OSHITOPOLWA SHOKUKONAKONWA 4
Jehova oha yambeke oonkambadhala dhetu dhokukala pEdhimbuluko
“Shi ningeni nokudhimbulukwa ndje.” — LUK. 22:19.
EIMBILO 19 Uulalelo wOmuwa
ELALAKANO LYOSHITOPOLWA a
1-2. Omolwashike hatu kala pEdhimbuluko omumvo kehe?
KONYALA omimvo 2 000 lwaampono dha ka pita, Jesus okwa li a gandja omwenyo gwe molwetu, shoka she tu egululila ompito yoku ka mona omwenyo gwaaluhe. Muusiku mboka wa tetekele eso lye, Jesus okwa li a lombwele aalanduli ye ya dhimbulukwe eyambo ndyoka a gandja, mokuninga oshituthi shi li paunathangwa mpoka pwa li pwa longithwa owala oshikwiila nomaviinu. — 1 Kor. 11:23-26.
2 Ohatu vulika kelombwelo lyaJesus ndyoka, molwaashoka otu mu hole noonkondo. (Joh. 14:15) Omumvo kehe pethimbo lyEdhimbuluko, ohatu ulike olupandu lwetu lwaashoka Jesus e tu ningila mokukutha ethimbo tu dhiladhile notu galikane kombinga yaashoka eso lye tali ti kutse. Ohatu kala wo twa nyanyukwa okutamununa mo uukalele wetu, nokuhiya aantu oyendji ngaashi tashi vulika ye tu wayimine poshiningwanima shika shi ikalekelwa. Ohatu kala wo twa tokola toko kaatu ethe nando osha shi tu imbe okukala pEdhimbuluko.
3. Oshike tatu ka kundathana moshitopolwa shika?
3 Moshitopolwa shika, otatu ka tala omikalo ndatu moka oshigwana shaJehova hashi ningi oonkambadhala shi kale pEdhimbuluko lyeso lyaJesus: (1) omokudhana Edhimbuluko momukalo moka Jesus e shi longa shi li ninge, (2) omokuhiya yalwe kEdhimbuluko nosho wo (3) mokukala pEdhimbuluko, nonando oshi li moonkalo oondhigu.
OHATU DHANA EDHIMBULUKO MOMUKALO MOKA JESUS E TU LONGA
4. Omapulo geni haga yamukulwa omumvo kehe pEdhimbuluko, nomolwashike omayamukulo gomapulo ngoka tu na okukala twe ga lenga? (Lukas 22:19, 20)
4 Omumvo kehe pEdhimbuluko, ohatu pulakene koshipopiwa shopaMbiimbeli shono hashi tu pe omayamukulo ga yela komapulo gontumba. Ohatu ilongo kutya omolwashike twa pumbwa ekulilo nosho wo kutya ongiini eso lyomuntu gumwe lye shi ningitha tashi wapa tu dhiminwe po omayono getu. Ohatu dhimbulukithwa kutya oshikwiila nomaviinu otayi thaneke shike nosho wo kutya oolye ye na oku shi lya noku ga nwa. (Lesha Lukas 22:19, 20.) Ohatu tedhatedha wo komalaleko nuuyamba ngoka mboka taya ka kala kombanda yevi taya ka mona. (Jes. 35:5, 6; 65:17, 21-23) Otu na okukala twa lenga iinima mbyoka. Oshoka aantu omabiliyona kaye yi shi, noihaya ulike olupandu meyambo lyaJesus. Ihaya dhimbulukwa eso lye momukalo moka a longa aalanduli ye. Omolwashike mbela?
