1-2. Omashongo geni aapiya yaJehova aadhiginini tashi vulika ya kale ya taalela?

 IININGWANIMA yi yemateka otayi vulu okulundulula onkalamwenyo yetu muusiku owala wumwe. Pashiholelwa, omumwatate omudhiginini, Luis, a okwa li a monika okankela. Ndohotola okwa li e mu lombwele kutya oku na ko owala oomwedhi dhotumba a se. Monika nomusamane gwe, oya li haya kala ya ipyakidhila nokulongela Jehova pamwe. Opo nduno esiku limwe Monika okwa li a mono kutya omusamane gwe, ngoka e li omukuluntugongalo, okwa kala nonkalamwenyo yopaali uule womimvo dhontumba. Olivia, omumwameme inaa hokanwa, okwa li e na okuza mo megumbo lye, omolwoshikungulu shombepo shoka sha li pokuya. Sho a ka galukila kegumbo lye, okwa adha egumbo lye lya hanagulwa po koshikungulu. Mepathimo lyeho, oonkalamwenyo dhaantu ayehe mbaka odha lunduluka inaaye shi tegelela. Mbela nangoye owa ningilwa oshinima oshiwinayi shoka sha lundulula onkalamwenyo yoye ombadhilila?

² Nonando otu li aapiya yaJehova aadhiginini, ohatu adhika komaupyakadhi nohatu ehama ngaashi owala aantu ayehe. Otashi vulika wo tu kale twa pumbwa okwiidhidhimikila omapataneko, nenge omahepeko okuza kwaamboka ye tonde oshigwana shaKalunga. Nonando Jehova ihe tu gamene komaupyakadhi ngoka, oku uvaneka kutya ote ke tu kwathela. (Jes. 41:10) Kekwatho lye, otatu vulu okukaleka po enyanyu lyetu, okuninga omatokolo omawanawa nokukala aadhiginini nokuli nuuna twa taalela oonkalo oondhigu noonkondo. Moshitopolwa shika, otatu ka kundathana omikalo ne moka Jehova he tu kwathele, uuna twa taalela omathimbo omadhigu mokukalamwenyo kwetu. Otatu ka tala wo kwaashoka tatu vulu okuninga, opo tu mone mo uuwanawa mekwatho ndyoka he tu pe.

 JEHOVA OTE KE KU GAMENA

3. Uuna twa taalela oonkalo oondhigu, oshike tashi vulika shi kale oshidhigu kutse okuninga?

³ Eshongo. Uuna twa taalela omaupyakadhi ga yemateka, otashi vulika tu mone oshidhigu okudhiladhila nawa nokuninga omatokolo. Omolwashike mbela? Oshoka otashi vulika tu kale twa dhengwa pomutima. Otashi vulika tu kale twa gwililwa po pamadhiladhilo. Otatu vulu okukala tu uvite twa fa tatu ende moshiyentsi, kaatu wete kutya otu uka peni. Ndhindhilika nkene aamwameme yaali mboka ya popiwa metetekelo ya li ye uvite, sho ya li muupyakadhi. Olivia okwa ti: “Konima sho oshikungulu sha hanagula po egumbo lyandje, onda li ndi uvite kaandi shi shoka ndi na okuninga nonda gwililwa po noonkondo.” Monika okwa popi kombinga yomusamane gwe ngoka a li e mu kengelele, a ti: “Onda li nda yemata noonkondo. Onda li ndi uvite uuwehame tawu kama ndje komutima. Kanda li owala tandi vulu okulonga sha. Shoka sha ningilwa ndje, kanda li ndi shi ngele onandi ke shi ningilwe.” Jehova okwa uvaneka kutya ote ke tu kwathela ngiini, uuna tu uvite twa gwililwa po?

