1. Omolwashike Edhimbuluko li li oshiningwanima sha simanenena momumvo? (Lukas 22:19, 20)

 EDHIMBULUKO lyeso lyaKristus oli li esiku lyokomumvo lya simanenena koshigwana shaJehova. Osho owala oshiningwanima Jesus a li a lombwele aalanduli ye kondandalunde ya kale haye shi dhimbulukwa. (Lesha Lukas 22:19, 20.) Otwa tegelela nondjuulukwe Edhimbuluko omolwomatompelo ogendji. Natu taleni gamwe gomugo.

2. Omolwomatompelo galwe geni hatu kala twa tegelela nondjuulukwe Edhimbuluko?

² Edhimbuluko ohali tu kwathele tu dhiladhile kongushu yekuliloyambo. Ohali tu dhimbulukitha omikalo moka tatu vulu okuulika olupandu omolweyambo lyaJesus. (2 Kor. 5:14, 15) Ohali tu pe wo ompito yokunyanyukilwa “okutsaathana omukumo” naamwatate naamwameme. (Rom. 1:12) Omumvo kehe, pEdhimbuluko oha pu kala oyendji mboka inaaya ipyakidhila we. Yamwe ohali ya inyengitha nokuli ya galukile kuJehova, molwaashoka ya taambwa ko nohamu. Aantu oyendji mboka ye na ohokwe oya inyengithwa kwaashoka ya mona noya uva, ya tameke okweenda mondjila ndjoka tayi fala komwenyo gwaaluhe. Osha yela kutya iinima ayihe mbyoka oya ningitha Edhimbuluko li kale lya simanenena kutse.

3. Edhimbuluko ohali tu hanganitha ngiini naamwatate muuyuni awuhe? (Tala wo ethano.)

³ Dhiladhila wo kunkene Edhimbuluko hali tu hanganitha naamwatate muuyuni awuhe. Oonzapo dhaJehova ohadhi gongala sho etango tali ningine muuyuni awuhe dhi dhane Edhimbuluko. Atuheni ohatu pulakene koshipopiwa shoka tashi tsu omuthindo nkene ekuliloyambo lya simana. Ohatu imbi omaimbilo gaali tatu tanga Kalunga, ohatu taambathana omandhindhiliko nohatu ti “amen” tashi zi komutima komagalikano agehe gane. Momukokomoko gwoowili 24 lwaampono, omagongalo agehe ohaga ningi sha faathana. Mbela oho dhiladhila ngaa enyanyu ndyoka Jehova  naJesus haya kala ye na, uuna ye wete twa hangana tatu ya simaneke momukalo ngoka?

4. Oshike tatu ka kundathana moshitopolwa shika?

⁴ Moshitopolwa shika, otatu ka kundathana omapulo taga landula: Ongiini tatu vulu okulongekidha omitima dhetu omolwEdhimbuluko? Ongiini tatu vulu okukwathela yalwe ya mone uuwanawa mulyo? Nongiini tatu vulu okukwathela mboka inaaya ipyakidhila we? Omayamukulo gomapulo ngoka, otage ke tu kwathela tu ilongekidhile oshiningwanima shika sha simanenena.

ONGIINI TATU VULU OKULONGEKIDHILA OMITIMA DHETU EDHIMBULUKO?

5. (a) Omolwashike tu na okudhiladhila kongushu yekuliloyambo? (Episalomi 49:7, 8) (b) Oshike wa ilonga mokavidio Jesus okwa sile shike?

⁵ Omukalo gumwe gwa simanenena moka tatu vulu okulongekidhila omitima dhetu Edhimbuluko, omokutedhatedha kongushu yekuliloyambo lyaJesus Kristus. Itatu vulu okwiihupitha tse yene muulunde neso. (Lesha Episalomi 49:7, 8; tala wo okavidio Jesus okwa sile shike?) a Jehova naJesus oya ningi eiyambo enene, sho Jehova a ningi elongekidho, opo Omwana omuholike a gandje omwenyo gwe e tu hupithe. (Rom. 6:23) Ngele otwa kala tatu tedhatedha aluhe kwaashoka Jehova naJesus ye tu ningila, otatu ka kala twa pandula lela ekuliloyambo. Otatu ka kundathana yimwe yomiinima iidhigu mbyoka Jehova naJesus ya li ye na ehalo oku tu ningila. Ihe tango, otatu ka kundathana kutya ekuliloyambo olya li lya kwatela mo shike?

