1. Omolwashike omathimbo gamwe tashi vulika tu kale twa tila?

 KEHE gumwe omathimbo gamwe oha kala e uvite a tila. Okukonakona Ombiimbeli ohaku tu mangulula lela kuumbanda wokutila oonakusa, oombepo dhoompwidhuli nokokutila onakuyiwa. Ihe natango otu li methimbo lya udha iinima “iitilithi,” ngaashi iita, omiyonena nomikithi. (Luk. 21:11) Otashi vulika tu kwatwe kuumbanda wokutila aantu, mwa kwatelwa omapangelo ngoka hage tu pataneke nokuli noyaandjetu mboka haya pataneke elongelokalunga lyashili. Yamwe otashi vulika haya ipula kutya itaya ka vula okwiidhidhimikila omashongo gongashingeyi nenge ngoka tashi vulika ge ke ya adhe monakuyiwa.

2. Hokolola onkalo yaDavid sho a li muGat.

² David okwa li a kwatwa kuumbanda. Pashiholelwa, sho omukwaniilwa Saul a li te mu tidha a hala e mu dhipage, David okwa tokola a ye ontuku koshilando shAafilisti, Gat. Omukwaniilwa gwokuGat, Akish, nziya okwa mono kutya David omukwiita ofule ngoka a li ta tembulilwa kaakiintu kutya okwa dhipaga Aafilisti “omayuvi omulongo.” David okwa li a ‘haluka unene.’ (1 Sam. 21:10-12) Okwa li ta ipula kombinga yaashoka omukwaniilwa Akish te ke mu ningila. David okwa li a sindi ngiini uumbanda we?

3. Shi ikolelela kEpisalomi 56:1-3, 11, David okwa li a sindi ngiini uumbanda?

³ MEpisalomi 56, David okwa popi nkene a li e uvite, sho e li muGat. MEpisalomi ndyoka, David okwa yelitha nawa kutya omolwashike a li a tila, nokwa holola kutya oshike she mu kwathele a sinde uumbanda. Sho David a li a tila, okwa inekele  muJehova. (Lesha Episalomi 56:1-3, 11.) David okwa li e na omatompelo omawanawa gokwiinekela muJehova. Kekwatho lyaJehova, David okwa tokola a ninge po sha tashi kumitha. Okwa ifethitha omupwidhi. Akish pehala lyokukala a hala oku mu dhipaga, okwa li e wete te mu ningile nayi, nokungawo David okwa hupu. — 1 Sam. 21:13–22:1.

4. Ongiini tatu vulu okukoleka einekelo lyetu muJehova? Shi thaneka.

⁴ Otatu vulu wo okusinda uumbanda, mokukala twa inekela muJehova. Ihe ongiini tatu vulu okukoleka einekelo lyetu muye, unene tuu ngele twa tila? Natu taleni kethaneko. Ngele owa lombwelwa kutya owu na uuvu wontumba, petameko otashi vulika wu kale wa tila. Ihe nando ongawo, oto vulu okusinda uumbanda mboka, ngele ndohotola owe mu inekela. Otashi vulika e shi okupanga nawa aavu mboka ye na omukithi gwa fa gwoye. Ota vulu a pulakene neitulomo noku ku shilipaleka kutya oku uvite ko onkalo yoye. Otashi vulika e ku pe omaetopo kutya epango lini lya kwathela yalwe ya aluke. Sha faathana, otatu vulu okukoleka einekelo lyetu muJehova, mokutala kwaashoka e tu ningila nale, shoka te tu ningile ngashingeyi naashoka te ke tu ningila. Shoka osho David a li a ningi. Sho tatu tala koohapu dhe dha nwethwa mo ndhoka tadhi adhika mEpisalomi 56, natu dhiladhile kunkene tadhi vulu wo okukoleka einekelo lyoye muJehova noku ku kwathela wu sinde uumbanda woye.

OSHIKE JEHOVA E KU NINGILA NALE?

