1-2. (a) Otashi vulika tu kale tu uvite ngiini, uuna tatu dhiladhila kombinga yonkalamwenyo yaJesus nuukalele we? (b) Oshike tatu ka kundathana moshitopolwa shika?

 UUNA twa silwa gumwe ngoka tu hole, ohatu kala twe mu yuulukwa unene! Petameko otashi vulika tu kale twa yemata unene sho tatu dhiladhila komasiku ngoka twa li hatu kala naye manga inaa sa, unene tuu ngele ngoka a si okwa li ta mono iihuna manga inaa sa. Ihe mokweendela ko kwethimbo, ohatu tameke ishewe twa nyanyukwa, uuna tatu dhiladhila kwaashoka e tu longa nenge oshinima shoka a ninga nenge a popya, e tu tse omukumo nenge e tu nyanyudhe.

² Momukalo gwa faathana, ohashi tu yemateke uuna tatu lesha kombinga yokuhepekwa kwaJesus nosho wo yeso lye. Poomwedhi dhEdhimbuluko, ohatu longitha lela ethimbo tu dhiladhile kombinga yankene eyambo lyaJesus lya simana. (1 Kor. 11:24, 25) Ihe ohatu mono enyanyu olindji uuna tatu dhiladhila kiinima ayihe mbyoka Jesus a popya nokwa ninga sho a li kombanda yevi. Ohashi tu tsu wo omukumo, uuna tatu dhiladhila kwaashoka ta ningi ngashingeyi nosho wo kwaashoka te ke tu ningila monakuyiwa. Okutedhatedha kiinima mbyoka nosho wo kohole ye ndjoka e tu nine, ohaku tu inyengitha tu ulike olupandu momikalo tadhi longo ngaashi tatu ke shi mona moshitopolwa shika.

3. Otu na omatompelo geni gokukala nolupandu omolwekulilo?

³ Ohatu kala tu na olupandu, uuna twa dhiladhila konkalamwenyo nokeso lyaJesus. Momukokomoko guukalele we kombanda yevi, Jesus okwa li a longo aantu kombinga yomayambeko ngoka Uukwaniilwa waKalunga tawu ke ya etela. Otwa pandula noonkondo oshili ndjika yUukwaniilwa. Otwa pandula ekulilo, molwaashoka ohali tu pitike tu kale tu na ekwatathano lya kola naJehova  nosho wo naJesus. Mboka yi itaala Jesus oye na wo ompito yoku ka kala nomwenyo sigo aluhe noku ka mona aaholike yawo ya yumudhwa. (Joh. 5:28, 29; Rom. 6:23) Inatu ninga nando osha, shoka she tu ningitha tu kale twa gwana okumona omayambeko ngoka noitatu vulu okufuta Kalunga naKristus omolwoshinima shoka ye tu ningila. (Rom. 5:8, 20, 21) Ihe otatu vulu okuulika kutya otwe ya pandula noonkondo. Ngiini mbela?