6. Ekulilo olya kwatela mo shike?

⁶ Ekulilo olyo ofuto ndjoka hayi futwa okufutila po oshinima shontumba. Omuntu gwotango, Adam, okwa li a shitwa a gwanenena. Sho a yono, okwa kanithile oyana ayehe nosho wo ye mwene etegameno lyokumona omwenyo gwaaluhe. Opo Jesus a futile po shoka sha kanithwa kuAdam, okwa yamba po omwenyo gwe gwa gwanenena. Ethimbo alihe ndyoka Jesus a kala kombanda yevi, “ina yona nando; kaku na omuntu gumwe u uvu iifundja yasha tayi zi mokana ke.” (1 Pet. 2:22) Sho a si, omwenyo gwe gwa gwanenena ogwa li gu na ongushu yi thike pomwenyo ngoka gwa kanithwa kuAdam. — 1 Kor. 15:45; 1 Tim. 2:6.

7. Omamakelo gamwe geni Jesus a li a taalele, sho a li kombanda yevi?

⁷ Jesus okwa kala ha vulika lela kuHe gwomegulu, nonando okwa li a taalelwa komamakelo ogendji sho a li kombanda yevi. Sho a li okanona, okwa vulika nokuli kaavali ye inaaya gwanenena, nando ye okwa li a gwanenena. (Luk. 2:51) Sho a li omugundjuka, okwa li e na okukondjitha omathiminiko kehe ngoka tashi vulika ga li tage mu zile kwaamboka ya hala a kale ihaa vulika kaavali ye, nenge kee shi omudhiginini kuJehova. Naasho Jesus a ningi omukuluntu, okwa li a kondjitha omamakelo gaSatana Ondiyapoli, mwa kwatelwa omaponokelo ge mu ukilila ge na ko nasha nuudhiginini we kuKalunga. (Mat. 4:1-11) Satana okwa li a tokola okuyonitha Jesus, opo a kale itaa wapa okugandja ekuliloyambo.

8. Omamakelo galwe geni Jesus a li a idhidhimikile?

⁸ Pethimbo lyiilonga ye yokuuvitha kombanda yevi, Jesus okwa li natango a idhidhimikile omamakelo galwe. Okwa li a hepekwa nokwa ningilwa omatilitho kutya ota dhipagwa. (Luk. 4:28, 29; 13:31) Okwa li e na okuungaunga nokwaagwanenena kwaalanduli ye. (Mark. 9:33, 34) Sho a li ta pangulwa, okwa li a hepekwa nokushekwa. Opo nduno okwa dhipagwa a fa omukolokoshi nokwa si eso enyanyalithi. (Heb. 12:1-3) Okwa li e na okwiidhidhimikila emakelo lyahugunina, nopwaahe na okugamenwa kuJehova. b — Mat. 27:46.

9. Otu uvitile ngiini eyambo lyaJesus? (1 Petrus 1:8)

⁹ Osha yela kutya Jesus okwa hepekwa noonkondo, opo a gandje ekuliloyambo. Uuna tatu  dhiladhila kunkene a iyamba nehalo a se omolwetu, mbela ihashi tu inyengitha tu kale tu mu hole nohole ya tsa kesipa? — Lesha 1 Petrus 1:8.

10. Ekulilo olya pula Jehova shi thike peni?

¹⁰ Ongiini kombinga yaJehova? Okwa li a ningi po shike nehalo ewanawa, opo Jesus a vule okugandja ekulilo? Jehova naJesus oye na ekwatathano lyopothingo, ndyoka hali vulu okukala pokati kahe nomwanamati. (Omayel. 8:30) Onkee dhiladhila owala kunkene Jehova a li e uvite sho a li ta tala Jesus ta idhidhimikile omahepeko ogendji ge thike mpoka, sho e li kombanda yevi. Kapu na omalimbililo kutya osha li sha ehameke Jehova okutala Omwana ta ungaungiwa naye nayi, kee niwe naye nota makelwa.

11. Longitha oshiholelwa shoka tashi ulike nkene Jehova a li e uvite, sho Jesus a dhipagwa?

¹¹ Omuvali kehe a silwa omwana oku shi kutya shoka ohashi yemateke omuntu nayi. Otu na eitaalo lya kola meyumuko, ihe shoka ihashi kutha po uuwehame mboka hatu kala tu uvite, omolwaaholike yetu mboka ya sa. Oshiholelwa shoka otashi tu kwathele tu uve ko nkene Jehova a li e uvite sho a tala Omwana omuholike ta hepekwa nota si, pethimbo lyiitemamvula mo 33 E.N. c — Mat. 3:17.

