Yamwe oya za momaputuko moka aalumentu oyendji inaaya simaneka aakiintu. Pashiholelwa, Hans, omutonatelishikandjo gumwe moBolivia, okwa ti: “Aalumentu yamwe oya za momaputuko moka aalumentu haya ladhipikwa ya kale ya itala ko ya simana ye vule aakiintu.” Shengxian, omukuluntugongalo moTaiwan okwa ti: “Moshitopolwa shetu, aalumentu oyendji oye uvite kutya kaye na okupulakena komaetopo gaakiintu. Ngele omulumentu okwa popi kutya omukiintu okwa ti shike kombinga yoshinima shontumba, oomakula ye otashi vulika ya kale ye mu sa uunye.” Aalumentu yamwe ohaya ningi aakiintu okatongo momikalo dhi ili nodhi ili. Pashiholelwa, otashi vulika ya ninge omashendjo taga ulile mo aakiintu.

Shono shi shi okupandulwa osho kutya, omulumentu ota vulu okuninga omalunduluko kutya nduno okwa za meputuko lini. Ota vulu okusinda iikala mbyoka aalumentu ye na kutya oya simana ye vule aakiintu. (Ef. 4:22-24) Shoka otashi vulu okuningwa mokulandula oshiholelwa shaJehova. Moshitopolwa shika, otatu ka kundathana nkene Jehova ha ungaunga naakiintu, nkene aamwatate taya vulu okwiilonga okuungaunga naakiintu ngaashi Jehova nosho wo nkene aakuluntugongalo taya vulu okutulila po yalwe oshiholelwa ngele tashi ya pokusimaneka aamwameme.

JEHOVA OHA UNGAUNGA NGIINI NAAKIINTU?

Jehova okwa tula po oshiholelwa oshiwanawa shi na ko nasha nokuungaunga naakiintu. E li Tate omunalukeno, oku hole oyana ayehe. (Joh. 3:16) Aamwameme aadhiginini okwe ya tala ko ye li oyanakadhona ya simana. Natu taleni komikalo tadhi landula moka Jehova a simaneka aakiintu.

Oha ungaunga nayo kaapu na okatongo. Jehova aalumentu naakiintu okwe ya shita oshifetha she. (Gen. 1:27) Ina shita aalumentu ye na oondunge  odhindji nenge uunkulungu owundji wu vule waakiintu; noke hole wo aalumentu shi vulithe paakiintu. (2 Ondjal. 19:7) Okwa shita aalumentu naakiintu taya vulu okuuva ko oshili yOmbiimbeli nokuholela omaukwatya ge omawanawa. Jehova okwa lenga wo eitaalo lyaalumentu naakiintu shi thike pamwe, kutya nduno oye na etegameno lyoku ka kala nomwenyo sigo aluhe meviparadisa, nenge otaya ka pangela ye li aakwaniilwa naayambi megulu. (2 Pet. 1:1) Osha yela kutya Jehova iha ningi aakiintu okatongo.

Oha pulakene kuyo. Jehova oku na ko nasha nankene aakiintu ye uvite nosho wo nomaipulo gawo. Pashiholelwa, okwa li a pulakene nokwa yamukula omagalikano gaRakel naHanna. (Gen. 30:22; 1 Sam. 1:10, 11, 19, 20) Jehova okwa li wo a nwetha mo aanyoli yOmbiimbeli ya nyole omahokololo gaalumentu mboka ya li ya pulakene kaakiintu. Pashiholelwa, Abraham okwa li a vulika kelombwelo lyaJehova a pulakene komukulukadhi gwe, Sara. (Gen. 21:12-14) Omukwaniilwa David okwa li a pulakene kuAbigal. Okwa li nokuli e uvite kutya Jehova oye a tumu Abigal a popye naye. (1 Sam. 25:32-35) Jesus, ngoka ha ulike thiluthilu omaukwatya ga fa gaHe, okwa li a pulakene kuyina, Maria. (Joh. 2:3-10) Iiholelwa mbika otayi tsu omuthindo kutya omukalo gumwe moka Jehova ha ulike kutya okwa simaneka aakiintu, omokupulakena kuyo.

