1. Oshike hashi ya momadhiladhilo goye, uuna to dhiladhila kombinga yaJehova?

 MBELA owa kambadhalele nale okudhiladhila kutya Jehova okwa tya ngiini? Uuna to popi naye megalikano, oshike hashi ya momadhiladhilo goye? Nonando Jehova iha monika, Ombiimbeli oye mu popya momikalo dha yoolokathana. Pashiholelwa, oya ti kutya oye “uuyelele negameno” nosho wo “omulilo hagu lungunitha.” (Eps. 84:11; Heb. 12:29) Okukala po kwe otaku faathanithwa nemanya lyosafire, noshiyela tashi adhima nosho wo nuutamvula tawu adhima. (Hes. 1:26-28) Oohapu dhimwe ndhoka dha popya Jehova otashi vulika dhi tu kumithe, nenge nokuli dhi tu ningithe tu kale tu uvite kaatu na oshilonga.

2. Oshike tashi vulika hashi imbi yamwe ya hedhe popepi naJehova?

² Molwaashoka ihaatu vulu okumona Jehova, otashi vulika tu mone oshidhigu okwiitaala kutya oku tu hole. Aantu yamwe ohaya dhiladhila kutya Jehova ita vulu nando okukala e ya hole, omolwiinima iiwinayi mbyoka ya ninga monakuziwa, nenge tashi vulika molwaashoka inaaya ulukilwa nando onale ohole koohe. Jehova oku uvite ko omaiyuvo getu nonkene hage tu gumu. Opo e tu kwathele, okwe tu ulukila omaukwatya ge omawanawa ngoka ge li mOohapu dhe.

3. Omolwashike twa pumbwa okukonakona nawa ohole yaJehova?

³ Oshitya shimwe shoka tashi hokolola nawa Jehova, osho ohole. (1 Joh. 4:8) Ohole oyo uukwatya we wa tongomana. Kehe shimwe shoka ha ningi, ohe shi ningi ta inyengithwa kohole. Ohole yaKalunga onene noyi na oonkondo ndhoka hadhi mu inyengitha e yi ulukile nokuli naamboka kaaye mu hole. (Mat. 5:44, 45) Moshitopolwa shika, otatu ka kundathana kombinga yaJehova nosho  wo ohole ye. Ngele otwa tsikile okwiilonga kombinga yaKalunga, otatu ka kala tu mu hole noonkondo.

JEHOVA OKU TU HOLE NOONKONDO

4. Ohole yaJehova ohayi ku uvitha ngiini? (Tala wo ethano.)

⁴ “Omuwa oye omunesilohenda nomunalukeno.” (Jak. 5:11) MOmbiimbeli, Jehova ota iyelekanitha nomuvali omunahole. (Jes. 66:12, 13) Dhiladhila owala komuvali ngoka ha sile oshimpwiyu pahole okahanona ke. Ohe ka tula komatundji nokupopya nako newi lyombili netalala. Uuna taka lili, nenge taka ehama, ohe ka pe shoka ka pumbwa. Uuna tatu ehama, ohatu kala tu na uushili kutya Jehova oku tu hole. Omupisalomi okwa nyola a ti: “Uuna nda tila nonda sa iimpwiyu, oto hekeleke ndje e to nyanyudha ndje.” — Eps. 94:19.

5. Ohole yaJehova yuudhiginini otayi ti shike kungoye?

⁵ Ohole yaJehova ihayi lunduluka. (Eps. 103:8) Iha etha po okukala e tu hole, uuna twa ningi sha oshiwinayi. Oshigwana shaIsraeli osha li sha yemateke Jehova omathimbo nomathimbo; ihe nando ongawo, okwa li a lombwele mboka ya iyela ombedhi kutya ohole ye ihayi hulu po, sho a ti: “Ou na ondilo momeho gandje, molwashoka owa simana nondi ku hole.” (Jes. 43:4, 5) Ohole yaKalunga ihayi lunduluka. Otatu vulu aluhe okukala twe yi inekela. Nokuli nonando otu ninge omapuko ga kwata miiti, Jehova ihe tu etha po. Ngele otwa iyele ombedhi e tatu galukile kuJehova, otatu ka mona kutya oku tu hole natango. Okwa uvaneka kutya ‘ote ke tu kuthila po.’ (Jes. 55:7) Ombiimbeli oya popya kutya edhiminopo ohali etele aantu “omathimbo goonkondo oompe” okuza kuJehova. — Iil. 3:19.