4. Sha ikolelela kAafilippi 4:6, 7, Jehova oku uvaneka oku tu ningila shike?

⁴ Shoka Jehova ha ningi. Oku uvaneka oku tu pa shoka Ombiimbeli tayi ithana ‘ombili yaKalunga.’ (Lesha Aafilippi 4:6, 7.) Ombili ndjoka, ombili yopamadhiladhilo noyokomutima, ndjoka hatu kala tu na, molwaashoka tu na ekwatathano lyopothingo naKalunga. Ombili ndjoka “yi vule uunongo auhe wopantu,” ito yi pewa komuntu. Mbela opu na oshikando shimwe wa galikanene kuJehova waa na ezimbuko e to kala wu uvite ombili? Owa li wu uvite ngawo, molwaashoka Jehova okwe ku pa ‘ombili’ ye.

5. Ombili yaKalunga ohayi gamene ngiini omadhiladhilo getu noomwenyo dhetu?

⁵ Enyolo olyo tuu ndyoka otali popi kutya ombili yaKalunga “otayi gamene,” nenge otayi shigi “oomwenyo nomadhiladhilo” getu. Oshitya shoka sha tolokwa ‘gamena’ osha li hashi longithwa muukwiita nosha li hashi popiwa sha ukithwa kaakwiita mboka ya gamena oshilando kaashi ponokelwe. Aakalimo yomoshilando shoka sha gamenwa oya li haya kotha taya mbonyoka, ye shi kutya omatanga giita oko ge li kiiyelo. Sha faathana, uuna ombili yaKalunga tayi gamene oomwenyo nomadhiladhilo getu, ohatu kala twa ngungumana, tu shi kutya otu li megameno. (Eps. 4:8) Ngaashi moshinima shaHanna, nokuli nando onkalo yetu inayi lunduluka mbala, otatu vulu natango okukala twa ngungumana. (1 Sam. 1:16-18) Nongele otwa kala twa ngungumana, olundji otatu ka mona oshipu okudhiladhila nawa nokuninga omatokolo gopandunge.

6. Oshike tatu vulu okuninga, opo tu mone mo uuwanawa mombili yaKalunga? (Tala wo ethano.)

⁶ Shoka twa pumbwa okuninga. Uuna wu uvite wa gwililwa po, pula Jehova e ku gamene. Ngiini mbela? Galikana sigo to kala wu na ombili  yaKalunga. (Luk. 11:9; 1 Tes. 5:17) Luis, ngoka a tumbulwa metetekelo, okwa yelitha nkene ye nomukadhi, Ana, ya li ya vulu okwiidhidhimika sho ya uvu kutya Luis oku na ko owala oomwedhi dhontumba a se. Okwa ti: “Omuntu ngele owu li monkalo ya fa ndjino, ohashi kala oshidhigu noonkondo okuninga omatokolo ge na ko nasha nuukolele nosho wo niinima yilwe. Ihe egalikano olya li lye tu kwathele tu kale tu na ombili monkalo ndjoka.” Luis nomukadhi oya ti kutya oya li ya galikana ya mana mo nolwiikando, taya pula Jehova e ya pe ombili yopamadhiladhilo, omutima gwa gundjila nosho wo uunongo wokuninga omatokolo gopandunge. Oya li ye uvite kutya okwe ya kwathela. Uuna wa taalela uupyakadhi, dhiginina okugalikana, noto ka mona nkene ombili yaJehova tayi gamene omutima nomadhiladhilo goye. — Rom. 12:12.

JEHOVA OTE KE KU KWATHELA

7. Otashi vulika tu kale tu uvite ngiini, uuna tu li monkalo ondhigu?

⁷ Eshongo. Uuna tu li muupyakadhi, omaiyuvo getu, okudhiladhila kwetu neihumbato lyetu otashi vulika kaayi kale we ngaashi yi na okukala. Otashi vulika omaiyuvo getu ga kale taga falwafalwa. Ana, ngoka a tumbulwa metetekelo, okwa ti kutya okwa pita monkalo moka kaa li e shi kutya oku uvite ngiini okuza sho omusamane gwe Luis a si. Okwa ti: “Uuna ndi uvite nda gwililwa po, onda li handi kala ndi iyuvitile ohenda. Onda li wo handi kala nda geya, sho a sa.” Shimwe ishewe, Ana okwa li ha kala e uvite uuwike nokwa yemata, sho ta ningi omatokolo giinima mbyoka Luis oye a li e shi oku yi unganeka nawa. Omathimbo gamwe, okwa li e uvite a fa e li moshikungulu shomefuta. Mbela Jehova ohe tu kwathele ngiini, uuna twa gwililwa po pamaiyuvo?