5. David okwa li a dhiladhila kombinga yashike, opo a sinde uumbanda? (Episalomi 56:12, 13)

⁵ Sho David a li a taalela onkalo ondhigu, okwa gandja eitulomo kwaashoka Jehova e mu ningila nale. (Lesha Episalomi 56:12, 13.) David okwa li aluhe ha tedhatedha ngawo monkalamwenyo ye. Pashiholelwa, omathimbo gamwe okwa li ha dhiladhila kombinga yiilonga yeshito lyaJehova, mbyoka hayi mu dhimbulukitha kutya Jehova omunankondoadhihe noku na ohokwe maantu. (Eps. 65:6-9) David okwa li wo a tedhatedha kombinga yaashoka Jehova a ningila yalwe. (Eps. 31:19; 37:25, 26) Okwa li a tedhatedha unene tuu kombinga yaashoka e mu ningila nale paumwene. Jehova okwa li a yambidhidha nokwa gamene David okuza kuunona we. (Eps. 22:9, 10) Dhiladhila nkene  okutedhatedha hoka kwa li kwa kwathele David a kale a inekela muJehova.

6. Uuna twa tila, oshike tashi tu kwathele tu kale twa inekela muJehova?

⁶ Uuna wu uvite wa tila, ipula ngeyi, ‘Oshike Jehova a ningila ndje nale?’ Kala ho tedhatedha kwaashoka a shita. Pashiholelwa, uuna tatu ‘tala’ nkene Jehova ha sile oshimpwiyu uudhila noongala, iinima mbyoka inaayi shitwa oshifetha she noihayi vulu oku mu longela, otatu koleke einekelo lyetu kutya ote ke tu sila wo oshimpwiyu. (Mat. 6:25-32) Natu taleni wo kwaashoka Jehova a ningila aalongeli ye. Otashi vulika wa konakona kombinga yomuntu gwomOmbiimbeli ngoka a li e na eitaalo lya dhenga mbanda, nenge tashi vulika wa lesha oshimoniwa shomupiya gwaJehova gwokunena. a Shimwe ishewe, tedhatedha kunkene Jehova e ku sila nale oshimpwiyu. Okwe ku kwathele ngiini wu mu tseye? (Joh. 6:44) Omagalikano goye okwa li e ga yamukula ngiini? (1 Joh. 5:14) Oho mono ngiini uuwanawa esiku kehe mekuliloyambo lyOmwana omuholike? — Ef. 1:7; Heb. 4:14-16.

7. Oshimoniwa shomuhunganeki Daniel osha li sha kwathele ngiini Vanessa a sinde uumbanda?

⁷ Vanessa, b omumwameme gwokoHaiti, okwa li a taalelwa konkalo itaayi nuwa omeya. Omulumentu gumwe gwopuyo okwa li he mu dhengele, he mu tumine omatumwalaka esiku kehe noku mu thininika a ninge po gwe. Vanessa okwa li e mu lombwele sha yela kutya ina hala okuninga oshinima sha tya ngawo. Ihe omulumentu ngoka okwa tameke okukala e mu tonde noku mu ningila omatilitho kutya ote ke mu longela omuyonena. Vanessa okwa ti: “Onda li nda tila.” Okwa li a sindi ngiini uumbanda mboka? Okwa katuka oonkatu dha kwata miiti, opo a igamene. Omukuluntugongalo gumwe okwa li e mu lombwele a ye kopolisi. Ihe Vanessa okwa li wo a gandja eitulomo kunkene Jehova a li a gamene aapiya ye yomonakuziwa. Okwa ti: “Omuntu gwotango ngoka nda li nda dhiladhila kombinga ye, omuhunganeki Daniel. Okwa li a umbilwa mekololo lyoonime dha sa ondjala, nonando ka li a ninga sha sha puka. Ihe Jehova okwa li e mu gamene. Oshinima shoka onda li nde shi lombwele Jehova megalikano. Okuza mpono, inandi kala we nda tila.” — Dan. 6:12-22.

