OSHITOPOLWA SHOKUKONAKONWA 4
Omolwashike hatu kala pEdhimbuluko?
“Shi ningeni nokudhimbulukwa ndje.” — LUK. 22:19.
EIMBILO 20 Owe tu pa Omumwoye e na ondilo
ELALAKANO LYOSHITOPOLWA *
1-2. (a) Uunake unene hatu dhiladhila omuholike gwetu ngoka a sa? (b) Jesus okwa li a ningi shike ongulohi ndjoka manga inaa sa?
KUTYA nduno aaholike yetu oya sa pwa pita ethimbo li thike peni, ohatu ya dhimbulukwa aluhe. Ohatu ya dhiladhila unene mesiku moka ya sa.
2 Omumvo kehe, ohatu gongala pamwe naantu omamiliyona muuyuni awuhe tu dhimbulukwe eso lyagumwe ngoka tu hole noonkondo, Jesus Kristus. (1 Pet. 1:8) Ohatu shi ningi tu mu dhimbulukwe, oshoka okwa gandja omwenyo gwe, e tu kulile muulunde neso. (Mat. 20:28) Jesus okwa li wo a hala aalanduli ye ya kale haya dhimbulukwa eso lye. Ongulohi ndjoka manga inaa sa, okwa li a dhike po uulalelo wi ikalekelwa e ta lombwele aalongwa ye mboka a li nayo a ti: “Shi ningeni nokudhimbulukwa ndje.” * — Luk. 22:19.
3. Oshike tatu ka kundathana moshitopolwa shika?
3 Omwaalu owala omushona gwomwaamboka haya kala pEdhimbuluko lyeso lyaKristus oyo ye na etegameno lyoku ka kala megulu. Ihe yalwe oyendji mboka haya kala po oye na etegameno lyoku ka kala kombanda yevi. Moshitopolwa shika, otatu ka tala komatompelo gontumba kutya omolwashike oongundu ndhika mbali hadhi kala dha halelela okukala pEdhimbuluko omumvo kehe. Otatu ka konakona wo kutya uuwanawa wuni hatu mono po. Tango natu ka taleni komatompelo gamwe kutya omolwashike aagwayekwa haya kala po.
OMOLWASHIKE AAGWAYEKWA HAYA KALA PEDHIMBULUKO?
4. Omolwashike aagwayekwa haya kutha ombinga mokulya oshikwiila nokunwa omaviinu pEdhimbuluko?
4 Omumvo kehe, aagwayekwa ayehe ohaya kala ya halelela oku ka kala pEdhimbuluko ya ka kuthe ombinga mokulya nokunwa. Omolwashike haya li oshikwiila nohaya nu omaviinu pEdhimbuluko? Opo tu yamukule epulo ndyoka, natu ka tale kwaashoka sha li sha ningwa po muusiku wahugunina wonkalamwenyo yaJesus kombanda yevi. Ongulohi ndjoka sho ya mana okudhana Opaasa, Jesus okwa dhike po shoka sha ka kala hashi ithanwa Uulalelo wOmuwa. Okwa pe aayapostoli ye aadhiginini 11 oshikwiila nomaviinu, e te ya lombwele ya lye oshikwiila shoka nokunwa omaviinu ngoka. Jesus okwe ya lombwele kombinga yomahangano, nenge yomalongekidho gaali, ano ehangano epe nosho wo ehangano lyUukwaniilwa. * (Luk. 22:19, 20, 28-30) Omahangano ngoka oge shi ningitha tashi wapa opo aayapostoli mboka nosho wo yalwe yomwaalu gwontumba ya ka ninge aakwaniilwa naayambi megulu. (Eh. 5:10; 14:1) Aagwayekwa mboka ya thigala ko * kombanda yevi ye li momahangano ngoka gaali, oyo owala haya vulu okukutha ombinga mokulya nokunwa oshikwiila nomaviinu pEdhimbuluko.