Okwe ya inekela. Pashiholelwa, Jehova okwa li a inekelela Eva oshinakugwanithwa shokukwathela Adam a sile oshimpwiyu evi alihe. (Gen. 1:28) Kungawo, oku ulike kutya ina tala ko Adam e vule Eva, ihe okwe mu tala ko e li omukwathi gwaAdam. Jehova okwa li wo a inekelele aahunganeki aakiintu, Debora naHulda, oshinakugwanithwa ya gandje omayele koshigwana she, mwa kwatelwa nokuli omutokolihapu nomukwaniilwa. (Aatok. 4:4-9; 2 Aak. 22:14-20) Kunena, Jehova okwa inekelela aakiintu Aakriste oshinakugwanithwa shokulonga iilonga ye. Aamwameme mbaka aadhiginini oye li aauvithi, aakokolindjila nosho wo aatumwa. Ohaya kwathele miilonga yokuninga oopulana dhomatungo, yokutunga noyokwoopalekulula Iinyanga yUukwaniilwa nosho wo iitayimbelewa. Yamwe ohaya longo koBetel, yalwe okoombelewa dhokutoloka. Aamwameme mboka oya fa etangakwiita enene ndyoka Jehova ha longitha okulonga ehalo lye. (Eps. 68:11) Osha yela kutya Jehova ina dhina aakiintu, nenge e ya tala ko itaaya vulu okulonga sha.

ONGIINI AAMWATATE TAYA VULU OKWIILONGA OKUUNGAUNGA NAAMWAMEME NGAASHI JEHOVA?

Aamwatate, opo tu mone ngele ohatu ungaunga naamwameme Aakriste ngaashi Jehova, otwa pumbwa okwiikonakona nawa, tu tale nkene hatu dhiladhila nohatu katuka, uuna tatu ungaunga naamwameme. Opo tu shi ninge, otwa pumbwa ekwatho. Ngaashi owala eshina lyo-X-ray hali vulu okumona uupyakadhi mboka wu li momutima gwomuntu, kuume kopothingo nosho wo Oohapu dhaKalunga otadhi vulu oku tu kwathela tu ndhindhilike mo omaiyuvo omawinayi ngoka tashi vulika ga mena omidhi mutse kombinga yaamwameme. Oshike twa pumbwa okuninga, opo tu vule okumona ekwatho ndyoka?

Pula kuume kopothingo. (Omayel. 18:17) Otatu vulu okupula kuume e shi okwiinekelwa, ngoka omunambili noku na oondunge dhokuyoolola, omapulo ngaashi: “Ohandi ungaunga ngiini naamwameme? Mbela oye shi wete ngaa kutya onde ya simaneka? Mbela opu na sha tandi vulu okuninga ndi vule okuhwepopaleka omukalo moka handi ungaunga nayo?” Ngele kuume koye okwa ti kutya owa pumbwa okuhwepopala momikalo dhontumba, ino uva nayi. Pehala lyaashono, kala wu na ehalo lyokuninga omalunduluko.

Konakona Oohapu dhaKalunga. Omukalo omwaanawa tatu vulu okutseya ngele ohatu ungaunga ngaa nawa naamwameme, omokulongitha Oohapu dhaKalunga dhi tu kwathele tu konakone iikala yetu noonkatu dhetu. (Heb. 4:12) Sho tatu konakona Ombiimbeli otatu ka ilonga kombinga yaalumentu mboka ya li ya ungaunga nawa naakiintu nosho wo mboka ya li inaaya ungaunga nayo nawa. Opo nduno tatu yelekanitha iiholelwa yawo nankene tse hatu ungaunga naakiintu. Shimwe ishewe, okutala kutya oovelise odhindji otadhi ti shike kombinga yankene Kalunga a tala ko aakiintu, otashi ke tu kwathela kaatu longithe omanyolo pambambo mokuyambidhidha etaloko lyetu lya puka, ndyoka tu na kombinga yaakiintu. Pashiholelwa, Petrus gwotango 3:7 okwa ti kutya omusamane oku na okuungaunga nomukulukadhi gwe ‘nesimaneko a fa oshiyuma sheloya.’ b Mbela shika osha hala okutya omulumentu oku na oondunge, nenge owino  e vule omukiintu? Hasho nando! Oto vulu okuyelekanitha oohapu dhaPetrus naashoka sha popiwa mAagalati 3:26-29, shono kutya Jehova okwa hogolola aalumentu naakiintu yontumba ya ka pangele pamwe naJesus megulu. Ngele otwa konakona Oohapu dhaKalunga nokupula kuume ketu kopothingo kutya ohatu ungaunga ngiini naakiintu, otashi ke tu kwathela tu ilonge nkene tu na okuungaunga naamwameme nesimaneko.

