1-2. Oshike tu na okutsikila okuninga konima ngele twa ninginithwa? Shi yelitha.

 OHO opaleke egumbo lyoye lungapi? Otashi vulika wa li we li opaleke nawa manga inoo tembukila mo. Ihe mbela oshike tashi ka ningwa po ngele owa etha oku li opaleka? Ngaashi tu shi shi nawa, ontsi noongaga omo tadhi ndumbala nziya. Opo wu kaleke egumbo lyoye lya yela, owa pumbwa okukala ho li opaleke pandjigilile.

² Sha faathana, natse otu na okutsikila okupukulula okudhiladhila kwetu nosho wo omaukwatya getu. Odhoshili kutya manga inaatu ninginithwa, otwa li twa longo nuudhiginini tu ninge omalunduluko ngoka ga pumbiwa monkalamwenyo yetu, opo tu “iyoge shaa shoka tashi nyateke olutu nenge omwenyo.” (2 Kor. 7:1) Ihe ngashingeyi, otwa pumbwa okulandula omayele gomuyapostoli Paulus, ngoka taga ti kutya natu ‘tsikile okushituluka lela tu ninge aape.’ (Ef. 4:23, yelekanitha NW) Omolwashike twa pumbwa okutsikila okuninga ngawo? Omolwaashoka uuyuni mbuka otawu vulu oku tu nwetha mo meendelelo, e tatu kala inaatu yogoka momeho gaJehova. Opo tu yande oshilanduliko shoka nokukala twa hokiwa kuJehova, otu na okukala hatu konakona pandjigilile omadhiladhilo getu, omaukwatya getu nomahalo getu.

3. ‘Okushitulula omadhiladhilo geni’ otashi ti ngiini? (Aaroma 12:2)

³ Oshike twa pumbwa okuninga, opo tu shitulule omadhiladhilo getu, ano kutya tu lundulule omukalo gwetu gwokudhiladhila?  (Lesha Aaroma 12:2.) Uutumbulilo wOshigreka mboka wa tolokwa ‘okushitulula omadhiladhilo geni,’ otawu vulu wo okutolokwa “okwoopalekulula omadhiladhilo geni.” Onkee ano, inatu pumbwa owala okulundulula onkalamwenyo yetu miinima yontumba. Ihe otu na okukonakona uuntu wetu womeni nokuninga omalunduluko ngoka ga pumbiwa, opo tu vulike komithikampango dhaJehova. Katu na owala oku shi ninga lumwe, ihe otu na okutsikila oku shi ninga.

4. Ongiini tatu vulu okuyanda okunwethwa mo kuuyuni mbuka wa kolokosha?

⁴ Sho tatu ka kala twa gwanenena, otatu ka vula okunyanyudha Jehova mukehe shoka tatu ningi. Ihe ngashingeyi, otwa pumbwa okutsikila okulonga nuudhiginini tu adhe elalakano ndyoka. Ndhindhilika kutya mAaroma 12:2, Paulus okwa ti kutya otwa pumbwa okushitulula omadhiladhilo getu, opo tu tseye shoka Kalunga a hala tu ninge. Pehala lyokwiiyetha tu nwethwe mo kuuyuni mbuka wa kolokosha, tango otu na okwiikonakona tu mone nkene omadhiladhilo gaKalunga, ihe haangoka guuyuni, taga nwetha mo omalalakano getu nomatokolo getu.

5. Ongiini tatu vulu okukonakona omadhiladhilo getu kombinga yesiku lyaJehova ndyoka li li popepi? (Tala ethano.)

⁵ Natu ka taleni koshiholelwa. Jehova okwa hala ‘tu kale twa tegelela esiku lye.’ (2 Pet. 3:12) Ipula ngeyi: ‘Mbela onkalamwenyo yandje ohayi ulike kutya masiku uuyuni mbuka owu li pokuhulithwa po? Mbela omatokolo gandje ge ko nasha nelongo nosho wo niilonga ohaga ulike ngaa kutya okulongela Jehova okwo oshinima sha simana monkalamwenyo yandje? Mbela ondi na ngaa eitaalo kutya Jehova ota ka sila ndje oshimpwiyu nosho wo yaandjetu, nenge ohandi kala tandi ipula unene niinima yopamaliko?’ Dhiladhila nkene Jehova ta ka kala a nyanyukwa, sho e wete onkalamwenyo yetu yi li metsokumwe nehalo lye. — Mat. 6:25-27, 33; Fil. 4:12, 13.

