1-3. Iinima yimwe yini tashi vulika yi tu lilithe?

 UUNAKE wi ihula okulila? Omathimbo gamwe ohatu lili kenyanyu. Ihe olundji ohatu lili molwaashoka tu uva nayi. Pashiholelwa, otashi vulika tu lile uuna gumwe ngoka tu hole a si. Omumwameme gwedhina Lorilei gwokoAmerika okwa ti: “Poompito dhimwe onda li handi kala ndi uvite nayi noonkondo sho omumwandjekadhona a si, noka pwa li shoka tashi vulu okuhekeleka ndje. Kanda li ndi shi ngele oshinima shoka otandi ka vula oku shi idhidhimikila.” *

² Opu na wo iinima yilwe mbyoka tayi vulu oku tu lilitha. Omumwameme Hiromi gwokoJapani okwa ti: “Omathimbo gamwe ohandi kala nda teka omukumo omolwokwaana ko nasha kwaantu mboka handi kambadhala okuuvithila. Omathimbo gamwe ohandi pula Jehova tandi lili, a kwathele ndje ndi mone gumwe ngoka a hala okutseya oshili.”

³ Mbela nangoye omathimbo gamwe oho kala wu uvite ngaashi aamwameme mboka twa zi nokupopya? Oyendji yomutse osho hatu kala tu uvite ngawo. (1 Pet. 5:9) Otwa hala ‘okulongela Jehova nenyanyu,’ ihe otashi vulika tu shi ninge twa nika oluhodhi, twa teka omukumo nenge tu li monkalo ondhigu ndjoka tayi makele uudhiginini wetu kuKalunga. (Eps. 6:6; 100:2) Oshike mbela tatu vulu okuninga po uuna twi iyadha tu uvite ngawo?

4. Oshike tatu ka kundathana moshitopolwa shika?

⁴ Otatu vulu okwiilonga sha koshiholelwa shaJesus. Poompito dhimwe opwa li oonkalo ndhoka dhe mu ningitha a ‘lile.’ (Joh. 11:35; Luk. 19:41; 22:44; Heb. 5:7) Natu ka kundathaneni dhimwe dhomoonkalo ndhoka. Sho tatu shi ningi, otatu ka mona shoka tatu vulu okwiilonga kombinga yaJesus nosho wo He, Jehova. Otatu ka kundathana wo omikalo tadhi longo ndhoka  tadhi vulu oku tu kwathela tu idhidhimikile oonkalo ndhoka hadhi tu etele oluhodhi.

5. Oshike tatu ilongo kombinga yaJesus kwaashoka sha popiwa muJohannes 11:32-36?

⁵ Pethimbo lyokufu mo 32 E.N., kuume ka Jesus Lasarus okwa tameke okweehama e ta si. (Joh. 11:3, 14) Lasarus okwa li e na aamwayinakadhona yaali, Maria naMarta, na Jesus okwa li e ya hole ayehe yatatu noonkondo. Aakiintu ayehe mboka yaali oya li ya gwililwa po noonkondo keso lyomumwayinamati gwawo. Konima sho Lasarus a si, Jesus okwa yi komukunda Betania, hoka Maria naMarta ya li haya zi. Sho Marta a uvu kutya Jesus oku li mondjila, okwa endelele e ke mu tsakaneke. Dhiladhila owala kunkene a li e uvite sho a lombwele Jesus a ti: “Omuwa, ando owa li po, ando omumwameme ina sa.” (Joh. 11:21) Nziya konima sho Jesus a mono Maria nayalwe taya lili, naye okwa lili. — Lesha Johannes 11:32-36.

6. Omolwashike Jesus a li a lili pompito yimwe?

⁶ Omolwashike Jesus pompito ndjono a lili? Embo Insight on the Scriptures otali ti: “Jesus ‘okwa hendwa komutima nokwa lili,’ sho a uvu kutya kuume ke Lasarus okwa sa naasho a mono nkene aamwayina yaLasarus ya nika oluhodhi omolweso lye.” * Jesus otashi vulika a li ta dhiladhila kombinga yuuwehame mboka kuume ke omuholike Lasarus a li muwo pethimbo ta ehama nankene a li e uvite sho e wete kutya oku li pokusa. Jesus otashi vulika wo a lili sho a mono nkene Maria naMarta ya dhengwa pevi keso lyomumwayina. Ngele nangoye owa silwa kuume koye nenge omukwanezimo, kapu na omalimbililo kutya nangoye owu na okukala wa li wa dhengwa pevi. Natu ka taleni kiinima itatu mbyoka tatu vulu okwiilonga moshiningwanima shika.