4. Maria Magdalena okwa ulike ngiini olupandu lwaashoka Jesus e mu ningila? (Tala ethano.)

⁴ Tala koshiholelwa shomukiintu gumwe Omujuda, Maria Magdalena. Okwa li monkalo tayi yemateke, molwaashoka okwa li ta monithwa iihuna koompwidhuli heyali. Oku na okukala a li e uvite kutya kapu na nando ogumwe ta vulu oku mu kwathela. Ihe dhiladhila owala nkene a li a pandula sho Jesus a tidha mo muye oompwidhuli ndhoka dha li tadhi mu hepeke! Olupandu lwe olwe mu inyengitha a ninge omulanduli gwaJesus nokulongitha ethimbo lye, oonkondo dhe nosho wo iiniwe ye a yambidhidhe Jesus miilonga yokuuvitha. (Luk. 8:1-3) Nonando Maria okwa li a pandula noonkondo shoka Jesus e mu ningila paumwene, otashi vulika ka li naanaa e uvite ko omagano ga dhenga mbanda ngoka Jesus a li te ke mu pa. Jesus okwa li ta ka gandja omwenyo gwe pehala lyaantu ayehe, “opo shaa ngoka te mu itaale” a vule oku ka mona omwenyo gwaaluhe. (Joh. 3:16) Ihe Maria okwa ulike kutya okwa pandula Jesus mokukala omudhiginini kuye. Pethimbo Jesus a li ta monithwa iihuna komuti gwomahepeko, Maria okwa li a thikama popepi naye, molwaashoka okwa li e na ko nasha naye nokwa li ta hekeleke mboka ya li po. (Joh. 19:25) Konima sho Jesus a si, Maria nosho wo aakiintu yalwe yaali oya eta omugwayo gwa nika nawa kombila, ye mu longekidhile epako. (Mark. 16:1, 2) Jehova okwa li a yambeke Maria noonkondo, molwaashoka okwa li omudhiginini kuJesus. Konima sho Jesus a yumudhwa, okwa li a tsakanene naMaria nokwa li a yi moonkundathana naye, uuthembahenda mboka kaawa li wa monika koyendji yomaalongwa yaJesus. — Joh. 20:11-18.

5. Ongiini tatu vulu okuulika olupandu lwiinima ayihe mbyoka Jehova naJesus ye tu ningila?

 ⁵ Natse otatu vulu okuulika olupandu omolwiinima ayihe mbyoka Jehova naJesus ye tu ningila mokulongitha ethimbo lyetu, oonkondo dhetu nosho wo iiyemo yetu tu longele Jehova. Pashiholelwa, otatu vulu okukwathela miilonga yokutunga noyokukaleka monkalo ombwanawa omatungo ngoka hatu longitha tu longele Jehova.

6. Omolwashike tatu vulu okutya ekulilo omagano gomuntu kehe?

⁶ Uuna twa dhiladhila kunkene Jehova naJesus ye tu hole, ohashi tu inyengitha natse tu kale tu ya hole. (1 Joh. 4:10, 19) Ohatu kala tu ya hole noonkondo unene tuu ngele twe shi mono mo kutya Jesus okwe tu sila pauhandimwe. Omuyapostoli Paulus okwa koleke oshinima shoka nokwa popi nkene e shi pandula sho a nyolele Aagalati a ti: ‘Omuna gwaKalunga, oku hole ndje nokwa gandja omwenyo gwe molwandje.’ (Gal. 2:20) Omolwekulilo, Jehova okwe ku nanena kuye, opo wu vule okuninga kuume ke. (Joh. 6:44) Mbela shoka ihashi ku hekeleke okutseya kutya Jehova okwa mona sha oshiwanawa mungoye nosho wo kutya okwa futa ofuto oyindji, opo wu vule okukala kuume ke? Mbela ihashi koleke ohole yoye yokuhola Jehova naJesus? Onkee ano, natu ipule ngeyi, ‘Ohole ndjoka oyi na okwiinyengitha ndje ndi ninge shike?’

7. Ngaashi sha ulikwa methano, ongiini atuheni tatu vulu okuulika kutya otu hole Jehova naJesus? (2 Aakorinto 5:14, 15; 6:1, 2)

⁷ Ohole yetu yokuhola Kalunga naKristus ohayi tu inyengitha tu ulukile yalwe ohole. (Lesha 2 Aakorinto 5:14, 15; 6:1, 2.) Omukalo gumwe hatu ulike ohole ndjoka, omokukutha ombinga nuulaadhi miilonga yokuuvitha. Ohatu popi nakehe gumwe tatu tsakaneke. Ihatu yanda okupopya nomuntu nando ogumwe, molwaashoka a za meputuko, nenge momuhoko gwa yooloka ko kugwetu. Ihe ohatu popi nakehe gumwe kutya nduno omuyamba, ohepele, a longwa nenge ina  longwa. Mokuninga ngawo, otatu longo ehalo lyaJehova, ngoka a hala “aantu ayehe ya hupithwe noya tseye oshili.” — 1 Tim. 2:4.