TEDHATEDHA KWAASHOKA JEHOVA TE KU NINGILE NGASHINGEYI

8. David okwa li a tompwa kushike? (Episalomi 56:8)

⁸ Nonando David okwa li moshiponga sha kwata miiti, sho a li muGat, ina gandja eitulomo kuumbanda. Pehala lyaashono, okwa tokola okutala kwaashoka Jehova te mu ningile pethimbo ndyoka. David okwa li e shi kutya Jehova oye te mu wilike note mu gamene nonokutya oku uvite ko omaiyuvo ge. (Lesha Episalomi 56:8.) David okwa li wo e na ookuume, ngaashi Jonatan nOmuyambi Omukuluntu, Ahimelek, mboka ya li ye mu yambidhidha noye mu kwathele. (1 Sam. 20:41, 42; 21:6, 8, 9) Nonando omukwaniilwa Saul okwa li a hala oku mu dhipaga, David okwa yi ontuku a ka hupithe omwenyo gwe. Okwa li a tompwa kutya Jehova uupyakadhi we oku wu shi nawa noku shi nkene e uvite.

9. Jehova oha tala shike mukehe gumwe gwomutse?

⁹ Uuna wa taalelwa kuupyakadhi mboka tawu ku ningitha wu kale wa tila, dhimbulukwa kutya Jehova oku ku wete noku shi nkene wu uvite. Pashiholelwa, Jehova ka li owala a mono sho Aaisraeli taya ungaungiwa nayo nayi muEgipiti, ihe okwa li wo e shi “omahepeko gawo agehe.” (Eks. 3:7) David okwa li a popi meimbilo lye kutya Jehova okwa mona “omahepeko” ge ‘nuudhigu’ we. (Eps. 31:7) Sho oshigwana shaKalunga sha li tashi mono iihuna, tashi vulika nokuli molwomatokolo  gasho omawinayi, Kalunga okwe shi “nikile oluhodhi.” (Jes. 63:9, Yelekanitha NW.) Uuna wa tila, Jehova oku uvite ko omaiyuvo goye nokwa halelela oku ku kwathela wu sinde uumbanda mboka.

10. Omolwashike wa tompwa kutya Jehova oku na ko nasha nangoye, nonokutya ote ke ku kwathela wu ungaunge nuupyakadhi kehe?

¹⁰ Otashi vulika wu kale wa limbililwa kutya Jehova ohe ku ambidhidha ngiini, uuna wa taalelwa kuupyakadhi. Onkee mu pula e ku kwathele wu mone nkene te ku ambidhidha. (2 Aak. 6:15-17) Opo nduno tala omapulo taga landula: Mbela oshipopiwa nenge etyokosha lyagumwe pokugongala olye ku koleka? Mbela oshileshomwa, okavidio, nenge eimbilo lyontumba oye ku tsa omukumo? Mbela gumwe okwe ku lombwela enyolo nenge sha she ku tsa omukumo? Otashi vulika tu dhimbwe nuupu ohole yuumwayinathana nosho wo iikulya yopambepo mbyoka hatu mono. Iinima mbyoka oyo omagano ga dhenga mbanda ga za kuJehova. (Jes. 65:13; Mark. 10:29, 30) Otaga ulike kutya oku na ko nasha nangoye. (Jes. 49:14-16) Otaga ulike wo kutya oye wa gwana okwiinekela.

11. Oshike sha li sha kwathele Aida a sinde uumbanda?

¹¹ Aida, ngoka a kala moSenegal, okwa mona nkene Jehova e mu ambidhidha, sho a li muupyakadhi. Molwaashoka oye osheeli, aavali ye oya li ya tegelela a kale ha mono iimaliwa oyindji, opo a vule okwiisila oshimpwiyu nosho wo yo. Ihe sho Aida a ningi omalunduluko monkalamwenyo ye, opo a vule okukokola ondjila, okwa li ta hupu shokadhila. Yaandjawo oya li ye mu geyela noku mu pa uusama. Okwa ti: “Onda li nda tila sho itaandi vulu we okukwathela aavali yandje naasho kehe gumwe a li a tonda ndje. Onda li nokuli nda pe Jehova uusama, sho ta etha iinima yi endele ndje nayi.” Opo nduno okwa pulakene koshipopiwa pokugongala. Okwa ti: “Omupopi okwa li e tu dhimbulukitha kutya, nonando otwa yemata noonkondo, Jehova oku shi kutya omolwashike. Kashonanakashona, sho nda pewa omayele kaakuluntugongalo nokuyalwe, onda tsuwa omukumo kutya Jehova oku hole ndje. Onda tameke okugalikana Jehova ndi na omukumo, nonda li ndi uvite ombili, sho omagalikano gandje ga yamukulwa.” Mokweendela ko kwethimbo, Aida okwa mono iilonga mbyoka ye mu kwathela a iyambidhidhe  ye mwene, sho ta kokola ondjila nokukwathele wo aavali ye nayalwe. Okwa ti: “Onda ilongo okukala nda inekela thiluthilu muJehova. Ngashingeyi konima ngele nda galikana, olundji uumbanda wandje ohawu zi po.”

