OSHITOPOLWA SHOKUKONAKONWA 2
EIMBILO 132 Otwa ninga omuntu gumwe
Aasamane, simanekeni aakulukadhi yeni
‘Ne aasamane omu na oku ya simaneka.’ — 1 PET. 3:7, yelekanitha NW.
SHOKA TATU KA ILONGA
Nkene omusamane ta vulu okuulika kutya okwa simaneka omukulukadhi gwe, okupitila moohapu nomiilonga.
1. Jehova okwa tula po elongekidho lyondjokana netompelo limwe lini?
JEHOVA ‘oKalunga omunyanyukwi,’ nokwa hala natse tu kale twa nyanyukwa. (1 Tim. 1:11, NW.) Okwe tu pa omagano ogendji ge tu kwathele, opo tu vule okunyanyukilwa onkalamwenyo. (Jak. 1:17) Gamwe gomomagano ngoka ogo ondjokana. Uuna omulumentu nomukiintu ya hokana, ohaya gana ya kale ye holathane nokusimanekathana. Ngele oya kala ye na ekwatathano lyopothingo, otaya vulu okukala ya nyanyukwa shili. — Omayel. 5:18.
2. Oshike hashi ningwa moondjokana odhindji kunena?
2 Shiyemateka, aaihokani oyendji kunena muuyuni, ohaya dhimbwa euvaneko ndyoka ya ninga mesiku lyohango yawo. Shoka ohashi ya ningitha kaaya kale ya nyanyukwa. Uuyelele wa za kEhangano lyUundjolowele mUuyuni, mboka opo wa piti, otawu ulike kutya aasamane oyendji ohaya hepeke aakulukadhi yawo palutu, pamaiyuvo nohaye ya ula omalaka omawinayi. Omusamane ngoka ha ningi ngawo, otashi vulika ha ungaunga nomukulukadhi gwe nesimaneko komeho gayalwe, ihe kegumbo oha ungaunga naye nayi. Uuna aasamane haya tala omathano giipala, ohashi ya ningitha kaaya kale nekwatathano ewanawa naakulukadhi yawo.
3. Iinima yini tayi vulu okuningitha omusamane a hepeke omukulukadhi gwe?
3 Oshike tashi vulu okuningitha aasamane yamwe ya hepeke aakulukadhi yawo? Otashi vulika ya putudhwa koohe mboka ye hole elongithonkondo, naashoka oshe ya ningitha ya kale yu uvite kutya eihumbato ndyoka oli li nawa. Yalwe oya nwethwa mo keputuko lyawo, ndyoka tashi vulika ha li humitha komeho edhiladhilo lya puka kutya “omulumentweelela” oku na okulongitha oonkondo, opo a ulukile omukulukadhi gwe kutya olye omuhona. Aalumentu yalwe inaya longwa nkene ye na okupangela omaiyuvo gawo, mwa kwatelwa ongeyo yawo. Aalumentu yamwe ohaya tala aluhe omathano giipala, shoka hashi ya ningitha ya kale ye na etaloko lya puka kombinga yaakiintu nosho wo yomilalo. Shimwe ishewe, oolopota odha ulika kutya pethimbo lyomukithi gwekomba gwo-COVID-19, aasamane oyendji oya li ya tameke okuhepeka aakulukadhi yawo. Ihe omusamane ke na nando okuhepeka omukulukadhi gwe omolwomatompelo ngoka.
4. Oshike aasamane Aakriste ye na okukotokela, nomolwashike?
4 Aasamane Aakriste oye na okukotoka kaaya ethe ya nwethwe mo ketaloko ewinayi lyuuyuni li na ko nasha naakiintu. a Omolwashike? Etompelo limwe olyo kutya olundji omuntu oha katuka sha ikolelela kwaashoka ta dhiladhila. Omuyapostoli Paulus okwa li a londodha Aakriste aagwayekwa yomuRoma kaaya ‘faathane nonkalo yuuyuni mbuka.’ (Rom. 12:1, 2) Mboka ya li megongalo lyAaroma oya adhika nale ya ninga Aakriste uule womimvo, sho Paulus e ya nyolele. Ihe oohapu dhaPaulus odha ulike kutya yamwe megongalo, oya li natango taya nwethwa mo komikalondjigilile dha puka nokunkene uuyuni hawu dhiladhila. Shoka osho she mu inyengitha e ya kumagidhe ya lundulule okudhiladhila kwawo neihumbato lyawo. Omayele ngoka otaga longo wo kaasamane Aakriste kunena. Shiyemateka, yamwe yomuyo oya nwethwa mo kunkene uuyuni hawu dhiladhila, nohaya hepeke nokuli aakulukadhi yawo. b Jehova okwa tegelela omusamane a ungaunge ngiini nomukulukadhi gwe? Eyamukulo otatu li adha menyolo lyenenedhiladhilo lyoshitopolwa shika.