8. Ongiini tatu vulu okuulukila aamwatate naamwameme ohole?

⁸ Ohatu ulike wo kutya otu hole Kalunga naKristus mokuulukila aamwatate naamwameme ohole. (1 Joh. 4:21) Ohatu ulike kutya otu na ko nasha nayo nohatu ya kwathele uuna ye li momaudhigu. Ohatu ya hekeleke uuna ya silwa, ohatu ya talele po uuna taya ehama, nohatu ningi ngaashi tatu vulu tu ya tse omukumo uuna ya gwilililwa po. (2 Kor. 1:3-7; 1 Tes. 5:11, 14) Ohatu tsikile oku ya galikanena, molwaashoka otu na uushili kutya “egalikano lyomuyuuki oli na oonkondo okuninga sha.” — Jak. 5:16.

9. Omomukalo gulwe guni tatu vulu okuulika kutya otu hole aamwatate naamwameme?

⁹ Ohatu ulike wo kutya otu hole aamwatate naamwameme, mokulonga nuudhiginini tu kaleke po ombili pokati ketu nayo. Ohatu kambadhala okuholela Jehova ngoka ha dhimine po aantu. Ngele Jehova okwa li e na ehalo lyokweetha Omwana a se omolwoondjo dhetu, mbela natse katu na okukala hatu dhimine po nehalo ewanawa aamwatate naamwameme uuna ya yono kutse? Inatu hala okukala twa fa omupiya omwiinayi ngoka a popiwa meyele lyaJesus. Nonando omuwa gwe okwa li e mu dhimine po oongunga dhe odhindji ndhoka a li e na, omupiya ngoka ka li a dhimine po omupiya omukwawo ngoka a li e na owala oongunga dhe oonshona. (Mat. 18:23-35) Ngele pokati koye nagumwe megongalo opu na okwaahauvathana, mbela ito vulu okukatuka tango onkatu wu ka pange ombili naye manga Edhimbuluko inaali thika? (Mat. 5:23, 24) Ngele osho wa ningi, kungawo oto ulike kutya owu hole noonkondo Jehova naJesus.

10-11. Ongiini aakuluntugongalo taya vulu okuulika kutya oye hole Jehova naJesus? (1 Petrus 5:1, 2)

¹⁰ Ongiini aakuluntugongalo taya vulu okuulika kutya oye hole Jehova naJesus? Omukalo gwa simana moka taya vulu oku shi ninga, omokusila oshimpwiyu oonzi dhaJesus. (Lesha 1 Petrus 5:1, 2.) Jesus okwa li a yelithile omuyapostoli Petrus oshinima shoka nawa. Konima sho Petrus a idhimbike Jesus iikando itatu, Petrus otashi vulika a li a halelela okuulika kutya oku hole Jesus. Konima yeyumuko lye, Jesus okwa pula Petrus a ti: “Simon yaJohannes, ou hole ndje tuu?” Otatu vulu okukala tu na uushili kutya Petrus oku na okukala a li a ningi oshindji a ulike kutya oku hole Omuwa gwe. Jesus okwa lombwele Petrus a ti: “Litha uunzigona wandje.” (Joh. 21:15-17) Monkalamwenyo ye ayihe, Petrus okwa li a sile oshimpwiyu nawa oonzi dhOmuwa, shoka shu ulike kutya okwa li e hole Jesus.

¹¹ Aakuluntugongalo, pethimbo lyoomwedhi dhEdhimbuluko, ongiini tamu vulu okuulika kutya oohapu dhaJesus ndhoka a li a lombwele Petrus odha simana kune? Otamu vulu okuulika kutya omu hole Jehova naJesus shi thike peni, mokuninga omatalelopo guusita pandjigilile nosho wo mokuninga oonkambadhala dhi ikalekelwa mu kwathele mboka inaayi ipyakidhila we, ya galukile kuJehova. (Hes. 34:11, 12) Otamu vulu wo okukambadhala okutsa omukumo aakonakonimbiimbeli nosho wo aantu yalwe, mboka ye na ohokwe nohaye ya kEdhimbuluko. Otwa hala oku ya ningitha ya kale ye uvite uugumbo, molwaashoka otu na einekelo kutya nayo otaya vulu okuninga aalanduli yaJesus.