OSHIKE JEHOVA TA KA NINGA NATANGO?

12. Shi ikolelela kEpisalomi 56:9, David okwa li a tompwa kushike?

¹² Lesha Episalomi 56:9. Ovelise ndjika otayi ulike omukalo gulwe moka David a li a sindi uumbanda we. Nonando onkalamwenyo ye oya li natango moshiponga, okwa li a tedhatedha kwaashoka Jehova te ke mu ningila. David okwa li e shi kutya Jehova ote ke mu hupitha pethimbo lyo opala. Kakele kaashono, Jehova okwa li a ti kutya David oye ta ka kala omukwaniilwa gwaIsraeli ta landula ko. (1 Sam. 16:1, 13) David okwa li e na uushili kutya kehe shoka Jehova a uvaneka, otashi ka gwanithwa.

13. Otatu vulu okukala neinekelo kutya Jehova ota vulu okuninga shike?

¹³ Jehova oku uvaneka oku ku ningila shike? Inatu tegelela e tu gamene komaupyakadhi agehe. c Ihe dhimbulukwa kutya, uupyakadhi kehe tawu tu adha muuyuni mbuka, Jehova ote ke wu kutha po muuyuni uupe, kutya nduno owu kale wa fa peni. (Jes. 25:7-9) Omushiti gwetu oku na lela oonkondo dhokuyumudha oonakusa, oku tu aludha nokuhanagula po aapataneki yetu ayehe. — 1 Joh. 4:4.

14. Oshike tatu vulu okutedhatedha kusho?

¹⁴ Uuna wa tila, tedhatedha kwaashoka Jehova te ke ku ningila monakuyiwa. Dhiladhila kunkene to ka kala wu uvite, uuna Satana ta ka kala kee po we, uuna aakolokoshi taya ka hanagulwa po e tapu kala owala aayuuki, naasho okwaagwanenena taku ka enda taku hulu po esiku kehe. Poshigongi shoshitopolwa shomo 2014, opwa li pwa ningwa euliko lyankene tatu vulu okutedhatedha kombinga yetegameno lyetu. Omusamane gumwe okwa li a kundathana naanegumbo lye nkene Timoteus omutiyali 3:1-5 ta vulu okuleshwa, andola okwa li ta popi nkene onkalo tayi ka kala mOparadisa. Okwa ti: “Muuyuni uupe otamu ka kala omathimbo ga tuntula. Molwaashoka aantu otaya ka kala ye holathane, ye hole iinima yopambepo, ye shi omangambeko gawo, aaifupipiki, haya tanga Kalunga, haya vulika kaakuluntu, ye shi okupandula, aadhiginini, ye hole yaandjawo nohole yomuule, haya uvathana, haya popile ooyakwawo muuwanawa, ye na eipangelo, ye na omwenyo omwaanawa, ye hole shoka oshiwanawa, aainekelwa, haya tivuka, ye hole Kalunga, pehala lyokuhola uuhalu uuwinayi, haya inyengithwa ketilokalunga lyashili, naantu ya tya ngawo, kala wu na ekwatathano lyopothingo nayo.” Mbela oho kundathana ngaa noyaandjeni, nenge nooitaali ooyakweni kutya onkalamwenyo muuyuni uupe otayi ka kala ya tya ngiini?