5. Sha ikolelela kuPetrus gwotango 3:7, omusamane oku na okuungaunga ngiini nomukulukadhi gwe?
5 Lesha 1 Petrus 3:7. Jehova ota lombwele aasamane ya simaneke aakulukadhi yawo. Okusimaneka oku ukitha komukalo moka hatu ungaunga naangoka twa simaneka. Omusamane ngoka a simaneka omukulukadhi gwe, ota ka ungaunga naye momukalo gwohenda nogwohole. Moshitopolwa shika, otatu ka kundathana nkene omusamane ta vulu okuulika kutya okwa simaneka omukulukadhi gwe. Ihe tango, natu ka kundathaneni eihumbato ndyoka hali ulike kutya omusamane ke hole noyi na simaneka omukulukadhi gwe.
YANDA SHOKA TASHI VULU OKUYEMATEKA OMUKULUKADHI GWOYE
6. Jehova oha kala e uvitile ngiini aalumentu mboka haya dhenge aakulukadhi yawo? (Aakolossa 3:19)
6 Okulongitha elongithonkondo. Jehova oku tonde kehe ngoka e hole elongithonkondo. (Eps. 11:5) Oku tonde unene tuu aasamane mboka haya dhenge aakulukadhi yawo. (Mal. 2:16; lesha Aakolossa 3:19.) Sha ikolelela kuPetrus gwotango 3:7, ndyoka li li enyolo lyenenedhiladhilo lyoshitopolwa, ngele omusamane iha ungaunga nomukulukadhi gwe nawa, ekwatathano lye naKalunga ohali gumwa. Jehova ota vulu nokuli a kale ihaa pulakene komagalikano ge.
7. Sha ikolelela kAaefeso 4:31, 32, okupopya kwoludhi luni aasamane ye na okuyanda? (Tala wo “Uutumbulilo wa yelithwa.”)
7 Okulongitha elaka lya honga. Aasamane yamwe ohaya popi ya geya noonkondo naakulukadhi yawo, noku ya ula oohapu tadhi ya uvitha nayi. Ihe Jehova oku tonde ‘ongeyo, ondjahi omakudhilo, nenge omatukano.’ c (Lesha Aaefeso 4:31, 32.) Oha kala e uvite oshinima kehe. Omukalo moka omusamane ha popi nomukulukadhi gwe nokuli nuuna ye li oyo ayeke megumbo, otashi ti sha kuJehova. Omusamane ngoka ha popi nomukulukadhi gwe nonyanya, iha teya po owala ondjokana yawo, ihe oha teya po wo ekwatathano lye naKalunga. — Jak. 1:26.
8. Jehova oku uvitile ngiini omathano giipala nomolwashike?
8 Okutala omathano giipala. Jehova oku uvitile ngiini omathano giipala? Oku ga tonde. Onkee omusamane ngoka ha tala omathano inaaga yogoka, oha teya po ekwatathano lye naJehova, noina simaneka omukulukadhi gwe. d Jehova okwa tegelela omusamane a kale omudhiginini komukulukadhi gwe miilonga nopamadhiladhilo. Jesus okwa ti kutya omulumentu ngoka ta tala omukiintu e mu haluka, okwe mu hondela nale “momutima gwe.” e — Mat. 5:28, 29.