6. Sakaria 2:8 ote tu longo shike kombinga yaJehova?

⁶ Lesha Sakaria 2:8. Molwaashoka Jehova oku tu hole, omaiyuvo getu oku ga uvite ko nokwa halelela oku tu gamena. Oha kala a yemata, uuna tatu mono iihuna. Onkee otatu vulu okukala nuushili kutya ote ke tu yamukula uuna tatu mu galikana, tatu ti: “Gamena ndje ongomuni yeho lyoye.” (Eps. 17:8) Eho oshitopolwa sholutu shoka shi na uuhwenge noshi na ondilo. Ano sho Jehova te tu yelekanitha nomuni yeho lye, okwa fa ta ti, ‘Kehe ngoka te mu ehameke, ne aantu yandje, ota ehameke oshinima shi na ondilo kungame.’

7. Omolwashike twa pumbwa okukala tu na einekelo lya kola mohole yaJehova?

⁷ Jehova okwa hala tu kale twa tompwa kutya oku tu hole pauhandimwe. Ihe oku shi  kutya omolwoonkalo ndhoka twa pita mudho monakuziwa, otashi vulika tu ipule ngele ota vulu ngaa okukala e tu hole. Nenge tashi vulika twa taalela oonkalo ndhoka tadhi vulu oku tu ningitha tu kale tu uvite kutya Jehova ke tu hole. Oshike tashi ka koleka einekelo lyetu muJehova? Okwiilonga nkene a ulike kutya oku hole Jesus, aagwayekwa nosho wo tseni atuheni.

NKENE JEHOVA HA ULIKE OHOLE

8. Omolwashike Jesus a li a tompwa kutya He oku mu hole?

⁸ Momukokomoko gwomimvo odhindji, Jehova nOmwana omuholike, oya kala ye na ekwatathano lyopothingo. Ekwatathano lyawo ndyoka, oya kala nalyo okuza peshito. Jehova okwa li a ulike kutya oku hole Jesus, ngaashi sha popiwa muMateus 17:5. Jehova okwa li ta vulu okutya owala, ‘Nguka oye nda hokwa.’ Ihe molwaashoka okwa hala tu tseye kutya oku hole Jesus shi thike peni, okwe mu ithana “Omumwandje omuholike.” Jehova okwa li e uvitile Jesus uuntsa nuunambano, molwaashoka okwa li a halelela okuyamba po omwenyo gwe. (Ef. 1:7) Jesus ka li a limbililwa kutya He oku mu hole. Okwa li a tompwa thiluthilu. Okwa li e shi popi lwiikando kutya He oku mu hole shili. — Joh. 3:35; 10:17; 17:24.

9. Oshitya shini tashi popi ohole yaJehova yokuhola aagwayekwa? Shi yelitha. (Aaroma 5:5)

⁹ Jehova okwe shi koleka wo kutya oku hole aagwayekwa. (Lesha Aaroma 5:5.) Ndhindhilika oshitya tashi ti kutya oya “tililwa.” Embo limwe lyuuyelele wOmbiimbeli olya ti kutya ohole yaKalunga “oye ya kutse ya fa okamulonga taka tondoka omeya.” Oohapu ndhoka otadhi tsu omuthindo kutya Jehova oku hole aagwayekwa shi thike peni. Aagwayekwa oye shi kutya oye li “kohi yohole yaKalunga.” (Jud. 1) Omuyapostoli Paulus okwa li a nyola nkene aagwayekwa haya kala ye uvite sho a ti: “Taleni ohole mpoka yi thike, Tate sho e tu hole! Ohole ye oyi li po onene, sho tse hatu ithanwa aana yaKalunga.” (1 Joh. 3:1) Mbela Jehova oku hole owala aagwayekwa? Aawe, Jehova oku ulika kutya oku tu hole atuheni.