5. Aagwayekwa oye shi shike kombinga yetegameno ndyoka ya pewa?
5 Etompelo limwe ishewe kutya omolwashike aagwayekwa haya kala ya halelela okukala pEdhimbuluko olyo kutya ohali ya pe ompito ya dhiladhile kombinga yetegameno lyawo. Jehova okwe ya pa etegameno ekumithi, ano oku ka kala ihaaya si noya gwanenena megulu, taya longo pamwe naJesus omuyumudhwa nayalwe 144 000, naashono sha dhenga mbanda otaya ka vula okumona Jehova Kalunga ye mwene! (1 Kor. 15:51-53; 1 Joh. 3:2) Aagwayekwa oye shi kutya oya pewa uuthembahenda uunene woku ka kala megulu. Ihe opo ya ka vule okuya mo, oye na okukala aadhiginini sigo omeso. (2 Tim. 4:7, 8) Ohashi ya etele enyanyu enene uuna taya dhiladhila kombinga yetegameno lyawo lyomegulu. (Tit. 2:13) Ongiini kombinga ‘yoonzi dhilwe’? (Joh. 10:16) Omolwomatompelo gamwe geni nayo haya kala pEdhimbuluko?
OMOLWASHIKE OONZI DHILWE HADHI KALA PEDHIMBULUKO?
6. Omolwashike oonzi dhilwe hadhi kala pEdhimbuluko omumvo kehe?
6 Oonzi dhilwe ohadhi kala pEdhimbuluko dhi tale shoka tashi ningwa po, ihe ihadhi kutha ombinga mokulya nokunwa. Momumvo 1938, mboka ye na etegameno lyoku ka kala kombanda yevi oya li ya hiywa oshikando shotango nayo ya kale pEdhimbuluko. Oshungolangelo 1 Maalitsa 1938 oya ti: “Oshi li nawa lela [oonzi dhilwe] nadho dhi kale po pokugongala hoka dho dhi mone shoka hashi ningwa po. . . . Nayo oyi li ompito nethimbo ndyoka ye na okunyanyukilwa.” Ngaashi owala aayenda mboka haya kala ya nyanyukwa sho ye li pohango, oonzi dhilwe nadho ohadhi kala dha nyanyukwa okukala pEdhimbuluko.
7. Omolwashike oonzi dhilwe hadhi kala dha halelela oku ka pulakena koshipopiwa shEdhimbuluko?
7 Oonzi dhilwe nadho ohadhi dhiladhila kombinga yetegameno lyadho, uuna dhi li pEdhimbuluko. Ohadhi kala dha halelela okupulakena koshipopiwa shoka hashi gandjwa po, oshoka ohashi popi unene kombinga yaashoka Kristus naaleli pamwe naye 144 000 taya ka ningila aantu mboka aadhiginini pEthimbo lyOmimvo Eyovi limwe. Kohi yewiliko lyOmukwaniilwa gwawo Jesus Kristus, aaleli mboka otaya ka kwathela mokuninga evi oparadisa nokukwathela aantu ya thike megwaneneno. Ohashi nyanyudha wo aatali nomeho omamiliyona mboka haya kala pEdhimbuluko sho haya kala ya fa ye wete omahunganeko gomOmbiimbeli taga ka gwanithwa po, ngaashi ngoka ge li muJesaja 35:5, 6; 65:21-23 nosho wo mEhololo 21:3, 4. Ohaya kala ya fa yi iwete naaholike yawo ye li muuyuni uupe, naashoka ohashi koleke etegameno lyawo nohashi ya ningitha ya kale ya tokola toko kaaya ethe po okulongela Jehova. — Mat. 24:13; Gal. 6:9.
8. Omolwetompelo lilwe lini oonzi dhilwe hadhi kala pEdhimbuluko?
8 Natu taleni ishewe ketompelo limwe kutya omolwashike oonzi dhilwe hadhi kala pEdhimbuluko. Ohadhi kala dha hala okuulika kutya odhi hole notadhi yambidhidha aagwayekwa. Oohapu dhaKalunga odha hunganeka kutya aagwayekwa nosho wo oonzi dhilwe oya li taya ka kala nekwatathano lya kola. Ngiini mbela? Natu ka kundathaneni iiholelwa yimwe.