15. Nonando Tanja okwa li a tila, oshike sha li she mu kwathele a sinde uumbanda?

¹⁵ Omumwameme gumwe gwokoMakedonia lyokUumbangalantu, Tanja, okwa li a sindi uumbanda mokutedhatedha komayambeko gomonakuyiwa. Aavali ye oya li haye mu pataneke noonkondo, sho ta konakona Ombiimbeli. Okwa ti: “Iinima yimwe mbyoka nda li handi kala nda tila yi ningwe, oya li ya ningwa. Meme okwa li ha dhenge ndje, uuna nda zi kokugongala. Aavali yandje oya li ya tilitha ndje kutya otaya dhipaga ndje, ngele onda ningi Onzapo yaJehova.” Lwanima, Tanja okwa tidhwa mo megumbo. Mbela okwa li a inyenge ngiini? Okwa ti: “Onda li nda gandja eitulomo kunkene tandi ka kala nda nyanyukwa sigo aluhe, ngele onda tokola okukala omudhiginini. Onda dhiladhila wo nkene Jehova muuyuni uupe ta ka futila po ashihe shoka tashi vulika ndi kanithe muuyuni mbuka, nonkene iinima ayihe iiwinayi tayi ka dhimbiwa.” Tanja okwa tsikile okukala omudhiginini. Kekwatho lyaJehova, okwa mono ehala lyokukala.  Ngashingeyi Tanja okwa hokanwa komumwatate omudhiginini notaya longo pamwe ya nyanyukwa miilonga yethimbo lyu udha.

KOLEKA EINEKELO LYOYE MUJEHOVA NGASHINGEYI

16. Oshike tashi ke tu kwathela tu kale tu na omukumo, uuna twa mono iiningwanima mbyoka ya hunganekwa muLukas 21:26-28 tayi ningwa?

¹⁶ Pethimbo lyuudhigu uunene, aantu otaya ka “sa omoluumbanda.” Ihe aapiya yaKalunga otaya ka kala ya ikolelela noye na omukumo. (Lesha Lukas 21:26-28.) Omolwashike itaatu ka kala twa tila? Omolwaashoka otatu ka adhika nale twa ilonga okwiinekela muJehova. Tanja ngoka a popiwa metetekelo, okwa ti kutya oonkalo moka a pita, odhe mu kwathela a kale ha vulu okuungaunga noonkalo dhilwe oondhigu. Okwa ti: “Onda ilonga kutya Jehova ota vulu oku tu kwathela monkalo kehe moka tatu iyadha. Omathimbo gamwe ohashi kala tashi monika sha fa aantu oyo ye na oonkondo, ihe muushili wo wene, Jehova oye e na oonkondo e ya vule. Kakele kaashono, kapu na shikukutu ihaa hulu.”

17. Enyolo lyokomumvo lyomo 2024 otali ke tu kwathela ngiini? (Tala ethano lyokombanda.)

¹⁷ Kunena opu na iinima oyindji mbyoka tayi vulu oku tu tilitha. Ihe ngaashi David, natse katu na okweetha uumbanda wu tu pangele. Enyolo lyokomumvo lyomo 2024 otali popi nkene David a galikana Jehova a ti: “Uuna nda tila, onde ku inekela.” (Eps. 56:3) Embo limwe lyuuyelele womOmbiimbeli olya popi kombinga yovelise ndjika, lya ti kutya “David ka li a kala ta dhiladhila kombinga yiinima mbyoka tayi mu tilitha, nenge kombinga yomaupyakadhi. Pehala lyaashono, okwa kala a inekela Mwaangoka te ke mu hupitha.” Moomwedhi tadhi landula, kala to dhiladhila kenyolo lyetu lyokomumvo, unene tuu ngele owa taalela oonkalo tadhi tilitha. Konga ethimbo wu dhiladhile kiilonga yaJehova yonale, yongashingeyi noyomonakuyiwa. Ngaashi David, nangoye oto vulu okutya: “Ondi inekela Kalunga noite tila.” — Eps. 56:4.