8. Ngaashi sha popiwa muJesaja 33:6, Jehova okwe tu shilipaleka kutya ote ke tu ningila shike?

⁸ Shoka Jehova ha ningi. Okwe tu shilipaleka kutya ote ke tu kwathela. (Lesha Jesaja 33:6.) Uuna mefuta mu na oshikungulu, osikepa ohashi vulika yi tameke tayi ihiki. Opo oosikepa kaadhi kale tadhi inyenge, odhindji dhomudho odha tulwa omilenge kohi kombinga kehe dha fa dhoohi. Omilenge ndhoka ohadhi kwathele osikepa kaayi tengauke, aanasikepa ya kale ye uvite ye li megameno noya nyanyukilwe olweendo lwawo. Ihe omilenge ndhoka ohadhi longo owala nawa uuna osikepa ya uka komeho. Sha faathana, Jehova ote ke tu kwathela sho tatu humu komeho nuudhiginini momathimbo omadhigu.

9. Ongiini iilongitho yetu yokukonga uuyelele tayi vulu oku tu kwathela tu kale tu na ondjele? (Tala wo ethano.)

⁹ Shoka twa pumbwa okuninga. Uuna wa gwililwa po pamaiyuvo, ninga ngaashi to vulu mokukala ho ningi iinima yopambepo. Odhoshili kutya otashi vulika wu kale ihoo vulu okuninga oshindji ngaashi shito, ihe dhimbulukwa kutya Jehova ina tegelela wu ninge shoka itoo vulu.  (Yelekanitha Lukas 21:1-4.) Itulila po wo ethimbo lyokuninga ekonakonombiimbeli lyopaumwene nolyokutedhatedha. Omolwashike mbela? Jehova, okupitila mehangano lye, okwe tu pa uuyelele wa dhenga mbanda wopamanyolo mboka tawu vulu oku tu kwathela tu kale tu na ondjele. Opo wu mone shoka wa pumbwa, oto vulu okulongitha iilongitho mbyoka yi li melaka lyoye, ngaashi o-JW Library^®, Watch Tower Publications Index nosho wo Embo lyokukonga uuyelele lyOonzapo dhaJehova. Monika, ngoka a popiwa metetekelo okwa ti kutya oha kongo omayele ta longitha iilongitho yokukonga uuyelele, uuna a tameke okukala e uvite a gwililwa po pamaiyuvo. Pashiholelwa, okwa li a kongo oshitya “ongeyo.” Pompito yimwe, oshitya “okugwaaleka” nenge “uudhiginini.” Opo nduno okwa li a lesha uuyelele mboka sigo ta kala e uvite nawa. Okwa ti: “Sho nda tameke okuninga omapekapeko, onda li nda tila noonkondo, ihe sho nda tsilike nokulesha uuyelele mboka, onda li ndi uvite Jehova a fa ta papatele ndje, oku shi popya pathaneko. Sho tandi lesha, onde shi mono mo kutya Jehova okwa li e uvite ko omaiyuvo gandje agehe, nokwa li ta kwathele ndje.” Ekwatho ndyoka Jehova ha gandja, otali vulu wo oku ku kwathela wu kale wu shi okupangela omaiyuvo goye, sigo wa kala wu uvite wa pepelelwa. — Eps. 119:143, 144.  