7. Sho Jesus a lili omolwookuume ke, otashi tu longo shike kombinga yaJehova?

⁷ Jehova oha kala e shi nkene wu uvite. Jesus ‘oku na ondjelo’ yaHe nenge tu tye oku na uukwatya wa fa waHe. (Heb. 1:3) Sho Jesus a lili, oku ulike kutya Jehova oha kala e uvite ngiini uuna twa silwa omuholike gwetu. (Joh. 14:9) Ngele owa nika oluhodhi omolweso lyagumwe  ngoka wu hole, kala wu na uushili kutya Jehova ke wete owala oluhodhi lwoye, ihe oku ku uvitile wo olukeno. Okwa hala okwaaludha omutima gwoye ngoka gwe ehamekwa. — Eps. 34:18; 147:3.

8. Omolwashike tu na okukala nuushili kutya Jesus ota ka yumudha aaholike yetu?

⁸ Jesus okwa hala oku ka yumudha aaholike yoye. Manga inaa lila, Jesus okwa shilipaleke Marta a ti: “Omumwanyoko ota ka yumuka.” Marta okwa li a itaale oohapu ndhika dhaJesus. (Joh. 11:23-27) Molwaashoka Marta okwa li omulongeli gwaJehova omudhiginini, oku na okukala a li e shi kombinga yomayumuko ngoka ga li ga ningwa monakuziwa komuhunganeki Elia nosho wo Elisa. (1 Aak. 17:17-24; 2 Aak. 4:32-37) Otashi vulika wo a li a uvu kutya Jesus okwa yumudha aantu yamwe. (Luk. 7:11-15; 8:41, 42, 49-56) Nangoye kala wu na uushili kutya oto ka mona ishewe aaholike yoye mboka ya sa. Sho Jesus a lili pompito ndjoka a li ta hekeleke ookuume ke mboka ya nika oluhodhi, oku ulike kutya okwa halelela oku ka yumudha oonakusa!

9. Ngaashi Jesus, ongiini to vulu okukwathela mboka ya nika oluhodhi? Gandja oshiholelwa.

⁹ Oto vulu okwaambidhidha mboka ya nika oluhodhi. Jesus ka li owala a lili pamwe naMarta naMaria, ihe okwa li wo a pulakene kuyo nokwe ya lombwele oohapu tadhi ya hekeleke. Natse otatu vulu okuningila sha faathana mboka ya nika oluhodhi. Dan, omukuluntugongalo ngoka ha kala moAustralia okwa ti: “Konima sho nekulu lyandje a si, onda li nda pumbwa okwaambidhidhwa. Aamwatate yamwe naakulukadhi yawo oya li aluhe yi ilongekidha omutenya nuusiku okupulakena kungame. Oya li ye etha ndi popye kombinga yeyeme lyandje nokaya li haya kala ya sa ohoni uuna tandi lili. Oya li wo ya kwathele ndje mokuninga iinima yontumba, ngaashi okuyoga ohauto yandje, oku ka landela ndje iikulya nokutelekela ndje, uuna nda li itaandi vulu okuninga iinima mbyoka. Olundji oya li ya galikana pamwe nangame. Oya li yu ulike kutya yo ookuume kashili naamwatate mboka ya ‘valwa, opo ya kwathe moluhepo.’” — Omayel. 17:17.

10. Hokolola kombinga yoshiningwanima shoka shi li muLukas 19:36-40.

¹⁰ Jesus okwa li e ya muJerusalem mo 9 gaNisan mo 33 E.N. Sho a thiki popepi noshilando shoka, ongundu yaantu oye mu gongalele e taya yala oonguwo dhawo mondjila komeho ge yu ulike kutya oye mu taamba ko e li Omukwaniilwa gwawo. Ndjoka oyi na okukala ya li lela ompito yenyanyu. (Lesha Lukas 19:36-40.) Onkee, aalongwa ye kaya li ya tegelela shoka sha ka ningwa po, ano kutya “Jesus sho a hedha popepi noshilando, okwe shi tala e te shi lili.” Okwa popi a kengeleka kombinga yuudhigu mboka wa li tawu ka adha aakalimo yomuJerusalem. — Luk. 19:41-44.

11. Omolwashike Jesus a lili omolwaakalimo yomuJerusalem?

¹¹ Jesus okwa li e uvite nayi komwenyo molwaashoka okwa li e shi kutya nonando aantu muJerusalem oya li ye mu taamba ko nenyanyu, okwa li e shi kutya Aajuda oyendji otaya ka tinda okutaamba ko etumwalaka lyUukwaniilwa. Oshizemo, Jerusalem osha li tashi ka hanagulwa po nAajuda ayehe mboka ya li taya ka hupa mehanagulo ndyoka oya li taya ka ninga aapika. (Luk. 21:20-24) Shi yemateka, ngaashi owala Jesus a ti, aantu oyendji oya tindi shili okupulakena kuye. Aantu oyendji moshitopolwa sheni ohayi inyenge ngiini ketumwalaka lyUukwaniilwa? Ngele aantu owala aashona haya pulakene koshili ndjoka to ya longo, oshike to ilongo kuJesus sho a lili omolwaantu yopethimbo lye? Natu ka taleni ishewe komatompelo gatatu.