12. Oshike tatu vulu okuninga miiwike mbyoka hayi tetekele Edhimbuluko?

¹² Omolwashike itoo tameke ngashingeyi sigo opethimbo lyEdhimbuluko, okukonakona kombinga yekuliloyambo pekonakono lyoye lyopaumwene, nenge pElongelokalunga lyUukwanegumbo? Longitha Embo lyokukonga uuyelele lyOonzapo dhaJehova (ngele omo li li melaka lyoye), nenge iileshomwa yilwe mbyoka ya kankamena kOmbiimbeli wu konakone muule kombinga yekuliloyambo. d Shimwe ishewe, ninga elesho lyOmbiimbeli lyEdhimbuluko ndyoka li li mokafo Onkalamwenyo yopaKriste niilonga yetu yokuuvitha — Okafo kokulongithwa pokugongala. MEsiku lyEdhimbuluko, ino dhimbwa okutala Oonkundathana dhongula dhenyolo lyesiku dhi ikalekelwa. Ngele otwa longekidhile omitima dhetu Edhimbuluko, otatu ka vula okukwathela yalwe nayo ya mone mo uuwanawa mulyo. — Esra 7:10.

KWATHELA YALWE YA MONE MO UUWANAWA

13. Oshinima shotango shini tatu vulu okuninga, tu kwathele yalwe ya mone uuwanawa pEdhimbuluko?

¹³ Ongiini tatu vulu okukwathela yalwe ya mone uuwanawa mEdhimbuluko? Onkatu yotango to vulu okukatuka, oku ya hiya kEdhimbuluko. Kakele kokuhiya aantu miilonga  yokuuvitha, otatu vulu wo okunyola omusholondondo gwaamboka twa hala okuhiya. Shoka osha kwatela mo okuhiya aakwanezimo, mboka hatu longo pamwe nayo, aanasikola ooyakwetu nayalwe. Nonando katu na uufo wehiyo wa gwana, otatu vulu oku ya tumina o-linka koshikwaelektronika. Olye e shi kutya yangapi yomuyo taye ke ya kEdhimbuluko? — Omuuv. 11:6.

14. Gandja oshiholelwa nkene okuhiya omuntu nokafo haku gumu omuntu.

¹⁴ Ino kala wa dhina nando kutya mboka to hiya itaye ke ya. Esiku limwe, omumwameme gumwe, ngoka omusamane gwe kee shi Oonzapo, okwa li a kumwa sho omusamane gwe e mu lombwele e uvite etumba kutya ota ka ya pamwe naye kEdhimbuluko. Omolwashike a li a kumwa? Omolwaashoka iikando oyindji ya za ko, okwa li e mu ladhipike a ye naye, ihe ine shi ninga nando. Oshike she mu inyengitha ngashingeyi? Omusamane okwa ti: “Onda pewa okafo kehiyo.” Okafo hono okwa li e ka pewa komukuluntugongalo ngoka a li ye shaathane naye. Omusamane okwa li a kala po pEdhimbuluko, nokwa kala ha kala po nomimvo odhindji dha ka landula ko.

15. Oshike twa hala okudhimbulukwa, uuna tatu hiya aantu kEdhimbuluko?

¹⁵ Kaleka momadhiladhilo kutya mboka twa hiya otashi vulika ya ka kale ye na omapulo gontumba, unene tuu ngele inaya enda ko nale. Onkee ano otatu vulu okudhiladhila kombinga yomapulo ngoka tashi vulika ye tu pule nokwiilongekidha oku ga yamukula. (Kol. 4:6) Pashiholelwa, yamwe otashi vulika ya ipule kutya: ‘Oshike tashi ka ningwa poshiningwanima shika?’ ‘Otashi ka kwata ethimbo li thike peni?’ ‘Oshike ndi na okuzala?’ ‘Mbela onda pumbwa okufuta, opo ndi ka kale po?’ ‘Mbela otapu ka umbwa ongalo?’ Uuna tatu hiya gumwe kEdhimbuluko, otatu vulu oku mu pula kutya, “Mbela owu na epulo lyasha?” Opo nduno tatu yamukula omapulo ngoka e na. Otatu vulu wo okulongitha uuvidio Edhimbuluko lyeso lyaJesus nosho wo Oshike hashi ningwa pokugongala kwOonzapo dhaJehova? opo tu ya kwathele ya uve ko nkene okugongalo kwetu haku ningwa. Oshileshwa 28 shembo Kala nonkalamwenyo ombwanawa sigo aluhe, oshi na iitsa oyindji iiwanawa mbyoka tatu vulu okukundathana nayalwe.