JEHOVA OTE KE KU AMBIDHIDHA

10. Otashi vulika tu kale tu uvite ngiini konima ngele twa ningilwa oshinima oshiwinayi?

¹⁰ Eshongo. Ngele otwa ningilwa sha oshiwinayi, otashi vulika pu kale omasiku gamwe tu uvite twa gwililwa po palutu nopamaiyuvo. Otashi vulika wa li omumatuki e na ondapo, ihe ngashingeyi oho ende to tina, oshoka owa ehamekwa muudhano. Shimwe ishewe, otashi vulika tu kale tu wete oshidhigu okugwanitha po oshinakugwanithwa shoka twa li hatu vulu oku shi longa nale nuupu, nenge tashi vulika ihaatu kala we naanaa tu na omukumo gwokuninga iinima mbyoka twa li hatu tyapula nale. Ngaashi Elia, natse otashi vulika tu kale tu uvite oshidhigu unene okupenduka, nokukala twa hala okulala owala. (1 Aak. 19:5-7) Jehova oku uvaneka oku tu ningila shike, uuna tu uvite twaa na oonkondo?

11. Omomukalo gulwe guni Jehova he tu kwathele? (Episalomi 94:18)

¹¹ Shoka Jehova ha ningi. Okwa uvaneka oku tu ambidhidha. (Lesha Episalomi 94:18.) Ngaashi owala omumatuki ngoka a mona oshiponga a pumbwa eyambidhidho, opo a vule okweenda, natse otashi vulika tu kale twa pumbwa ekwatho tu vule okukala twa ipyakidhila nokulongela Jehova. Moonkalo ndhoka, Jehova ote tu shilipaleke ta ti: “Ongame  Omuwa Kalunga koye; otandi ku tsu omukumo te ti: ‘Ino tila; otandi ku kwatha.’” (Jes. 41:13) Omukwaniilwa David naye okwa li e shi ningilwa. Sho a li a taalelwa komaupyakadhi nokaatondi, okwa ti kuJehova: ‘Oonkondo dhoye odha gamene ndje.’ (Eps. 18:35) Jehova ohe tu gamene ngiini?

12. Oolye Jehova ta vulu okulongitha ye tu kwathele, uuna twa gwililwa po?

¹² Olundji Jehova ohe tu ambidhidha mokwiinyengitha yalwe ye tu kwathele. Pashiholelwa, pompito yimwe sho David a li e uvite a gwililwa po, kuume ke Jonatan okwa li e mu talele po, opo e mu hekeleke noku mu tse omukumo. (1 Sam. 23:16, 17) Sha faathana, Jehova okwa li a hogolola Elisa a kwathele Elia. (1 Aak. 19:16, 21; 2 Aak. 2:2) Kunena, Jehova otashi vulika a longithe yaandjetu, ookuume nenge aakuluntugongalo ye tu kwathele. Ihe uuna tu uvithwa nayi, otashi vulika tu kale twa hala okwiikalela, naashoka oshi li paunshitwe. Oshike tatu vulu okuninga, opo Jehova e tu kwathele?

13. Oshike twa pumbwa okuninga, opo tu mone mo uuwanawa mekwatho lyaJehova? (Tala wo ethano.)

¹³ Shoka twa pumbwa okuninga. Ino kambadhala okwiikalela. Uuna twa ikalela, olundji ihatu kala we tatu gandja eitulomo kiinima yilwe, ihe ohatu tameke owala okugandja eitulomo kutse yene nokomaupyakadhi getu. Shoka otashi vulu okuguma omatokolo ngoka hatu ningi. (Omayel. 18:1) Odhoshili kutya omathimbo gamwe ohatu kala twa pumbwa okwiikalela, unene tuu ngele otwa taalela oonkalo oondhigu. Ihe ngele otwa kala twa ikalela ethimbo ele, otashi vulika tu hunuthe ompito yokukwathelwa kwaamboka Jehova ta longitha. Ano nando onkalo oyi kale ondhigu shi thike peni, taamba ko ekwatho ndyoka to pewa kuyaandjeni, kookuume nokaakuluntugongalo. Kala we ya tala ko kutya otaya longithwa kuJehova, ye ku kwathele. — Omayel. 17:17; Jes. 32:1, 2.