9. Ehunganeko ndyoka li li muSakaria 8:23 otali popi shike kombinga yankene oonzi dhilwe hadhi kala dhu uvitile aagwayekwa?
9 Lesha Sakaria 8:23. Ehunganeko ndika otali popi kombinga yankene oonzi dhilwe hadhi kala dhu uvitile aagwayekwa. Uutumbulilo ‘Omujuda gumwe’ nosho wo “nane” otawu popi ongundu yimwe, ano oshihupe shaagwayekwa mboka ye li ngashingeyi kombanda yevi. (Rom. 2:28, 29) “Aakwiilongo omulongo [“yomalaka gomiigwana ayihe” NW] oye lile po oonzi dhilwe. Ohaya “kwata,” sha hala okutya ohayi imanga kumwe nuudhiginini naagwayekwa, moku ya wayimina melongelokalunga lya yogoka. Onkee ano, ongulohi yEdhimbuluko, oonzi dhilwe ohadhi ulike kutya odhi na ekwatathano lyopothingo naagwayekwa sho hadhi kala po nayo.
10. Jehova okwa ninga po shike a gwanithe po ehunganeko ndyoka li li muHesekiel 37:15-19, 24, 25?
10 Lesha Hesekiel 37:15-19, 24, 25, yelekanitha OB-1954. Jehova okwa gwanitha po ehunganeko ndika sho a ningitha aagwayekwa noonzi dhilwe ya longele kumwe ya hangana. Ehunganeko ndika olya tumbula iiti iyali. Mboka ye na etegameno lyoku ka kala megulu oya fa oshiti ‘shaJuda’ (ezimo moka mwa li mwa hogololwa aakwaniilwa yaIsraeli), naamboka ye na etegameno lyoku ka kala kombanda yevi oya fa oshiti ‘shaEfraim.’ * Jehova okwa li ta ka hanganitha iiti mbyoka e tayi ningi ‘oshiti shimwe.’ Shoka osha hala okutya ohaya longele kumwe ya hangana taya wilikwa kOmukwaniilwa gumwe, Kristus Jesus. Omumvo kehe, aagwayekwa nosho wo oonzi dhilwe ohaya kala pEdhimbuluko, ayehe ye li ongundu yimwe, ano “oshigunda shimwe” shi na “omusita gumwe.” — Joh. 10:16.
11. Oonzi ndhoka dha popiwa muMateus 25:31-36, 40 ohadhi yambidhidha aamwahe yaKristus unene momukalo guni?
11 Lesha Mateus 25:31-36, 40. Meyele ndika, “oonzi” otadhi thaneke aantu mboka aayuuki pethimbo ndika lyehulilo mboka ye na etegameno lyoku ka kala kombanda yevi, ano oonzi dhilwe. Ohaya yambidhidha nuudhiginini aagwayekwa mboka ya hupa ko ngashingeyi kombanda yevi, unene moku ya kwathela ya gwanithe po oshinakugwanithwa oshinene, ano iilonga yokuuvitha noyokuninga aantu aalongwa muuyuni awuhe. — Mat. 24:14; 28:19, 20.
12-13. Omomikalo dhini ishewe oonzi dhilwe hadhi yambidhidha aamwahe yaKristus?
12 Omumvo kehe miiwike mbyoka tayi tetekele Edhimbuluko, oonzi dhilwe ohadhi yambidhidha aamwahe yaKristus mokukutha ombinga moshikonga shoka hashi ningwa muuyuni awuhe shokuhiya aantu mboka ye na ohokwe ye ye kEdhimbuluko. (Tala oshimpungu “ Oto ilongekidhile ngaa oomwedhi dhEdhimbuluko?”) Ohadhi ningi wo omalongekidho agehe ngoka ga pumbiwa, opo Edhimbuluko li vule okuningwa megongalo kehe muuyuni awuhe, nonando momagongalo ogendji kamu na omugwayekwa nando ogumwe. Oonzi dhilwe ohadhi kala dha nyanyukwa okwaambidhidha aamwahe yaKristus momikalo ndhoka. Odhi shi kutya Jesus okwa tala ko shoka tadhi ningile aamwahe aagwayekwa kutya oye te shi ningilwa. — Mat. 25:37-40.