12. Okudhiladhila koohapu ndhoka Jesus a li a popi ongulohi ndjoka ya tetekele eso lye, ohaku tu tsu ngiini omukumo? (Johannes 16:32, 33)

¹² Ongulohi ndjoka ya tetekele eso lye, Jesus okwa li a lombwele aalongwa ye a ti: “Uuyuni otau ke mu hepeka. Ihe inamu tila, ngame onda sinda uuyuni!” (Lesha Johannes 16:32, 33.) Oshike sha li sha kwathele Jesus a kale e na uulaadhi, sho a li ta thiminikwa kaatondi ye nokukala omudhiginini sigo omeso? Okwa kala i  inekela muJehova. Molwaashoka okwa li e shi kutya aalanduli ye nayo otaye ki iyadha momamakelo ga fa ge, okwa pula Jehova e ya gamene. (Joh. 17:11) Omolwashike oshinima shoka tashi tu tsu omukumo? Omolwaashoka Jehova oku na oonkondo e vule lela aatondi yetu. (1 Joh. 4:4) Jehova oha kala e wete kehe shimwe. Otwa tompwa kutya ngele otwa kala twa inekela muJehova, ote tu kwathele tu sinde uumbanda wetu notu kale tu na uulaadhi.

13. Josef Omwaarimatia okwa li a ulike ngiini uulaadhi?

¹³ Tala koshiholelwa shaJosef Omwaarimatia. Okwa li a simanekwa lela kAajuda. Okwa li wo oshilyo shOmpangu yopombanda yAajuda. Ihe pethimbo lyuukalele waJesus kombanda yevi, Josef okwa li ha vulu okuninga kehe shimwe, ihe ka li e na uulaadhi. Johannes okwa ti kutya okwa li “omulongwa gwaJesus, ihe omeholamo, oshoka okwa [li a] tila Aajuda.” (Joh. 19:38) Nonando Josef okwa li e na ohokwe metumwalaka lyUukwaniilwa, okwa li i iholeke kutya oku na eitaalo muJesus. Osha yela kutya otashi vulika a li a tila kutya aantu itaye ke mu simaneka we ngele oya uvu kutya ye omulongwa gwaJesus. Kutya nduno oshike, Ombiimbeli otayi tu lombwele kutya konima sho Jesus a si, Josef hugunina “okwi itsu omukumo nokwa yi kuPilatus e te mu indile omudhimba gwaJesus.” (Mark. 15:42, 43) Josef ina kambadhala we okwiiholeka kutya ye omulongwa gwaJesus.

14. Oshike wu na okuninga ngele oho adhika kuumbanda wokutila aantu?

¹⁴ Mbela nangoye owi iyadhele nale wa tila aantu ngaashi Josef? Mbela omathimbo gamwe oho kala wa sa ohoni okulombwela yalwe kosikola nenge kiilonga kutya ngoye Onzapo yaJehova? Mbela oto kakadhala okuninga omuuvithi nenge okuninginithwa, molwaashoka wa tila kutya yalwe otaye ke ku tila ngiini? Ino etha omaiyuvo ga tya ngaaka ge ku keelele okuninga shoka shi li mondjila. Galikana kuJehova wa mana mo. Mu pula e ku pe uulaadhi wu longe ehalo lye. Sho to mono nkene Jehova ta yamukula omagalikano goye, oto ka kala wu na oonkondo nosho wo omukumo. — Jes. 41:10, 13.