12. Oshike tatu ilongo kombinga yaJehova, sho Jesus a lili omolwaantu yopethimbo lye?

 ¹² Jehova oku na ko nasha naantu. Okulila kwaJesus, ohaku tu dhimbulukitha kutya Jehova oku na ko nasha naantu shili. Jehova ‘ina hala nando ogumwe a ka hanagulwe po, ihe okwa hala, aantu ayehe ye ethe uulunde wawo.’ (2 Pet. 3:9, yelekanitha NW) Kunena, ohatu ulike kutya otu hole aantu ooyakwetu mokuninga oonkambadhala tu ya kwathele yi ilonge kombinga yonkundana ombwanawa yUukwaniilwa. — Mat. 22:39.

13-14. Jesus okwa li a ulukile ngiini aantu olukeno, nongiini tatu vulu okukokeka uukwatya mbuka?

¹³ Jesus okwa li ha longo nuudhiginini miilonga yokuuvitha. Okwa li a ulike kutya oku na ko nasha naantu sho a kala he ya longo pompito kehe. (Luk. 19:47, 48) Oshike sha li hashi mu inyengitha a ninge ngawo? Jesus okwa li e ya uvitile olukeno. Poompito dhimwe, aantu oyendji oya li ya hala oku mu pulakena, nokuli ye naalongwa ye kaya li ya mono ompito ‘yokulya.’ (Mark. 3:20) Okwa li wo a popi nagumwe gwomaapulakeni ye uusiku, pethimbo ndyoka omupulakeni ngoka opo a li a mono ompito. (Joh. 3:1, 2) Aantu oyendji mboka ya li ya pulakene kuJesus petameko kaya li ya ningi aalongwa ye. Ihe okwa li a uvithile nawanawa mboka ye mu uvu sho ta popi. Kunena otwa hala okuuvithila omuntu kehe onkundana ombwanawa. (Iil. 10:42) Opo tu shi tompole, otashi vulika tu kale twa pumbwa okuninga omalunduluko pethimbo ndyoka hatu uvithile aantu.

¹⁴ Kala wu na ehalo lyokuninga omalunduluko ngoka ga pumbiwa. Ngele ihatu uvitha pomathimbo ga yoolokathana, otashi vulika kaatu mone aantu mboka ya hala okwiilonga kombinga yonkundana ombwanawa. Omukokolindjila gwedhina Matilda okwa ti: “Ngame nomusamane gwandje ohatu kambadhala okuuvithila aantu pomathimbo ga yoolokathana. Ethimbo lyongula ohatu uvithile momahala goongeshefa. Omutenya ohatu longitha uutemba, oshoka aantu oyendji ohaya kala taya endaenda. Lwokomatango, opo hatu adha mo unene aantu oyendji momagumbo.” Pehala owala lyokukala tatu uvithile aantu pethimbo ndyoka tali tu opalele, natu kale tu na ehalo lyokuninga omalunduluko tu uvithile aantu pethimbo ndyoka tatu vulu lela oku ya mona. Ngele osho twa ningi, otatu vulu okukala nuushili kutya Jehova ota ka kala e tu nyanyukilwa.

15. Oshike sha li sha ningwa po muusiku wahugunina manga Jesus inaa sa, ngaashi sha popiwa muLukas 22:39-44?

¹⁵ Mo 14 Nisan mo 33 E.N., lwokongulohi, Jesus okwa li a yi meyana lyaGetsemane. Mehala ndyoka, okwa mbumbulile Jehova omutima gwe. (Lesha Lukas 22:39-44.) Pethimbo ndyoka edhigu, Jesus ‘okwi indile nokulila nokukugila pombanda.’ (Heb. 5:7) Jesus okwa li a galikana kombinga yashike muusiku mboka wa hugunina manga inaa sa? Okwa galikana a pewe oonkondo a kale omudhiginini kuJehova noku longe ehalo Lye. Jehova oku uvu egalikano lyOmwana ngoka tali zi komutima e ta tumu omuyengeli e mu koleke.