5. Konima sho aayapostoli oyendji yaJesus ya si, aantu oya tameke okudhana Edhimbuluko lyeso lyaJesus ngiini?
5 Nziya konima sho oyendji yomaayapostoli yaJesus ya si, Aakriste yiifundja oye ya megongalo. (Mat. 13:24-27, 37-39) Aalumentu mboka oya popi “iifundja, yi ihilile aalongwa.” (Iil. 20:29, 30) “Iifundja” yimwe mbyoka Aakriste mboka aafundja ya tameke okulonga aantu, oombyoka kutya Jesus ina gandja olutu lwe lu li eyambo “lumwe aluke, opo a kuthe po oondjo dhaantu,” ngaashi Ombiimbeli tayi ti. Ihe eyambo lye anuwa oli na okukala tali endululwa iikando niikando. (Heb. 9:27, 28) Kunena, aantu oyendji oyi itaala elongo ndyoka liifundja. Ohaya yi koongeleka oshiwike kehe, nomathimbo gamwe esiku kehe, oku ka dhimbulukwa eyambo lyaJesus, oshinima shoka hashi ithanwa mongeleka yaKatoolika kutya “Eyambo Eyapuki lyEmisa.” b Aantu yomoongeleka dhilwe ohaya dhimbulukwa eso lyaJesus nonando haaluhe, ihe oyendji yomuyo kaye uvite ko naanaa kutya eyambo lyaJesus otali ti shike. Yamwe ohashi vulika yi ipule ngeyi: ‘Mbela eso lyaJesus otali vulu ngaa shili okudhima po omayono gandje?’ Omolwashike hayi ipula ngaaka? Omolwaashoka poompito dhimwe oyi itaalithwa lela kaantu mboka haya ti kutya omayono itaga vulu okudhimwa po keso lyaJesus. Aalanduli yaJesus yashili oya ungaunga ngiini noshinima shoka?
6. Mo 1872, ongundu yaakonakonimbiimbeli oya li ya thiki pehulithodhiladhilo lini?
6 Lwopehulilo lyethelemumvo eti-19, ongundu yaakonakoni yOmbiimbeli mboka ya li pamwe naCharles Taze Russell, oya tameke okukonakona nuukeka Omanyolo. Oya li ya hala okutseya oshili kombinga yeyambo lyaJesus nosho wo kutya eso lye oli na okudhimbulukiwa ngiini. Mo 1872, oya li yu uvite ko nawa kutya Jesus okwa gandja shili ekuliloyambo omolwaantu ayehe. Uuyelele mboka ya li ya mono inaye wu ngungunina. Ihe oya li ye wu tseyithile aantu okupitila momambo, miifokundaneki nosho wo miifo. Nziya konima yaashoka, oya tameke okugongala pamwe ya dhimbulukwe eso lyaJesus omumvo kehe, taya holele Aakriste yomethelemumvo lyotango.
7. Ohatu mono ngiini uuwanawa momakonakono ngoka ga li ga ningwa kaakonakonimbiimbeli yopetameko?
7 Kunena ohatu mono uuwanawa miinima mbyoka ya li ya konakonwa kAakriste mboka konima yomimvo odhindji dha ka pita. Ngiini mbela? Jehova okwe tu kwathela tu uve ko kutya eyambo lyaJesus otali ti shike naashoka tali ke tu ningila nosho wo aantu ayehe. (1 Joh. 2:1, 2) Otwa ilonga wo kutya mOmbiimbeli omu na omategameno gaali gaantu mboka haya nyanyudha Kalunga. Etegameno lyomwenyo gwaaluhe megulu lyaantu yamwe nosho wo etegameno lyomwenyo gwaaluhe kombanda yevi lyaantu yalwe omamiliyona. Ohatu hedha popepi naJehova uuna tatu konakona kombinga yankene e tu hole nosho wo kombinga yankene hatu mono uuwanawa paumwene mekuliloyambo lyaJesus. (1 Pet. 3:18; 1 Joh. 4:9) Onkee ngaashi aamwatate aadhiginini yomonakuziwa, ohatu hiya yalwe ye ye tu dhimbulukwe nayo eso lyaJesus momukalo moka a longa aalongwa ye, ye li ninge.