AAKULUNTUGONGALO OHAYA ULIKE NGIINI KUTYA OYA SIMANEKA AAMWAMEME?

Aamwatate megongalo otaya vulu wo okwiilonga nkene ye na okuungaunga nesimaneko naamwameme mokulandula oshiholelwa shaakuluntugongalo. Ongiini aakuluntugongalo taya vulu okutulila po yalwe oshiholelwa ngele tashi ya pokusimaneka aamwameme? Natu ka taleni komikalo dhontumba dhokondandalunde.

Ohaya pandula aamwameme. Omuyapostoli Paulus okwa tulila po aakuluntugongalo oshiholelwa oshiwanawa. Okwa li a pandula aamwameme yontumba montumwafo ndjoka a li a nyolele egongalo lyaRoma. (Rom. 16:12) Dhiladhila owala nkene aamwameme mboka ya li ye uvite sho ontumwafo yaPaulus ya li tayi leshelwa egongalo. Sha faathana, aakuluntugongalo ohaya pandula aamwameme omolwomaukwatya gawo omawanawa nomolwokulongela kwawo Jehova. Shika ohashi kwathele aamwameme ya tseye kutya egongalo olye ya simaneka nolye ya lenga. Omathimbo gamwe, aamwameme mbaka otashi vulika ya pumbwa owala okutsuwa omukumo komukuluntugongalo, opo ya vule okutsikila okulongela Jehova nuudhiginini. — Omayel. 15:23.

Uuna aakuluntugongalo taya pandula aamwameme, omatyokosha gawo naga kale gokondandalunde noge li paushili. Omolwashike mbela? Omumwameme Jessica okwa ti: “Ohashi kala oshiwanawa uuna aamwatate taya lombwele omumwameme kutya ‘owa ninga nawa.’ Ihe ohashi tu kumike noonkondo uuna aamwatate taye tu pandula, uuna twa ninga sha shokondandalunde, ngaashi okulonga aanona yetu ya kale  haya kuutumba ya mwena pokugongala, nenge sho hatu ka tala omukonakoni gwontumba e ye kokugongala.” Uuna aakuluntugongalo taya pandula aamwameme omolwoshinima shontumba shoka ya ninga, ohashi ya ningitha ya kale ye uvite ya pumbiwa noye na oshilonga megongalo.

Ohaya pulakene kaamwameme. Aakuluntugongalo aaifupipiki oye shi kutya hayo owala haya ningi omaetopo omawanawa. Aamwatate mboka ohaya pula aamwameme ya ninge omaetopo gawo, nokupulakena kuyo nuukeka. Uuna taye shi ningi, ohashi tsu omukumo aamwameme, naakuluntugongalo ohaya mono mo wo uuwanawa. Ngiini mbela? Omukuluntugongalo gwedhina Gerardo, ngoka ha longo koBetel, okwa ti: “Onda mona kutya okupula aamwameme omaetopo gawo, ohashi kwathele ndje ndi gwanithe po nawa iilonga yandje. Olundji ohaya kala ya longa iilonga yontumba ethimbo ele, ye vulithe aamwatate.” Aamwameme oyendji megongalo oye li aakokolindjila, onkee ohaya kala ye shi oshindji kombinga yaantu yomoshitopolwa. Omukuluntugongalo gwedhina Bryan okwa ti: “Aamwameme oye na omaukwatya ogendji omawanawa nosho wo uunkulungu, iinima mbyoka ya pumbiwa mehangano. Onkee oto vulu okumona uuwanawa mowino yawo.”

