola naDavid nokwa li e mu hole, ngaashi i ihole ye mwene.” (1 Sam. 18:1) Jehova okwa li a hogolola David a ninge omukwaniilwa konima yaSaul. Konima yaashoka, Saul okwa tameke okukala e huge David nokwa li a kambadhala oku mu dhipaga. Ihe Jonatan, omwanamati gwaSaul, ka li a ambidhidha he, sho a li ta kambadhala okudhipaga David. Jonatan naDavid oyu uvanekelathana okukala aluhe ookuume nokwaambidhidhathana. — 1 Sam. 20:42.

7. Oshike sha li tashi vulu okwiimba Jonatan naDavid kaaya pange uukuume?

⁷ Oshikumithi sho Jonatan naDavid ya li ye na uukuume wopothingo, oshoka opu na iinima oyindji mbyoka ya li tayi vulu oku ya imba kaaya pange uukuume. Pashiholelwa, Jonatan okwa li e vule David nomimvo 30 lwaampono. Jonatan okwa li ta vulu okudhiladhila kutya ita vulu okupanga uukuume nomuntu omugundjuka kuye ngoka nokuli kee na sho e shi kombinga yonkalamwenyo. Ihe Jonatan ka li a dhina David. Okwa li e mu simaneka.

8. Mbela sho to dhiladhila, omolwashike Jonatan a li kuume omuwanawa kuDavid?

⁸ Jonatan okwa li ta vulu okukala a sila David ondumbo. Jonatan okwa li ta vulu okutya oye e na uuthemba wokuninga omukwaniilwa, molwaashoka okwa li omwanamati gwomukwaniilwa Saul. (1 Sam. 20:31) Ihe Jonatan okwa li omwiifupipiki nokwa li omudhiginini kuJehova. Onkee okwa li a ambidhidha etokolo lyaJehova lyokuninga David omukwaniilwa gwomonakuyiwa. Jonatan okwa li wo omudhiginini kuDavid, nonando oshinima shoka osha li sha geyitha Saul. — 1 Sam. 20:32-34.

9. Mbela Jonatan okwa li a sila David ondumbo? Shi yelitha.

⁹ Jonatan okwa li e hole David, onkene ka Ii e mu sila ondumbo. Jonatan okwa li onkulungu mokuumba uutati nokwa li omukwiita ependa. Yo nahe, Saul, oya li ya tseyika nawa ye na ‘ondapo ye vule omakodhi’ noye na ‘oonkondo ye vule oonime.’ (2 Sam. 1:22, 23) Onkee ano, Jonatan okwa li ta vulu okwiitangela iinima mbyoka a pondola okuninga molwuupenda we. Ihe Jonatan ka li e na ombepo yethigathanopo noka li a sile David ondumbo, omolwiinima iiwanawa mbyoka a longa. Pehala lyaashono, Jonatan okwa li a hokwa David omolwuulaadhi we, naasho a li hi inekele aluhe muJehova. Pashiholelwa, Jonatan okwa li a tameke okukala e hole David ngaashi i ihole ye mwene, konima sho David a dhipaga Goliat. Ongiini tatu vulu okuulukila aamwatate naamwameme ohole ndjoka yuumwayinathana ngaashi Jonatan?