16. Mboka taye ya kEdhimbuluko otashi vulika ya kale ye na omapulo geni?

 ¹⁶ Konima yEdhimbuluko mboka ya li po ya ulika ohokwe, otashi vulika ya kale ye na omapulo gontumba. Otashi vulika ya ipule kutya omolwashike kaapu na ngoka a lya oshikwiila nokunwa omaviinu, nenge kutya omolwashike aantu aashona oyo owala ya kutha ombinga mokulya oshikwiila nokunwa omaviinu. Otashi vulika wo ya ipule kutya Edhimbuluko ohatu li dhana iikando ingapi. Otashi vulika natango ya kale ya hala okutseya ngele okugongala kwOonzapo dhaJehova akuhe ohaku ningwa momukalo gwa faathana. Nonando uuyelele mbuka owundji owa kundathanwa nale moshipopiwa shEdhimbuluko, mboka aape otashi vulika taya ka pumbwa uuyelele wa gwedhwa po. Oshitopolwa shi li kepandja lyetu, jw.org, shi na oshipalanyolo, “Omolwashike Oonzapo dhaJehova hadhi dhana Uulalelo wOmuwa momukalo gwa yooloka ko komalongelokalunga galwe?” otashi vulu oku tu kwathela tu yamukule omapulo gamwe ngoka tashi vulika ye tu pule. Otwa hala okuninga ngaashi tatu vulu manga Edhimbuluko inaali tameka, sho tu li pulyo nokonima ngele lya pu, tu kwathele ‘mboka ya hala okumona omwenyo gwaaluhe,’ ya mone wo uuwanawa mulyo. — Iil. 13:48.

KWATHELA MBOKA INAAYA IPYAKIDHILA WE

17. Ongiini aakuluntugongalo taya vulu okukwathela mboka inaaya ipyakidhila we? (Hesekiel 34:12, 16)

¹⁷ Pethimbo lyoomwedhi dhEdhimbuluko ongiini aakuluntugongalo taya vulu okukwathela mboka inaaya ipyakidhila we? Ya ulukileni kutya omu na ko nasha nayo. (Lesha Hesekiel 34:12, 16.) Manga Edhimbuluko inaali tameka, shilipalekeni kutya omwa dhengela oyendji ngaashi tashi vulika. Ya ulukileni kutya omu ya hole nomwa hala oku ya kwathela momukalo kehe tamu vulu. Ya hiyeni kEdhimbuluko. Ngele oye ya, ya hambeleleni nohamu. Konima yEdhimbuluko tsikileni okukala mu na ekwatathano ewanawa naamwatate naamwameme mboka noku ya kwathela pambepo, opo ya galukile kuJehova. — 1 Pet. 2:25.

18. Ongiini atuheni megongalo tatu vulu okukwathela mboka inaaya ipyakidhila we? (Aaroma 12:10)

¹⁸ Ayehe megongalo otaya vulu okukwathela mboka inaaya ipyakidhila we, mboka ye ya  kEdhimbuluko. Ngiini mbela? Omokuungaunga nayo nohole, nolukeno nonesimaneko. (Lesha Aaroma 12:10.) Dhimbulukwa kutya otashi vulika sha kala oshidhigu kaamwatate naamwameme mboka okuya kokugongala. Otashi vulika ya li ya tila kutya pamwe itaya ka taambwa ko nawa. e Onkee ano ino ya pula omapulo tage ya sitha ohoni, nenge wu popye iinima mbyoka tayi vulu oku ya ehameka. (1 Tes. 5:11) Aamwatate naamwameme mboka oye li ooitaali ooyakwetu. Otwa nyanyukwa okulongela Kalunga pamwe nayo ishewe. — Eps. 119:176; Iil. 20:35.

19. Uuwanawa wuni hawu zi mokudhimbulukwa eso lyaJesus?

¹⁹ Otwa pandula sho Jesus e tu lombwela tu kale hatu dhimbulukwa eso lye omumvo kehe, notu uvite ko kutya omolwashike sha simanenena okuninga ngawo. Ngele otwe shi ningi, tse nosho wo yalwe otatu ka mona mo uuwanawa momikalo odhindji. (Jes. 48:17, 18) Ohole yetu yokuhola Jehova naJesus otayi ka koka. Ohatu ulike kutya otwa pandula shi thike peni, omolwaashihe shoka ye tu ningila. Ohatu koleke ekwatathano lyetu nooitaali ooyakwetu. Otashi vulika wo tu kwathele yalwe ya ilonge nkene nayo taya vulu okumona omalaleko nuuyamba ngoka ga etithwa kekuliloyambo. Onkee ano natu ninge ngaashi tatu vulu, tu ilongekidhile Edhimbuluko lyonuumvo, ndyoka li li oshiningwanima sha simanenena momumvo.