JEHOVA OTE KU HEKELEKE

14. Mbela iinima yini tayi vulu oku tu tilitha?

¹⁴ Eshongo. Otashi vulika tu pite moonkalo ndhoka tadhi tu tilitha. MOmbiimbeli omwa popiwa aapiya yaKalunga aadhiginini mboka ya popya kombinga yethimbo ndyoka ya li muudhigu noya tila aatondi yawo, nenge omathiminiko galwe. (Eps. 18:4; 55:1, 5) Sha faathana, otashi vulika tu kale twa taalela omapataneko kosikola, kiilonga, okuza kuyaandjetu nenge kepangelo. Otashi vulika wo tu kale twa tila okusa, molwaashoka tatu ehama. Pomathimbo ngoka otashi vulika tu kale tu uvite kaatu na oshilonga twa fa okanona hoka ka pumbwa ekwatho. Jehova ohe tu kwathele ngiini momathimbo ga fa mpono?

15. Sha ikolelela kEpisalomi 94:19, Jehova okwe tu uvanekela oku tu ningila shike?

 ¹⁵ Shoka Jehova ha ningi. Ohe tu hekeleke nohe tu ngungumaneke. (Lesha Episalomi 94:19.) Episalomi ndika otashi vulika li tu dhiladhilithe okakadhona hoka ka tila noita ka vulu okukotha, omolwomityalakato dhomvula. Otatu vulu okukala twa fa tu wete he te ya kuko, te ka kutha po, e ta kala e ka papatela sigo ka kotha. Nonando omityalakato otadhi tsikile, oke uvite ka gamenwa sho ka ukatwa kuhe. Uuna twa taalela omamakelo omatilithi, otashi vulika tu kale twa pumbwa Tate yetu gwomegulu, a kale e tu papatela, oku shi popya pathaneko sigo twa ngungumana. Ongiini tatu vulu okumona ehekeleko ndyoka okuza kuJehova?

16. Oshike tatu vulu okuninga, opo tu mone mo uuwanawa mehekeleko ndyoka Jehova he tu pe? (Tala wo ethano.)

¹⁶ Shoka twa pumbwa okuninga. Kala aluhe ho popi naJehova megalikano nokulesha Oohapu dhe. (Eps. 77:1, 12-14) Ngele osho wa kala ho ningi, oto ka kala ho pula tango ekwatho kuTate gwomegulu, uuna wa gwililwa po. Lombwela Jehova kombinga yaashoka hashi ku tilitha naashoka to ipula naasho. Mu pitika a popye nangoye, noto ka mona nkene te ku hekeleke okupitila mOohapu dhe. (Eps. 119:28) Ngele owa lesha iitopolwa yontumba mOmbiimbeli, otashi vulu oku ku hekeleka lela, uuna wa tila. Pashiholelwa, otashi vulu oku ku hekeleka uuna wa lesha embo lyaJob, Omapisalomi, Omayeletumbulo nosho wo oohapu dhaJesus ndhoka dhi li muMateus ontopolwa 6. Sho to galikana kuJehova nokulesha Oohapu dhe, oto ka mona nkene te ku hekeleke.

17. Einekelo lini tatu vulu okukala tu na?

¹⁷ Otatu vulu okukala tu na einekelo kutya Jehova ote ke tu kwathela aluhe, uuna tu li moonkalo oondhigu monkalamwenyo yetu. Kapu na siku twi iyadhe tu li otse atuke. (Eps. 23:4; 94:14) Jehova oku uvaneka oku tu gamena, oku tu kwathela, oku tu ambidhidha noku tu hekeleka. Jesaja 26:3 otayi popi Jehova tayi ti: “Omuwa, oho gandja ombililela kumboka ihaa tenguka noye ku inekela.” Onkee ano inekela muJehova, e to ningi ngaashi to vulu wu mone mo uuwanawa momakwatho agehe ngoka he tu pe. Ngele owe shi ningi, oto ka kala ishewe wu na oonkondo nomomathimbo omadhigu.