9. Omolwashike Jehova e tonde omusamane ngele ta thiminike omukulukadhi a ye naye momilalo?
9 Okuthiminikila omukadhi momilalo. Aasamane yamwe oha ya thiminike aakulukadhi yawo ya ye momilalo momukalo ngoka inaagu yogoka, notagu ningitha aakulukadhi ya kale ye uvite kaaye holike. Jehova okutonde okwiihola mwene nokwaa na ko nasha. Kalunga okwa tegelela omusamane a kale e hole nokwa simaneka omaiyuvo gomukulukadhi gwe. (Ef. 5:28, 29) Ongiini ngele omusamane okwa dhina noha hepeke omukulukadhi gwe, nenge ha tala omathano giipala? Mbela ongiini ta vulu okulundulula okudhiladhila kwe nosho wo oonkatu dhe?
NKENE OMUSAMANE TA VULU OKUHULITHA PO EIHUMBATO EWINAYI
10. Ongiini aasamane taya vulu okulandula oshiholelwa shaJesus?
10 Oshike tashi vulu okukwathela omusamane a ethe po okuhepeka, noku kala a dhina omukulukadhi gwe? Ota vulu okukambadhala okuholela Jesus. Nonando Jesus ka li a hokana, omukalo moka a li ha ungaunga naalongwa ye, ogu li oshiholelwa oshiwanawa kaasamane, nkene ye na okuungaunga naakulukadhi yawo. (Ef. 5:25) Pashiholelwa, tala shoka aasamane taya vulu okwiilonga komukalo moka Jesus a li ha ungaunga nokupopya naayapostoli ye.
11. Jesus okwa li ha ungaunga ngiini naayapostoli ye?
11 Jesus okwa li ha ungaunga nayaapostoli ye momukalo gwombili nogwesimaneko. Ka li nando he ya haula, nenge he ya pangele. Nonando okwa li e na oonkondo e ya vule, Jesus ka li a longitha oonkondo dhe e ya ningithe ya kale kaaye na oonkondo, nenge ye mu tila. Pehala lyaashono okwa li e ya yakula neifupipiko. (Joh. 13:12-17) Okwa li a lombwele aalongwa ye a ti: ‘Ilongeni kungame, oshoka ngame ondi na omwenyo omwaanawa nomomutima ondi ishonopeka, opo nduno otamu ka imonena epepelelo.’ (Mat. 11:28-30) Ndhindhilika kutya Jesus okwa li e na omwenyo omwaanawa. Omuntu a tya ngaaka ina nkundipala. Pehala lyaashono, oku na oonkondo dhokwiipangela ye mwene. Uuna a uvithwa nayi, oha kala a ngungumana noha pangele omaiyuvo ge.
12. Jesus okwa li ha popi ngiini nayalwe?
12 Jesus okwa li ha longitha oohapu dhe a hekeleke nokuladhipika yalwe. Ka li ha haula aalanduli ye. (Luk. 8:47, 48) Nokuli naasho aapataneki ye ya li ye mu tuku nokukambadhala oku mu hinda, “ina tuka mboka ye mu tuku.” (1 Pet. 2:21-23) Omathimbo gamwe, Jesus okwa li ha kala a mwena pehala lyokuyamukula momukalo omwiinayi. (Mat. 27:12-14) Shoka oshi li oshiholelwa oshiwanawa kaasamane Aakriste.
13. Ngaashi sha popiwa muMateus 19:4-6, ongiini omusamane ta vulu ‘okwiimanga kumwe nomukulukadhi gwe’? (Tala wo ethano.)
13 Jesus okwa longa aasamane ya kale aadhiginini kaakulukadhi yawo. Okwa li a endulula oohapu dhaHe ndhoka tadhi ti kutya, omusamane oku na ‘okwiimanga kumwe nomukulukadhi gwe.’ (Lesha Mateus 19:4-6.) Oshitya shOshigreka shoka sha tolokwa “imanga kumwe,” otashi ti lelalela “okukanyatela.” Onkee ano ekwatathano pokati komusamane nomukulukadhi mboka ye li mondjokana, oli na okukala lya kolelela, onga aantu mboka ya kanyatela kumwe. Ekwatathano lyawo ngele olya teka po, nena kehe gumwe oku na okumona iihuna. Omusamane ngoka e na ekwatathano lya kola nomukulukadhi gwe, ota ka yanda okutala omathano giipala goludhi kehe. Omeho ge ote ke ga galula ko nziya kaaga tale “iinima yaa na oshilonga.” (Eps. 119:37) Omusamane a tya ngawo oha ningi euvathano nomeho ge, opo kaa tale omukiintu gulwe nokahalu, ngoka kee shi omukulukadhi gwe. — Job 31:1.