HIYA YALWE KEDHIMBULUKO
Oshike to vulu okuninga opo wu kuthe ombinga thiluthilu moshikonga shokuhiya aantu kEdhimbuluko? (Tala okatendo 8-10) e
8. Oshigwana shaJehova osha li sha ningi shike opo shi hiye yalwe kEdhimbuluko? (Tala ethano.)
8 Oshigwana shaJehova oshi na ondjokonona onde yokuhiya yalwe kEdhimbuluko. Okuza petameko lyomumvo 1881, aamwatate naamwameme yomoAmerika oya li ya hiywa ya gongale megumbo lyomumwatate gumwe moAllegheny, moPennsylvania omolwoshiningwanima shika shi ikalekelwa. Lwanima, egongalo kehe olya ka kala hali ningi Edhimbuluko. MuMaalitsa 1940, aauvithi oya li ya lombwelwa kutya otaya vulu okuhiya kehe gumwe ngoka a ulika ohokwe moshitopolwa shawo. Mo 1960, oBetel oya li ya nyanyangidha uufo wehiyo noku wu tumina komagongalo oshikando shotango. Okuza mpoka, uufo omabiliyona wehiyo lyEdhimbuluko owa andjaganekwa. Omolwashike hatu longitha ethimbo olindji noonkondo nohatu longo lela nuudhiginini tu hiye yalwe?
9-10. Oolye haya mono mo uuwanawa moonkambadhala dhetu dhokuhiya yalwe kEdhimbuluko? (Johannes 3:16)
9 Etompelo limwe kutya omolwashike hatu hiya yalwe ye ye tu dhimbulukwe nayo eso lyaJesus, olyo kutya otwa hala yi ilonge kombinga yaashoka Jehova naJesus ye tu ningila atuhe. (Lesha Johannes 3:16.) Otu na einekelo kutya shoka haya mono nokuuva pEdhimbuluko, otashi ke ya inyengitha yi ilonge oshindji e taya ningi aapiya yaJehova. Ihe yalwe ohaya mono po wo uuwanawa.
10 Ohatu hiya wo mboka ihaaya longele we Jehova. Ohatu ningi ngaaka, opo tu ya dhimbulukithe kutya Kalunga oku ya hole natango. Oyendji ohaya taamba ko ehiyo lyetu, nohashi tu nyanyudha noonkondo oku ya mona ye ya kEdhimbuluko. Okukala pEdhimbuluko ohaku ya dhimbulukitha nkene ya li ya nyanyukilwa okulongela Jehova monakuziwa. Natu taleni koshiholelwa shaMonica. c Pethimbo lyomukithi gwekomba gwo-COVID-19, okwa tameke ishewe okuuvitha. Konima sho a kala pEdhimbuluko mo 2021, okwa ti: “Edhimbuluko ndika olya kala oshinima shi ikalekelwa kungame. Shika osho oshikando shotango konima yomimvo 20, nda vulu okuuvithila aantu noku ya hiya kEdhimbuluko ndika. Onda li nda ningi ngaashi tandi vulu ndi hiye yalwe, molwaashoka onda pandula shoka Jehova naJesus ya ningila ndje.” (Eps. 103:1-4) Kutya nduno aantu ohaya taamba ko ehiyo lyetu nenge hasho, ohatu ningi ngaashi tatu vulu tu ya hiye kEdhimbuluko, tu na uushili kutya Jehova oha pandula oonkambadhala dhetu.
11. Jehova okwa yambeka ngiini oonkambadhala dhetu dhokuhiya aantu kEdhimbuluko? (Haggai 2:7)
11 Jehova okwa yambeka lela oonkambadhala dhetu dhokuhiya aantu kEdhimbuluko. Mo 2021, nonando opwa li pu na omaimbo omolwomukithi gwekomba gwo-COVID-19, pEdhimbuluko opwa li aantu 21 367 603. Momwaalu ngoka Oonzapo dhaJehova adhihe muuyuni awuhe otadhi yi mo lwiikando iyali netata! Odhoshili kutya Jehova iha kala owala e na ko nasha nomwaalu gwaantu mboka haya kala po. Ihe oha gandja eitulomo komuntu kehe ngoka ha kala po. (Luk. 15:7; 1 Tim. 2:3, 4) Otu na uushili kutya uuna tatu hiya yalwe kEdhimbuluko, Jehova ote tu kwathele tu mone aantu mboka ye na omitima omiwanawa. — Lesha Haggai 2:7.