10. Okukala tu ‘holathane lelalela nomwenyo aguhe’ otashi ti shike?

¹⁰ Ombiimbeli otayi tu lombwele tu kale tu ‘holathane lelalela nomwenyo aguhe.’ (1 Pet. 1:22) Jehova okwe tu tulila po oshiholelwa shankene tu na oku shi ninga. Oku tu hole noonkondo, nongele otwa kala tatu mu longele nuudhiginini, kapu na shoka tashi vulu oku tu topola ko kohole ye. (Rom. 8:38, 39) Oshitya shOshigreka shoka sha tolokwa “lelalela,” otashi gandja edhiladhilo lyomuntu ta ningi oonkambadhala a mana mo, u ulike ohole. Ihashi kala aluhe oshipu okuulukila aamwatate naamwameme ohole yuumwayinathana. Uuna yalwe ye tu uvitha nayi, otwa pumbwa okutsikila oku ya ‘hololela ohole yetu moku ya yakula, nokuninga ashihe shoka tatu vulu tu koleke uukumwe wetu womombepo ondjapuki omolwombili ndjoka tayi tu mangele kumwe.’ (Ef. 4:1-3) Ngele otwa longo nuudhiginini tu kale tu na ‘ombili ndjoka tayi tu mangele kumwe,’ itatu ka kala hatu gandja unene eitulomo komapuko gaamwatate naamwameme. Otatu ka ninga ngaashi tatu vulu tu kale twe ya tala ko  ngaashi Jehova e ya tala ko. — 1 Sam. 16:7; Eps. 130:3.

11. Omolwashike omathimbo gamwe tashi vulika shi kale oshidhigu okuulika ohole yuumwayinathana?

¹¹ Haaluhe hashi kala oshipu okuulukila aamwatate naamwameme ohole yuumwayinathana, unene tuu uuna tu shi omaunkundi gawo. Otashi vulika Aakriste yamwe yopetameko ya li ye na uupyakadhi mboka. Pashiholelwa, pokati kaEuodia naSintike otashi vulika kaapwa li uupyakadhi washa sho ya li taya “longo nuudhiginini okutaandelitha evaangeli pamwe [naPaulus].” Ihe mokweendela ko kwethimbo oya tameke okukala kaayu uvitathane. Onkee Paulus okwe ya kumagidha ya “kambadhale okuuvathana ngashika aakiintu aamwayinathana mOmuwa.” — Fil. 4:2, 3.

12. Ongiini tatu vulu okukokeka ohole yuumwayinathana noku yu ulukila aamwatate naamwameme?

¹² Kunena Ongiini tatu vulu okukokeka ohole yuumwayinathana noku yu ulukila aamwatate naamwameme? Ngele otwa kutha ethimbo tu ya tseye nawa, otashi ka kala oshipu kutse tu ya uve ko noku ya ulukila ohole yuumwayinathana. Inatu etha omimvo dhawo nosho wo eputuko lyawo yi tu imbe tu pange uukuume nayo. Dhimbulukwa kutya Jonatan okwa li e vule David nomimvo 30 lwaampono, ihe oya panga uukuume wa kola. Mbela megongalo lyeni omu na omukuluntu nenge omugundjuka ngoka to vulu okupanga uukuume naye? Ngele owe shi ningi, kungawo oto ulike kutya owu ‘hole ooitaali ayehe.’ — 1 Pet. 2:17.

13. Omolwashike tashi vulika kaatu kale tu na uukuume wopothingo nakehe gumwe megongalo?

¹³ Mbela okukala tu na ohole yuumwayinathana osha hala okutya otatu ka kala tu na uukuume wopothingo nakehe gumwe megongalo? Aawe, shoka itashi vulika. Inashi puka okukala tu na ekwatathano lyopothingo naamboka ye hole iinima mbyoka tu hole. Jesus okwa li i ithana aayapostoli ye ayehe “ookuume” ke, ihe okwa li e hole unene Johannes. (Joh. 13:23; 15:15; 20:2) Ihe Jesus ka li nando u ungaunga naJohannes momukalo omuwanawa shi vulithe yakwawo. Pashiholelwa, sho Johannes nomumwayina Jakob ya pula ya pewe oondondo dha simana mUukwaniilwa waKalunga,  Jesus okwe ya lombwele a ti: “Omahala gokukuutumba kolulyo lwandje nenge kolumoho lwandje hangame tandi ga gandja.” (Mark. 10:35-40) Ngaashi Jesus, inatu kala tu na okatongo mokuungaunga nookuume ketu momukalo gwa yooloka ko kunkene hatu ungaunga nayalwe. (Jak. 2:3, 4) Ngele otwa ningi ngaaka otatu ka eta etopoko megongalo, pehala lyokuhumitha komeho uukumwe. — Jud. 17-19.