Omusamane omudhiginini ta yanda okutala omathano giipala (Tala okatendo 13) g
14. Omusamane ngoka ha hepeke omukulukadhi gwe, oku na okuninga shike, a opaleke ekwatathano lye naJehova nonomukadhi?
14 Omusamane ngoka ha hepeke omukulukadhi gwe palutu, nenge nomalaka okwa pumbwa okukatuka oonkatu dhontumba a opaleke ekwatathano lye naJehova nosho wo nomukadhi. Oonkatu ndhono odhini? Yotango, omusamane ngono oku na okuzimina kutya oku na uupyakadhi wa kwata miiti. Kapu na nando oshinima shimwe sha holekwa Kalunga. (Eps. 44:21; Omuuv. 12:14; Heb. 4:13) Ontiyali, oku na okuhulitha po okuhepeka omukulukadhi gwe nokulundulula iikala ye mbyoka. (Omayel. 28:13) Ontitatu, Oha gandja ombili komukadhi nokuJehova, noku ya pula ye mu dhimine po. (Iil. 3:19) Omusamane oku na wo okupula Jehova e mu kwathele a lundulule nokupangela omadhiladhilo ge, okupopya kwe nosho wo iikala ye. (Eps. 51:10-12; 2 Kor. 10:5; Fil. 2:13) Ontine, oha katuka metsokumwe nomagalikano ge, mokwiilonga okukala e tonde elongithonkondo lyoludhi kehe nosho wo oohapu ombwiinayi. (Eps. 97:10) Ontitano, oha kongo ekwatho meendelelo, kaakuluntugongalo megongalo. (Jak. 5:14-16) Ontihamano, oha ningi ompangela ndjoka tayi mu kwathele a yande eihumbato lya tya ngaaka monakuyiwa. Omusamane ngoka ha tala omathano giipala, naye oku na okulandula oonkatu ndhoka. Jehova ota ka yambeka oonkambadhala dhe, a lundulule eihumbato lye. (Eps. 37:5) Ihe inashi gwana owala komusamane a ethe po iinima mbyoka hayi uvitha nayi omukulukadhi gwe. Okwa pumbwa wo okwiilonga nkene e na okusimaneka omukulukadhi gwe. Mbela shono ota vulu oku shi ninga ngiini?
NKENE TO VULU OKUSIMANEKA OMUKULUKADHI GWOYE
15. Ongiini omusamane ta vulu okuulika kutya okuhole omukulukadhi gwe?
15 Ulika kutya owu hole omukulukadhi gwoye. Aamwatate mboka taye shi enditha nawa mondjokana, ohaye shi ningi omukalondjigilile okuninga sha esiku kehe, shoka tashi ulike kutya oye hole aakulukadhi yawo. (1 Joh. 3:18) Omusamane ota vulu okuulukila omukulukadhi gwe ohole ya tsa kesipa, mokuninga iinima ngaashi, oku mu kwata moonyala noku mu papatela. Ota vulu oku mu nyolela okatumwalaka noku mu lombwela ta ti: “Onde ku yuulukwa,” nenge e mu pule kutya, “Esiku lyoye otali ende ngiini?” Omathimbo nomathimbo ota vulu oku mu ulukila kutya oku mu hole, moku mu nyolela okakalata noohapu dha hogololekeka. Uuna omusamane ta ningi iinima mbyoka, kungawo ota ulike kutya okwa simaneka omukulukadhi gwe, nota shi ka koleka ondjokana yawo.
16. Omolwashike omusamane e na okulombwela omukulukadhi gwe kutya okwe mu lenga?
16 Ulika olupandu. Omusamane ngoka ha simaneke omukulukadhi gwe, ohe mu ladhipike nohe mu tsu omukumo. Omukalo gumwe moka he shi ningi, omoku dhimbulukwa oku mu ulukila olupandu omolwiinima ayihe mbyoka omukulukadhi ha ningi, e mu yambidhidhe. (Kol. 3:15) Uuna omusamane ta tanga omukulukadhi gwe, ohashi nyanyudha omutima gwomukulukadhi. Omukadhi oha kala e uvite a gamenwa, e holike nokwa simanekwa. — Omayel. 31:28.