Aakuluntugongalo kaye na okudhina omaetopo gaamwameme. Omolwashike mbela? Omukuluntugongalo gwedhina Edward okwa ti: “Eetopo lyomumwameme nowino ye, otayi vulu okukwathela omumwatate a uve ko oshinima shontumba muule, noku uve ko nawa omaiyuvo gayalwe. (Omayel. 1:5) Nokuli nonando omukuluntugongalo ita longitha eetopo lyomumwameme, ota vulu oku mu pandula omolweetopo neuvoko lye.

Ohaya dheula aamwameme. Aakuluntugongalo ohaya kongo oompito dhokudheula aamwameme. Pashiholelwa, otaya vulu okulonga aamwameme nkene ye na okukwatela komeho elongekidho lyiilonga yomomapya, uuna taya ka iyadha kaapu na omumwatate a ninginithwa. Otaya vulu oku ya dheula ya kale ye shi okulongitha iilongitho nomashina, opo ya vule okukwathela miilonga yokutunga noyokwoopalekulula omatungo gehangano. KoBetel, aatonateli oya dheulila aamwameme iilonga yi ili noyi ili, mwa kwatelwa yokwoopalekulula, oku ka landa iinima, okulonga niimaliwa, okutula oopolohalama mookompiuta nosho tuu. Uuna aakuluntugongalo taya dheula aamwameme, ohashi ulike kutya otaya vulu iilonga noye shi okwiinekelwa.

Aamwameme oyendji ohaya longitha edheulo ndyoka ya pewa kaakuluntugongalo ya kwathele yalwe. Pashiholelwa, aamwameme yamwe ohaya longitha edheulo ndyoka ya pewa miilonga yokutunga, ya kwathele yalwe ya tungulule omagumbo gawo, uuna ya dhengwa koshiponga shopaunshitwe. Aamwameme yalwe mboka ya longwa nkene ye na okuuvitha montaneho, ohaya longitha uunkulungu mboka, ya dheule aamwameme oyendji. Aamwameme ohaya kala ye uvitile ngiini aakuluntugongalo mboka ye ya dheula? Omumwameme Jennifer okwa ti: “Sho twa li tatu tungu Oshinyanga shUukwaniilwa shimwe, omutonateli gumwe okwa li a dheula ndje. Okwa mono iilonga mbyoka nda longa e ta pandula ndje. Ondi hole okulonga pamwe naye, molwaashoka ohandi kala ndi uvite ndi na oshilonga nondi shi okwiinekelwa.”

UUWANAWA WOKUUNGAUNGA NAAMWAMEME NGAASHI AANTU YAANDJETU

Otu hole aamwameme aadhiginini ngaashi Jehova. Onkee ohatu ungaunga nayo ngaashi aantu yaandjetu. (1 Tim. 5:1, 2) Otwe ya lenga notu hole okulonga pamwe nayo. Ohatu kala twa nyanyukwa uuna ye shi kutya otu ya hole nohatu ya ambidhidha. Omumwameme Vanessa okwa ti: “Onda pandula Jehova noonkondo, sho ndi li oshitopolwa shehangano lye, moka mu na aamwatate haya kumike ndje.” Omumwameme gumwe gwokoTaiwan okwa ti: “Onda pandula noonkondo sho Jehova nehangano lye, ya lenga aamwameme nosho wo omaiyuvo gawo. Shika ohashi koleke eitaalo lyandje, nohandi shi pandula noonkondo, shi vulithe puuthembahenda mboka ndi na wokukala oshitopolwa shehangano lyaJehova.”

Jehova oha kala e uvite uuntsa nuunambano, uuna e wete aalumentu aadhiginini taya ningi oonkambadhala ya kale ya lenga nokusimaneka aakiintu ngaashi ye. (Omayel. 27:11) Omukuluntugongalo gwedhina Benjamin, gwokoSkotolanda, okwa ti: “Aalumentu oyendji muuyuni kunena inaya simaneka nando aakiintu. Onkee uuna aakiintu ye ya kOshinyanga shUukwaniilwa, otwa hala ya kale ye uvite ye holike noya simanekwa.” Ano natu ningeni ngaashi tatu vulu, tu holele Jehova mokuungaunga naamwameme nohole nonesimaneko, ngaashi ye shi ilongela. — Rom. 12:10.