6. Oshike twa pumbwa okutsikila okuninga?

 ⁶ Otwa pumbwa okukonakona pandjigilile omadhiladhilo getu nokuninga omalunduluko ngoka ga pumbiwa. Paulus okwa li a lombwele Aakorinto a ti: “Ikonakoneni, ne mu iyeleke, opo mu tale, ngele omu li tuu meitaalo.” (2 Kor. 13:5) Okukala “meitaalo” inaku kwatela mo owala okuya kokugongala nokukala hatu kutha ombinga miilonga yokuuvitha. Okwa kwatela mo wo okudhiladhila kwetu, omahalo getu nosho wo omainyengotompelo getu. Onkee ano, otwa pumbwa okutsikila okushitulula omadhiladhilo getu, mokulesha Oohapu dhaKalunga, mokwiilonga okudhiladhila ngaashi ye nokuninga kehe shoka sha pumbiwa tu kale metsokumwe nehalo lyaJehova. — 1 Kor. 2:14-16.

7. Shi ikolelela kAaefeso 4:31, 32, oshike ishewe tu na okuninga, nomolwashike tashi vulu okukala eshongo?

⁷ Lesha Aaefeso 4:31, 32. Kakele kokuninga omalunduluko mokudhiladhila kwetu, otwa pumbwa ‘okuzala omuntu omupe.’ (Ef. 4:24) Shono otashi tu pula tu longe nuudhiginini. Yimwe yomiinima mbyoka tu na okuninga, okulonga nuudhiginini tu sinde omaukwatya omawinayi, ngaashi uululu, ondjahi nonkone. Omolwashike tashi vulika shi kale oshidhigu? Omolwaashoka omaukwatya gamwe omawinayi oga mena omidhi mutse. Pashiholelwa, Ombiimbeli otayi ti kutya aantu yamwe oye na ‘egamo lyokugeya’ nenge haya ‘geye mbala.’ (Omayel. 29:22, yelekanitha NW.) Gumwe ngoka a li e na omaukwatya omawinayi, otashi vulika a pumbwa okulonga nuudhiginini, opo a ninge omalunduluko nokuli nokonima sho a ninginithwa, ngaashi tatu ke shi mona moshimoniwa tashi landula.

8-9. Oshimoniwa shaStephen otashi ulike ngiini kutya otwa pumbwa okutsikila okwiihula omuntu gwetu omukulu?

⁸ Omumwatate gumwe gwedhina Stephen okwa li e na uunkundi wokupangela ongeyo ye. Okwa ti: “Konima sho nda ninginithwa, onda li ndi na okukondjitha iikala yokugeya nayi. Oshikando shimwe manga tatu longo egumbo negumbo muukalele, onda li nda tidha omufuthi ngoka a yaka oradio mohauto yandje. Sho nde mu hedha popepi, oradio okwe yi ekelehi e ta fadhuka po. Sho nde shi hokololele mboka nda li tandi longo nayo kutya onde yi mona, omukuluntugongalo gumwe okwa pula ndje a ti ‘Stephen ando omufuthi owe mu kwatele, ando owe mu ningile shike?’ Epulo ndyoka olya li lya dhiladhilitha ndje muule noli inyengitha ndje ndi [longele ko kuukwatya] wokukala omunambili.” b

⁹ Ngaashi oshimoniwa shaStephen tashi shi ulike, otashi vulika tu ulike uukwatya uuwinayi inaatu shi tegelela, nonando otwa kala hatu ti katu wu na we. Ngele shono oshe ku ningilwa, ino teka omukumo nokudhiladhila kutya ngoye omuntu omwinayi. Omuyapostoli Paulus okwa li e shi zimine a ti: “Nando ndi kale nda hala okulonga uuwanawa, uuwinayi auke he longo.” (Rom. 7:21-23) Aakriste ayehe inaya gwanenena, onkee oye na uukwatya uuwinayi mbono hawu tsikile okuya mo ishewe muyo ngaashi owala ontsi niiyagaya mbyono hayi ya momagumbo getu. Onkee ano, otwa pumbwa okutsikila okwiikaleka twa yogoka. Ongiini tatu vulu oku shi ninga?

10. Ongiini to vulu okukondjitha omaukwatya omawinayi? (1 Johannes 5:14, 15)

¹⁰ Lombwele Jehova megalikano omaukwatya omawinayi ngoka to kondjo nago, wu na omukumo kutya ote ku uvu note ku kwathele. (Lesha 1 Johannes 5:14, 15.) Nonando Jehova ita kutha po uukwatya uuwinayi pashikumithalonga, ota vulu oku ku pa oonkondo kuu ulike omaukwatya ngoka omawinayi. (1 Pet. 5:10) Ihe ngashingeyi kala metsokumwe nomagalikano goye, mokukala ihoo ningi iinima mbyoka  tayi ku ningitha wu zale omuntu omukulu. Pashiholelwa, kala wa kotokela okutala oomuvi, oopolohalama dhokotiivii nenge okulesha omahokololo ngoka taga hwahwameke omaukwatya omawinayi ngoka to kambadhala okweetha po. Ino etha nando wu kale to dhiladhila kombinga yiinima iiwinayi. — Fil. 4:8; Kol. 3:2.