10. Oshike tashi tu shilipaleke lela kutya Jehova oku tu hole?

¹⁰ Oshike tashi tu shilipaleke lela kutya Jehova oku tu hole? Ekuliloyambo. Ohole ndjoka a ulika itayi vulu okuyelekwa nasha. (Joh. 3:16; Rom. 5:8) Jehova okwa gandja Omwana e na ondilo, sho a pitika a se omolwaantu ayehe, opo oondjo dhetu dhi vule okudhimwa po notu vule okukala ookuume Ke. (1 Joh. 4:10) Ngele otwa kala hatu tedhatedha aluhe kofuto ndjoka Jehova naJesus ya futa, opo owala tatu ka uva ko kutya oye tu hole shi thike peni. (Gal. 2:20) Ekuliloyambo inali futwa, molwaashoka li li oshitegelelwa, ihe oli li omagano gopahole. Jehova okwe tu ulukile ohole ye mokuyamba po Omwana, Jesus, ngoka e na ondilo noonkondo. Jehova okwa pitika Omwana a hepekwe noku se molwetu.

11. Oshike tatu ilongo muJeremia 31:3?

¹¹ Ngaashi twe shi mona, Jehova ine tu ulukila owala kutya oku tu hole, ihe okwe tu lombwela wo kutya oku tu hole shi thike peni. (Lesha Jeremia 31:3.) Jehova okwe tu hilila kuye, molwaashoka oku tu hole. (Yelekanitha Deuteronomium 7:7, 8.) Kapu na sha tashi vulu oku tu topola ko kohole ye. (Rom. 8:38, 39) Oho kala wu uvite ngiini sho e ku ohole? Lesha Episalomi 23 nokutala kutya ohole yaJehova nesiloshimpwiyu lye oya li ya gumu ngiini David nosho wo nkene tayi vulu oku tu gumeni atuheni.

OWU UVITE NGIINI SHO JEHOVA E KU HOLE?

12. Ongiini to vulu okungonga Episalomi 23?

¹² Lesha Episalomi 23:1-6. Episalomi 23 olyo eimbilo ndyoka tali popi kombinga yokwiinekela mohole yaJehova nomesiloshimpwiyu lye. David, omunyoli gwalyo, okwa popya kombinga yekwatathano lya kola ndyoka lya li pokati ke nOmusita gwe, Jehova. David okwa li e uvite e li  megameno, sho a etha Jehova e mu endithe, nokwa li a inekela thiluthilu muye. David okwa li e shi kutya Jehova ote ke mu ulukila ohole ye esiku nesiku. Oshike sha li she mu inyengitha a kale e mu inekela?

13. Omolwashike David a li e na uushili kutya Jehova oku na ko nasha naye?

¹³ “Inandi pumbwa sha.” David okwa li e uvite a silwa oshimpwiyu nawa, molwaashoka Jehova okwa li aluhe e mu pe shoka a pumbwa. David okwa li wo e shi kutya Jehova oku li kuume ke nokwe mu hokwa. Nomolwaashono a li e na uushili kutya Jehova ota ka tsikila okugwanitha po oompumbwe dhe adhihe, kutya nduno oshike tashi ke mu ningilwa monakuyiwa. Molwaashoka David okwa li e shi kutya Jehova oku mu hole note ke mu sila oshimpwiyu, oshe mu kwathele kaa kale e na omaipulo, ihe pehala lyaashono, okwa kala a nyanyukwa nokwa gwanenwa kwaashoka e na. — Eps. 16:11.