OSHIGWANA SHAJEHOVA OHASHI KALA PEDHIMBULUKO NUUNA OONKALO OONDHIGU
Jehova oha yambeke oonkambadhala dhetu dhokukala pEdhimbuluko (Tala okatendo 12) f
12. Oonkalo dhini hashi vulika dhi shi ningithe oshidhigu kutse tu kale pEdhimbuluko? (Tala ethano.)
12 Jesus okwa li a hunganeke kutya momasiku gahugunina, otatu ki iyadha moonkalo oondhigu, ngaashi okupatanekwa kaakwanezimo, omahepeko, iita, omalega noonkwawo odhindji. (Mat. 10:36; Mark. 13:9; Luk. 21:10, 11) Omathimbo gamwe, oonkalo ndhoka ohadhi shi ningitha oshidhigu kutse tu dhimbulukwe eso lyaJesus. Aamwatate naamwameme oya ninga po shike, opo ya sinde omashongo ngoka, nongiini Jehova e ya kwathela?
13. Jehova okwa li a yambeke ngiini Artem sho a ulike uulaadhi nokukala a tokola toko okuninga Edhimbuluko sho e li mondholongo?
13 Okutulwa mondholongo. Aamwatate mboka ye li mondholongo omolweitaalo lyawo, ohaya ningi ngaashi taya vulu ya dhimbulukwe eso lyaJesus. Tala koshiholelwa shaArtem. Poomwedhi dhEdhimbuluko lyomo 2020, okwa li mondholongo mokandunda okashona mu na aanandholongo yalwe yatano. Nonando okwa li e li mondholongo, okwa li a vulu okumona iinima yimwe e yi longithe yi li omandhindhiliko pEdhimbuluko, nokwa li a ningi omalongekidho a gandje oshipopiwa shEdhimbuluko omolwuuwanawa we mwene. Ihe mboka a li nayo mokandunda komondholongo oya li haya hili omakaya nohaya popi oohapu oombwinayi. Artem okwa ningi po shike? Okwe ya pula ngele otaya vulu okukala itaaya popi oohapu oombwinayi nokuhila omakaya uule owala wowili yimwe. Shoka sha li sha kumitha Artem, osho kutya aalumentu mboka oya zimine kaaya hile omakaya nenge ya tukane pethimbo lyEdhimbuluko. Artem okwa ti: “Onde ya lombwele kombinga yEdhimbuluko.” Nonando oya ti kutya kaya li ya hala okuuva kombinga yoshiningwanima shika, konima sho ya mono nokuuva Artem ta ningi Edhimbuluko, oye mu pula ashihe kombinga yalyo.
14. Oshigwana shaJehova osha vulu ngiini okukala pEdhimbuluko pethimbo lyomukithi gwekomba gwo-COVID-19?
14 Omukithi gwekomba gwo-COVID-19. Sho omukithi nguka gwa tukuka, oshigwana shaJehova kasha li tashi vulu okugongala pamwe pEdhimbuluko. Ihe shoka inashi shi imba okudhana Edhimbuluko. d Omagongalo ngoka haga vulu okulongitha ointaneta oga li ga vulu okudhana Edhimbuluko pavidio. Ihe ongiini kombinga yaantu omamiliyona mboka ya li kaaye na ointaneta? Miilongo yimwe, iitayimbelewa oya li ya ningi omalongekidho, opo aantu mboka ya vule okutala oshipopiwa shoka kotiivii nenge ye shi pulakene koradio. Shimwe ishewe, iitayimbelewa oya li ya vulu okukwata oshipopiwa shoka momalaka ge vulithe po 500, opo naamboka ye li kiitopolwa yi ikalela ya vule okudhana Edhimbuluko. Aamwatate oya li ya fala oshipopiwa shoka sha kwatwa mewi kaamwatate mboka ye li kiitopolwa mbyoka, mboka ya li ye shi pumbwa.