13 Omolwomatompelo geni ishewe atuheni hatu kala pEdhimbuluko, kutya nduno otu na etegameno lini?
OMOLWASHIKE ATUHE HATU KALA PEDHIMBULUKO?
14. Jehova naJesus oye tu ulukila ngiini kutya oye tu hole noonkondo?
14 Otwa pandula ohole ndjoka Jehova naJesus ye tu ulukila. Jehova okwe tu ulukila ohole ye momikalo odhindji, ihe omukalo gumwe gwa dhenga mbanda, oosho a li a tumu Omwana omuholike kombanda yevi e ye a mone iihuna noku se omolwetu. (Joh. 3:16) Jesus naye okwe tu ulukila ohole onene sho i igandja nehalo ewanawa e tu sile. (Joh. 15:13) Itatu vulu okufuta Jehova naJesus omolwohole ndjoka ye tu ulukila, ihe otatu vulu okuulika kutya otwe ya pandula meihumbato lyetu esiku kehe. (Kol. 3:15) Ohatu kala pEdhimbuluko opo tu dhiladhile kohole ndjoka ye tu ulukila atuhe, natse tu ya ulukile kutya otu ya hole.
15. Omolwashike aagwayekwa nosho wo oonzi dhilwe hadhi ulike kutya odha pandula ekulilo?
15 Otwa pandula noonkondo omagano gekulilo. (Mat. 20:28) Aagwayekwa oya lenga noonkondo ekulilo, oshoka olye shi ningitha tashi wapa ya kale ye na etegameno ekumithi. Molwaashoka oye na eitaalo meyambo lyaKristus, Jehova okwe ya tala ko aayuuki nokwe ya taamba ko ye li oyana. (Rom. 5:1; 8:15-17, 23) Oonzi dhilwe nadho odha pandula lela ekulilo. Molwaashoka odhi na eitaalo meyambo lyaKristus, odha yogoka koshipala shaKalunga, ohadhi vulu oku mu longela iilonga iiyapuki nodhi na etegameno lyoku ka ‘pita momahepeko ngoka omanene,’ nenge tu tye muudhigu uunene. (Eh. 7:13-15) Omukalo gumwe moka aagwayekwa nosho wo oonzi dhilwe hadhi ulike kutya odha pandula ekulilo omokukala pEdhimbuluko omumvo kehe.
16. Omolwetompelo ishewe lini hatu kala pEdhimbuluko?
16 Etompelo limwe ishewe kutya omolwashike hatu kala pEdhimbuluko olyo kutya otwa hala okuvulika kuJesus. Kutya nduno etegameno lyetu olini, kehe gumwe gwomutse okwa hala okuvulika koshipango shoka Jesus a gandja uusiku mboka a dhike po Edhimbuluko a ti: “Shi ningeni nokudhimbulukwa ndje.” — 1 Kor. 11:23, 24.
UUWANAWA WUNI HATU MONO PO PEDHIMBULUKO?
17. Edhimbuluko ohali tu kwathele ngiini tu hedhe popepi naJehova?
17 Ohatu hedha popepi naJehova. (Jak. 4:8) Ngaashi twe shi ilongo, Edhimbuluko ohali tu pe ompito tu dhiladhile kombinga yetegameno ndyoka Jehova e tu pa notu tedhatedhe kohole onene ndjoka e tu ulukila. (Jer. 29:11; 1 Joh. 4:8-10) Sho tatu dhiladhila ketegameno lyetu ndyoka tatu ka mona shili monakuyiwa nosho wo kohole itaayi hulu po ndjoka Jehova e tu nine, ohashi koleke ohole yetu yoku mu hola nosho wo uukuume mboka tu na naye. — Rom. 8:38, 39.