14. Jehova ohe tu sile oshimpwiyu ngiini pahole?

¹⁴ Jehova ohe tu sile oshimpwiyu pahole, unene tuu uuna iinima iiwinayi tayi tu ningilwa. Claire, a ngoka a longa kObetel uule womimvo dhi vulithe 20, okwa li e uvite kee na ekwatho lyasha, sho yaandjawo ya li ya mono omaupyakadhi ga kwata miiti kepaya taku zi. He okwa li a kwatwa kuuvu wombanda, gumwe gwomaamwayinakadhona okwa kondwa, ye noyaandjawo oya li ye na uupyakadhi wopashimaliwa noya kanitha egumbo lyawo. Jehova okwa li a ulike ngiini kutya oku ya hole? Claire okwa ti: “Jehova okwa li a si oshimpwiyu, opo yaandjetu ya kale aluhe ye na shoka ya pumbwa esiku kehe. Iikando oyindji, Jehova okwa li nokuli he tu pe shi vulitha pwaashoka twa pumbwa. Olundji onda li hadhi dhiladhila nkene Jehova e tu kwathela, nokandi na siku ndi dhimbwe ohole ndjoka e tu ulukila.  Okutala kwaashihe shono, osha kwathele ndje ndi tsikile okulongela Jehova nenyanyu, uuna pwa holoka ishewe omaupyakadhi.”

15. Omolwashike David a li e uvite a talalekwa? (Tala wo ethano.)

¹⁵ “Omwenyo gwandje ote gu talaleke.” Omathimbo gamwe, David okwa li ha kala e uvite a gwililwa po, molwomaupyakadhi nomahepeko agehe ngoka a li a taalela. (Eps. 18:4-6) Ihe ohole yaJehova oya li ye mu talaleke. Jehova okwa li a fala kuume ke ngoka a vulwa komwiidhi omutalala ‘nokomeya gevululuko.’ Oshizemo, David okwa li a nkondopalekwa nokwa tsikile okulongela Jehova nenyanyu. — Eps. 18:28-32.

16. Ohole yaJehova oye ku talaleka ngiini?

¹⁶ Sha faathana, nokunena “okesilohenda lyOmuwa, sho inaatu yonwa po thilu,” sho twa li twa taalelwa komahepeko nokomaupyakadhi. (Oontak. 3:22; Kol. 1:11) Natu taleni koshiholelwa shaRachel. Okwa li a gwililwa po sho omusamane gwe e mu thigi po naasho a thigi po Jehova, pethimbo lyomukithi gwekomba, COVID-19. Jehova okwa li e mu kwathele ngiini? Okwa ti: “Jehova okwa li a shilipaleke ndje kutya oku hole ndje. Okwa li a pe ndje ookuume mboka ya li haye ya okutalela ndje po, haya etele ndje iikulya, haya tumine ndje omatumwalaka, haya tumine ndje omanyolo taga tsu ndje omukumo, haya yolo pamwe nangame nohaya dhimbulukitha ndje aluhe kutya Jehova oku na ko nasha nangame. Ohandi pandula aluhe Jehova sho a pa ndje aamwatate naamwameme aanahole.”

17. Omolwashike David a li inaa “tila sha”?

¹⁷ “Itandi tila sha, oshoka Omuwa, ou li pungame.” Olundji onkalamwenyo yaDavid oya li hayi kala moshiponga, nokwa li e na aatondi oyendji aanankondo. Ihe ohole yaJehova oya li hayi mu kwathele a kale e uvite e li megameno. David okwa li ta vulu okukala e uvite kutya Jehova oku li pamwe naye monkalo kehe, nokwa li e na uushili mwaashoka. Onkee okwa li a vulu okwiimba a ti: “[Jehova] okwa kutha ndje uumbanda auhe.” (Eps. 34:4) David okwa li ha kala a tila shili, ihe okwa vulu okusinda uumbanda mboka, molwaashoka okwa li e shi kutya Jehova oku mu hole.