15. Oshike to ilongo koshiholelwa shomukonakonimbiimbeli gumwe Sue?
15 Okupatanekwa kaakwanezimo. Kuyamwe, eshongo enene ndyoka hali ya imbi okukala pEdhimbuluko, okupatanekwa kaakwanezimo. Tala koshiholelwa shomukonakonimbiimbeli gumwe, Sue. Mo 2021, esiku ndyoka lya tetekele Edhimbuluko, Sue okwa li a lombwele omulongi gwe gwOmbiimbeli kutya molwaashoka yaandjawo ohaye mu pataneke, ita vulu okukala po pEdhimbuluko. Omulongi gwe gwOmbiimbeli okwa lesha Lukas 22:44. Opo nduno okwe mu yelithile kutya uuna tu li muudhigu, otu na okulandula oshiholelwa shaJesus mokugalikana kuJehova nokwiinekela muYe thiluthilu. Esiku lya ka landula ko, Sue okwa longekidha oshikwiila nomaviinu e ta tala oonkundathana dhi ikalekelwa dhongula dhenyolo lyesiku kepandja lyokointaneta, jw.org. Ongulohi ndjoka, okwa yi mondunda ye yokulala e ta pulakene koshipopiwa shEdhimbuluko kongodhi ye. Konima yaashoka, Sue okwa nyolele omulongi gwe gwOmbiimbeli a ti: “Owa tsa ndje omukumo noonkondo ohela. Onda ninga ashihe shoka tandi vulu ndi kale po pEdhimbuluko, na Jehova okwa kwathela ndje lela. Onda nyanyukwa noonkondo nonda pandula lela!” Mbela sho to tala Jehova ita vulu oku ku kwathela ngele owi iyadha monkalo ya fa ndjoka?
16. Omolwashike tu na uushili kutya Jehova ota ka laleka nuuyamba oonkambadhala dhetu dhokukala pEdhimbuluko? (Aaroma 8:31, 32)
16 Jehova okwa lenga noonkondo oonkambadhala dhetu ndhoka hatu ningi tu kale pEdhimbuluko lyeso lyaJesus. Otatu vulu okukala tu na uushili kutya ote ke tu laleka nuuyamba, uuna tatu ulike olupandu lwaashoka e tu ningila. (Lesha Aaroma 8:31, 32.) Onkee ano, natu kaleni twa tokola toko okukala pEdhimbuluko omumvo nguka nokuninga ngaashi tatu vulu miilonga yaJehova pethimbo lyoomwedhi dhEdhimbuluko.
EIMBILO 18 Otu na olupandu omolwekulilo
a MEtiyali, 4 Apilili 2023, aantu omamiliyona muuyuni awuhe otaya ka kala pEdhimbuluko lyeso lyaKristus. Oyendji otaya ka kala po oshikando shotango. Yalwe mboka ye etha po okulongela Jehova noya ninga omimvo odhindji inaaye ya kEdhimbuluko, opo taya ka kala. Yamwe oye li moonkalo ndhoka hadhi shi ningitha oshidhigu kuyo ya kale po, ihe nayo otaya ka vula okukala po. Kutya nduno owu li moonkalo dha tya ngiini, oto vulu okukala wu na uushili kutya Jehova ota ka kala a nyanyukwa sho wa ninga oonkambadhala wu kale po.
b Aantu mboka haya dhana Emisa oyi itaala kutya oshikwiila nomaviinu ohaga lundulukile molutu nomombinzi yaKristus. Ohaya dhiladhila kutya olutu nombinzi yaJesus ohalu yambwa ethimbo kehe omuntu ta kutha ombinga moshituthi shoka.
c Omadhina gamwe oga lundululwa.
d Tala wo iitopolwa yi li kepandja lyokointaneta jw.org lyOshiingilisa, yi na oshipalanyolo “2021 Memorial Commemoration.”