11. Oshike tu na okuninga, opo tu kale twa zala omuntu omupe?

¹¹ Kutya nduno owi ihula omuntu omukulu, osha simana okukala wa zala omuntu omupe. Ongiini to vulu oku shi ninga? Omokuholela Jehova sho to ilongo kombinga yomaukwatya ge. (Ef. 5:1, 2) Pashiholelwa, uuna wa lesha ehokololo mOmbiimbeli tali popi kutya Jehova oha dhimine po, ipula ngeyi, ‘Mbela ohandi dhimine po ngaa yalwe?’ Uuna to lesha kombinga yohenda ndjoka Jehova hu ulukile yalwe uuna ye li muudhigu, ipula ngeyi, ‘Mbela ohandi kwathele ngaa ooitaali ooyakwetu mboka ye na ompumbwe, nohandi shi ulike ngaa miilonga?’ Omukalo gumwe to vulu okushitulula omadhiladhilo goye, omokuzala omuntu omupe nokukala omwiidhidhimiki sho to shi ningi.   

12. Ombiimbeli oya li ya kwathele ngiini Stephen a lundulule iikala ye?

¹² Stephen ngoka a popiwa metetekelo, okwe shi mono kutya okwa li a vulu okuzala omuntu omupe kashona nakashona. Okwa ti: “Okuza sho nda ninginithwa, opwa kala natango iinima oyindji mbyoka hayi geyitha ndje nayi. Onda li ndi ilongo okukala handi zi po paantu mboka taya kambadhala okugeyitha ndje, nenge ndi ngungumaneke onkalo momukalo kehe tagu wapa. Aantu oyendji mwa kwatelwa nekulu lyandje, ohaye shi pandulile ndje. Ondi ikuminwa lela. Ihandi ipandula mwene, sho nda lundulula iikala yandje. Pehala lyaashono, ondi wete kutya shika otashi ulike kutya Ombiimbeli oyi na oonkondo okulundulula omuntu.”

13. Oshike tashi ke tu kwathela tu tsikile okukokeka omahalo omawanawa? (Aagalati 5:16)

¹³ Lesha Aagalati 5:16. Jehova ohe tu pe ombepo ye ondjapuki yi tu kwathele tu longe shoka shu uka. Uuna tatu konakona Oohapu dhaKalunga, otatu etha ombepo ye yi tu nwethe mo. Ohatu mono wo ombepo ondjapuki, uuna tu li pokugongala. Pokugongala mpoka ohatu kala po naamwatate naamwameme mboka haya kambadhala okulonga shoka shi li mondjila ngaashi tse, naashoka ohashi tu tsu omukumo. (Heb. 10:24, 25; 13:7) Shimwe ishewe, ngele otwa galikana Jehova tashi zi komutima noku mu pula e tu kwathele tu kondjithe uunkundi wetu, ote tu pe ombepo ye ondjapuki yi tu nkondopaleke, tu tsikile okukondjitha omahalo omawinayi. Nonando iinima mbyoka otashi vulika kaayi kuthe po omahalo getu omawinayi, otayi ke tu kwathela tu kondjithe iilonga yuuhalu. Ngaashi Aagalati 5:16 taya ti, mboka taya endithwa kombepo ‘itaa ka gwanitha we uuhalu wopantu.’

14. Omolwashike sha simana okutsikila okukokeka omahalo omawanawa?

¹⁴ Sho twa tameke okuninga iinima mbyoka tayi tu kwathele tu kale tu na ekwatathano ewanawa naJehova, osha simana okutsikila okukokeka omahalo omawanawa. Omolwashike? Omolwaashoka gumwe gwomaatondi yetu iha kotha. Omutondi ngoka oye emakelo lyokuninga shoka sha puka. Nokuli nokonima sho twa ninginithwa otashi vulika tu iyadhe tatu ningi iinima mbyoka twa pumbwa okuyanda, ngaashi okundombola, okunwa sha pitilila nenge okutala omathano giipala. (Ef. 5:3, 4) Omumwatate gumwe Omukriste omugundjuka okwe shi zimine a ti: “Oshinima shimwe shoka oshidhigu nda kala te kondjo nasho, osho okukala nda hala omuntu guukashikekookantu wa fa wandje. Onda li ndi shi omahalo ngoka kage po we, ihe  natango ondi ga na.” Oshike tashi vulu oku ku kwathela ngele owu na omahalo omawinayi ge na lela oonkondo?