15. Konima sho Jesus i iholele aalongwa ye, enyanyu lyawo olye yi inyengitha ya ninge shike? (Lukas 24:52, 53)

¹⁵ Aalongwa yaJesus oya li ya yemata noonkondo sho a si. Kala andola wa fa wu iwete wu li monkalo yawo. Kaya li owala ya silwa kuume kawo ngoka ye hole, ihe oya li wo ye uvite ya kanitha etegameno. (Luk. 24:17-21) Ihe sho Jesus e ya ihololele, okwa li a longitha ethimbo e ya kwathele ya uve ko nkene ta gwanitha po omahunganeko gOmbiimbeli. Okwa li wo e ya pe iilonga ya simana. (Luk. 24:26, 27, 45-48) Konima yomasiku 40 sho Jesus a shuna megulu, aalongwa  ye kaya li we ya yemata, ihe oya li ya nyanyukwa noonkondo. Molwaashoka oya li ye shi kutya Omuwa gwawo oku na omwenyo nokwiilongekidha oku ya kwathela ya gwanithe po oshinakugwanithwa shawo oshipe, osha li she ya etele enyanyu. Enyanyu lyawo olye yi inyengitha ya tsikile okutanga Jehova. — Lesha Lukas 24:52, 53; Iil. 5:42.

16. Ongiini tatu vulu okuholela aalongwa yaJesus?

¹⁶ Ongiini tatu vulu okuholela aalongwa yaJesus? Otatu vulu okumona enyanyu mokulongela Jehova momukokomoko aguhe gwomumvo, ihe hamoku mu longela owala pethimbo lyEdhimbuluko. Oshinima shoka otashi pula tu kale twa pititha komeho Uukwaniilwa waKalunga monkalamwenyo yetu. Pashiholelwa, oyendji oya ninga omalunduluko melandulathano lyawo liilonga, opo ya kuthe ombinga muukalele, ya ye kokugongala nokukutha ombinga pandjigilile melongelokalunga lyuukwanegumbo. Yamwe oya tokola kaayi ilikolele iinima yopamaliko mbyoka yalwe ya tala ko yi na oshilonga, opo ya longithe ethimbo lyawo olindji ya kwathele megongalo nenge ya tembukile koshitopolwa hoka ku na ompumbwe onene yaamwatate naamwameme. Nonando otwa pumbwa eidhidhimiko tu tsikile okulongela Jehova, okwe tu uvanekela kutya ote ke tu laleka nuuyamba lela, ngele otwa pititha komeho Uukwaniilwa monkalamwenyo yetu. — Omayel. 10:22; Mat. 6:32, 33.

17. Owa tokola okuninga shike pethimbo lyoomwedhi dhEdhimbuluko? (Tala ethano.)

¹⁷ Otwa tegelela nondjuulukwe oku ka kala pEdhimbuluko mEtiyali 4 Apilili. Nonando ongawo, ino tegelela sigo esiku ndyoka lya thiki, opo wu tameke okudhiladhila kombinga yonkalamwenyo yaJesus, yeso lye noyohole ndjoka ye naJehova ye tu ulukila. Kala to dhiladhila kombinga yiinima mbika olundji ngaashi tashi vulika pethimbo lyoomwedhi dhEdhimbuluko. Pashiholelwa, itulila po ethimbo wu leshe nowu tedhatedhe kombinga yiiningwanima mbyoka tayi adhika moshimpungu “Oshiwike shaJesus shahugunina kombanda yevi,” shi li mokafo Onkalamwenyo yopaKriste niilonga yetu yokuuvitha kaApilili 2019, pepandja 4. Sho to dhiladhila kombinga yonkalamwenyo yaJesus, tala koovelise dhomOmbiimbeli ndhoka tadhi koleke olupandu lwoye, ohole, uulaadhi nosho wo enyanyu lyoye. Kambadhala wo okukonga omikalo dhokondandalunde moka to vulu okuulika olupandu lwoye talu zi komutima. Oto vulu okukala wu na uushili kutya Jesus ota ka kala a pandula ashihe shoka ho ningi wu mu dhimbulukwe pethimbo lyoomwedhi dhEdhimbuluko. — Eh. 2:19.