16. Omolwashike Jesus a li e uvite uudhigu sho a li ta galikana meyana lyaGetsemane?

¹⁶ Jesus oku na okukala a li ta lili sho ta galikana meyana lyaGetsemane, oshoka okwa li e uvite uudhigu sho aantu ya li taye ke mu tala ko kutya ina simaneka edhina lyaKalunga. Okwa li wo e shi kutya oku na oshinakugwanithwa sha kwata miiti, ano okukala omudhiginini nokupopila edhina lyaHe. Ngele owu li monkalo ondhigu ndjoka hayi makele uudhiginini woye kuJehova, oshike to vulu okwiilonga kokulila kwaJesus? Natu ka tale komatompelo omakwawo gatatu.

17. Oshike tatu vulu okwiilonga kombinga yaJehova sho a yamukula egalikano lyaJesus tali zi komutima?

¹⁷ Jehova oha pulakene komagalikano goye uuna to mu indile sha. Jehova okwa li a pulakene kuJesus sho a li te mu indile e mu ningile sha megalikano. Omolwashike mbela? Oshoka Jesus okwa li a halelela okukala omudhiginini kuHe nokupopila edhina Lye. Ngele otwa halelela okukala aadhiginini kuJehova nokupopila edhina lye, ota ka yamukula omagalikano getu sho tatu galikana e tu kwathele. — Eps. 145:18, 19.

18. Omomikalo dhini Jesus a fa kuume ngoka e na olukeno noku uvite ko omaiyuvo gayalwe?

¹⁸ Jesus oha kala e uvite ko omaiyuvo goye. Uuna twa yemata, ohatu kala twa nyanyukwa uuna tatu hekelekwa kukuume ngoka u uvite ko omaiyuvo getu, unene tuu ngele naye okweenda moonkalo oondhigu dha fa dhetu. Jesus oye kuume ngoka. Oku shi kutya omuntu oha kala u uvite ngiini ngele ke na oonkondo nokwa pumbwa ekwatho. Oku shi uunkundi wetu, noha shilipaleke aluhe kutya  otwa mona ekwatho ndyoka twa pumbwa “pethimbo lyo opala.” (Heb. 4:15, 16) Ngaashi owala Jesus a li a taamba ko ekwatho ndyoka a pewa komuyengeli meyana lyaGetsemane, natse natu kale tu na ehalo lyokutaamba ko ekwatho ndyoka Jehova he tu pe, kutya nduno okupitila moshileshomwa, mokavidio nenge moshipopiwa, nenge okupitila momukuluntugongalo nenge momumwatate nenge momumwameme ngoka a pyokoka.

19. Ongiini to vulu okumona oonkondo uuna wu li monkalo ondhigu? Gandja oshiholelwa.

¹⁹ Jehova ote ke ku pa ‘ombili yaKalunga.’ Jehova ote ke tu nkondopaleka ngiini? Ngele otwa galikana, otatu ka mona ‘ombili yaKalunga, ndjoka yi vule uunongo auhe wopantu.’ (Fil. 4:6, 7) Ombili ndjoka Jehova ha gandja ohayi tu ngungumaneke nohayi tu kwathele tu dhiladhile nawa. Natu tale kunkene hayi kwathele omumwameme Luz. Okwa ti: “Olundji ohandi kala ndu uvite uuwike. Omathimbo gamwe, omaiyuvo ngoka ohaga ningitha ndje ndi kale ndi uvite kutya Jehova ke hole ndje. Ihe uuna nda tameke okudhiladhila ngawo, nziya ohandi lombwele Jehova nkene ndi uvite. Egalikano ohali kwathele ndje ndi kale ndi uvite hwepo.” Ngaashi oshimoniwa shomumwameme nguka tashi shi ulike, natse otatu vulu okumona ombili yaKalunga ngele otwa galikana.

20. Iinima yini twi ilongo mokulila kwaJesus?

²⁰ Inatu ilonga tuu iiyilongomwa tayi tu hekeleke notayi tu kwathele mokulila kwaJesus! Otwa dhimbulukithwa tu ambidhidhe ookuume ketu mboka ya nika oluhodhi nokukala tu na einekelo kutya Jehova naJesus otaye ke tu kwathela uuna twa silwa gumwe ngoka tu hole. Otwa ladhipikwa tu uvithile nokulonga aantu nolukeno, oshoka Jehova Kalunga naJesus Kristus ohaya ulike uukwatya mboka uuwanawa. Ohashi tu hekeleke wo sho tu shi kutya Jehova nOmwana omuholike oyu uvite ko omaiyuvo getu, ohaye etele uunkundi wetu olukeno, noya hala oku tu kwathela tu idhidhimike. Onkee ano, natu tsikileni okutula miilonga shoka twi ilongo sigo opethimbo ndyoka Jehova ta ka gwanitha po euvaneko lye ndika ewanawa kutya “ota ka theta omahodhi agehe momeho [getu]!” — Eh. 21:4.