15. Omolwashike tashi tu tsu omukumo okukala tu shi kutya omahalo ga puka ohaga adha “aantu ayehe”? (Tala ethano.)

¹⁵ Uuna to kondjo nomahalo ga puka ngoka ge na lela oonkondo, dhimbulukwa kutya hangoye awike. Ombiimbeli otayi ti: “Emakelo ndyoka lye mu adha, olyo tuu ndyoka hali adha aantu ayehe.” (1 Kor. 10:13a) Ombiimbeli yilwe oya toloka ovelise ndjoka ya ti: “Kapu na emakelo lye mu adha inaali adha nale aantu.” Oohapu ndhoka odha li dha nyolelwa Aakriste aalumentu naakiintu mboka ya li muKorinto. Yamwe yomuyo oya li nale aahondeli, omashenge noonkolwi. (1 Kor. 6:9-11) Mbela sho to dhiladhila konima sho ya ninginithwa kaya li we ye na omahalo ga puka ngono ya li haya kondjo nago? Oya li ye ga na. Odhoshili kutya ayehe oya li aagwayekwa, ihe oya li aantu inaaya gwanenena. Onkee nokaapu na omalimbililo, oya li haya kondjo nomahalo ga puka omathimbo nomathimbo. Oshinima shoka nashi tu tse omukumo. Omolwashike? Omolwaashoka otashi ulike kutya nando oto kondjo nomahalo omawinayi ga fa peni, opu na gumwe e ga sinda. Onkee oto vulu okukala “wu na eitaalo lya kola, oshoka owa tseya nooitaali ooyakweni yomuuyuni auhe otaa pitile momahepeko ogo tuu ngoka.” — 1 Pet. 5:9.

16. Oshiponga shini tu na okuyanda, nomolwashike?

¹⁶ Yanda oshiponga shokudhiladhila kutya kapu na ngoka ta vulu okuuva ko onkalo yoye. Oshoka okudhiladhila kwa tya ngawo otaku vulu oku ku ningitha wu thike pehulithodhiladhilo kutya onkalo yoye itayi ke ya we kondjila nosho wo kutya ito vulu okukondjitha omahalo omawinayi. Ihe Ombiimbeli otayi ti: “Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.” (1 Kor. 10:13b) Onkee ano, nokuli nonando omahalo  omawinayi oga kale ge na oonkondo, otatu vulu okutsikila okukala aadhiginini kuJehova. Kekwatho lyaJehova otatu vulu okuninga ngaaka mokuhenuka okuninga shoka sha puka.

17. Nonando otatu tsikile okwaadhika komahalo omawinayi, oshike tatu vulu okuninga?

¹⁷ Dhimbulukwa aluhe kutya tu li aantu inaatu gwanenena, otu na okwaadhika komahalo omawinayi. Ihe ngele oge ku adha owu na oku ga yanda meendelelo, ngaashi Joseph a li a fadhuka po omukulukadhi gwaPotifar. (Gen. 39:12) Ino pumbwa okwiiyethela momahalo omawinayi!

18-19. Omapulo geni tatu vulu okwiipula sho tatu kambadhala okushitulula omadhiladhilo getu?

¹⁸ Okushitulula omadhiladhilo getu okwa kwatela mo oonkambadhala tadhi tsikile, opo omadhiladhilo getu noonkatu dhetu dhi nyanyudhe Jehova. Onkee, kala ho ikonakona pandjigilile nokwiipula ngeyi: ‘Mbela ohandi ihumbata ngaa momukalo ngono tagu ulike kutya ondi wete kutya ethimbo ndino tu li mulyo olye endelela? Otandi ningi ngaa ehumokomeho mokuzala omuntu omupe? Ohandi etha ngaa ombepo yaJehova yi wilike ndje monkalamwenyo yandje, opo ndi yande okuninga iinima ya puka?’

¹⁹ Sho to ikonakona tala mpoka wa ninga ehumokomeho, ihe hakokwaagwanenena kwoye. Ngele owa mono mpoka wa pumbwa okuninga ehumokomeho, ino teka omukumo. Pehala lyaashono, landula omayele ngoka ge li mAafilippi 3:16 taga ti: “Natu humeni owala komeho nondjila naanaa ndjoka twe ende nayo sigo oompaka.” Ngele osho wa ningi, kala wu na uushili kutya Jehova ota ka yambeka oonkambadhala dhoye wu tsikile okushitulula omadhiladhilo goye.