18. Okutedhatedha koshiholelwa shaJesus, ohaku tu inyengitha tu ninge shike?
18 Edhimbuluko ohali tu inyengitha tu holele Jesus. (1 Pet. 2:21) Momasiku ngoka haga tetekele Edhimbuluko, ohatu gandja eitulomo komahokololo gOmbiimbeli ngoka taga popi kombinga yiiningwanima mbyoka ya li ya ningwa moshiwike shahugunina shaJesus kombanda yevi, eso lye nosho wo eyumuko lye. Kongulohi mesiku lyEdhimbuluko, ohatu pewa oshipopiwa shoka hashi tu dhimbulukitha ohole ndjoka Jesus e tu nine. (Ef. 5:2; 1 Joh. 3:16) Uuna tatu lesha kombinga yoshiholelwa shaJesus shombepo yeiyambo nokutedhatedha kusho, ohashi tu inyengitha tu “kale ngashika Jesus Kristus a li.” — 1 Joh. 2:6.
19. Oshike tu na okuninga opo tu tsikile okukala tu holike kuKalunga?
19 Otwa tokola toko shi vulithe nale tu kale mohole yaKalunga. (Jud. 20, 21) Kalunga ota kala e tu hole ngele otwa kala hatu ningi ngaashi tatu vulu tu vulike kuye, tu yapulithe edhina lye notu nyanyudhe omutima gwe. (Omayel. 27:11; Mat. 6:9; 1 Joh. 5:3) Okukala pEdhimbuluko ohaku tu inyengitha tu kale twa tokola toko tu ihumbate esiku kehe momukalo ngoka tagu ulike kutya otwa hala okukala tu holike kuJehova sigo aluhe.
20. Omatompelo omawanawa geni tu na gokukala pEdhimbuluko?
20 Kutya nduno etegameno lyetu olyoku ka kala sigo aluhe megulu nenge okombanda yevi, otu na lela omatompelo omawanawa gokukala pEdhimbuluko. Omumvo kehe sho hatu gongala pamwe mesiku ndyoka, ohatu dhimbulukwa eso lyagumwe ngoka tu hole, Jesus Kristus. Shoka unene sha dhenga mbanda, ohatu dhimbulukwa ohole onene, ano ohole ndjoka Jehova e tu ulukila sho a gandja Omwana e tu kulile. Nuumvo, Edhimbuluko otali ningwa kongulohi mEtitano, 15 Apilili 2022. Otu hole Jehova nOmwana, onkee mesiku lyEdhimbuluko lyeso lyaJesus, kapu na okukala pu na nando osha sha simana kutse shi vulithe okukala po.
EIMBILO 16 Tangeni Jehova omolwOmwana, Omugwayekwa
^ Kutya nduno etegameno lyetu olyoku ka kala megulu nenge omoparadisa kombanda yevi, ohatu kala twa halelela okukala pEdhimbuluko omumvo kehe. Oshitopolwa shika otashi ka kundathana kombinga yomatompelo omawanawa gomOmbiimbeli kutya omolwashike hatu kala po nuuwanawa mboka hatu mono po.
^ Oohapu ndhika odha tolokwa “Shi ningeni mu dhimbulukwe ndje” (Today’s English Version) nosho wo “Shi ningeni onga edhimbuluko lyandje” (The Jerusalem Bible).
^ Opo wu mone uuyelele owundji kombinga yehangano epe nosho wo ehangano lyUukwaniilwa, tala oshitopolwa “One otamu ka ninga ‘onkwaniilwa yaayambi’” shi li mOshungolangelo 15 Kotoba 2014, epandja 15-17.
^ UUTUMBULILO WA YELITHWA: Uutumbulilo mboka ya thigala ko otawu ulike kaagwayekwa mboka natango ye na omwenyo kombanda yevi.
^ Opo wu mone uuyelele wa gwedhwa po kombinga yehunganeko lyiiti iyali mbyoka ya popiwa muHesekiel ontopolwa 37, tala membo Pure Worship of Jehovah — Restored At Last!, ep. 130-135, okat. 3-17.