14. Ngaashi sha popiwa mAafilipi 2:3, oshike tashi ke tu kwathela tu yande ombepo yethigathanopo?

¹⁴ Ngele otwa kala hatu ulukile yalwe ohole yuumwayinathana, megongalo itamu ka kala mu na ombepo yethigathanopo. Dhimbulukwa kutya Jonatan ina kambadhala okukala e vule David, opo ando oye a ninge omukwaniilwa. Atuheni otatu vulu okuholela Jonatan. Ino kala wa tsila ondumbo ooitaali ooyakweni molwuunkulungu mboka ye na, ‘ihe ifupipika kiipala yayakweni, ngoye waa dhiladhile kutya ongoye omuwanawa wu ya vule.’ (Lesha Aafilippi 2:3.) Shi kaleka momadhiladhilo kutya kehe gumwe gwomutse oku na oshilonga megongalo. Ngele otwa kala aaifupipiki, otatu ka vula okumona omaukwatya omawanawa gayalwe notatu ka mona mo uuwanawa miiholelwa yawo yuudhiginini. — 1 Kor. 12:21-25.

15. Oshike wi ilonga koshiholelwa shaTanya nuukwanegumbo we?

¹⁵ Uuna twa adhika kuudhigu ombaadhilila, Jehova ohe tu hekeleke okupitila maamwatate naamwameme nomekwatho ndyoka haye tu pe. Ndhindhilika shoka sha li sha ningilwa uukwanegumbo wumwe moAmerika sho wa li tawu zi koshigongi shopaigwana shi na oshipalanyolo: “Ohole itayi hulu po!” Omumwameme Tanya, ngoka e na aanona yatatu okwa ti: “Manga tatu hingi tu uka kohotela, otwa pumwa kohauto yimwe. Nonando kapu na gumwe gwomutse a li e ehamekwa, otwa li twa haluka noonkondo notwa  zi mo mohauto, e tatu kala twa thikama mopate. Manga tu li po, otwa mono omuntu te tu lapa kombinga onkwawo yopate tu ye kohauto ye. Omuntu ngoka okwa li omumwatate ngoka naye a li ta zi koshigongi. Ihe haye owala a li a thikama. Aamwatate naamwameme yalwe yatano ya za koSweden nayo oya li ya thikama. Aamwameme oya li ye tu papatele, naashoka osha li she tu hekeleke. Onda li nde ya lombwele kutya otu li nawa notaya vulu okuya. Ihe oya kala pamwe natse sigo oambulansa yeya, noya li ya shilipaleke kutya otwa mona ekwatho ndyoka twa pumbwa. Sho twa li monkalo ndjoka ondhigu, otwa li tu uvite kutya Jehova oye te tu ulukile ohole ye. Oshiningwanima shoka oshe tu ningitha tu kale tu hole aamwatate naamwameme noonkondo nosha koleke ohole yetu yokuhola Jehova.” Mbela oto dhimbulukwa oshikando shontumba wa li muudhigu, e to ulukilwa ohole yuumwayinathana kOmukriste omukweni?

16. Omolwomatompelo geni twa pumbwa okuulukilathana ohole yuumwayinathana?

¹⁶ Ndhindhilika iizemo iiwanawa mbyoka hayi zi mokuulukilathana ohole yuumwayinathana. Ohatu hekeleke aamwatate naamwameme uuna ye li muudhigu. Ohatu humitha komeho uukumwe mokati koshigwana shaKalunga. Ohatu ulike kutya otu li aalongwa yaJesus, naashoka ohashi hilile mboka ye na omitima omiwanawa kuJehova. Shoka sha simanenena, ohatu simanekitha Jehova, ngoka e li “Tate omunahenda, Kalunga, ngoka kuye haku zi ekwatho alihe.” (2 Kor. 1:3) Atuheni natu tsikile okuulika nokukoleka ohole yetu yuumwayinathana!