18. Okukala tu shi kutya Jehova oku tu hole ohaku tu koleke ngiini, uuna twa tila?

¹⁸ Okukala tu shi kutya Jehova oku tu hole ohaku tu koleke ngiini, uuna twa taalela oonkalo tadhi tu tilitha? Omumwameme omukokolindjila gwedhina Susi okwa popi nkene ye nomusamane gwe ya li ye uvite, sho omwanamati gwawo a ikutha omwenyo. Okwa ti: “Uuna pwa ningwa sha oshinyanyalithi, ohashi ku gumu  noonkondo nohashi ku ningitha wu kale wu uvite waa na oshilonga. Ihe ohenda yaJehova, ohayi tu kwathele tu kale tu uvite tu li megameno.” Omumwameme Rachel ngoka a popiwa metetekelo, okwa ti: “Ongulohi yimwe sho nda li ndi uvite nda yemata nonda tila noonkondo, onda galikana muule kuJehova. Opo nduno onda kala ndi uvite kutya okwa kwathele ndje ndi kale nda pepelelwa nonda gundjila, ngaashi omuvalakadhi he shi ningile okahanona ke. Okuza mpono onda kotha nombili. Oshinima shoka kandi na siku ndi shi dhimbwa nando.” Omukuluntugongalo gwedhina Tasos okwa li a kala mondholongo uule womimvo ne, sho a tindi okukutha ombinga miita. Okwa li a mono ngiini kutya Jehova oku mu hole nohe mu sile oshimpwiyu? Okwa ti: “Jehova okwa sila ndje oshimpwiyu, sho a pe ndje shi vulithe pwaashihe shoka nda li nda pumbwa. Shoka osha kwathele ndje ndi kale nda inekela thiluthilu muJehova. Shimwe ishewe, Jehova okwa kwathele ndje okupitila mombepo ye ondjapuki, ndi kale nda nyanyukwa, nonando ondi li mondholongo. Shono osha kwathele ndje ndi mone kutya ngele onda kala nde mu inekela, otandi ka mona kutya oku hole ndje shi thike peni. Onkee onda tameke oku mu longele ndi li omukokolindjila gwondjigilile, manga ndi li mondholongo.”

HEDHA POPEPI NAKALUNGA KOYE OMUNALUKENO

19. (a) Otatu ka galikana ngiini ngele otu shi kutya Jehova oku tu hole? (b) Oohapu dhini tadhi hokolola ohole yaJehova hadhi ku gumu? (Tala oshimpungu “ Oohapu ndhoka hadhi tu kwathele tu kale tu uvite ohole yaJehova yomuule.”)

¹⁹ Iimoniwa mbyoka twa zi nokukundathana otayi ulike kutya Jehova ngoka e li “Kalunga kohole,” oku li pamwe natse. (2 Kor. 13:11) Oku na ko nasha natse pauhandimwe. Otwa tompwa kutya ote tu “gamene omolwesilohenda lye.” (Eps. 32:10) Ngele otwa kala hatu tedhatedha kunkene e tu ulukila ohole, ota ka kala gwolela kutse notatu kala tu uvite tu li popepi lela naye. Otatu ka popya naye twa manguluka noku mu lombwele kutya otwa pumbwa ohole ye shi thike peni. Otatu vulu oku mu lombwela kombinga yaashihe shoka tatu ipula nasho, tu na einekelo kutya ote ke tu uva ko nokwa halelela oku tu kwathela. — Eps. 145:18, 19.

20. Ongiini ohole yaJehova hayi tu hedhitha popepi naye?

²⁰ Ngaashi owala hatu hedha popepi nomulilo uuna ku na uutalala, osho wo hatu hedha kuJehova omolwohole ye onene. Nonando ohole yaJehova oyi na oonkondo, oku na wo olukeno. Kala wa nyanyukwa sho Jehova e ku hole. Onkee ano ohole ye nayi tu inyengitheni atuheni tu tye: “Ondi hole Omuwa”! — Eps. 116:1.