17. Ongiini omusamane ta vulu okuulika kutya okwa simaneka omukulukadhi gwe?
17 Kala omunahole nowu na esimaneko. Omusamane ngoka e hole omukulukadhi gwe, oku na ko nasha naye nokwe mu lenga. Ohe mu tala ko e li omagano ge na ondilo, ga za kuJehova. (Omayel. 18:22; 31:10) Oshizemo, oha ungaunga nomukulukadhi gwe pahole nonesimaneko, nokuli nuuna taya yi momilalo. Ita ka thiminika omukulukadhi gwe a ninge iinima ya nyata yi na ko nasha nomilalo, mbyoka tayi ke mu ningitha a kale e uvite inaa manguluka, a dhinika, nenge a kale e na eiyuvo tali mu nyenyetele. f Nomusamane ota ka kambadhala okukaleka eiyuvo lye lya yela koshipala sha Jehova. — Iil. 24:16.
18. Aasamane oye na okukala ya tokola toko okuninga shike? (Tala wo oshimpungu “ Omikalo ne moka to vulu okukala omusamane e na esimaneko.”)
18 Aasamane, kaleni mwa shilipalekwa kutya Jehova oku wete nokwa pandula oonkambadhala ndhoka ha mú ningi mú simaneke aakulukadhi yeni miinima ayihe mbyoka ha mú ningi monkalamwenyo yeni. Kala wa tokola toko wu simaneke omukulukadhi gwoye, mokuyanda eihumbato inaali yogoka, oku mu ulukila olukeno, esimaneko noku mu ulukila kutya owu mu hole. Ngele owa ningi ngawo, oto ka ulika kutya owu mu hole, nowe mu lenga. Simaneka omukulukadhi gwoye, noto ka gamena ekwatathano ndyoka lya simanenena, ano uukuume woye naJehova. — Eps. 25:14.
EIMBILO 131 “Shono Kalunga e shi tula kumwe”
a Aasamane otaya vulu okumona mo uuwanawa mokulesha oshitopolwa shi na oshipalanyolo, “Mbela oho ungaunga ngaa naakiintu ngaashi Jehova?” shi li moshifo shOshungolangelo shaJanuali 2024.
b Mboka ye li iihakanwa yomahepeko otaya vulu okumona mo uuwanawa mokulesha oshitopolwa shomiitopolwa yapambathana shi na oshipalanyolo “Help for Victims of Domestic Abuse,” shi li mpoka pwa nyolwa “More Topics,” kepandja jw.org nosho wo moJW Library®.
c UUTUMBULILO WA YELITHWA: “Oohapu oombwinayi” odha kwatela mo okuula omuntu iinima iiwinayi, oku mu tuka noku mu ningitha a kale e uvite nayi. Onkene oohapu kehe ndhoka oondulu, tadhi dhinitha, nenge tadhi tukana, odha talika ko oombwinayi.
d Tala oshitopolwa ko jw.org nosho wo ko JW Library, shi na oshipalanyolo “Pornography Can Shatter Your Marriage.”
e Omukulukadhi ngoka e na omusamane ha tala omathano giipala, ota vulu okumona uuwanawa moshitopolwa shi na oshipalanyolo, “Ngele kuume kopandjokana oha tala omathano giipala,” shi li moshifo shOshungolangelo shaAuguste 2023.
f Ombiimbeli inayi gandja uuyelele kutya omikalo dhini dha yogoka, nenge inaadhi yogoka, ngele tashi ya pomukulukadhi nomusamane, uuna taya yi momilalo. Aaihokani Aakriste, oye na okuninga omatokolo ngoka taga ulike kutya oya hala okusimaneka Jehova, okunyanyukilathana nokukala ye na eiyuvo lya yela. Oshili mpano kutya, aaihokani kaye na okukundathana nayalwe oshinima shika shopaumwene shondjokana yawo.
g SHOKA TASHI ULIKWA METHANO: Aaniilonga mboka kaaye shi Oonzapo, haya longo pamwe nomumwatate, taya kambadhala oku mu ningitha a tale oshifo sha thanekwa omathano giipala.
